¹ Á wɔ́ Yi byì-swénnǝ. Rǝ̀myɛ́ ce, ce-nǝ jàn nɛ́ á wɛ̀rhɛ́ ǹdǝ rǝ̀ ta. ² Swéné-nǝ dwã, ǹdǝ Kristǝ gǝ́ só nǝ́ba né. Ń pɔ ń cìn Yi ni ǹdǝ vwĩ̀-kɔn dɛ̀bɛ́ rǝ̀ zhe lwẽ́ nã́nyǝ̀nyɛ̀lɛ́ rǝ̀ sú Yi yírh ta nǝ́ yilǝ. ³ Á wɔ́ Yi lyì. Fwǝ̌l tumǝ ǹdǝ́ tùntùm-bǝywààlɛ̀ ǹdǝ́ nǝ̀cɛ̀ndɛ̀ pyǎ kɔn lyɛ̃ cɛ nɛ, rǝ̀myɛ́ èta mɔ́ yò bǝ mǝ̌ s'o púr nyú w myɛ cìcì á sõ yé. ⁴ Á bǝ̀k'á púr zɔ̀m-bǝywààlɛ̀ ráá zɔ̀mà nyɛ̀bɛ́ nǝ̀ bǝ kùr zhe myɛ cìcì á nyú w yé. Zɔ̀mà nɛ́ nǝ̀myɛ́ gakó bǝ mǝ̌ sǝ nǝ zɔ̀m yé. Á gǝ la zɔ̌m, s'e yǝ̀ Yi nǝ̀bán co. ⁵ Lwar-na bǝ̀ nǝ̀fòló ǹdǝ́ lyì-bǝyɔ̀lɔ̀ ǹdǝ́ bwɛ̃̌-dǔr cí t'â la jàà nɔ Kristǝ ǹdǝ́ Yi tǝnà y wẽ́ yé, bǝ̀ wẽ̀ ré tɛ̀bɛ́ lò mó nǝ́ ń dùr rǝ̀ bwɛ̃̌ mɔ́ n'ê jǐrh ǹdǝ ń yi ta. ⁶ Á bǝ̀k'á yẽ̌ lyì zǝ zɔ̀m-fwǝ́ǝ́re bǝ m'e jǝ́jɛ̀rɛ́ ába yé. Wɔ́ rǝ̀myɛ́ gakó yil Yi lyim n'ê zɛ̃̀ ǹdǝ́ lyì bí byɛ̀bɛ́ bǝ̀ t'â zwẽ rǝ̀ nyí ni mú. ⁷ Á bǝ̀k'á jí ǹdǝ́ lyì bí bǝ̀myɛ́ mɔ́ dwí rí yé. ⁸ Shãã ga, á y'ǎ ŋwɛ́nɛ́ cǝ-byín wǝ. Sǝ èlǎsɛ̃́, á gǝ́ zù Cinnǝ mú ce, á ŋwɛ́nɛ́ pwẽ̀ wǝ̀. Rǝ̀myɛ́ ce, wɛ̀rhɛ́-na ǹdǝ pwẽ̀ lyì gǝ́ mǝ̌ sǝ bǝ wɛ̀rhɛ́ nɛ́, ⁹ bǝ̀ cɛ̀nɛ̀ dwí gakó, ǹdǝ́ cángá dwí gakó, ǹdǝ́ zhǝ̀n dwí gakó, wɔ́ pwẽ̀ wẽ́ rǝ̀ n'ê shí ní. ¹⁰ Ce-nǝ jàn nɛ́ á lwar kɔn dɛ̀bɛ́ rǝ̀ wɔ́ Yi pùbùlǝ̀. ¹¹ Á bǝ̀k'á ce á cìn cǝ-byṹ tùntwǝ̃̀ǝ̃̀ né wẽ́ yé, bǝ̀ nǝ̀ bǝ kùr zhe yé. Á gaga mɔ́ mǝ̌ s'á byili byɛ̀bɛ́ bǝ̀ n'ê twĩ̀ tùntwǝ̃̀ǝ̃̀ né nǝ̀myɛ́ mɔ́ nɛ bǝ̀ nyǐ nǝ̀ bǝ mǝ̌ yé. ¹² Kɔn dɛ̀bɛ́ bǝ̀myɛ́ cìnǝ́ bé n'ê shèè bǝ̀ wɛ̀rhɛ́ mɔ́ byilu myɛ wɔ́ cìzhìlǝ̀. ¹³ Sǝ pwẽ̀ gǝ tú è yǝ̌r tùntwǝ̃̀ǝ̃̀ né nǝ̀myɛ́ gakó, kɔn gakó n'ê dwi pwẽ̀ nè pamparɛ̃ɛ̃. ¹⁴ Zhǝ̀nà, kɔn dɛ̀bɛ́ gakó rǝ̀ du pwẽ̀ nè pamparɛ̃ɛ̃, rǝ̀ n'ê jǐrh pwẽ̀. Wɔ́ rǝ̀myɛ́ è ce, bǝ̀ n'ê wǝ̀lǝ̀: «Ǹmyɛ́ mɔ̀bɔ́ ǹ dɛ̌ mɔ́, zɛ̃̀ tɛ̃́; zɛ̃̀ ń yẽ̌ cùùrí ni; Kristǝ mà n yǝ̌r mó ǹdǝ́ ń pwẽ̀ dé.» ¹⁵ Dɛ̃̌-na á cìn á tùntwǝ̃̀ǝ̃̀ né wẽ́. Yál-na surhǝ cìnǝ́, s'á bǝ̀k'á wɛ̀rhɛ́ ǹdǝ bǝ-surhǝ-zhe cìnǝ́ ta yé. ¹⁶ Ce-nǝ jàn nɛ́ á wɛ̀rhɛ́ cɛ̀nɛ̀ twéé twéé, bǝ̀ lũ w nǝ́ ŋwɛ́nɛ́ ò wẽ́ èlǎsɛ̃́ mɔ́ bǝ càn yé. ¹⁷ Wɔ́ rǝ̀myɛ́ è ce, á bǝ̀k'á yǝ̀ lyì byɛ̀bɛ́ bǝ̀ yǝ̀l nǝ̀ kùrǝ̀ yé. Ce-nǝ jàn nɛ́ á lwar kɔn dɛ̀bɛ́ Cinnǝ mó nǝ́ ń yǎl b'ǎ wɛ̀rhɛ́ mɔ́ kùrǝ̀. ¹⁸ Á bǝ̀k'á nyɔ̀ sɛ̃́ kɔn lyɛ̃ cɛ nɛ yé, bǝ̀ sɛ̃́ nyɔ́ kɔn lyɛ̃ cɛ nɛ n'ê ce numbyíní yààyàà tùntwǝ̃̀ǝ̃̀ wẽ́. Ce-nǝ á wun ní sú ǹdǝ́ Eshirhǝ náàcɛ̀nɛ́. ¹⁹ Á gǝ tú dwã yó gakó, s'á nún núrh shɛ̀bɛ́ gakó sǝ̀ n'ê shí Eshirhǝ náàcɛ̀nɛ́ sõ, ǹdǝ́ núrh dwí gakó, á m'á ce Cinnǝ mó nǝ̀bán ǹd'á wun gakó. ²⁰ Ce-nǝ nǝ́ Da Yi nǝ̀bán twéé twéé kɔn gakó wẽ́, Cinnǝ Yezu Kristǝ yil yilǝ. ²¹ Shɛ̀nɛ́-na dwã nyí ni Kristǝ nyɔ̀mɔ̀ w yilǝ. ²² Ámyɛ̌ kana bɛ́, zwẽ-nǝ á byǝ́nǝ́ bé nyí ni, ǹdǝ á gǝ́ n'á zwẽ Cinnǝ mó nyí ni ní, ²³ bǝ̀ bal wɔ́ ń kɛ̃ yó-cǝ́bal ǹdǝ Kristǝ gǝ́ wɔ́ ń gùlú w yó-cǝ́bal nɛ́. Gùlú w wɔ́ Kristǝ yala. Wɔ́ ńmyɛ̌ cìcì ń wɔ́ ò Zwennǝ. ²⁴ Kana bɛ́ myɛ mǝ̌ sǝ bǝ zwẽ bǝ̀ byǝ́nǝ́ bé nyí ni, ǹdǝ gùlú w gǝ́ n'ô zwẽ Kristǝ nyí ni ní. ²⁵ Ámyɛ̌ bala bɛ́, swéné-nǝ á kana bɛ́, ǹdǝ Kristǝ gǝ́ só ń gùlú w n pǝ ń myǝ̌l ré ò yil né. ²⁶ Ń zǝ nɛ̃̌ ǹdǝ́ ń nyì-zɔ̀mɛ̀ n mǝ n shàrh w o jǐrh wárhgáá ǹdǝ Yi gǝ́ n'ê yǎl nɛ́. ²⁷ Ń nǝ́ ń yǎl b'ò yál cɛ̀nɛ̀ ò kɔn gakó wẽ́, o yǝ̀ wárhgáá, dóó dwí-byǐ bǝ̀k'a gùlí w o m'o zhì ńmyɛ̌ cìcì yé né yé. ²⁸ Èta myɛ, bala bɛ́ mǝ̌ sǝ bǝ swéné bǝ̀ kana bɛ́ ǹdǝ bǝ̀ gǝ́ só bǝ̀ cìcì ní, bǝ̀ lò mɔ̀bɔ́ ǹ só ǹ kɛ̃, wɔ́ ǹ cìcì ǹ só. ²⁹ Lò tɛ̀nɛ́ ń nǝ́ ń wǝ̀l bǝ̀ ń twǝ́r tɛ̀nɛ́ ǹdǝ́ ń sǝ̀pwà yala nɛ́ yé. Lò gakó nǝ́ ń cili ń yala nɛ́ sõ, n kwɛrhɛ nɛ cɛ̀nɛ̀, ǹdǝ Kristǝ gǝ́ nǝ́ ń wɛ̀rhɛ́ ń gùlú w ní. ³⁰ Nǝ́myɛ̌ wɔ́ Kristǝ yala nɛ́ kǝ̀kàlsɛ̀. ³¹ Bǝ̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bǝ wɔ̀: «Rǝ̀myɛ́ yilǝ, bal mà n yẽ̌ ń da ǹdǝ́ ń ná nɛ, n jòm ǹdǝ́ ń kɛ̃ mɔ́, sǝ bǝ̀myɛ́ bǝ̀lyè y ga b'a mù dwã nɛ bǝ jǐrh kɔn rǝ̀dù.» ³² Zɔ̀mɛ̀ rɛ́ rǝ̀myɛ́ n'ê byili nǝ́ba kɔn nánfɔ̀lɔ̀ dɛ̀bɛ́ rǝ̀ zhe kùrǝ̀, sǝ àmyɛ́ n'â bùl bǝ̀ wɔ́ Kristǝ ǹdǝ́ ń gùlú w yò rǝ̀ n'ê zɔ̀mà. ³³ Sǝ rǝ̀ n'ê zɔ̀m ámyɛ yò, bǝ̀ bal gakó mǝ̌ sǝ́ swéné ǹ kɛ̃ ǹdǝ ǹ cìcì ta, sǝ kɛ̃ myɛ mǝ̌ sǝ́ nyɛ̀ ǹ byal.