¹ Lyì y'à ŋwɛ́nɛ́ Esǝrayɛl lyì bí wẽ́ shãã ga, bǝ̀ n'ê gòm kɔma bǝ̀ bǝ̀myɛ́ wɔ́ Yi nyì-zwennǝ. Èta myɛ, kàrmɔ̀ byilnǝ nánkɔ̀mdɛ̀ b'a shèè bǝ yǝ̀ ámyɛ wẽ́ bǝ̀ n'ê cèrhè kɔma nyǝ̀ná lyì bí ni. Bǝ̀ gaga mɔ́ b'a zhɛ̃̀ bǝ̀ yó-cǝ́bal mɔ́ mɔ̀bɔ́ ń vwǎrh bɛ mɔ́. Sǝ bǝ̀ m'a zhìlì bǝ̀ cìcì yò làlà. ² Lyì nánzhǝzhɔ̌ b'a tó be bǝ twĩ̀ yààyàà, sǝ bǝ̀ tùntwǝ̃̀ǝ̃̀ né b'a ce lyì bí tùrh zhǝ̀n sɔ́má yá. ³ Bǝ̀ m'a zǝ numbyínsi surhǝ nyǝ̀ná bǝ jǝ́jɛ̀rɛ́ ába, mùnì bǝ nǝ kɔn. Sǝ bǝ̀ bùrsí kɔ́ mɔ́ ju kùr shãã ga, bǝ̀ yò w zhìlù mú bwǝlse. ⁴ Yi yǝ̀ màlɛ́kabá byɛ̀bɛ́ bǝ̀ wɛ̀rhɛ́ lwɛlɛ mɔ́ nɛ yẽ̌ yé. Rǝ̀ co be nɔ̀nɔ̀ ǹdǝ́ cǝ-byṹ jàà y wa, rǝ ce bǝ lyẽ be ǹdǝ́ nyáná bǝ̀ m'ê dɛ̃̀ bùrsí kɔ́ dɛ̃ rɛ́. ⁵ Rǝ̀ yǝ̀ shãã ga lũ w ni yẽ̌ yé. Rǝ̀ ce dwà nyɔ̀ dɛ̃́dɛ̃́, nɛ̃̌ mɔ́ zhìlì byɛ̀bɛ́ bǝ̀ bǝ shɛ̀ rǝ̀ nyí ni zõ mó lũ wǝ́, sǝ rǝ̀ vwǎrh Nǝwee mó ń nǝ́ ń bwǝ̀l cángá yò-ècɔ̀nɔ̀ nyí rí mú, e súlí lyì dwã bwàlpyɛ̀. ⁶ Rǝ kǝ́ Sɔdɔm ǹdǝ́ Gɔmɔɔrɛ bùrsì, rǝ zǝ myǐn rǝ cɔ̀ cɛmɛ nɛ́ nǝ̀myɛ́. Rǝ̀myɛ́ y'à mǝ̌ sǝ rǝ yǝ̀ myɔrhɔ byɛ̀bɛ́ bǝ̀ bǝ shɛ̀ nyí ni zõ mó yilǝ, mùnì bǝ lwar kɔn dɛ̀bɛ́ rǝ̀ la bɛ wɔ̀rhɔ́. ⁷ Sə rǝ̀ zwẽ Lɔtɛ mɔ́, ń yà ń wɔ́ lyì-twǝ̌ y, ń ŋwɛ́nɛ́ lyì bí byɛ̀bɛ́ bǝ̀ y'à bǝ shɛ̀ Yi nyí ni zõ mó cǝcǝl w twéé twéé ǹdǝ́ wu-zhìlù mú. ⁸ Lyì-twǝ̌ y èmyɛ́ gǝ́ y'à ŋwɛ́nɛ́ bǝ̀ wẽ́, ń yírhǝ́ nǝ bǝ̀ tùntùm-bǝjǝ́ǝ́lé, ń zhã̌ myɛ j'à nyɛ̌ nǝ̀ yò twéé twéé mó, ń wu y'à zhìlì. ⁹ Rǝ̀myɛ́ n'ê byili bǝ̀ Cǐnnǝ mó wɔ̌ ń zwẽ byɛ̀bɛ́ bǝ̀ zhí mu bǝ̀ zhǐ bǝ̀ nà y yó mó nɔ̀nɔ̀ jɔ̃̀ wà, n zɛ̃̀ n zhìlì ń yala nɛ ǹdǝ́ byɛ̀bɛ́ bǝ̀ bǝ shɛ̀ ń nyí ni zõ mó, ń mǝ́ ń dɛ̃̀ bùrsí kɔ́ dɛ̃ rɛ́, n pǝ bɛ còrhò-tum. ¹⁰ Sǝ wɔ́ byɛ̀bɛ́ bǝ̀ t'â zwẽ ń nyí ni, bǝ̀ n'ê wɛ̀rhɛ́ ǹdǝ bǝ̀ yala nɛ́ shilǝ námmǝlwǎlsɛ́ gǝ́ n'ê yǎl nɛ́ mɔ́ nɛ, ń la còrhò-tum pɔ du. Kàrmɔ̀ byilnǝ bé nánkɔ̀mdɛ́ rǝ̀myɛ́ mɔ́ zhe rǝ̀ cìcì zhǝ̀nà; bǝ̀ wɔ́ cìn-byilu cìnǝ́; bǝ̀ n'ê tùrh jàn cìnǝ́ bé bǝ̀ ŋwɛ́nɛ́ dɛ̃̌ yi w bǝ̀ zhe zùwǝ́ mó; bǝ̀ t'â nyàm bɛ̀ yé. ¹¹ Màlɛ́kabá zhe jàn ǹdǝ́ ŋwɔ̀nɔ́ du bǝ̀myɛ́. Sǝ ǹdǝ́ rǝ̀myɛ́ ga, bǝ̀ t'â cĩ́ yò jàn cìnǝ́ bé bǝ̀myɛ́ mɔ́ yó w bǝ tùrh bè Cǐnnǝ mó yé né yé. ¹² Lyì bí bǝ̀myɛ́ mɔ́ wɔ́ kɔn dɛ̀bɛ́ bǝ̀ bùl bǝ̀ kùr yó bǝ̀ n'ê wɛ̀rhɛ́ ǹdǝ vwàmá ta. Bǝ̀ bǝ surhǝ zhe yé. Wɔ́ zal e gu dúdú yil bǝ̀ ŋwɛ́nɛ́. Bǝ̀ n'ê tùrh kɔn dɛ̀bɛ́ bǝ̀ yǝ̀l rǝ̀ párá, sǝ bǝ̀ yò b'a zhìlì ǹdǝ vwàmá ta. ¹³ Wɔ́ rǝ̀myɛ́ rǝ̀ b'a yǝ̀ bǝ̀ còrhò-tum bǝ̀ tùntùm-bǝjǝ́ǝ́lé yilǝ. Bǝ̀ só sǝ bǝ wɛ̀rhɛ́ bǝ̀ shilǝ námmǝlwǎlsɛ́ pùbùlǝ̀ nǝ̀nyɔ́nɔ́ nɛ. Rǝ̀myɛ́ n'ê pɛ bɛ wu-nyɔ̃̀. Bǝ̀ gǝ n'ê tó ába bǝ̀ jí címsi, bǝ̀ só kɔma góm bǝ pǝ ába. Bǝ̀ tùntwǝ̃̀ǝ̃̀ né wɔ́ cìzhìl nyǝ̀ná, nǝ̀ bǝ shil zhe yé. ¹⁴ Bǝ̀ yírhǝ́ t'â nyǐ kaka dõ jàà wà, e súlí fwǝ̌l tumǝ ne yé. Bǝ̀ t'â lyɛ̀ɛ̀ ǹdǝ́ yǝ̀-bǝlwàálɛ wɔ̀rhɔ́ yé. Bǝ̀ n'ê jǝ́jɛ̀rɛ́ lyì bí byɛ̀bɛ́ bǝ̀ surhǝ né bǝ jàà èdù zhǐ mú, bǝ̀ n'ê pyà wársɛ twéé twéé, sǝ bǝ̀ yò b'a zhìlì! ¹⁵ Bǝ̀ yẽ̌ sɔ́má y nántwǝ̌ y ne bǝ ywǝ̀r bǝ jé. Bǝ̀ kwè sɔ́má y kɛ̀bɛ́ Bɔsɔɔrɛ byǐ Balaamɛ kwè mó. Balaamɛ wɔ́ Yi nyì-zwennǝ, sǝ ń swéné wársɛ, n shɛ̀nɛ́ n zwẽ se n twĩ̀ lwɛlɛ. ¹⁶ Ń gǝ́ cẽ Yi nyí ni mú ce, bǝ̀na púr è nyí e zɔ̀m ǹdǝ́ mɔ ǹdǝ numbyíní ta. Bǝ̀na j'à t'â zɔ̀m yé. Èta, è cǝ̀r ń tùm-fwǝ́ǝ́ré yé ne. ¹⁷ Kàrmɔ̀ byilnǝ bé bǝ̀myɛ́ mɔ́ wɔ́ ǹdǝ bǔrh shɛ̀bɛ́ sǝ̀ bǝ nɛ̃̌ zhe ta. Bǝ̀ wɔ́ ǹdǝ bǝ́ban ta, zho nánfɔ̀lɔ̀ n'ô kwè, sǝ Yi tɛnɛ jàà rǝ cĩ́, è nyɛ̌ námbyṹ fúrí, rǝ̀ la bɛ nɛ́ co. ¹⁸ Bǝ̀ n'ê zǝ bǝ̀ cìn-byilu zɔ̀m-fwǝ́ǝ́ré ǹdǝ́ bǝ̀ ywǎl zɔ̀mà nɛ́, bǝ̀ m'ê vwɛ̃ lyì bí byɛ̀bɛ́ bǝ̀ ju kùr bǝ shǝ́r lũ w lyì bí bǝ̀ jé mó wẽ́ mó. ¹⁹ Bǝ̀ n'ê bwǝl nyí bǝ̀ bǝ̀ m'a pǝ bɛ cìn-cìnú, bǝ̀myɛ́ cìcì mú j'à wɔ́ bǝ̀ yala shilǝ né nǝ̀ la bǝ̀ yò zhìlù mú yómǝ́, bǝ̀ kɔn jàn gǝ du lò, ǹ wɔ́ rǝ̀ yóm. ²⁰ Byɛ̀bɛ́ bǝ̀ lwar nǝ́ Cǐnnǝ mó ǹdǝ́ nǝ́ Zwennǝ Yezu Kristǝ pár bǝ shǝ́r lũ w tùntùm-bǝlwàálɛ́ wẽ́ mó, lyì bí bǝ̀myɛ́ gǝ yẽ̌ bǝ̀ cìn nì tùntwǝ̃̀ǝ̃̀ né nǝ̀myɛ́ jɔ̃̀ wà, nǝ k'a ŋwɛ̀nɛ́ bɛ, bǝ̀ yò m'a kwɛrhɛ o cɔ̀ dwini shãã ga. ²¹ Bǝ̀ gǝ y'à yǝ̀ sɔ́má y cángá mɔ́ pár lwar cɔ̃̀ bǝ̀ gǝ lwar è pár bǝ zɛ̃̀ bǝ cẽ Yi nyǝ́ né bǝ̀ byili bi mú. ²² Sǝswalá èdù ŋwɛ́nɛ́ è n'ê wǝ̀lǝ̀: «Kùlí y'a tɔlɛ, e k'a zhízhílí e jí è tǝtɔɔlɛ́.» È dõ k'e wɔ̀: «Bǝ̀ gǝ shàrh kùkú, o k'a vò o byíbyílí bɔ̀bɔ̀rɔ̀ wà.» Rǝ̀myɛ́ ce, kɔn rɛ́ dɛ̀bɛ́ rǝ̀ yú bi mú n'ê byili bǝ̀ sǝswaálsɛ́ zɔ̀mà nɛ́ wɔ́ zhǝ̀nà.