¹ Cinu wɔ̀ Muyiisi ni: ² «Wál Esərayɛl lyì byǎ bɛ́ nɛ bə̀ bə̀ kwɛ̃̀ bə bə̀ bə zul Pyi-Ayərɔɔtɛ yé y wə, Myəgədɔl ǹdə́ nə̀-fɔ̀lɔ̀ w bwə̌l mó wə. Wɔ́ Baal-Səfɔn yé né, á yé y wə, nə̀-fɔ̀lɔ̀ w nyí ni mú, á m'ǎ zul ní. ³ Faraɔ̃ mà n zɛ̃̀ ń nə́ ń wə̀l Esərayɛl lyì byǎ bɛ́ shò kwã nɛ́: ‹Nyǐ bi bə̀ wun zɛ̃̀, bə̀ n'ê yə́yɛ́lɛ́ tɛ̃́ tə̀na y wa! Èpòlò w zɔ bɛ!› ⁴ À m'a kù Faraɔ̃ wu wə́, n zɛ̃̀ n zɛ̃̀ n pú bə̀ kùr ń nə́ ń jì. Sə à m'a nɔ̀ ńmyɛ̌ ǹdə́ ń shə̀dɛ́ɛ́sɛ́ tɛ̃́ a m'a pə còrhó à cìn ni. Ezhibti lyì bí m'a zɛ̃̀ bə lwar b'àmyɛ́ wɔ́ Cinu.» Esərayɛl lyì byǎ bɛ́ wɛ̀rhɛ́ ǹdə ń gə́ byili ní. ⁵ Bə̀ zhə̀l bə byili Ezhibti pyɔ̌ mɔ́ nɛ bə̀ Esərayɛl lyì byǎ bɛ́ dùr. Faraɔ̃ ǹdə́ ń tùntùnnə bé wun bùlə̀ né zhɛ́rhɛ́ bə̀ shò kwã nɛ́ bə zɛ̃̀ bə wɔ̀: «Bə̀kɔ́n nə́ wɛ̀rhɛ́ èta mɔ́? Nə́ yẽ̌ Esərayɛl lyì byǎ bɛ́ nɛ bə lyɛ̃ bə̀ k'ê t'â la tũ̌ bə pə nə́ba yé!» ⁶ Rə̀myɛ́ yó, Faraɔ̃ lyẽ ń búlə́ eshã-vwə̃tu wə́, n zə ń shə̀dɛ́ɛ́sɛ́ n ce ń kwã nɛ́. ⁷ N du ǹdə́ búlə́ eshərh-vwə̃tur zɔ̃̌-nyə̀ldù tɛ̀bɛ́ rə̀ y'à càn du rə̀ dwã bɛ́ gakó e súlí Ezhibti búlə́ eshərh-vwə̃tur rí dwã bɛ́ púlə́púlə́, rə̀myɛ́ òdù gakó ǹd'ô jòmnə mó. ⁸ Cinu kù Ezhibti pyɔ̌ Faraɔ̃ wu wə́, n zɛ̃̀ n pú Esərayɛl lyì byǎ bɛ́ kùr ń nə́ ń jì. Esərayɛl lyì byǎ bɛ́ y'à zhẽ̌ bə̀ jɛ̀rh bə ce dɛ̃̌a bə̀ gə́ y'à tú bə̀ n'ê shə́r Ezhibti ní mú yi ní. ⁹ Ezhibti lyì bí ǹdə́ Faraɔ̃ búlə́ eshərh-vwə̃tur rí púlə́púlə́ ǹdə́ ń eshə-jòmnə bé e súlí ń shə̀dɛ́ɛ́sɛ́ pú bə̀ kùr bə̀ n'ê jì, sə bə̀ zɔ bə̀ kùr ni ǹdə́ bə̀ y'à zul nə̀-fɔ̀lɔ̀ w nyí ni, Pyi-Ayərɔɔtɛ yala nɛ, Baal-Səfɔn yé y wə. ¹⁰ Faraɔ̃ yà ń bwəlse Esərayɛl lyì byǎ bɛ́ kùr ne. Esərayɛl lyì byǎ bɛ́ kwẽ̌ bə̀ la nyǔ, bə púrí Ezhibti lyì bí bə̀ zɛ̃̀ bə̀ wɔ bə̀ kwã nɛ́ bə̀ bànà! Ywẽ nánfɔ̀lɔ̀ zə bɛ, bə búbwéé bə ce Cinu ni. ¹¹ Bə bwə̀rh Muyiisi bə wɔ̀: «È nə wɔ́ lú-bɔ̀là bə̀ bə já Ezhibti ní ń mə́ zɛ̃̀ ń zə nə́ba nə́ la b'ě cì gɔ-elũ èpòlò w wə? Bə̀kɔ́n ǹ wɛ̀rhɛ́ èta, ǹ gə́ ce nə́ shə́r Ezhibti ní mú? ¹² Nə́ yə̀ dámǎ nə́ wɔ̀ mɔ́ Ezhibti ní: ‹Yẽ̌-nə́ba nə́ twĩ̀ nə́ pə Ezhibti lyì bí ni! Nə́ gə n'é twĩ̀ nə́ pɛ Ezhibti lyì bí ni cɔ̃̀ nə́ gə cù gɔ-elũ èpòlò w wə.› » ¹³ Rə̀myɛ́ yó, Muyiisi wɔ̀ dwí rí ni: «Á bə̀k'á dùr ywẽ yé! Zə-na á wun ni! Á m'ǎ nə kɔn rɛ́ tɛ̀bɛ́ Cinu la wɔ̀rhɔ́ n mə n zwẽ ába zà mɔ́. Ezhibti lyì bí á nə zà èta mɔ́, á k'á t'á la bórhó á nə bɛ gaga yé. ¹⁴ Wɔ́ Cinu ń mà n bú búlə́ né á jàà wa. Ámyɛ̌ wúrí á zhì shɛ́ɛ́ jàà èdù!». ¹⁵ Cinu bwə̀rh Muyiisi n wɔ̀: «Byè yil ǹ nə́ ǹ búbwéé ǹ ce ne? Wál Esərayɛl lyì byǎ bɛ́ nɛ: bə̀ bə̀ zɛ̃̀ dɛ̃̌ bə kwè sɔ́má! ¹⁶ Ǹmyɛ́ zhẽ̌ ǹ də̀-dɔ̀lɔ̀ w dɛ̃̌, sə́ cèlè ǹ jɛ̃̀ y nə̀-fɔ̀lɔ̀ w yó wə, ń bɔ̀n w dwã wa, mùnì ga Esərayɛl lyì byǎ bɛ́ tó cə-kùlì wẽ́ nə̀-fɔ̀lɔ̀ w cəcəl w bə byɛrhɛ. ¹⁷ Àmyɛ́ m'a kù Ezhibti lyì bí wun ní, mùnì ga bə pú Esərayɛl lyì byǎ bɛ́ kùr bə zù. Rə̀myɛ́ yi ní, à m'a nɔ̀ Faraɔ̃ ǹdə́ ń shə̀dɛ́ɛ́sɛ́ gakó ǹdə́ ń búlə́ eshərh-vwə̃tur rí e súlí ń eshə-jòmnə bé tɛ̃́ a m'a pə còrhó à cìn ni. ¹⁸ À gə́ m'a tó rə̀myɛ́ mɔ́ dɛnnɛ a pə còrhó à cìn ni yi ní, Ezhibti lyì bí m'a j'a zɛ̃̀ bə lwar b'àmyɛ́ wɔ́ Cinu.» ¹⁹ Yi màlɛ́ka y è y'à n'ê zhə̀l Esərayɛl lyì byǎ bɛ́ yé né mó zhǐr e b'è wɔ bə̀ kwã nɛ́. Ébɔ̃ w myɛ zhǐr bə̀ yé né, o b'ò wɔ bə̀ kwã nɛ́. ²⁰ Ébɔ̃ w b'o zhì Ezhibti lyì bí ǹdə́ Esərayɛl lyì byǎ bɛ́ cəcəl wə. Ébɔ̃ w yé y èdù y'à wɔ́ cə-byín ò yé y dõ mó zɛ̃̀ è y'à wɔ́ pwẽ̀ rə̀ n'ê yə̌r cəcɛ̃ y wẽ́. Rə̀myɛ́ mɔ́ ce, cəcɛ̃ y námpúm, lòlò yə̀ zhə̀l n bwəlse ń dõ ne yé. ²¹ Muyiisi cèlè ń jɛ̃̀ y nə̀-fɔ̀lɔ̀ w yó wə. Cinu ce zho nánfɔ̀lɔ̀ ò shí yi-púrhí sõ, zɛ̃̀ tɛ̃́ o ce cəcɛ̃ y námpúm, o ce nə̀-fɔ̀lɔ̀ w pyìrhí o kwɛ̃̀ ò kwã nɛ́, o yẽ̌ cɛ y nɛ tɛ̃́ nánkùlì. Nàná bɛ́ bɔ̀n dwã nɛ. ²² Esərayɛl lyì byǎ bɛ́ zhə̀l cə-kùlì yó, nə̀-fɔ̀lɔ̀ w cəcəl wə. Nàná bɛ́ y'à mɔ dwã nɛ bə̀ zhǐ ǹdə byílsi ta, bə̀ jə̀-jĩ́ ǹdə́ bə̀ jə̀-gwã̀ ga nɛ. ²³ Ezhibti lyì bí pú Esərayɛl lyì byǎ bɛ́ kùr bə jì bi; Faraɔ̃ eshesé púlə́púlə́ ǹdə́ ń búlə́ eshərh-vwə̃tur rí, e súlí ń eshə-jòmnə bé pú bə̀ kùr bə zù bə vò bə yí nə̀-fɔ̀lɔ̀ w cəcəl wə. ²⁴ Cɛ y gə́ tú è bwə́l lɔ́, Cinu jòm myìn-zhù w ǹdə́ ébɔ̃ w wẽ́ n myə̀lɛ́ Ezhibti lyì shə̀dɛ́ɛ́sɛ́, n já n ce kɔn gakó gùlí dwã sə̀ sõ. ²⁵ N ce sə̀ eshərh-vwə̃tur rí nèsé cìr, rə̀ dǔr mó j'a zɛ̃̀ e jǐrh zwini. Rə̀myɛ́ yó, Ezhibti lyì bí shə̀dɛ́ɛ́sɛ́ wɔ̀: «Bà-na nə́ yẽ̌ Esərayɛl lyì byǎ bɛ́ nɛ nə́ dùr nə́ vò pyépyé, bə̀ wɔ́ Cinu ń nə́ ń tó be ń bwí ǹdə́ nə́ba!» ²⁶ Cinu wɔ̀ Muyiisi ni: «Cèlè ǹ jɛ̃̀ y nə̀-fɔ̀lɔ̀ w yó wə: bə̀ nàná bɛ́ kwɛ̃̀ bə bə̀ bə mɔ́lɛ́ Ezhibti lyì shə̀dɛ́ɛ́sɛ́ ǹdə́ sə̀ búlə́ eshərh-vwə̃tur rí e súlí sə̀ eshə-jòmnə bé!» ²⁷ Muyiisi cèlè ń jɛ̃̀ y nə̀-fɔ̀lɔ̀ w yó wə. Cɛ y gə́ tú è bwə́l lɔ́, nə̀-fɔ̀lɔ̀ w k'a kwɛ̃̀ o bə̀ ò jàà y wa, rə̀myɛ́ yi ní ǹdə́ Ezhibti lyì bí n'ê dùr bə̀ zǎ wa. Cinu já n ce bə mɛ̃ nə̀-fɔ̀lɔ̀ w cəcəl wə. ²⁸ Nàná bɛ́ kwɛ̃̀ bə dùr bə b'e yí bə mɔ́lɛ́ búlə́ eshərh-vwə̃tur rí ǹdə́ eshə-jòmnə bé. Lò mə̀dù ga myɛ yə̀ dàl Faraɔ̃ shə̀dɛ́ɛ́sɛ́ shɛ̀bɛ́ gakó sə̀ y'à pú Esərayɛl lyì byǎ bɛ́ kùr sə zù nə̀-fɔ̀lɔ̀ w w mɔ́ wẽ́ yé. ²⁹ E jà Esərayɛl lyì byǎ bɛ́ zhə̀l cə-kùlì yó, bə tó nə̀-fɔ̀lɔ̀ w cəcəl w bə byɛrhɛ. Nàná bɛ́ y'à mɔ dwã nɛ bə̀ zhǐ ǹdə byílsi ta, bə̀ jə̀-jĩ́ ǹdə́ bə̀ jə̀-gwã̀ ga nɛ. ³⁰ Dɛ̃ rɛ́ rə̀myɛ́ mɔ́ yù wə, Cinu zwẽ Esərayɛl lyì byǎ bɛ́ Ezhibti lyì bí jɔ̃̀ wa. Sə Esərayɛl lyì byǎ bɛ́ nɔ Ezhibti lyì bí cùùrí rə̀ ləlɛ tɛ̃́ nə̀-fɔ̀lɔ̀ w nyí ni. ³¹ Esərayɛl lyì byǎ bɛ́ j'a lwar Cinu jɛ̃̀ y jàn rɛ́ nánfɔ̀lɔ̀ w ń yà ń mə n bú ǹdə́ Ezhibti lyì bí mú gə́ y'à wɔ́ kɔn ná-dwí yilə. Esərayɛl lyì byǎ bɛ́ j'a nyàm Cinu, bə zə Cinu ǹdə́ ń tùntùnnə Muyiisi zhə̀nà.