¹ Esərayɛl lyì byǎ bɛ́ zhì Elyim ní bə zhǐr, sə bə̀ gakó púlə́púlə́ zhə̀l bə yí Siini gɔ-elũ èpòlò w wə, Elyim ǹdə́ Sǝnǝyi bwə̌l mó wə, cànsɛ̀ sə̀lyè nyǎ y dwã shí ǹdə́ nə̀nu dɛ̃ rɛ́ yù wə, bə̀ gə́ shə́r Ezhibti tənà y w mɔ́ kwã nɛ́. ² Gɔ-elũ èpòlò w gàà mɔ́, Esərayɛl lyì byǎ bɛ́ k'e zɛ̃̀ bə̀ n'ê ŋwúŋwùní bə̀ m'ê bwí Muyiisi ǹdə́ Aarɔ̃. ³ Bə̀ wə̀l be: «Cinu gə yà ń ce nə́ cì Ezhibti tənà y w nə́ gə́ y'à n'ê jòm nàmá bɛ́ nə́kwɛ́nsɛ́ nyí ni, nə́ n'é jí kùjú nə́ búl nə́ swí mú y'à be cɔ̃̀! Á zɛ̃̀ á zə nə́ba á m'á bə̀ gɔ-elũ èpòlò w kɔ̀bɔ́ wẽ́, á la ce nɔrh gu lyì-zhǎ bɛ́ byɛ̀bɛ́ gakó!» ⁴ Cinu wɔ̀ Muyiisi ni: «À m'a ce búúri shí dɛ̃̌-yi w rə nyɔ̀ ǹdə dwà ta á pwà. Dɛ̃ gakó, dwí rí m'a du rə pwà kɔn mɛrhɛ dwã ǹdə́ rə̀ dɛ̃ gakó kùjú wə́. À m'a tó rə̀ dɛnnɛ a zhẽ̀ re a nyì: rə̀ m'a zwẽ à nyə́ né ráá rə̀ t'â la nɛ zõ? ⁵ Dwã nyə̀ldù dɛ̃ rɛ́, dwí rí gə tɛnɛ kɔn rɛ́ tɛ̀bɛ́ rə̀ pwà mɔ́, rə̀ m'a pù rə yí tɛ̀bɛ́ rə̀ n'ê pwà dɛ̃ gakó mó twər rə̀lyèa.» ⁶ Muyiisi ǹdə́ Aarɔ̃ wɔ̀ Esərayɛl lyì byǎ bɛ́ púlə́púlə́ ne: «Zà də̀dɛ̀nɛ́ y á m'ǎ lwar bə̀ wɔ́ Cinu ń ce á shə́r Ezhibti tənà y wa; ⁷ nəkɔl nəkɔkɛ́lɛ́ yá, á m'ǎ nə Cinu còrhó wə́, bə̀ ń nyɛ̀ɛ̀ á gə́ n'á ŋwúŋwùní á m'á bwí ǹdə́ mɔ mɔ́. Nə́myɛ̌ wɔ́ byè, á m'á n'á ŋwúŋwùní á m'á bwí ǹdə́ nə́ba?» ⁸ Muyiisi yà ń nə́ ń yǎl n wɔ̀: «Á m'ǎ nə Cinu còrhó w ń gə́ mà n pə ába nàmá á dɔ̃̀ zà də̀dɛ̀nɛ́ yá, n súlí n pə ába búrú á búl á dɔ̃̀ á sú nəkɔl nəkɔkɔ́lɛ́ y mɔ́, bə̀ ń nyɛ̀ɛ̀ á gə́ n'á ŋwúŋwùní á m'á bwí ǹdə́ mɔ mɔ́. Byè nə́myɛ̌ wɔ́? È də̀ nə́myɛ̌ á n'á ŋwúŋwùní á m'á bwí yé, wɔ́ Cinu á n'á ŋwúŋwùní á m'á bwí.» ^{11 9} Muyiisi wɔ̀ Aarɔ̃ nɛ: «Wál Esərayɛl lyì byǎ bɛ́ gakó ne: Twẽ̌-nə á bwəlse Cinu yala nɛ, bə̀ ń nyɛ̀ɛ̀ á ŋwúŋwùnú mú.» ¹⁰ Sə Aarɔ̃ gə́ tú ń nə́ ń zɔ̀m ǹdə́ Esərayɛl lyì byǎ bɛ́ yi ní, bə̀ zhízhílí bə̀ yə́rh bə zǎ gɔ-elũ èpòlò wə́: rə̀myɛ́ yó, Cinu còrhó w j'a du ébɔ̃ w wẽ́. 11 Cinu wɔ̀ Muyiisi ni: ¹² «À nyɛ̀ɛ̀ Esərayɛl lyì byǎ bɛ́ ŋwúŋwùnú mú. Cĩ́ bi à nyí rí ń wɔ̀: Cɛ y gə tú è n'ê byíbyílí yi ní, á m'ǎ dɔ̃̀ nàmá; nəkɔl nəkɔkɔ́lɛ́ yá, á m'ǎ búl á dɔ̃̀ búrú á sú. Á m'ǎ zɛ̃̀ á lwar b'àmyɛ́ á Yi rí, wɔ́ Cinu.» ¹³ Də̀dɛ̀nɛ́ y èmyɛ́ mɔ́, nə̀pə̀pǎr rɛ́ j'a du rə sú zulə́ jàà yá. È zɛ̃̀ nəkɔkɔ́lɛ́ yá, myɔ̀nɔ̀ ce o kə́kɛ́lɛ́ zulə́ jàà yá. ¹⁴ Sə myɔ̀nɔ̀ w gə́ tu kwã, bə̀ púrí kɔn rə̀ nyɛ̌ ǹdə wẽ̀ byǎ námpwẽ̀ námpɔ́lsɛ dɛ̃́dɛ̃́ ta, bə̀ zɔ dwã nɛ, cɛ y yó, gɔ-elũ èpòlò w wə. ¹⁵ Esərayɛl lyì byǎ bɛ́ gə́ nɔ rɛ, bə zɛ̃̀ bə̀ n'ê bwə̀rh dwã bə̀ zhe: «Man U?» («Tɛ̀bɛ́ wɔ́ byè?»), bə̀ bə̀ y'à yə̀l kɔn ná-dwí yil ǹdə́ rɛ yé. Muyiisi wɔ̀ bɛ: «Wɔ́ búrú w kɔ̀bɔ́ Cinu nə́ ń pɛ ába á la dɔ́m mɔ́. ¹⁶ Nyǐ nyí rí tɛ̀bɛ́ Cinu pɔ mɔ́: Pwǎ-na w kɔn yí lò gakó gə́ wɔ̌ ń mà n dɔ̃̀ nɛ́. Lò gakó mà n pwà kɔn mɛrhɛ ń lyì bí yó wə́, lyítərə nə̀na ku yírh rə̀dù ń kòrhó w lò mə̀dù gakó yilə.» ¹⁷ Esərayɛl lyì byǎ bɛ́ wɛ̀rhɛ́ ǹdə bə̀ gə́ byili ní; jàlà pwà dɛ̃́dɛ̃́, jàlà pwà námpɔ́lɛ́. ¹⁸ Bə̀ gə́ tú bə zə lyítərə nə̀na yírh ku w bə m'e mɛrhɛ yi ní, lò mɔ̀bɔ́ ń nyǎn rɛ́ y'à já mɔ́ jɛ́nɛ́ rɛ́ y'à yə̀ cɛ nɛ lyɛ̃ yé, kɔn k'ê yə̀ lò mɔ̀bɔ́ ń nyǎn rɛ́ y'à wɔ́ námpɔ́lɛ́ myɛ mùrì yé. Lò gakó yà ń pwà kɔn yí ń gə́ wɔ̌ ń mà n jí ní. ¹⁹ Muyiisi wɔ̀ bɛ: «Lòlò bə̀ kaka dàl n cĩ́ kɔn m'e yí nəkɔl nəkɔkɔ́lɛ́ y yé!» ²⁰ Sə lyì jàlà yə̀ Muyiisi cili yé, bə dàl w bə cĩ́ kɔn m'e yí è zɛ̃̀ nəkɔkɔ́lɛ́ yá. Sə ò cɔ̀ o pɔn o ce zə̀zɔ̀mɛ́. Rə̀myɛ́ yó, Muyiisi lyim j'a zɛ̃̀ rə̀ n'ê yì bi. ²¹ Bə̀ y'à j'â n'ê pwà w nəkɔkɔ́lɛ́ gakó, kɔn yí lò gakó gə́ yà ń wɔ̌ ń mà n jí ní. Nə̀nyɔ́nɔ́ w gə tú ò ce cɛ y byìrh, ò y'à n'ô yə̀lə́. ²² Dwã nyə̀ldù dɛ̃ rɛ́, bə̀ pwà dwã nə̀lyè búúri, lyítərə nə̀na yírh wẽ̀ ré rə̀lyè, lò gakó yilə. Esərayɛl dwí rí náncɛsɛ́ gakó bə̀ sə cĩ́ ri Muyiisi ni. ²³ Muyiisi wɔ̀ sɛ: «Wɔ́ nyí rí rə̀myɛ́ Cinu yà ń pɔ mɔ́: Nəkɔl wɔ́ shìrhə́ dɛ̃, shìrhə́ dɛ̃ rɛ́ tɛ̀bɛ́ Cinu cǐ mú. Shɛ̃̌-na kɔn dɛ̀bɛ́ rə̀ mə̌ ǹdə́ shɔ̃̀ mɔ́; sə á pyì tɛ̀bɛ́ rə̀ mə̌ ǹdə́ pyíl mú. Sə á cĩ́ kɔn rɛ́ tɛ̀bɛ́ rə̀ dàl mɔ́ á m'á dɛ̃̀ nəkɔl nəkɔkɔ́lɛ́ yá.» ²⁴ Bə̀ cĩ́ tɛ̀bɛ́ rə̀ dàl mɔ́ kɔn m'e yí cɛ-lár rɛ́, ǹdə Muyiisi gə́ yà ń pɔ nyí ní. Sə rə̀ yə̀ pɔn rə ce zə̀zɔ̀mɛ́ yé. ²⁵ Muyiisi wɔ̀ bɛ: «Jí-nə re zà, bə̀ zà wɔ́ shìrhə́ dɛ̃ Cinu Yi còrhó yilə. Á t'á la w nɔ pwẽ̀ ne zà yé. ²⁶ Á m'ǎ pwà w dwã nyə̀ldù, sə dwã nyàlpyɛ̀ dɛ̃ rɛ́, wɔ́ shìrhə́ dɛ̃ rɛ́: kaka t'â la nɔ yé.» ²⁷ E jà dwã nyàlpyɛ̀ dɛ̃ rɛ́, lyì jàlà du bə̀ la w pwǎ sə bə̀ yə̀ kaka nɛ yé. ²⁸ Cinu wɔ̀ Muyiisi ni: «Á m'ǎ cẽ à pùbùlə̀ né wɔ̀rhɔ́ e súlí à nyə́ né zõ kɔn m'e yí dǒ? ²⁹ Lwar-na cɛ̀nɛ̀ bə̀ nyǐ Cinu pɔ ába shìrhə́ dɛ̃ rɛ́, n súlí n pə ába dwã nə̀lyè kùjú dwã nyə̀ldù dɛ̃ rɛ́. Lò gakó mɛ̃ ń jàà y wa. Lòlò bə̀ká n shə́r ń dǒ-sõ dwã nyàlpyɛ̀ dɛ̃ rɛ́ yù w yé.» ³⁰ Rə̀myɛ́ mɔ́ ce, Esərayɛl lyì byǎ bɛ́ shǐrh dwã nyàlpyɛ̀ dɛ̃ rɛ́ yù wə. ³¹ Esərayɛl lyì byǎ bɛ́ ce kùjú w òmyɛ́ mɔ́ yil bə̀ mánnɛ. Ò y'à nyɛ̌ ǹdə nyã̀shã̌ dwí ta, ò y'à wɔ́ námpõ̀, ò y'à nyɛ̀ ǹdə ŋwǎmsɛ́ shɛ̀bɛ́ bə̀ co tùr sə̀ wẽ́ ta. ³² Muyiisi wɔ̀: «Nyǐ Cinu nyí rí ń pɔ mɔ́: Bə̀ ce lyítərə nə̀na ku yírh rə̀dù bə cĩ́ dɛ̃̌ á nɛ̀mɛ́ nɛ́ yilə, mùnì ga bə nə búrú w kɔ̀bɔ́ à m'a kɔ̃̀ ába gɔ-elũ èpòlò w wə, à gə́ tú a ce á shə́r Ezhibti ní yi ní mú párá.» ³³ Muyiisi wɔ̀ Aarɔ̃ nɛ: «Kwě nə̀bwɛ́nɛ́, ń ló lyítərə nə̀na ku w ò sú pyám yírh rə̀dù è wẽ́, ń vò ń cĩ́ Cinu yé né, ń mə́ cĩ́ dɛ̃̌ á nɛ̀mɛ́ nɛ́ yilə.» ³⁴ Aarɔ̃ zhə̀l n cĩ́ y dɔbrɛ́ nyə́ né bwə̀lsé yé né ǹdə nyí rí Cinu yà ń pɔ Muyiisi ni mú gə́ y'à n'ê byili ní, bə m'e cĩ́ y dɛ̃̌. ³⁵ Esərayɛl lyì byǎ bɛ́ dɔ̀m mánnɛ y byinə shə́-èna, kɔn m'e yí bə vò bə zù tənà y kɛ̀bɛ́ lyì y'à jě è wẽ́ mó wə. Wɔ́ mánnɛ y bə̀ dɔ̀mà, kɔn m'e yí bə yí Kanaã tənà y swɛ̃́ rɛ́. ³⁶ Lyítərə nə̀na ku w yírhə́ shí mánnɛ y'à yú bə̀ mɔrhɔ ku w yírh rə̀dù.