¹ Shãã ga á dwǝ́ǝ́ré ǹdǝ́ á yǝ̀-bǝlwàálɛ́ y'à ce á cì. ² Á y'ǎ n'á nyǐ lũ w kɔ̀bɔ́ lyì bí tùntwǝ̃̀ǝ̃̀ né nǝ̀ wɔ́ lwɛlɛ mɔ́, á zɛ̃̀ á tó á n'á wɛ̀rhɛ́ ǹdǝ bǝ̀ ta. Á y'ǎ n'á wɛ̀rhɛ́ jàn cìnǝ́ námmǝlwǎlsɛ́ sǝ̀ ŋwɛ́nɛ́ dɛ̃̌ mɔ́ yó-cǝ́bal mɔ́ pùbùlǝ̀. Wɔ́ ńmyɛ̌ ń ŋwɛ́nɛ́ lyì bí byɛ̀bɛ́ bǝ̀ t'â wɛ̀rhɛ́ Yi pùbùlǝ̀ mó wẽ́ èlǎsɛ̃́ ń nǝ́ ń twĩ̀. ³ Shãã ga nǝ́myɛ̌ gakó y'ǎ wɔ́ ǹdǝ lù w lyì bí ta. Nǝ́ tùntwǝ̃̀ǝ̃̀ né y'à wɔ́ ǹdǝ nǝ́ wun ní gǝ́ n'ê yǎl nɛ́. Èta, nǝ́ y'ǎ n'é tó nǝ́ shilǝ námmǝlwǎlsɛ́ ǹdǝ́ nǝ́ wun bùlǝ̀ námmǝlwǎlsɛ́ gǝ́ n'ê yǎl nɛ́. Nǝ́myɛ̌ gǝ́ y'ǎ wɔ́ èta mɔ́ ce, Yi lyim y'à zɛ̃̀ ǹdǝ́ nǝ́ba rǝ̀ la nǝ́ba còrhò-tum pɔ ǹdǝ bǝ̀ ta. ⁴ Sǝ Yi nɔ̀nɔ̀-dǔr mó já dɛ̃́dɛ̃́. Rǝ̀ só nǝ́ba kɔn lyɛ̃ cɛ nɛ. ⁵ Nǝ́ dwǝ́ǝ́ré y'à ce nǝ́ cì, sǝ Yi ce nǝ́ tó Kristǝ ne nǝ́ bwìrhì. Wɔ́ rǝ̀ gǝ́ só nǝ́ba dɛ̃́dɛ̃́ mɔ́ è ce rǝ vwǎrh ába. ⁶ Rǝ̀ tó Yezu Kristǝ dɛnnɛ rǝ bwìrhì nǝ́ba, mùnì nǝ́ tó mo nǝ́ jòm Arǝzana w nǝ́ jí pyɛ̀lɛ̀. ⁷ Èta, Yi wɛ̀rhɛ́ nǝ́ba cɛ̀nɛ̀ Kristǝ jàn yilǝ, mùnì ga byinǝ né nyɛ̀bɛ́ nǝ̀ bàn mɔ́ wẽ́, lyì dwí gakó lwar bǝ̀ rǝ̀ tó Yezu Kristǝ dɛnnɛ rǝ byili rǝ̀ nɔ̀nɔ̀-dǔr mó ǹdǝ́ rǝ̀ sónó wǝ́ ⁸ Yi tó rǝ̀ pɛnɛ́ nánfò w dɛnnɛ nɛ rǝ vwǎrh ába, á gǝ́ zhí Kristǝ ne mó yilǝ. Rǝ̀myɛ́ wɔ́ Yi pɛnɛ́. È dǝ̀ ámyɛ̌ sõ rǝ̀myɛ́ shí ní yé. ⁹ È dǝ̀ á tùm-ècɛ̀nà nǝ̀ ce á nǝ vwǎrh yé. Èta, lò lò wàr ń mà n zhẽ̌ ń cìn dɛ̃̌ yé. ¹⁰ Wɔ́ Yi rǝ̀ wɛ̀rhɛ́ nǝ́ba. Rǝ̀ wɛ̀rhɛ́ nǝ́ba Yezu Kristǝ jàn yilǝ, mùnì ga nǝ́ twĩ̀ tùntũ̀-ècɛ̀nà. Wɔ́ rǝ̀myɛ́ cìcì rǝ̀ dámǎ rǝ tɛnɛ tùntwǝ̃̀ǝ̃̀ né nǝ̀myɛ́ rǝ cĩ́ nǝ́ba. ¹¹ Ámyɛ̌ byɛ̀bɛ́ bǝ̀ yǝ̀ lùl Zhwifubá dwí rí wẽ́ mó, bǝ̀ y'à t'â gòm ába yé. Sǝ bǝ̀ gǝ́ y'à n'ê gòm Zhwifubá mó ce, bǝ̀ tǝ̀ rǝ̀myɛ́ yil bǝ̀ n'ê byẽ̀ ába bǝ̀ lyì byɛ̀bɛ́ bǝ̀ yǝ̀ gòm, bǝ zɛ̃̀ bǝ̀ n'ê byẽ̀ bǝ̀ cìn bǝ̀ lyì byɛ̀bɛ́ bǝ̀ gòmǝ̀, kɔn rɛ́ tɛ̀bɛ́ bǝ̀ n'ê gòm bǝ̀ yala nɛ́ nɛ mɔ́ yilǝ. Lyǐrh-nǝ bǝ̀ wɔ́ èta á y'ǎ wɔ́ nɛ́ shãã ga. ¹² Lwar-na bǝ̀, rǝ̀myɛ́ yi ní, á y'ǎ gwẽ̌ yǝ̀ Kristǝ zwì yé; á y'ǎ wɔ́ zhǝlǝ; á y'ǎ tɛ̀nɛ́ Yi lyì bí rǝ̀ cír mó wẽ́ yé. Yi y'à zɔ dɔbrɛ ǹdǝ́ rǝ̀ lyì bí, rǝ bwǝl be nyí, sǝ ámyɛ̌ twǝ́r y'à tɛ̀nɛ́ nyì-bwelé y èmyɛ́ wẽ́ yé. Á y'ǎ ŋwɛ́nɛ́ lũ w wẽ́, á yǝ̀l Yi párá, á t'á dɛ̃̀ kɔn rǝ̀ sõ myɛ yé. ¹³ Sǝ èlǎsɛ̃́, á gǝ́ zù Yezu Kristǝ mó ce, á tó ń jal mɔ́ mǝ̀ ló tɛ̃́ mɔ́ dɛnnɛ á bwǝlse Yi ni, e jà shãã ga á y'ǎ nyɛ ǹdǝ́ rɛ. ¹⁴ Wɔ́ Kristǝ cìcì ń pɔ ń myǝ̌l, n mǝ n ce yǝ̀-zùlǝ́ jòm Zhwifubá ǹdǝ́ byɛ̀bɛ́ bǝ̀ dǝ̀ Zhwifubá mó bwǝ̌l wǝ. Ń vùr kɔn rɛ́ dɛ̀bɛ́ rǝ̀ y'à ŋwɛ́nɛ́ bǝ̀ cǝcǝl w rǝ̀ pɔr bɛ dwã nɛ, e ce zùùri ŋwɛ́nɛ́ bǝ̀ bwǝ̌l w mó. N ce bǝ̀myɛ́ kùrǝ̀ né nǝ̀lyè y ga dwã yó bǝ jǐrh dwí rǝ̀dù. ¹⁵ N ce Zhwifubá nyǝ́ né ǹdǝ́ nǝ̀ gǝ́ n'ê byili ní gakó k'ê bǝ kùr zhe yé. Ń wɛ̀rhɛ́ èta, n mǝ n ce dwǝ́ né nǝ̀myɛ́ kùrǝ̀ nǝ̀lyè y ga jǐrh dwí nándùl kùr rǝ̀dù, bǝ̀ gǝ́ zù mu mú yilǝ. Wɔ́ èta ń tó né n ce yǝ̀-zùlǝ́ né ŋwɛ́nɛ́ bǝ̀ bwǝ̌l wǝ. ¹⁶ Ń cù dǝ̀-jɔrhɔ́ yó n mǝ n vùr kɔn dɛ̀bɛ́ rǝ̀ y'à ce bǝ̀ n'ê súl dwã mɔ́, bǝ zɛ̃̀ bǝ jǐrh kɔn rǝ̀dù. Ń ce bǝ̀myɛ́ kùrǝ̀ bǝ̀lyè y ga yò k'a kwɛrhɛ ǹdǝ́ Yi. ¹⁷ Èta ń zɔ yǝ̀-zùlǝ́ nyí n mǝ n bǝ̀ n byili ámyɛ̌ byɛ̀bɛ́ á y'ǎ nyɛ ǹdǝ́ Yi mú, ǹdǝ́ byɛ̀bɛ́ bǝ̀ y'à bwǝ́l re mó ne. ¹⁸ Wɔ́ ńmyɛ̌ dɛnnɛ nǝ́myɛ̌ byɛ̀bɛ́ nǝ́ wɔ́ Zhwifubá mó, ǹd'ámyɛ̌ byɛ̀bɛ́ á dǝ̀ Zhwifubá mó b'ǎ tó né nǝ́ bwǝlse Yi ni, Eshirhǝ náàcɛ̀nɛ́ y èdù y jàn yilǝ. ¹⁹ Wɔ́ rǝ̀myɛ́ è ce, á k'á dǝ̀ zhǝlǝ yé. Á k'á dǝ̀ lyì byɛ̀bɛ́ bǝ̀ shí kwã nɛ́ yé. Á zù Yi dwí rí wẽ́ èlǎsɛ̃́. Ámyɛ̌ ǹdǝ́ rǝ̀ dwí rí ga jǐrh kɔn rǝ̀dù. ²⁰ Bǝ̀ zǝ ámyɛ bǝ súlí bǝ̀ n'ê lwì Yi dwí rí jì yǝ́, sǝ wɔ́ Kristǝ tùntúmǝ́ bé ǹdǝ́ Yi nyì-zwennǝ bé bǝ̀ m'e cĩ́ jì y kùr ré. Wɔ́ Yezu Kristǝ cìcì mú ń wɔ́ jì-byòló w nǝ́kulu wǝ́. ²¹ Wɔ́ ńmyɛ̌ yó bǝ̀ n'ê zhílí jì y bokwǎ bɛ́ nɛ bǝ̀ lwì, mùnì ga e zǝ è jàn nɛ, e yǝ̀ Cǐnnǝ mó nyǎ. ²² Á gǝ́ zù mù mú ce, bǝ̀ zǝ ámyɛ bǝ súlí bǝ̀ m'ê lwì jì y kɛ̀bɛ́ Yi tó rǝ̀ Eshirhǝ y dɛnnɛ rǝ̀ ŋwɛ́nɛ́ è wẽ́ mó.