¹ Ámyɛ̌ bǝ̀sɔ́ná bɛ́, zwẽ-nǝ á dabá ǹd'á nábá nyí ni, ǹdǝ Cǐnnǝ mó gǝ́ nǝ́ ń yǎl nɛ́. Rǝ̀myɛ́ wɔ́ kɔn dɛ̀bɛ́ rǝ̀ mǎ. ² Yi nyǝ́ né gakó wẽ́, wɔ́ nyí rí tɛ̀bɛ́ rǝ̀ n'ê wǝ̀l bǝ̀: Nyám ǹ da ndǝ́ ǹ ná mɔ́ nɛ rǝ̀ jɛ̀rɛ̀ rǝ bwǝl nyí rǝ b'e súlí. ³ Rǝ̀ wòwǝ̀: Ǹ gǝ nǝ́ ǹ nyàm ǹ da ǹdǝ́ ǹ ná, ǹb'ǎ zǝ wu-nyɔ̃̀, ǹ myǝ̌l j'a zǝ dwɛ̀lɛ̀ cɛ yó. ⁴ Ámyɛ̌ dabá, bǝ̀k'á wɛ̀rhɛ́ á bǝ̀sɔ́ná bɛ́, á ce bǝ̀ lyimǝ zɛ̃̀ yé. Kɔ́n-na bɛ, s'á cící bi, á cèrhè be, ǹdǝ́ Cǐnnǝ mó cìcì surhǝ né. ⁵ Ámyɛ̌ tùntùnnǝ̀ bé, zwẽ-nǝ á yó-cìnǝ́ bé cɛ yó mó nyí ni. Nyám-na bɛ ǹdǝ́ wu-põ̀, ǹdǝ á gǝ́ n'á zwẽ Kristǝ nyí ni ní. ⁶ È bǝ̀k'a yǝ̀ bǝ̀ gǝ zhǐ bǝ̀ yírhǝ́, á zɛ̃̀ á n'á twĩ̀ á pɛ bɛ ǹdǝ wɔ́ numbyínsi pùbùlǝ̀ wɔ̀rhɔ́ á n'á pyà ta yé. Wɛ̀rhɛ́-na kɔn dɛ̀bɛ́ Yi n'ê yàlá, ǹd'á wun gakó á tumǝ né wẽ́, ǹdǝ Kristǝ tùntùnnǝ̀ ta. ⁷ Twĩ̌-nǝ á pǝ á yó-cìnǝ́ bé ne ǹdǝ́ wu òdù, ǹdǝ wɔ́ Kristǝ ne á n'á twĩ̀ á pɛ ta, sǝ è bǝ̀k'a yǝ̀ ǹdǝ wɔ́ numbyínsi dúdú ni á n'á twĩ̀ á pɛ ta yé. ⁸ Lwar-na bǝ̀ lò mɔ̀bɔ́ ń nǝ́ ń wɛ̀rhɛ́ cɛ̀nɛ̀, rǝ̀-ná-cí gǝ wɔ́ lò tùntùnnǝ̀, ráá ń gǝ cǐ ń cìn myɛ, ń b'a nǝ cɛ̀nɛ̀ rɛ́ ń wɛ̀rhɛ́ mɔ́ Cinnǝ mó sõ. ⁹ Ámyɛ̌ yó-cìnǝ́ bé, ámyɛ wɛ̀rhɛ́-na cɛ̀nɛ̀ ǹd'á tùntùnnǝ̀ bé. Á bǝ̀k'á bya bɛ yé. Lwar-na b'ǎmyɛ̌ ǹdǝ́ bǝ̀myɛ́ ga zhe yó-cǝ́bal mǝ̀dù, ń ŋwɛ́nɛ́ Arǝzana w ń cǐ ámyɛ̌ ga. Lyì bí gakó wɔ́ kɔn rǝ̀dù ń sono. ¹⁰ À zɔ̀mɛ̀ nánkwɛɛ́rɛ́ à la byilu mú, wɔ́ lwǝ́l à n'â lwǝ̀l ába, s'á zhí Cinnǝ mú ni á b'á pyà wu-jɔ̀ ń jàn rɛ́ nánfɔ̀lɔ̀ w wẽ́. ¹¹ Kwě-nǝ Yi búlǝ́ wẽ̀ ré gakó á zǝ á jɔ̃̀ wà, mùnì á ŋwɛ̀nɛ́ á zhì á cẽ Shǝtana sòlò mó. ¹² Nǝ́ t'á bwí ǹdǝ́ numbyínsi yé. Nǝ́ r'é bwí ǹdǝ́ jàn cìnǝ́ námmǝlwǎlsɛ́ shɛ̀bɛ́ dwí gakó sǝ̀ ŋwɛ́nɛ́ dɛ̃̌, yírhǝ́ wàr nǝ̀ nɛ, sǝ̀ zhe jàn ǹdǝ́ ŋwɔ̀nɔ́ cǝ-byín lũ w wẽ́ mó. ¹³ Rǝ̀myɛ́ ce, kwě-nǝ Yi búlǝ́ wẽ̀ ré gakó á zǝ á jɔ̃̀ w èlǎsɛ̃́, mùnì dwã nɛ́ nyɛ̀bɛ́ nǝ̀ bǝ càn mɔ́ gǝ tú nǝ̀ yúwǝ́, s'á ŋwɛ̀nɛ́ á zhì á bú búlǝ́ né kɔn m'e yí nǝ̀ zhɔ̌, s'á zhì á nà y yó kẽkẽ. ¹⁴ Zɛ̃̀-nà á zhì dɛ̃̌ á dɛ̃̀. Ce-nǝ zhǝ̀n rɛ́ á cã̌ nɛ́ ǹdǝ cã̌-tɔ̀nɔ̀ ta. Zwí-nǝ cángá tumǝ né nǝ yǝ̀ ǹdǝ kàmǝ̀-zwǐ kɛ̀bɛ́ á m'á cǝ̀r á cìn búlǝ́ jàà w ta. ¹⁵ Ce-nǝ yǝ̀wǎl á nǝ̀rh né ǹdǝ nǝ̀cìlǝ̀ ta, á m'á bwǝ̀l yò-ècɔ̀nɔ̀ nyí rí rǝ̀ n'ê pɛ yǝ̀-zùlǝ́ mó. ¹⁶ Zǝ-na á Yi-ni-zhú mú mǝ yǝ̀ ku á m'á cǝ̀r á cìn kɔn gakó wẽ́ twéé gakó. Shǝtana gǝ tú è la zǝ è swé ré ǹdǝ́ rǝ̀ myǐn mú e dul ába, sǝ ku w cǝ̀r rè. ¹⁷ Zwẽ-nǝ Yi vwǎrh mɔ́ ǹdǝ cɔ̀bɔ́ yǝ́-pú ta, s'á zwẽ Yi zɔ̀mɛ̀ rɛ́ Eshirhǝ náàcɛ̀nɛ́ n'ê pɛ ába mɔ́ ǹdǝ shù ta. ¹⁸ Ce-nǝ Yi dɛ̃ gakó, á lwǝ̀l re ǹdǝ́ Eshirhǝ náàcɛ̀nɛ́ jàn, s'á zhìli á yala nɛ kɔn gakó wẽ́, á lwǝ̀l re dɛ̃ gakó rǝ̀ lyì bí yilǝ. ¹⁹ Lwǝ̌l-nǝ re àmyɛ yilǝ, mùnì ga à gǝ la zɔ̌m, sǝ rǝ sɛ̃ nɛ ǹdǝ́ zɔ̀mà nyɛ̀bɛ́ nǝ̀ m'a ce a byili yò-ècɔ̀nɔ̀ nyí rí rǝ̀ y'à shèè mó ǹdǝ́ wu-jɔ̀. ²⁰ À wɔ́ yò-ècɔ̀nɔ̀ nyí rí rǝ̀myɛ́ bwǝ̀lnǝ. Wɔ́ rǝ̀myɛ́ yil bǝ̀ zɔ nɛ bǝ ce byǝ̀nǝ́-jù wǝ̀. Lwǝ̌l-nǝ Yi à yilǝ, mùnì a zɔ̀m ǹdǝ á gǝ́ mǝ̌ s'a zɔ̀m nɛ́ ǹdǝ́ wu-jɔ̀. ²¹ Tishiki wɔ́ nǝ́ da-byǐ nántwǝ̌. Ń nǝ́ ń twĩ̀ Cǐnnǝ mó tum rí ǹdǝ kɔn gǝ́ mǝ̌ nɛ́. Ń mà n zɔ̀m à yò ǹd'ába, n byili kɔn dɛ̀bɛ́ à n'â wɛ̀rhɛ́. ²² À n'â twĩ̀ mu á sono, mùnì n byili ába kɔn dɛ̀bɛ́ rǝ̀ ŋwɛ́nɛ́ nǝ́ sono, sǝ n súlí n zǝ á wwun ni. ²³ Nǝ́ Da Yi ǹdǝ́ Cǐnnǝ Yezu Kristǝ m'a ce bǝ̀ yǝ̀-zùlǝ́ né ǹdǝ́ bǝ̀ sonó w yǝ̀ nɛ́ ǹd'ámyɛ̌ ǹdǝ́ nǝ́ da-byǎ bɛ́ gakó, á kwɛrhɛ á zhí Yi ni. ²⁴ Yi b'a cĩ́ bwǝl lyì byɛ̀bɛ́ gakó bǝ̀ só nǝ́ Cǐnnǝ Yezu Kristǝ ǹdǝ́ sónó páá mɔ́ yó!