¹ Wɔ́ rǝ̀myɛ́ è ce àmyɛ́ Pwǝǝ n'â lwǝ̀l Yi á yilǝ. Bǝ̀ co ne byǝ̀nǝ́-jù wǝ̀, à gǝ́ n'â twĩ̀ Yezu Kristǝ tum rí à pɛ ámyɛ̌ byɛ̀bɛ́ á dǝ̀ Zhwifubá ne mó yilǝ. ² Zhǝ̀nà, à yě pamparɛ̃ɛ̃ b'ǎ nyɛ̀ɛ̀ tum rí tɛ̀bɛ́ Yi tó rǝ̀ sónó w dɛnnɛ rǝ pẽ a twĩ̀ mú yilǝ. ³ Yi byili ni kɔn rɛ́ dɛ̀bɛ́ rǝ̀ y'à n'ê yǎl rǝ wɛ̀rhɛ́ mɔ́. Rǝ̀ j'à yǝ̀ ce lò lò lwar rǝ̀myɛ́ shãã ga yé. À zɔ̀m kɔn rɛ́ rǝ̀myɛ́ yò ǹd'ába námpɔ́lɛ́. ⁴ Á gǝ kàrmɔ à sɛ́bɛ́ rɛ́ á b'ǎ lwar kɔn rɛ́ dɛ̀bɛ́ Yi byili ni rǝ̀ y'à shèè Kristǝ shò-kwã nɛ́ mɔ́ kùrǝ̀. ⁵ Shãã ga, Yi yǝ̀ ce lyi bí lwar kɔn rɛ́ rǝ̀myɛ́ mɔ́ kùr yé. Sǝ èlǎsɛ̃́, rǝ̀ byili ri rǝ̀ tùntúmǝ́ ǹdǝ́ rǝ̀ nyì-zwennǝ bé rǝ̀ cír mó ne ǹdǝ́ Eshirhǝ náàcɛ̀nɛ́ jàn. ⁶ Kɔn rɛ́ rǝ̀myɛ́ wɔ́: byɛ̀bɛ́ bǝ̀ dǝ̀ Zhwifubá mɔ́ gǝ́ tó yò-ècɔ̀nɔ̀ nyí rí dɛnnɛ bǝ zu Kristǝ mó ce, bǝ̀myɛ b'a nǝ cǝl kɔn rɛ́ dɛ̀bɛ́ Yi y'à bwǝl rǝ̀ nyí rǝ̀ la rǝ̀ lyi bí ni pɔ mɔ́ wẽ́. Bǝ̀myɛ́ ǹdǝ́ Zhwifubá ga jǐrh kɔn rǝ̀dù. Bǝ̀myɛ twǝ́r ŋwɛ́nɛ́ kɔn rɛ́ dɛ̀bɛ́ Yi bwǝl rǝ̀ nyí rǝ̀ la pɔ mɔ́ wẽ́. ⁷ Wɔ́ Yi rǝ̀ ce à n'â bwǝ̀l yò-ècɔ̀nɔ̀ nyí rí. Wɔ́ rǝ̀myɛ́ rǝ̀ tó rǝ̀ sónó w ǹdǝ́ rǝ̀ jàn rɛ́ nánfɔ̀lɔ̀ w dɛnnɛ rǝ pɛ̃ tum rí rǝ̀myɛ́. ⁸ Àmyɛ́ à wɔ́ Kristǝ-lyì bí gakó námpɔ́lɛ́. Sǝ ǹdǝ́ rǝ̀myɛ́ ga, Yi pɔ nɛ sɔ́má à n'â bwǝ̀l Kristǝ yò-ècɔ̀nɔ̀ w nyí à byili byɛ̀bɛ́ bǝ̀ dǝ̀ Zhwifubá mɔ́ nɛ. Kɔn rɛ́ dɛ̀bɛ́ yò-ècɔ̀nɔ̀ nyí rí n'ê pɛ mɔ́ wɔ́ nǝ̀cɛ̀ndɛ nánfɔ̀lɔ̀; rǝ̀ kùr nyɔ̀ɔ̀ zum ǹdǝ́ lyì bí. ⁹ Yi ce à n'â byili lyì bí gakó ne kɔn rɛ́ dɛ̀bɛ́ rǝ y'à shèè shãã ga mɔ́ gǝ́ la nɛ́ wɔ̀rhɔ́. Wɔ́ Yi rí tɛ̀bɛ́ rǝ̀ wɛ̀rhɛ́ kɔn gakó mó rǝ̀ y'à shèè kɔn rɛ́ rǝ̀myɛ́ mɔ́ kɔn m'e yí zà. Lyì bí yǝ̀ rǝ̀ kùr lwar yé. ¹⁰ Yi wɛ̀rhɛ́ èta mùnì ga, èlǎsɛ̃́, jàn cìnǝ́ byɛ̀bɛ́ bǝ̀ ŋwɛ́nɛ́ dɛ̃̌ bǝ̀ zhe ŋwɔ̀nɔ́ mɔ́ dwí gakó tó Kristǝ-lyì bí gùlú w dɛnnɛ bǝ lwar bǝ̀ Yi surhǝ né já dɛ̃́dɛ̃́. ¹¹ Rǝ̀ tó nǝ́ Cǐnnǝ Yezu Kristǝ dɛnnɛ rǝ wɛ̀rhɛ́ rǝ̀myɛ́ ǹdǝ rǝ̀ gǝ́ n'ê yǎl bǝ̀ kɔn tó né ǹdǝ́ lũ w y'à gwẽ̌ yǝ̀ kùr ji yé. ¹² Nǝ́ gǝ́ mù dwã nɛ ǹdǝ́ Kristǝ, nǝ́ zhí mu mú ce, nǝ́ wɔ̌ nǝ́ bwǝlse Yi ni ǹdǝ́ nǝ́ wun gakó, ywẽ k'ê bǝ nǝ́ba zhe yé. ¹³ wɔ́ rǝ̀myɛ́ è ce, à n'â lwǝ̀l ába, á bǝ̀k'á tǝ̀ nɔ̀nɔ̀ w kɔ̀bɔ́ à n'â nwɛ̀nɛ̀ á yil mó yil á gǝ á wun yé. Nɔ̀nɔ̀ w òmyɛ́ b'a ce á nǝ cǝl Yi zùwǝ́ y wẽ́. ¹⁴ Wɔ́ rǝ̀myɛ́ è ce, à n'â wùlì nǝ́ Da Yi yé né. ¹⁵ Ń ce dwí tɛ̀bɛ́ gakó rǝ̀ ŋwɛ́nɛ́ dɛ̃̌ ǹdǝ́ cɛ yó zhe rǝ̀ yilǝ. ¹⁶ Yi zhe zùwǝ́ dɛ̃́dɛ̃́, rǝ̀ zhe kɔn gakó. Wɔ́ rǝ̀myɛ́ yil à n'â lwǝ̀l re bǝ̀ rǝ̀ pǝ ába wu-jɔ̀, mùnì á tó rǝ̀ Eshirhǝ y dɛnnɛ a zǝ jàn nánfɔ̀lɔ̀, ¹⁷ sǝ Kristǝ yǝ̀ á wun ní wẽ́, á gǝ́ zhí mu mú yilǝ. Zhǐ-nǝ kẽkẽ, á swéné dwã, á nǝ̀rh pǝ tɛ̃́, á bǝ̀k'á zhízhǐ yé. ¹⁸ Èta, á b'ǎ ŋwɛ̀nɛ́ á tó Yi lyì bí dwã bɛ́ gakó ne á lwar Kristǝ sónó w já dɛ̃́dɛ̃́, ò dǝ̀ zhɔ̌ kɔn mɔ́ gǝ́ wɔ́ nɛ́. ¹⁹ Á b'ǎ lwar ń sónó w ò kùr lwar mú gǝ́ wɔ́ kɔn ná-dwí yilǝ, e jà wɔ́ kɔn dɛ̀bɛ́ numbyíní wàr ò kùr è n'ê swí yé. Èta, Yi cìci b'a yǝ̀ á wẽ́ námpúm. ²⁰ Yi nǝ còrhó! Rǝ̀ jàn rɛ́ nánfɔ̀lɔ̀ w gǝ́ ŋwɛ́nɛ́ ǹdǝ́ nǝ́ba mɔ́ ce, nǝ́ gǝ lwǝ̀l re kɔn, rǝ̀ y'a pǝ nǝ́ba kɔn dwini nǝ́ gǝ́ lwǝ̀l né, ráá nǝ́ gǝ́ n'é bùl né. ²¹ Yi nǝ còrhó twéé gakó Kristǝ-lyì gùlú w wẽ́ Yezu Kristǝ jàn yilǝ, byinǝ nǝ̀ bǝ zhɔ̌! Amɛn!