¹ Cinu wə̀l Muyiisi ǹdə́ Aarɔ̃ nɛ ǹdə́ bə̀ y'à ŋwɛ́nɛ́ Ezhibti tənà y wa: ² «Cànà y kɛ̀bɛ́ m'a yə̀ cànsɛ́ cànà nã́yə́ə́ y á yilə, wɔ́ èmyɛ́ è la yə̀ byin rí kùr-jirə́ cànà yá. ³ Wál-na Esərayɛl lyì byǎ bɛ́ dwí rí púlə́púlə́ ne: Cànà y kɛ̀bɛ́ dwã shí yù wə, sə kɛ̀lɛ́ gakó ráá étwí-ènyí gakó pyà è pyì-bwɛ̀lɛ́ ráá è bɔ̀-bwɛ̀lɛ́. ⁴ Étwí-ènyí rí lyì bí yó w gə wɔ́ námpɔ́lɛ́ dɛ̃́dɛ̃́ vwǎm mə̀dù dɔ́m yilə, sə bə ce dwã yó ǹdə́ bə̀ jè-dõ mó mɔ̀bɔ́ ń bwə́l bə̀ étwí-ènyí rí ni mú, kɔn tó dwã ǹdə́ lyì bí yó wə́. Á m'ǎ nyǐ lò gakó gə́ wɔ̌ ń mà n dɔ̃̀ nɛ́ á m'á cír vwǎm mɔ́. ⁵ Á m'ǎ zə vwǎm mɔ̀bɔ́ kaka bə mɔ zhe, mə̀ wɔ́ námbya e jà mə̀ zhe byin rə̀dù, á pyì-bwǎlsɛ́ ráá á bɔ̀-bwǎlsɛ́ wẽ́. ⁶ Á m'ǎ cĩ́ mu á m'á dɛ̃̀ cànà y èmyɛ́ mɔ́ dwã shí ǹdə́ nə̀na dɛ̃ rɛ́. Esərayɛl byǎ bɛ́ bə̀ tú dwã yó mó m'a zɛ̃̀ bə zwə́l mo, cɛ y gə tú è n'ê byíbyílí yi ní. ⁷ Bə̀ m'a zə vwǎm mɔ́ jal mɔ́ kə̀kàlà bə fwàl jìsí bə̀ la sə̀ wẽ́ jǒm bə dɔ̃̀ mɔ mɔ́ bwə̀ə̀lé sarha nɛ́ nə̀lyè y ǹdə́ sə̀ étwí-ènyí zã̌ y ga. ⁸ Bə̀ m'a wò vwǎm mɔ́ nàmá bɛ́ bə dɔ̃̀ cəcɛ̃ y èmyɛ́ mɔ́, ǹdə́ búúri rə̀ yə̀ sã̀-nə̀byẽ̌ ce, e súlí vɔr cɛ̀ɛ́. ⁹ Á bə̀k'á dɔ̃̀ vwǎm mɔ́ kaka nángo ráá mə̀ kɔn rɛ́ tɛ̀bɛ́ rə̀ shɛ̃̀ yé. È m'a yə̀ mə̀ kɔn rɛ́ tɛ̀bɛ́ rə̀ wò dúdú ǹdə́ mə̀ yó w ǹdə́ mə̀ nə̀-gwěsé e súlí mə̀ wu wẽ̀ ré. ¹⁰ Á bə̀k'á dàl mə̀ kaka è zɛ̃̀ nəkɔkɔ́lɛ́ yil yé, mə̀ kɔn gə dàl è zɛ̃̀ nəkɔkɔ́lɛ́ yá, sə á ji ri myǐn. ¹¹ Nyǐ á gə́ m'ǎ dɔ̃̀ nàmá bɛ́ nɛ́: á cã̌-tɔ̀nɔ̀ w m'a lyẽ á cã̌ nɛ́ ǹdə́ nə̀cìlə̀ á nə̀rh né e súlí ǹdə́ də̀-dɔ̀lɔ̀ á jɔ̃̀ wa. Á m'ǎ j'á dɔ̃̀ bɛ làlà. Wɔ́ Cinu Pakɛ y címsí. ¹² À m'a tó Ezhibti tənà y wẽ́ a lyɛ̃ cəcɛ̃ y èmyɛ́ mɔ́, a gu numbyínsí ǹdə́ vwàmá nɛ́ myɛ ga byì-yə́ə́ byì-yə́ə́ Ezhibti tənà y wẽ́. Èta, à m'a kə́ Ezhibti tənà y yə né gakó bùrsí, a pə nɛ còrhò-tum. Wɔ́ àmyɛ́ à wɔ́ Cinu. ¹³ À gə tú à la còrhò-tum pɔ Ezhibti lyì bí ni yi ní, jal mɔ́ mə̀ fwàl jìsí á wɔ sə̀ wẽ́ mó yó w mó m'a yə̀ myɔrhɔ á yilə. À gə nɔ jal mɔ́, à m'a gar ába a lyɛ̃. Èta, màbyóó w ò la cɛ y cɔ̌ mɔ́ t'â la ába zal yé. ¹⁴ Dɛ̃ rɛ́ rə̀myɛ́ mɔ́ m'a yə̀ lyìrhə́ dɛ̃ á yilə. Á m'ǎ vò zhəl mó mə̀myɛ́ mɔ́ á m'á jí címsi nánfɔ̀lɔ̀ Cinu yilə. Á m'ǎ j'á n'á jí címsí sə̀myɛ́ mɔ́ byin byin gakó, Cinu yilə. Wɔ́ nyí rə̀ m'à j'â ŋwɛ́nɛ́ twéé twéé yilə. ¹⁵ Á m'ǎ dɔ̃̀ búúri tɛ̀bɛ́ rə̀ yə̀ sã̀-nə̀byẽ̌ ce, dwã nyàlpyɛ̀. Sə kɔn zhì dwã nyàlpyɛ̀ y nə̀myɛ́ mɔ́ dɛ̃ nã́yéé ré, á m'ǎ j'á ce sã̀-nə̀byẽ̌ jé tɛ̃́ á jìsí wẽ́. Bə̀ m'a vùr lò mɔ̀bɔ́ gakó ń dɔ̀m búrú w kɔ̀bɔ́ ò co sã̀-nə̀byẽ̌, dɛ̃ nã́yéé ré e m'e yí dwã nyàlpyɛ̀ dɛ̃ rɛ́, Esərayɛl lyì byǎ bɛ́ wẽ́. ¹⁶ Dɛ̃ nã́yéé ré, á m'ǎ jòm kúl-fwɛ̀lɛ̀ Cinu yilə. Dwã nyàlpyɛ̀ dɛ̃ rɛ myɛ, á k'á jòm kúl-fwɛ̀lɛ̀ Cinu yilə. Dwã nɛ́ nə̀myɛ́ mɔ́ wẽ́, tum də́-byǐ ga t'â la tũ̌ yé, wɔ́ kùjú w dúdú lò gakó wɔ̌ ń mà n tɛnɛ ń cìn yilə. ¹⁷ Á m'ǎ jí búúrí rə̀ yə̀ sã̀-nə̀byẽ̌ ce mó címsí, bə̀ dɛ̃ rɛ́ rə̀myɛ́ mɔ́ yù w cìcì, à ce á dwí rí shə́r Ezhibti tənà y wa. Á m'ǎ j'á n'á jí címsí sə̀myɛ́ mɔ́ byin byin gakó, wɔ́ nyí rə̀ m'à j'â ŋwɛ́nɛ́ twéé twéé yilə. ¹⁸ Cànà nã́yə́ə́ y dwã shí ǹdə́ nə̀nà dɛ̃ rɛ́ də̀dɛ̀nɛ́ yá, á m'ǎ dɔ̃̀ búúri rə̀ yə̀ sã̀-nə̀byẽ̌ ce kɔn m'e yí cànà y dwã shí-èlyè ǹdə́ rə̀dù dɛ̃ rɛ́ də̀dɛ̀nɛ́ yá. ¹⁹ Dwã nɛ́ nyàlpyɛ̀ y wẽ́, bə̀ bə mə̌ sə bə nə sã̀-nə̀byẽ̌ á jìsí w yé. Sə bə̀ m'a vùr lò mɔ̀bɔ́ gakó ń dɔ̀m bùrú kɔ̀bɔ́ ò co sã̀-nə̀byẽ̌, ń wɔ́ zhə-bal ráá Esərayɛl tənà y lò, Esərayɛl lyì byǎ bɛ́ wẽ́. ²⁰ Á t'á la búrú ò co sã̀-nə̀byẽ̌ òdù ga á nyú w co yé. Jààsɛ́ shɛ̀bɛ́ á ŋwɛ́nɛ́ sə̀ wẽ́ mó myɛ, sə á dɔ̃̀ búúrí rə̀ yə̀ sã̀-nə̀byẽ̌ ce mó.» ²¹ Muyiisi byẽ̀ Esərayɛl náncɛsɛ́ gakó dwã yó, n wɔ̀ sɛ: «Zhəl-nə á pyà vwàmá á dwə́ né yilə, sə á zwə́l ne Pakɛ y címsí yilə. ²² Lyẽ-nə yəzɔ́pɛa vɔr dwã nɛ á mɔ́rh rɛ jal mɔ́ mə̀ ŋwɛ́nɛ́ nə̀zhõ̌ w mó wẽ́, sə á zhɛ́rhɛ́ jal mɔ́ á jìsí étwí-ènyí bòló w sarha nɛ́ nə̀lyè y ǹdə́ sə̀ étwí-ènyí zã̌ y yó. Sə rə̀myɛ́ kwã nɛ́, á mə̀dù ga bə̀ká n mɛrhɛ ń la ń jì y étwí-ènyí rí gar n shə́r ń sõ jù w ǹdə́ cɛ y gwẽ̌ yə̀ lɛ́ yé. ²³ Cinu mà n tó Ezhibti tənà y w n lyɛ̃ ń la mə n pə y còrhò-tum sə ń mà n nə jal mɔ́ jìsí étwí-ènyə́ né sarha nɛ́ dǎr rɛ́ ǹdə́ sə̀ étwí-ènyí zã̌ y yó. Rə̀myɛ́ yi ní, ń mà n gar n yẽ̌ étwí-ènyí rí rə̀myɛ́ mɔ́ nɛ, ń tá ń la cɔ̀rna mɔ́ nɛ yõ̌ n zù á sõ jù w n gu lò yé. ²⁴ Á m'ǎ wɛ̀rhɛ́ rə̀myɛ́ mɔ́ gakó. Wɔ́ nyí rə̀ m'à j'â ŋwɛ́nɛ́ twéé twéé, ámyɛ̌ ǹd'á nɛ̀mɛ́ nɛ́ ga yilə. ²⁵ Á gə tú á zù tənà y kɛ̀bɛ́ Cinu bwəl nyí bə̀ ń la ába pɔ mɔ́ wẽ́, á m'ǎ j'á n'á twĩ̀ tũ̀twĩ̀ĩ̀ rí rə̀myɛ́ mɔ́. ²⁶ Á byǎ bɛ́ gə bwə̀rh ába bə wɔ̀: ‹Tũ̀twĩ̀ĩ̀ rí èta mɔ́ kùrə̀?› ²⁷ Á m'ǎ lyár bɛ á wɔ̀: ‹Wɔ́ Pakɛ y vwĩ̀ rí nə́ zwə́l nə́ pə Cinu ni mú, ńmyɛ̌ mɔ̀bɔ́ ń gar Esərayɛl lyì byǎ bɛ́ jìsí n yẽ̌ Ezhibti tənà y wa, ń gə́ tú n pə còrhò-tum Ezhibti lyì bí ni n zɛ̃̀ n yẽ̌ nə́ kǎlsɛ́ nɛ sə lú mú yi ní mú.› » Rə̀myɛ́ yó, Esərayɛl lyì byǎ bɛ́ jòm bə̀ nə̀dwə́nə́ yó, bə zə bə̀ yə́rh bə pú tɛ̃́ bə cèrhé Cinu. ²⁸ Rə̀myɛ́ kwã nɛ́, Esərayɛl lyì byǎ bɛ́ j'a zɛ̃̀ bə vò bə wɛ̀rhɛ́ kɔn rɛ́ tɛ̀bɛ́ Cinu yà ń pɔ rə̀ nyí Muyiisi ǹdə́ Aarɔ̃ nɛ mɔ́. ²⁹ Ecɛ̃-swélé bɔ̀l wa, Cinu já n gu byì-cɛ gakó Ezhibti tənà y wa, kɔn zhì Faraɔ̃ byì-cɛ y è y'à mə̌ dwã s'e pú mu e jí pyɛ̀lɛ̀ rɛ́ mɔ́, e m'e yí lò mɔ̀bɔ́ bə̀ y'à zɔ búlə́ jàà w bə ce jù w mú byì-cɛ yá, e súlí vwǎm byì-yə́ə́ gakó. ³⁰ Faraɔ̃ ǹdə́ ń tùntùnnə bé e súlí Ezhibti lyì bí gakó j'a zɛ̃̀ cəcɛ̃ y èmyɛ́ mɔ́; wu-zhùlù búbwéé nánfwɛ̀lɛ̀ y'à zɛ̃̀ tɛ̃́ Ezhibti tənà y wa, bə̀ kɛ̀lɛ́ èdù ga y'à tɛ̀nɛ́ cùù y'à tɛ̀nɛ́ è wẽ́ yé. ³¹ Rə̀myɛ́ yó, Faraɔ̃ já n byẽ̀ Muyiisi ǹdə́ Aarɔ̃ cəcɛ̃-swélé y w n wɔ̀ bɛ: «Zɛ̃̀-na! Shə́r-nə à dwí rí cəcəl wə, ámyɛ̌ ǹdə́ Esərayɛl lyì byǎ bɛ́. Zhəl-nə á vò á cèrhé Cinu ǹdə á gə́ lwə̀l né. ³² Zə-na á dɔ̀ wá, və̌-ywàálɛ́ ǹdə́ vwàmá nánfwààlɛ́ ga á m'á súlí á shə́r, ǹdə á gə́ lwə̀l né. Sə á m'ǎ súlí á bwəl bwəl tɛ̀bɛ́ rə̀ càn á pə àmyɛ nɛ!» ³³ Ezhibti lyì bí pàm Esərayɛl lyì byǎ bɛ́ kùr ni, bə̀ bə̀ shə́r tənà y w làlà, bə̀ bə̀ y'à n'ê wə̀lə̀: «Nə́ gakó m'ǎ cì!» ³⁴ Dwí rí j'a kwè rə̀ búrú mún mú mə̀ y'à pò mó rə m'e lyɛ̃ ǹdə́ mə̀ y'à gwẽ̌ yə̀ zɛ̃̀ yé; rə pyípyílí wẽ̀ ré tɛ̀bɛ́ bə̀ n'ê pò búrú mún mú rə̀ wẽ́ mó ǹdə́ rə̀ kàmə̀zù-fwààlɛ́ rə lyẽ, rə zhĩ rə̀ pyə́pyɛla wa. ³⁵ Esərayɛl lyì byǎ bɛ́ y'à wɛ̀rhɛ́ ǹdə Muyiisi gə́ yà ń byili bi ní. Bə̀ y'à lwə̀l wẽ̀ rə̀ zùrhì ǹdə́ sə̀byì-kùlì ǹdə́ sánə́má e súlí kàmə̀zù-fwààlɛ Ezhibti lyì bí ni. ³⁶ Cinu yà ń ce Ezhibti lyì bí y'à só ń dwí rí yò, rə̀myɛ́ ce Ezhibti lyì bí pɔ kɔn rɛ́ tɛ̀bɛ́ Esərayɛl lyì byǎ bɛ́ y'à lwə̀l be mó. Wɔ́ èta kɔn tó né Esərayɛl lyì byǎ bɛ́ j'a m'e zwẽ Ezhibti lyì bí wẽ̀ ré bə yẽ̌ be nánfò! ³⁷ Esərayɛl lyì byǎ bɛ́ j'a zɛ̃̀ bə zhì Araməsɛɛsɛ bə zhǐr bə kwè sɔ́má y bə̀ la Sukɔɔtɛ, bala bɛ́ bə̀ y'à n'ê zhə̀l tɛ̃́ mɔ́ dúdú y'à yú nunə mɔ̀ɔ̀rhɛ̀ zɔ̃̌-nyə̀ldù, bə̀sɔ́ná bɛ́ twə́r y'à tɛ̀nɛ́ nɛ́ yé. ³⁸ Lyì dwã nánzhəzhɔ̌ bə̀ y'à gùlí gùlí dwã tó be bə shə́r ǹdə́ bə̀ və̌-ywàálɛ e súlí bə̀ vwàmá nánfwààlɛ nánjə̀jóló. ³⁹ Bə kwè búrú mún mú mə̀ y'à pò bə̀ y'à m'e shí Ezhibti mú, bə ji ŋwǎmsɛ. Mún mú gə́ y'à yə̀ zɛ̃̀ mɔ́ ce, mə̀ ŋwǎmsɛ́ yàl ŋwǎmsɛ́ shɛ̀bɛ́ sə̀ y'à yə̀ sã̀-nə̀byẽ̌ ce. Bə̀ gə́ pàm bə̀ kùr ni bə jì bi bə̀ bə̀ shə́r Ezhibti ní mu ce, bə̀ y'à yə̀ ŋwɛ̀nɛ́ bə pyà kùjú bə ce bə̀ byẽ́ myɛ cìcì yé. ⁴⁰ Esərayɛl lyì byǎ bɛ́ y'à jòm Ezhibti ní byinə zwã̌-àna ǹdə́ shə́-ètɔ̀. ⁴¹ Sə wɔ́ byinə zwã̌-àna ǹdə́ shə́-ètɔ̀ y pyǐrh yó wə, dɛ̃ rɛ́ rə̀myɛ́ mɔ́ cìcì, Cinu shə̀dɛ́ɛ́sɛ́ kùrə̀ né gakó shə́r Ezhibti tənà y wa. ⁴² Cəcɛ̃ y èmyɛ́ mɔ́ Cinu zɔ ń yírhə́ mùnì ga n ce Esərayɛl lyì byǎ bɛ́ ŋwɛ̀nɛ́ bə shə́r Ezhibti tənà y wa. Wɔ́ Cinu ń cǐ yə. Esərayɛl lyì byǎ bɛ́ myɛ m'a zə bə̀ yírhə́ cəcɛ̃ y èmyɛ́ mɔ́ byin byin gakó. ⁴³ Cinu wɔ̀ Muyiisi ǹdə́ Aarɔ̃ nɛ: «Nyǐ Pakɛ címsí gə́ mə̌ sə sə jí ní: Dwí dõ lò mə̀dù ga myɛ bə mə̌ sə n tó n jí si yé. ⁴⁴ Ǹ m'ǎ gõ̀ tùntùnnə mɔ̀bɔ́ gakó bə̀ yè ǹdə́ sə̀byǐ mú, rə̀myɛ́ yi ní, ń mà n zɛ̃̀ n tó n jí si. ⁴⁵ Zhə-bal mɔ̀bɔ́ ń zul ǹ sõ ráá lò mɔ̀bɔ́ bə̀ kwè bə̀ n'ê kwɛ̃̌ mɔ́ bə mə̌ sə n tó n jí si yé. ⁴⁶ Bə̀ m'a jòm jì èdù wẽ́ bə m'e jí si. Ǹ tá ǹ la címsí nǎm mɔ́ mə̀dù ga myɛ zə ń du jù w ń vò pwẽ̀ ne yé. Á t'á la vwǎm mɔ́ kúr rí kɔ́ yé. ⁴⁷ Esərayɛl dwí rí púlə́púlə́ m'a jí Pakɛ címsí. ⁴⁸ Zhə-bal mɔ̀bɔ́ ń jě ǹ sõ gə nə́ ń yǎl n tó n jí Pakɛ címsí n mə n cèrhé Cinu, sə bə jɛ̀rɛ̀ bə gõ̀ bal bal gakó ń sõ mó. Rə̀myɛ́ kwã, ń mà n ŋwɛ̀nɛ́ n twẽ̌ n bwəlse n tó n jí si, ǹdə Esərayɛl lyì byǎ bɛ́ tənà y lò ta. Sə lò mɔ̀bɔ́ ń yə̀ gòm mó mə̀dù ga myɛ bə̀ká n tó n jí si yé. ⁴⁹ Nyí rí m'a yə̀ rə̀myɛ́ rə̀dù y Esərayɛl lyì byǎ bɛ́ tənà y lò ǹdə́ zhə-bal mɔ̀bɔ́ ń jě á sõ mó yilə.» ⁵⁰ Esərayɛl lyì byǎ bɛ́ gakó wɛ̀rhɛ́ kɔn rɛ́ tɛ̀bɛ́ Cinu yà ń pɔ rə̀ nyí Muyiisi ǹdə́ Aarɔ̃ nɛ mɔ́ cìcì. ⁵¹ Wɔ́ dɛ̃ rɛ́ rə̀myɛ́ mɔ́ yù w cìcì, Cinu ce Esərayɛl lyì byǎ bɛ́ shə́r bə tùrhì dwã nɛ kùkùl kùkùl bə du Ezhibti tənà y wa, kɔn tó dwã ǹdə́ bə̀ shə̀dɛ́ɛ́sɛ́ kùrə̀ né.