¹ Àmyɛ́ mɔ̀bɔ́ bǝ̀ co byǝ̀nǝ́ jù w à gǝ́ n'â twĩ̀ Cǐnnǝ mó tum rí yil mó, à n'â lwǝ̀l ába ǹdǝ́ à wu gakó Yi pɛnɛ́ y nánfò w yilǝ: Zǝ-nǝ á cìn cɛ̀nɛ̀ ǹdǝ Yi gǝ́ byẽ̀ ába b'ǎ yál nɛ́ mɔ́. ² Yál-na cìn-lwǝl ǹdǝ́ wu-bɔ̀nɔ̀ ǹdǝ́ cìn-pyɔ́nɔ́ cìnǝ́. Swéné-nǝ dwã, s'á zǝ cìn-pyɔ́nɔ́ ǹdǝ́ dwã. ³ Ce-nǝ jàn nɛ́ á tó yǝ̀-zùlǝ́ né nǝ̀ co ába dwã nɛ mɔ́ dɛnnɛ á zǝ nyì-dwiì rí tɛ̀bɛ́ rǝ̀ n'ê shí Eshirhǝ náàcɛ̀nɛ́ sõ mó. ⁴ Nǝ́ gakó wɔ́ kɔn rǝ̀dù; kɔn rɛ́ dɛ̀bɛ́ Yi byẽ̀ nǝ́ba nǝ́ r'é dɛ̃̀ rǝ̀ sõ mó myɛ wɔ́ rǝ̀dù; ⁵ nǝ́ Cǐnnǝ mó wɔ́ mǝ̀dù; nǝ́ yi ni zhú mú wɔ́ mǝ̀dù; nǝ́ nɛ̃̌-mɔ́lɔ́ mɔ́ myɛ wɔ́ mǝ̀dù; ⁶ nǝ́ Yi rí myɛ wɔ́ rǝ̀dù; rǝ̀ wɔ́ nǝ́ gakó Da; rǝ̀ cǐ nǝ́ gakó; rǝ̀ n'ê tó nǝ́ gakó dɛnnɛ rǝ̀ twĩ̀, rǝ̀ ŋwɛ́nɛ́ nǝ́ gakó wẽ́. ⁷ Nǝ́ gakó nɔ Yi pɛnɛ́ y ǹdǝ Kristǝ gǝ́ tǝ̀l n pǝ lò gakó ne né. ⁸ Bǝ̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bǝ wɔ̀: Ń gǝ́ zɛ̃̀ n vò dɛ̃̌ yi ní, ń zɔ yómǝ́ n mǝ n vò, n pǝ paánsɛ lyì ni. ⁹ Ń dɛ̃̌ zhǝl mó n'ê yǎl e wɔ̀ bǝ̀ byè? Rǝ̀ n'ê yǎl e wɔ̀ bǝ̀ nyǐ ń jɛ̀rɛ̀ n shí dɛ̃̌ dɛ̃̌ n só tɛ̃́ cɛ y yó. ¹⁰ Mɔ̀bɔ́ ń shí dɛ̃̌ n só tɛ̃́ mɔ́, wɔ́ ńmyɛ̌ ń kǝ́ n vò dɛ̃̌ n lyɛ̃ cɛ nɛ gaga, mùnì ga n sú lũ w púlǝ́púlǝ́. ¹¹ Wɔ́ ńmyɛ̌ ń tǝ̀l paánsɛ́ n pǝ lò gakó ne. N ce lyì jàlà wɔ́ Yi nyì-zwennǝ, jàlà wɔ́ yò-cɔ̀nɔ̀ nyí rí bwǝ̀lna, jàlà n'ê nyǐ gùlú w lyì bí yò e jà bǝ̀ n'ê byili Yi zɔ̀mɛ̀ rɛ́. ¹² Ń pɔ paánsɛ́ sǝ̀myɛ́ ń lyì bí ni mùnì bǝ ŋwɛ̀nɛ́ bǝ twĩ̀ ń tum rí cɛ̀nɛ̀. ¹³ Èta, gùlú w ò wɔ́ ń yala nɛ́ mɔ́ m'a vò yé né. Èta, nǝ́ gakó b'ǎ jǐrh kɔn rǝ̀dù nǝ́ Yi-ni-zhú mú ǹdǝ́ Yi Byǐ mú pár lwar mɔ́ ga wẽ́, nǝ́ yǝ̀ námpwǝ̀lǝ́ Kristǝ wẽ́, nǝ́ yǝ̀ ǹdǝ ń ta námpúm. ¹⁴ Nǝ́ k'é t'á la yál ǹdǝ bǝ̀sɔ́ná ta, sǝ bǝ m'e yǝ́yɛ́lɛ́ nǝ́ba dɛ̃̌ ǹdǝ zho nánfɔ̀lɔ̀ gǝ́ y'a zǝ bǔ-bwǝl o m'o vò, ò gǝ́ zǎ má ta yé. Èta, lyì bí byɛ̀bɛ́ bǝ̀ n'ê gòm kɔma mɔ́ k'ê wàr nǝ́ba bǝ̀ la jǝ́jɔ̀rɔ́ ǹdǝ́ zɔ̀mà dwí tǝ̀ltǝ̀l yé. ¹⁵ Sǝ nǝ́ gǝ n'é byili zhǝ̀n nǝ́ dwã bɛ́ nɛ ǹdǝ́ sónó, nǝ́ b'ǎ byì kɔn gakó wẽ́ ǹdǝ Kristǝ ta. Wɔ́ ńmyɛ̌ ń wɔ́ ń gùlú w yó wǝ́. ¹⁶ Wɔ́ ńmyɛ̌ jàn yil ń yala nɛ́ kǝ̀kàlsɛ́ gakó zhí dwã nɛ sǝ̀ wɔ́ kɔn rǝ̀dù. Wɔ́ rǝ̀myɛ́ è ce, yala nɛ́ kǝ̀kàlà èdù gakó gǝ n'ê twĩ̀ è tum rí cɛ̀nɛ̀, nǝ̀ gakó n'e byìl sónó wẽ́. ¹⁷ À n'â lwǝ̀l ába ǹdǝ́ à wu gakó Cǐnnǝ mó yil ré yilǝ, s'á bǝ̀k'á k'á wɛ̀rhɛ́ ǹdǝ byɛ̀bɛ́ bǝ̀ yǝ̀l Yi rí tɛ̀bɛ́ rǝ̀ wɔ́ zhǝ̀n mɔ́ pár ta yé. Bǝ̀ n'ê tó bǝ̀ wun bùlǝ̀ né nǝ̀ bǝ kùr zhe mó ne. ¹⁸ Bǝ̀ surhǝ né pyi, bǝ̀ wẽ́ ne myɛ j'à nyɛ̌ nánkùùli, bǝ̀ yǝ̀l nǝ̀ kùrǝ̀ yé. Bǝ̀ twǝ́r tɛ̀nɛ́ nyǔ mú mɔ̀bɔ́ Yi n'ê pɛ mɔ́ wẽ́ yé. ¹⁹ Bǝ̀ k'ê yǝ̀l kɔn dɛ̀bɛ́ rǝ̀ càn ǹdǝ́ dɛ̀bɛ́ rǝ̀ bǝ càn pár dwã w yé. Bǝ̀ k'ê yǝ̀l cìzhìl myɛ pár yé. Bǝ̀ n'ê twĩ̀ ywǎl tumǝ, bǝ̀ t'â dùr ywẽ yé. ²⁰ Sǝ è dǝ̀ èta bǝ̀ byili ámyɛ̌ nɛ Kristǝ shò-kwã nɛ́ yé. ²¹ Ámyɛ̌ byɛ̀bɛ́ á mù dwã nɛ ǹdǝ́ Yezu Kristǝ mó, bǝ̀ yǝ̀ ába zhǝ̀n rɛ́ ń shò-kwã nɛ́ mɔ́ byili nà? ²² Á mǝ̌ s'á yẽ̌ á shãã ga tùntwǝ̃̀ǝ̃̀ né ne. Wɔ́ á yò zhìlù jàà w tùntwǝ̃̀ǝ̃̀ né nǝ̀myɛ́ y'à zǝ ába nǝ̀ la nɛ́. Yẽ̌-nǝ ne ǹdǝ lò gǝ́ y'ǎ ji ǹ yala gɔ̀nɔ̀ kɔ̀bɔ́ ò k'ô bǝ càn myǐn ní. ²³ Yẽ̌-nǝ Yi Eshirhǝ y pyìrhí á wun ní ǹdǝ è gǝ̀ n'ê yǎl nɛ́. ²⁴ Yál-na lyì-dùlǝ̀, ǹdǝ wɔ́ kàmǝ̀-zù-dùrh á zù ta. Lyì-dùlǝ̀ bé bǝ̀myɛ́ mɔ́ wɔ́ Yi rǝ̀ wɛ̀rhɛ́ bɛ ǹdǝ rǝ̀ gǝ́ n'ê yǎl nɛ́. Bǝ̀ tó zhǝ̀n rɛ́ dɛnnɛ bǝ jǐrh Yi lyì, wu-cángá cìnǝ́. ²⁵ Rǝ̀myɛ́ ce, á bǝ̀k'á gõ̀ kɔma yé. Lò gakó mǝ̌ sǝ́ byili ǹ dõ ne, bǝ̀ nǝ́myɛ̌ gakó wɔ́ kɔn rǝ̀dù Kristǝ yala nɛ́ wẽ́. ²⁶ Á lyimǝ gǝ tú nǝ̀ zɛ̃̀ yi ní, s'á bǝ̀k'á wɛrhɛ́ yǝ̀-bǝlɔ̀lɔ́ yé. Bá á gǝ kwè lyim myɛ, sǝ yi bǝ̀k'a zù ǹdǝ́ rǝ̀ gwẽ̌ n'ê yì yé. ²⁷ Á bǝ̀k'á pǝ bɔ̀l Shǝtana nɛ e zù á wẽ́ yé. ²⁸ Lò mɔ̀bɔ́ ń yà ń nǝ́ ń ŋwɔ̀là, sǝ ń bǝ̀ká n kǝ́ n ŋwɔ̀ yé, sǝ ce jàn nɛ́ n twĩ̀ ǹdǝ́ ń sǝ̀pwà jɛ̀sɛ́. Ń bǝ̀ká n wɛ̀rhɛ́ yǔyǔ yé. Èta, ń bà n ŋwɛ̀nɛ́ n nǝ kɔn n mǝ n sɛ̃ lo mɔ̀bɔ́ ń bǝ zhe ne. ²⁹ Zɔ̀mà nyɛ̀bɛ́ nǝ̀ bǝ càn bǝ mǝ̌ sǝ nǝ shí á nyú w yé. Zɔ̌m-na zɔ̀mà nyɛ̀bɛ́ nǝ̀ zhe kùr nǝ̀ wɔ̌ nǝ̀ b'a sɛ̃ lyì bí byɛ̀bɛ́ á n'á zɔ̀m nɛ á byili bi mú ni, mùnì ga bǝ̀ Yi-ni-zhú jàn rɛ́ súlí. ³⁰ Yi zǝ rǝ̀ Eshirhǝ y rǝ cĩ́ rǝ̀ cìcì myɔrjɔ á yala nɛ. Á bǝ̀k'á zhìlì è wu ni yé, bǝ̀ wɔ́ èmyɛ́ è ce á yě bǝ̀ Yi b'a vwǎrh ába námpúm á yǝ̀-bǝlwàálɛ́ wẽ́ dɛ̃ rǝ̀dù. ³¹ Lò gǝ wɛ̀rhɛ́ ába lwɛlɛ, s'á bǝ̀k'á cĩ́ ri á wẽ́ yé. Á bǝ̀k'á kwè lyim, á b'á pupwiri tɛ̃́ yé. Á bǝ̀k'á bya dwã yé, á bǝ̀k'á tùrh dwã yé. Dɛ̃̌-na á cìn ǹdǝ́ wu-bárhɛ́ tùntwǝ̃̀ǝ̃̀ dwí gakó. ³² Wɛ̀rhɛ́-na cɛ̀nɛ̀ dwã nɛ, s'á zǝ wu-bɔ̀nɔ̀ ǹdǝ́ dwã. Pa-na dwã sǔbri ǹdǝ Yi gǝ́ tó Kristǝ dɛnnɛ rǝ pǝ ába sǔbri ní.