¹ Cinu wɔ̀ Muyiisi ni: ² «Vǔr byì-yə́ə́ gakó, kɛ̀bɛ́ è ná tó yé n lù y Esərayɛl lyì byǎ bɛ́ sõ mó, è wɔ́ byì-cɛ ráá vwǎm byì-yə́ə́, ń cĩ́ kwã à yilə. Wɔ́ àmyɛ́ cəl.» ³ Muyiisi wɔ̀ dwí rí ni: «Lyǐrh-nə dɛ̃ rɛ́ tɛ̀bɛ́ á shə́r Ezhibti ní, yómə́-jè y né mó yò, wɔ́ Cinu ń ce á shə́r gàà mɔ́ ǹdə́ ń jɛ̃̀ jàn rɛ́ nánfɔ̀lɔ̀ wá. Sə á bə̀k'á dɔ̃̀ búrú ò co sã̀-nə̀byẽ̌ dɛ̃ rɛ́ rə̀myɛ́ mɔ́ yé. ⁴ Wɔ́ Abyiibi cànàa y wẽ́, zà dɛ̃ rɛ́ á m'ǎ shə́r né. ⁵ Rə̀myɛ́ ce, Cinu gə tú ń ce ǹ zù Kanaã lyì bí ǹdə́ Yititəbá ǹdə́ Amɔrətəbá ǹdə́ Yivyitəbá e súlí Zhəbuusi lyì bí tənà y yil ǹdə́ tùr n'ê dùr tɛ̃́ è wẽ́, ń yà ń bwəl è nyí ǹ nàmbala bɛ́ nɛ mɔ́ wa, ǹ m'ǎ twĩ̀ tũ̀twĩ̀ĩ̀ rí tɛ̀bɛ́ cànà y èmyɛ́ mɔ́ wẽ́: ⁶ Ǹ m'ǎ dɔ̃̀ búúri tɛ̀bɛ́ rə̀ yə̀ sã̀-nə̀byẽ̌ ce dwã nyàlpyɛ̀ wẽ́. Sə dwã nyàlpyɛ̀ dɛ̃ rɛ́ yù wə, á m'ǎ jí címsi nánfɔ̀lɔ̀ Cinu yilə ⁷ Dwã nɛ́ nə̀myɛ́ wẽ́, bə̀ m'a dɔ̃̀ búúri rə̀ yə̀ sã̀-nə̀byẽ̌ ce. Bə̀ bə mə̌ sə bə nə búrú ò co sã̀-nə̀byẽ̌ ráá sã̀-nə̀byẽ̌ á tənà y nyí rí púlə́púlə́ wẽ́ yé. ⁸ Dɛ̃ rɛ́ rə̀myɛ́ mɔ́ yù wə, ǹ m'ǎ cĩ́ ǹ byǎ bɛ́ nɛ ń wɔ̀: ‹Wɔ́ Cinu gə́ co nyí à kwã nɛ́ à gə́ tú a shə́r Ezhibti ní yi ní mú yilə, à n'â wɛ̀rhɛ́ èta.› ⁹ Rə̀myɛ́ mɔ́ m'a yə̀ myɔrhɔ ń cĩ́ ǹ vɔ̀mɛ̀ nɛ́ yó ǹdə́ lyìrhə́ kɔn ń lyẽ ǹ cíl rí ni, mùnì ga Cinu nyí rí yə̀ ǹ nyú w twéé gakó, b'è wɔ́ ǹdə́ ń jɛ̃̀ y jàn rɛ́ nánfɔ̀lɔ̀ w Cinu mə n ce ń shə́r Ezhibti tənà y wa. ¹⁰ Ǹ m'ǎ wɛ̀rhɛ́ kɔn rɛ́ tɛ̀bɛ́ nyí rə̀myɛ́ mɔ́ n'ê byili, dɛ̃ rɛ́ tɛ̀bɛ́ bə̀ cír rə̀ pyǐrh yil mú, byin byin gakó. ¹¹ Rə̀myɛ́ ce, Cinu gə tú ń ce ǹ zù Kanaã lyì bí tənà y w ǹdə ń gə́ bwəl nyí ǹmyɛ́ ǹdə́ ǹ nàmbala bɛ́ nɛ nɛ́, n zɛ̃̀ n ce y ǹ jɔ̃̀ wa, ¹² ǹ m'ǎ pə ǹ byì-cɛ gakó ǹdə́ ǹ vwàmá nɛ́ byì-yéésé gakó Cinu ni. Vwàmá nɛ́ byì-yéésé námbyalsɛ́ gakó wɔ́ Cinu cəl! ¹³ Sə è gə wɔ́ bə̀nab byì-yə́ə́ yilə, ǹ m'ǎ zə pyì-bwɛ̀lɛ́ ń cĩ́ è jàà wa. Ǹ gə yə̀ pyì-bwɛ̀lɛ́ zə ń cĩ́ è jàà wa, sə́ mà è byã y nɛ ń gu yə. Ǹ m'ǎ pyà kɔn ń cĩ́ ǹ byì-cɛ gakó jàà wa, ǹ byǎ bɛ́ wẽ́. ¹⁴ Nəkɔla, ǹ byǐ mú gə bwə̀rh mó n wɔ̀: ‹Byè yil á n'á wɛ̀rhɛ́ tɛ̀bɛ́?›, ǹ m'ǎ lyár mɔ ń wɔ̀: ‹Cinu ce nə́ shə́r Ezhibti, yómə́-jè né, ǹdə́ ń jɛ̃̀ jàn rɛ́ nánfɔ̀lɔ̀ wá. ¹⁵ Faraɔ̃ gə́ yà ń wɛ̀rhɛ́ yó-kùlù ń tá ń yǎl n yẽ̌ nə́ba nə́ shə́r mo ce, Cinu gu byì-cɛ gakó ǹdə́ vwǎm byì-yə́ə́ gakó Ezhibti tənà y wa. Wɔ́ rə̀myɛ́ è ce, à n'â zwə́l vwǎm byì-yə́ə́ námbya gakó à pɛ Cinu ni. Sə è gə wɔ́ à byǎ bɛ́ byì-cɛsɛ́ gakó yilə, à n'â pyà kɔn à cín sə̀ jàà wa, à zwə́lə́.› ¹⁶ Rə̀myɛ́ mɔ́ m'a yə̀ myɔrhɔ ǹ cĩ́ ǹ vɔ̀mɛ̀ nɛ́ ǹdə́ ǹ cíl rí yó b'è wɔ́ ǹdə́ ń jɛ̃̀ y jàn rɛ́ nánfɔ̀lɔ̀ w Cinu mə n ce nə́ shə́r Ezhibti tənà y wa.» ¹⁷ Faraɔ̃ gə́ yẽ̌ Esərayɛl lyì byǎ bɛ́ nɛ bə shə́r yi ní, Yi yə̀ be zə rə m'e tó Shilisəti lyì bí tənà y sɔ́má y yé, ǹd'ê y'à bwə́l ga yírh wə. Yi y'à wə̀l rə̀ cìn ni: «Dwí rí bə̀k'a tə̀ búlə́ né yil rə̀ wu bùlə̀ né zhɛ́rhɛ́, rə kwɛ̃̀ rə bə̀ Ezhibti yé!» ¹⁸ Wɔ́ rə̀myɛ́ è ce Yi ce bə kwɛ̃̀ bə kwè sɔ́má y è zǎ vwal-gɔ nə̀-fɔ̀lɔ̀ w gɔ-elũ èpòlò w səta. Bə̀ y'à súlí bə pwà búlə́ wẽ̀ bə̀ gə́ y'à tú bə̀ n'ê shə́r Ezhibti ní yi ní mú. ¹⁹ Muyiisi yà ń pwà Zhozefu kúr rí. Zhozefu zhə̀n ga yà ń nyɛ́ɛ́ Esərayɛl lyì byǎ bɛ́ bə bwəl nyí ń gə́ wə̀l be yi ní: «Zhə̀n zhə̀nà, Yi m'a bə̀ rə ce nyí á kwã nɛ́. Rə̀myɛ́ yi ní, á m'ǎ pwà à kúr rí á m'á zhǐr nyɔ̀nɔ̀.» ²⁰ Esərayɛl lyì byǎ bɛ́ zhì Sukɔɔtɛ nɛ́ bə zhǐr bə yí bə zul Etam nɛ́, gɔ-elũ èpòlò w nyí ni. ²¹ Cinu cìcì yà ń wɔ bə̀ yé né ń nə́ ń zhə̀lə̀: nə̀nyɛ́nɛ́ nɛ, wɔ́ ébɔ̃ ò y'à n'ô byili bi sɔ́má yá, cəcɛ̃ nɛ́, wɔ́ myìn-zhù ò y'à n'ô yə̌r be. Èta, cəcɛ̃ ǹdə́ nə̀nyɛ́nɛ́ ga, bə̀ y'à wɔ̌ bə̀ n'ê zhílí bə̀ sɔ́má yá. ²² Nə̀nyɛ́nɛ́ nɛ, ébɔ̃ w y'à j'â t'â kwàrh dwí rí yé né yál yé, myìn-zhù w myɛ y'à j'â t'â kwàrh rə̀ yé né cəcɛ̃ nɛ myɛ yé.