¹ Dɔwabá nántwǝ̌rh, tɛ̀bɛ́ wɔ́ à sábá nǝ̀lyè nyǎn rɛ́ à n'â kɛ̃ à la ába pɔ. Sǝ nǝ̀myɛ́ nǝlyè y ga wẽ́, à n'â yǎl b'ǎ tó kàrmɔ́ à n'â lyǐrh ába mɔ́ dɛnnɛ á surhǝ né pul pamparɛ̃ɛ̃. ² Lyǐrh-nǝ zɔ̀mà nɛ́ nyɛ̀bɛ́ Yi nyì-zwennǝ bé byili shãã ga mɔ́, ǹdǝ́ Cǐnnǝ mó ń wɔ́ nǝ́ zwennǝ mó nyǝ́ né tùntúmǝ́ bé byili ába mó. ³ Sǝ tɛ̀bɛ́ rǝ̀ wɔ́ yò du mú, lwar-na bǝ̀ dwã nɛ́ nánkwaá nɛ́ wẽ́, lyì m'a zɛ̃̀ bǝ̀ n'ê wɛ̀rhɛ́ ǹdǝ bǝ̀ shilǝ námmǝlwǎlsɛ́ gǝ́ n'ê yǎl nɛ́. ⁴ Bǝ̀ b'a mɔ̀n ába bǝ wɔ̀: Yezu yǝ̀ wǝ̀l bǝ̀ ń mà n ká n bǝ̀ nà? Sǝ wɔ́ yẽ̀ ń nǝ ŋwɛ́nɛ́? nǝ́ nàmbala bɛ́ cùwǝ̀, lũ w j'a cẽ o gwẽ̌ zhǐ ǹdǝ ò gǝ́ wɔ́ nɛ́, kaka yǝ̀ lyǝ́r yé. ⁵ Wɔ́ Yi rǝ̀ zǝ rǝ̀ zɔ̀mɛ̀ rɛ́, rǝ wɛ̀rhɛ́ dɛ̃̌ ǹdǝ́ cɛ shãã shãã ga, rǝ ce cɛ y du nɛ̃̌ cǝcǝl wǝ, rǝ wɛ̀rhɛ́ y ǹdǝ́ nɛ̃̌. Bǝ̀ n'ê wɛ̀rhɛ́ ǹdǝ wɔ́ swé bǝ̀ swě rǝ̀myɛ́ ta. ⁶ Wɔ́ nɛ̃̌ mɔ́ mǝ̀myɛ́ cìcì Yi ce mǝ mɔ́lɛ́ shãã ga lũ w mǝ cɔ̀ wa. ⁷ Wɔ́ zɔ̀mɛ̀ rɛ́ rǝ̀myɛ́ cìcì rǝ̀ gwẽ̌ zǝ dɛ̃̌ ǹdǝ́ cɛ y rǝ̀ zhǐ zà zà, rǝ̀ m'ê dɛ̃̀ lyì bí byɛ̀bɛ́ bǝ̀ bǝ shɛ̀ nyí zõ búrsí dɛ̃ rɛ́. Wɔ́ dɛ̃ rɛ́ rǝ̀myɛ́ yù w Yi la dɛ̃̌ ǹdǝ́ cɛ y yò zhìlù ǹdǝ́ myǐn. ⁸ Dɔwabá nántwǝ̌rh, kɔn rǝ̀dù ŋwɛ́nɛ́ á bǝ mǝ̌ s'á swě yé: dẽ rǝ̀dù nyɛ̌ ǹdǝ byinǝ mɔ̀rhɔ̀ ta, byinǝ mɔ̀rhɔ̀ nyɛ̌ ǹdǝ dɛ̃ rǝ̀dù ta Cǐnnǝ mó yilǝ. ⁹ Lyì jàlà n'ê bùl bǝ̀ Cǐnnǝ mó nǝ́ ń dɛnɛ ǹdǝ́ ń nyì-bwelé y pyǐrh, s'e dǝ̀ èta yé. Ń nǝ́ ń yǎl bǝ̀ lyì bi gakó pyìrhí bǝ̀ wun bǝ yẽ̌ lwɛlɛ wɔ̀rhɔ́ nɛ. Wɔ́ rǝ̀myɛ́ è ce, ń nǝ́ ń zhìlì ń yala ǹd'ába, mùnì lò mǝ̀dù ga yò bǝ̀ká n zhìlì yé. ¹⁰ Cǐnnǝ mó dɛ̃ rɛ́ b'a jàr bɛ ǹdǝ ŋwɔ̀l-bal ta. Sǝ rǝ̀myɛ́ yùwǝ̀, dɛ̃̌ yi rí b'a jé ǹdǝ́ sɔ̀ nánfɔ̀lɔ̀ kɔ̀bɔ́ ò n'ô zɛ̃̀ wu ni. Wẽ̀ tɛ̀bɛ́ rǝ̀ ŋwɛ́nɛ́ dɛ̃̌ yi w mú b'a shɛ̃̀ bárhɛ́ rǝ yǝ̌l. Yi b'a kǝ́ lyì bí byɛ̀bɛ́ bǝ̀ ŋwɛ́nɛ́ cɛ yó mó bǝ̀ tùntwǝ̃̀ǝ̃̀ né yilǝ. ¹¹ Rǝ̀myɛ́ gakó gǝ́ la jó èta mɔ́ ce, ámyɛ cìcì mú mǝ̌ s'á lwar á gǝ́ m'ǎ zǝ á cìn ní á tùntwǝ̃̀ǝ̃̀ né wẽ́. Á tùntwǝ̃̀ǝ̃̀ né mǝ̌ sǝ nǝ yí Yi pùbùlǝ̀, s'á zhí ri, ¹² á m'á dɛ̃̀ rǝ̀ dɛ̃ rɛ́. Ce-nǝ jàn nɛ́ á tùntwǝ̃̀ǝ̃̀ né ce dɛ̃ rɛ́ yí làlà. Rǝ̀myɛ́ yùwǝ̀, myǐn mú b'a cɔ̀ dɛ̃̌ yi rí, sǝ mǝ̀ lumi rí b'a lyɛ̃ rǝ yǝ̌l tɛ̀bɛ́ gakó rǝ̀ ŋwɛ́nɛ́ dɛ̃̌. ¹³ Yi bwǝl nyí bǝ̀ rǝ̀ b'a ce dɛ̃̌ nándwǝ̃̀ ǹdǝ́ cɛ nándwǝ̃̀ yǝ̀ nɛ́, sǝ cánga tumǝ b'a yǝ̀ rǝ̀ wẽ́. Wɔ́ rǝ̀myɛ́ nǝ́ n'é dɛ̃̀. ¹⁴ Rǝ̀myɛ́ ce, dɔwabá nántwǝ̌rh, ce-nǝ jàn nɛ́ á yǝ̀ wárhgáá, dóó bǝ̀k'a yǝ̀ á yó w Yi yé né yé, sǝ yǝ̀-zùlǝ́ yǝ̀ ámyɛ̌ ǹdǝ́ rǝ̀myɛ́ ga bwǝ̌l wǝ, á b'á dɛ̃̀ dɛ̃ rɛ́ rǝ̀myɛ́. ¹⁵ Lwar-na bǝ̀ nǝ́ Cǐnnǝ mó gǝ́ nǝ́ ń zhìlì ń yala nɛ mɔ́, wɔ́ mùnì ga á nǝ vwǎrh. Wɔ́ èta nǝ́ da-byǐ nántwǝ̌ Pwǝǝ kɛ̃ n byili ába né. Ń zɔ̀m ǹdǝ́ surhǝ né nyɛ̀bɛ́ Yi pɔ mɔ mɔ́. ¹⁶ Ń zɔ̀m yò w òmyɛ́ sábá nɛ́ nyɛ̀bɛ́ gakó ń kɛ̃ rǝ̀myɛ́ yil mó wẽ́. Zɔ̀mà jàlà ŋwɛ́nɛ́ ń sábá nɛ́ wẽ́ nǝ̀ kùrǝ̀ nyɔ̀ɔ̀ zum. Rǝ̀myɛ́ ce, lyì bí byɛ̀bɛ́ bǝ̀ bǝ bǝ̀ nà yó zhǐ kẽkẽ bǝ̀ yǝ̀ kaka kùr swí mú n'ê lyǝ́r zɔ̀mà nɛ́ nǝ̀myɛ́. Bǝ̀ n'ê wɛ̀rhɛ́ èta Yi zɔ̀mɛ̀ rɛ́ sɛ́bɛ́ jààsɛ dwã myɛ wẽ́, sǝ rǝ̀myɛ́ wɔ́ bǝ̀ cìcì yò bǝ̀ n'ê zhìlì. ¹⁷ Wɔ́ rǝ̀myɛ́ à dámǎ à n'â byili ába dɔwabá nántwǝ̌rh. Rǝ̀myɛ́ ce, dɛ̃̌-na á cìnǝ̀, bǝ̀k'á yẽ̌ byɛ̀bɛ́ bǝ̀ bǝ shɛ̀ Yi nyǝ́ né zõ mó ne bǝ jǝ́jɛ̀rɛ̀ yé, mùnì ga á ŋwɛ̀nɛ́ á zhì kẽkẽ. ¹⁸ Ce-nǝ jàn nɛ́ á cǝ̀ǝ̀le á yǝ̀ nǝ́ Cǐnnǝ mó ǹdǝ́ nǝ́ Zwennǝ Yezu Kristǝ sónó w wẽ́, á lwar ń pár á súlí. Ń yil ré b'a nǝ còrhó èlǎsɛ̃́ ǹdǝ́ byinǝ nǝ̀ bǝ zhɔ̌ zhe yilǝ! Amɛ̀n!