¹ Rə̀myɛ́ yó, Muyiisi ǹdə́ Esərayɛl lyì byǎ bɛ́ nún nwə̃́ y kɛ̀bɛ́ bə m'e cèrhé Cinu bə wɔ̀: «À m'a nún Cinu, bə̀ ń búl n twĩ̀ tũ̀-fɔ̀lɔ̀. Eshã y ǹdə́ è eshə-jòmnə mó ga, ń byirh bi n ló nə̀-fɔ̀lɔ̀ w wa. ² À jàn rɛ́ ǹd'â nwə̃́ y ga wɔ́ Cinu. Ńmyɛ̌ ń yàl à yi-zwẽẽ́. Ńmyɛ̌ ń wɔ́ à Yi rí, À m'a cèrhé mo; à nàmbal mɔ́ Yi rí yil ré rə̀ du mú, à m'a bwə̀l ré a byili. ³ Cinu wɔ́ búlə́-kàndɔ. Cinu, è wɔ́ ń yil ré. ⁴ Ń byirh Faraɔ̃ búlə́ eshərh-vwə̃tur rí ǹdə́ ń shə̀dɛ́ɛ́sɛ́ ga n ló nə̀-fɔ̀lɔ̀ w wa. Faraɔ̃ shə̀dɛ́ɛ́sɛ́ yé né cìnə́ bé byɛ̀bɛ́, bə̀ yě kɔn du bə̀ dwã bɛ́ mɔ́, ń byirh bi ń ló vwal-gɔ nə̀-fɔ̀lɔ̀ w wa. ⁵ Nə̀-fɔ̀lɔ̀ w nánlyilyùmú w lyìl bi, ǹdə nə́kulu ta, bə̀ mɔ́lɛ́ bə vò tɛ̃́tɛ̃́ nə̀-fɔ̀lɔ̀ w kùr wə. ⁶ Ǹ jə̀-jĩ́ jɛ̃̀ y j'â búl è zhe jàn nánfɔ̀lɔ̀, Cinu, ǹ jə̀-jĩ́ jɛ̃̀ y j'â n'ê mà ǹ zwə̀ bé è bɔbwɛlɛ, Cinu. ⁷ Ǹ zùwə́ y j'â búl è já dɛ̃́dɛ̃́, ǹ nə́ ǹ zhə̀r ǹ zwə̀ bé ǹ lwé tɛ̃́. Ǹ lyim-cəcɔ̌ w gə zɛ̃̀, bə̀ j'â n'ê jí myǐn ǹdə màálɛ. ⁸ Ǹ gə já ń shǐrh, ǹ myə̀lə́ né zho w ce nàná bɛ́ j'â n'ê mwɛ dwã nɛ jàà èdù. Nə̀-zha y n'ê zɛ̃̀ è zhǐ dɛ̃̌ ǹdə byílí ta. Nə̀-fɔ̀lɔ̀ w nánlyilyùmú w kùr ré tɛ̃́tɛ̃́ mɔ́ n'ê zal dwã nɛ. ⁹ Zù-bal mɔ́ yà ń nə́ ń wə̀l ń cìn ni: À m'a pú bə̀ kùr a jì bi a za, à m'a zɛ̃̀ a tə̀ bə̀ wẽ̀ ré à la pwǎ búlə́ né kwã mɔ́, à cəl ré jɛ́nɛ́ rɛ́ m'a lyɛ̃ cɛ nɛ. À m'a fwə̌rh à búlə́ shù wə́, a ce bə jé tɛ̃́! ¹⁰ Cinu, ǹ gə́ shǐrh, ǹ myə̀lə́ né zho w ce nə̀-fɔ̀lɔ̀ w lyìl bí tɛ̃́, ǹdə kàmmɔ ku ta, bə̀ tu bə vò tɛ̃́tɛ̃́ nàná bɛ́ ǹdə́ bə̀ jàn rɛ́ kùr wə. ¹¹ Mɔ̌ lò ń wɔ́ ǹ nyɛrh-dõ yə né wẽ́, Cinu? Mɔ̌ lò ń nyɛrhɛ mɔ́, ǹmyɛ́ mɔ̀bɔ́ ǹ já ǹ búl ǹ bə dõ zhe mó? Ǹmyɛ́ mɔ̀bɔ́ ǹ tũ̀-fwààlɛ́ ce bə̀ n'ê nyàm mɔ́ mɔ́? Ǹmyɛ́ mɔ̀bɔ́ ǹ nə́ ǹ wɛ̀rhɛ́ màmyaarhɛ mɔ́? ¹² Ǹ cèlè ǹ jə̀-jĩ́ jɛ̃̀ yá, cɛ y j'a lyì bi. ¹³ Dwí rí ǹ bú búlə́ ń zwẽ mó, ǹ nə́ ǹ zal rɛ ǹdə́ wu-bɔ̀nɔ̀. Ǹ jàn rɛ́ ǹ mə́ zə rɛ, ń zǎ jàà y kɛ̀bɛ́ è wɔ́ ǹmyɛ́ Cinu jàà y wẽ́. ¹⁴ Dwə́ né dwã bɛ́ nyɛ̀ɛ̀, nə zɛ̃̀ nə̀ n'ê kəkə: Wu-zɛ̃̀ɛ̃́ n'ê gwi Shilisəti lyì bí. ¹⁵ Edɔm yó-cìnə́ bé wun zɛ̃̀. Mɔwaabɛ pyə̀-dwí rí lyì bí zɛ̃̀ bə̀ n'ê kəkə. Kanaã lyì bí gakó wun gɔwa. ¹⁶ Ywẽ ǹdə́ wu-zɛ̃̀ɛ̃́ nánfɔ̀lɔ̀ zhe be. Bə̀ nyə́ cɛrhɛ, ǹ jɛ̃̀ y jàn rɛ́ nánfɔ̀lɔ̀ w yilə, bə̀ kùl bə jǐrh ǹdə nə́kulu ta, kɔn la m'e yí ǹ dwí rí lyɛ̃, kɔn la m'e yí dwí rí ǹ zwẽ rə̀ jǐrh ǹmyɛ́ dwí mú lyɛ̃, Cinu. ¹⁷ Ǹ zə rɛ ń yí ǹ cəl-tənà y pyɔ̀ w yó, ń ce rə̀ jě gàà twéé twéé yilə. Jàà y kɛ̀bɛ́ ǹmyɛ́ cìcì tɛnɛ, ǹ la è wẽ́ jǒm mó, Cinu. Jàà y kɛ̀bɛ́ ǹmyɛ́ cìcì, la ǹ còrhó-jì y è wẽ́ lú mú, Cinu. ¹⁸ Cinu nə́ ń jí pyɛ̀lɛ̀ twéé twéé yilə!» ¹⁹ Faraɔ̃ eshã y ǹdə́ ń búlə́ eshərh-vwə̃tur rí e súlí ń eshə-jòmnə bé y'à zù nə̀-fɔ̀lɔ̀ w wẽ́, sə Cinu yà ń ce nə̀-fɔ̀lɔ̀ w kwɛ̃̀ ò kwã nɛ́ o b'o mɔ́lɛ́ bɛ: e jà Esərayɛl lyì byǎ bɛ́ zhə̀l cə-kùlì yó, bə tó nə̀-fɔ̀lɔ̀ w cəcəl w bə lyɛ̃. ²⁰ Aarɔ̃ nəkɔ́ nyì-zwennə Myərəyam kwè gùlí, kana bɛ́ gakó du bə pú ń kùrə̀, bə̀ n'ê dwí gǔlsi bə̀ m'ê sɛ. ²¹ Myərəyam ji nwə̃́ n pə bɛ n wɔ̀: «Nún-nə Cinu, ń búl n twĩ̀ tũ̀-fɔ̀lɔ̀. Eshã y ǹdə́ è eshə-jòmnə mó ga, ń byirh bi n ló nə̀-fɔ̀lɔ̀ w wa!» ²² Muyiisi ce Esərayɛl lyì byǎ bɛ́ zhì vwal-gɔ nə̀-fɔ̀lɔ̀ w nɛ bə zhǐr bə zǎ Shuuri gɔ-elũ èpòlò wə́. Bə̀ zhə̀l gɔ-elũ èpòlò w w dwã nə̀tɔ̀ ǹdə́ bə̀ yə̀ nɛ̃̌ nɛ yé. ²³ Bə yí Mara, sə bə̀ yə̀ ŋwɛ̀nɛ́ bə nyɔ̀ Mara nɛ̃̌ mɔ́ yé, bə̀ mə̀ y'à nyɛ̌ cɛ̀ɛ́. Wɔ́ rə̀myɛ́ è ce bə ce yil ré bə̀ Mara, rə̀ kùr wɔ́ «càn». ²⁴ Dwí rí j'a zɛ̃̀ rə̀ n'ê ŋwúŋwùní rə̀ m'ê bwí Muyiisi rə̀ zhe: «Bə̀kɔ́n nə́ la nyɔ́?» ²⁵ Muyiisi búbwéé n ce Cinu ni, sə Cinu byili mu cǒ òdù, Muyiisi ká cǒ òmyɛ́ mɔ́ dɔ̌ n dul nɛ̃̌ mɔ́ wẽ́, sə rə̀myɛ́ yó, nɛ̃̌ mɔ́ shɛ̀nɛ́ nyɔ́. Wɔ́ gàà mɔ́ Cinu vùr nyə́ Esərayɛl lyì byǎ bɛ́ yil né, n súlí n pə bɛ lùl-e-púrsi. Wɔ́ gàà mɔ́ myɛ ń zhẽ̀ be né. ²⁶ Cinu wə̀l be: «Ǹ gə cili Cinu ǹ Yi rí cəl ré cɛ̀nɛ̀, ń wɛ̀rhɛ́ kɔn dɛ̀bɛ́ rə̀ wɔ́ cánga ń yírh wə, ǹ nə́ ǹ pyèrhè ǹ zhɛ̃̌ ǹ cili kɔn rɛ́ tɛ̀bɛ́ rə̀ wɔ́ ń pùbùlə̀ né, ̀ nə́ ǹ zwẽ ń nyə́ né, à t'â la mɔ́ címsí shɛ̀bɛ́ à ju Ezhibti lyì bí ni mú èdù ga ju yé. Bə̀ wɔ́ àmyɛ́ Cinu, à n'â wárh mɔ́.» ²⁷ Rə̀myɛ́ kwã nɛ́, Esərayɛl lyì byǎ bɛ́ lyɛ̃ bə yí Elyim: nə̀-bùlsi shí ǹdə́ sə̀lyè ǹdə́ kwə̌rh shə́-shàlpyɛ̀ y'à ŋwɛ́nɛ́ gàà. Bə̀ zul gàà mɔ́, nɛ̃̌ mɔ́ nyí ni.