¹ Ǹ tá ǹ la kɔma zɔ̀mà zə ń mə́ tó dɛ̃̌ yé. Ǹ tá ǹ la kɔma góm ń mə́ ce nyí dóó cə́bal kwã nɛ́ yé. ² Ǹ tá ǹ la nyí co lyì-zhǎ bɛ́ byɛ̀bɛ́ bə̀ n'ê pyà lwɛlɛ wɔ̀rhɔ́ mɔ́ kwã yé. Bùrsì jàà wa, ǹ tá ǹ la zɔ̌m ń ce lyì-zhǎ byɛ̀bɛ́ bə̀ t'â yǎl sə bùrsí kwè sə̀ sɔ́má y mɔ́ kwã yé. ³ Bùrsì jàà wa, ǹ tá ǹ la nyí nə̀mɔ̀ kwã co, e jà ń bə bùrì zhe yé. ⁴ Ǹ gə tu ǹ zù-bal nɔ̃ ráá ń bə̀na rə̀ jé yó, sə́ zə rɛ ń bə̀ ń pɔ̃. ⁵ Ǹ gə nɔ ǹ zù-bal bə̀na è tu è zhĩĩ rí kùr wə, ǹ tá ǹ la lyɔ̃ ń yẽ̌ mo yé, ǹ m'ǎ sɛ̃ mɔ ń kwɛrhɛ è zhĩĩ rí. ⁶ Ǹ tá ǹ la ǹ dwí rí lò mɔ̀bɔ́ ń wɔ́ nə̀mɔ̀ mɔ́ bùrsí bǔr námməjóló, ń bùrsí yi ní yé. ⁷ Ǹ tá ǹ la ǹ cìn co yò w kɔ̀bɔ́ ò wɔ́ kɔma wẽ́ yé. Ǹ tá ǹ la lò mɔ̀bɔ́ ń bə dóó zhe ráá ń wɔ́ cángá cə́bal gu yé, b'à t'â la lò mɔ̀bɔ́ ń twĩ̀ lwɛlɛ rɛ́ rə̀myɛ́ mɔ́ nyǔ ǹdə lò mɔ̀bɔ́ ń bə dóó zhe ta yé. ⁸ Ǹ tá ǹ la shɔ̀nɔ́ bə yè mó ǹdə́ pɛnɛ́ yé, bə̀ pɛnɛ́ y n'ê pyi byɛ̀bɛ́ bə̀ yě rə̀ kùr mó yírhə́, è n'ê súlí è cɔ̀ cángá cìnə́ yò. ⁹ Ǹ tá ǹ la zhə-bal mɔ̀bɔ́ ń jě ǹ sõ mó nɔ̀nɔ̀ yé. Á cìcì mú yě zhə-bal nyǔ mú gə́ wɔ́ kɔn ná-dwí yilə, bə̀ ámyɛ yàl zhələ Ezhibti tənà y wa. ¹⁰ Byinə nyə̀ldù, ǹ m'ǎ dù ǹ cɛ y ń jə̀r. ¹¹ Sə byinə nyàlpyɛ̀ byin rí, ǹ m'ǎ yẽ̌ y e shǐrh, sə ǹ tá ǹ la kaka jə̌r è wẽ́ yé. Ǹ dwí rí lyì bí byɛ̀bɛ́ bə̀ wɔ́ nə̀mwà mɔ́ m'a jə̀r bə m'e kɔ̃̀ bə̀ cìnə̀. Gɔ-wẽ̀ ré myɛ m'a jí rə̀ kùr ré. Ǹ m'ǎ wɛ̀rhɛ́ ǹ də̀vɛ̃́-cèmé né ǹdə́ ǹ olyivyə́ə́ré myɛ ga èta. ¹² Ǹ m'ǎ twĩ̀ tumə nyɛ̀bɛ́ ǹ mə̌ sə́ twĩ̀ mú dwã nyə̀ldù, sə dwã nyàlpyɛ̀ dɛ̃ rɛ́, ǹ tá ǹ la tum tũ̌ yé, mùnì ga ǹ nɔ̃ w ǹdə́ ǹ bə̀na y shǐrh, sə ǹ yə-kɛ̃ mɔ́ byǐ mú ǹdə́ zhə-bal mɔ́ myɛ k'a zə jàn. ¹³ «Á m'ǎ ce jàn nɛ́ á tó kɔn rɛ́ tɛ̀bɛ́ gakó à byili ába mɔ́: á t'á la yə dwã còrhó yé, bə̀ t'â la nə̀ yilə né nyɔ̀ɔ̀ á nyú w yé. ¹⁴ Byin byin gakó, ǹ m'ǎ jí címsi kùrə̀ nə̀tɔ̀ ń mə́ cèrhé ne: ¹⁵ Ǹ m'ǎ jí búrú ò yə̀ sã̀-nə̀byẽ̌ ce címsí. Dwã nyàlpyɛ̀ ǹ m'ǎ dɔ̃̀ búrú ò yə̀ sã̀-nə̀byẽ̌ ce, Abyiibi cànà y wẽ́, ǹdə à gə́ pɔ mɔ́ nyí ní. Bə̀ wɔ́ cànà y èmyɛ́ mɔ́ wẽ́ ǹ shə́r Ezhibti tənà y w nɛ́. Sə rə̀myɛ́ yi ní, bə̀ t'â bàn à yé né ǹdə́ jə̀-fwə̀r yé. ¹⁶ Címsí sə̀myɛ́ mɔ́ kwã nɛ́, ǹ m'ǎ jí ǹ cɛsɛ́ ǹ dù mú byǎ nã́yə́ə́ jòró w címsí; cɛ y gə tú è púl, ǹ gə tú ǹ jə̀r ǹ cɛsɛ́ wẽ̀ ré ǹ zhɛ̀, ǹ m'ǎ jí rə̀ címsí. ¹⁷ Byin byin gakó, ǹ bala bɛ́ m'a bə̀ Yó-cə́bal, Cinu yé né twər rə̀tɔ̀. ¹⁸ Ǹ tá ǹ la jal vwĩ̀ zwə́l ń zɛ̃̀ ń súlí búrú ò co sã̀-nə̀byẽ̌ ń pɛ̃ yé. Ǹ tá ǹ la vwə̃̀ né nwǐsí bə̀ pɔ nɛ à címsí dɛ̃ rɛ́ mɔ́ dɛ̃̌ cṹ cəcɛ̃ y kɔn m'e yí cɛ y lá yé. ¹⁹ Ǹ m'ǎ zə ǹ cɛsɛ́ wẽ̀ ré byǎ bɛ́ nã́yə́ə́ bé ń mə́ bə̀ Cinu, ǹ Yi rí jì y wẽ́. Ǹ tá ǹ la bɔ̀-bwɛ̀lɛ́ shɔ̃̀ è ná y yil mú w yé. ²⁰ À m'a twĩ̀ màlɛ́ka e bə̀ e yə̀ ǹ yé né e m'e yìlì mú sɔ́má y yó, e zə mɔ́ ń zù jàà y à tɛnɛ ǹ yil mú wə. ²¹ Nyám yá, sə́ cili è cəl ré, bə̀k'á cẽ è nyí ni yé, è t'â la ǹ nyí-ni-cõ mó yò shɔ̀nɔ́ yé, bə̀ wɔ́ àmyɛ́ yil yilə è n'ê twĩ̀. ²² Ǹ gə cili è cəl ré, ń wɛ̀rhɛ́ kɔn dɛ̀bɛ́ gakó à byili mú mú, à m'a yə̀ ǹ zwə̀ bé zù-bal e súlí ǹ búl-dwã bɛ́ búl-dõ. ²³ À màlɛ́ka y gə tú è yàl ǹ yé né, e zə mɔ́ ń zù Amɔrətəbá ǹdə́ Yititəbá ǹdə́ Pərəzhitəbá ǹdə́ Kanaã lyì bí ǹdə́ Yivyitəbá e súlí Zhəbuusi lyì bí tənà y wa, a zɛ̃̀ a ce bə jé tɛ̃́, ²⁴ ǹ tá ǹ la bə̀ yə né yé né wùlù ń cèrhé ne yé, ń súlí ǹ tá ǹ la tũ̌ ń pə nɛ myɛ yé, ǹ tá ǹ la wɔ̀rhɔ́ ǹdə bə̀ gə́ n'ê wɛ̀rhɛ́ nɛ́ bə̀ sõ mó yé. Ǹ gaga mɔ́ m'ǎ mà nɛ ń bɔbwɛlɛ, ń súlí ń mà bə̀ nə́kulə né bə̀ cìì tɛ̃́ mɔ́ ń lo. ²⁵ Á gə cèrhé Cinu á Yi rí, ń mà n zɛ̃̀ n cĩ́ bwəl á kùjú w ǹd'á nàná bɛ́ yó, ń mà n súlí n pə́ címsí á nyí ni n ce kwã nɛ́. ²⁶ Bə̀ t'â la kɛ̃ ń pwǐ n'ê vùr ráá ń wɔ́ kə-eju nɔ ǹ tənà y w yé. À m'a yẽ̌ ǹ nyǔ mú dwɛ̀lɛ̀ rɛ́ ga pyìrh. ²⁷ À m'a ce ywẽ nánfɔ̀lɔ̀ búl e zə dwə́ né nyɛ̀bɛ́ ǹ la nə̀ sõ mó gakó, a pyẽ̀ nə̀ kùr nyí ni a jì ni. À m'a ce ń nə ǹ zwə̀ bé gakó kwərh bə̀ n'ê dùrə̀. ²⁸ À m'a twĩ̀ tù-bəlyẽlyẽẽ́se sə jì Yivyitəbá ǹdə́ Kanaã lyì bí e súlí Yititəbá ǹ yé né. ²⁹ È də̀ byin rə̀dù wẽ́ à la bɛ nɛ́ jǔ ǹ yé né yé, bə̀ tənà y m'a b'e jǐrh cɛ nã́wǒ è pyě tɛ̃́ nánfò, gɔ-wẽ̀ ré myɛ m'a pù rə sú yə, sə rə̀myɛ́ m'a bə̀ ǹdə́ ǹ yò zhùlù. ³⁰ À m'à n'â jì bi ǹ yé né námpɔ́lɛ́ námpɔ́lɛ́ kɔn m'e yí ń pù ń jǐrh nánzhəzhɔ̌, ń zwẽ tənà y ń cìní. ³¹ À m'a ce ǹ tənà y zhì vwal-gɔ nə̀-fɔ̀lɔ̀ w nɛ e m'e vò Shilisəti lyì bí nə̀-fɔ̀lɔ̀ w nɛ, e súlí e zhì gɔ-elũ èpòlò w ne e m'e vò Efəraatɛ bù-fwɛ̀lɛ̀ y nɛ. À gə tú à co tənà y lyì bí ǹ jɔ̃̀ wa, ń zɛ̃̀ ń jì bi ǹ yé né ń zhɛ̀, ³² ǹ tá ǹ la dɔbrɛ zal ǹdə́ bə̀myɛ́ ǹdə́ bə̀ yə né yé. ³³ Ǹ tá ǹ la bɛ yõ̌ bə jòm ǹ tənà y wa, mùnì ga bə̀ bə̀k'a ce ń dó ne yé: ǹ m'ǎ zɛ̃̀ ǹ nə́ ǹ cèrhé bə̀ yə né, sə rə̀myɛ́ mɔ́ m'a jǐrh pɔ̀mɔ̀ ǹ yilə.»