¹ Àmyɛ́ Shǝmɔ-Pyɛɛrɛ, à wɔ́ Yezu Kristǝ tùntùnnǝ̀ ǹdǝ́ ń tùntúm, à n'â kɛ̃ sɛ́bɛ́ rɛ́ tɛ̀bɛ́. Yezu Kristǝ wɔ́ nǝ́ Yi ǹdǝ́ nǝ́ Zwennǝ. Ń wɔ́ wu-cángá cí. Wɔ́ rǝ̀myɛ́ yilǝ, ń ce ámyɛ zù mù ǹdǝ nǝ́myɛ̌ ta. Wɔ́ ámyɛ̌ nɛ à n'â kɛ̃ sɛ́bɛ́ rɛ́ tɛ̀bɛ́ à la pɔ. ² Yi ǹdǝ́ nǝ́ Cǐnnǝ Yezu b'a cĩ́ bwǝl á yó, sǝ bǝ̀ yǝ̀-zùlǝ́ né j'â n'ê súlí á yó w twéé twéé, á gǝ́ yě bǝ̀ pár mɔ́ yilǝ! ³ Yi gǝ́ wɔ́ jàn cǝ́bal mɔ́ ce, rǝ̀ pɔ nǝ́ba kɔn dɛ̀bɛ́ gakó rǝ̀ b'a ce nǝ́ zhì nǝ́ nà y yó nǝ́ zhí rǝ̀myɛ́ nɛ, sǝ nǝ́ zǝ myǝ̌l. Rǝ̀ ce nǝ́ lwar mɔ̀bɔ́ ń byẽ̀ nǝ́ba mùnì nǝ́ nǝ ń zùwǝ́ y ǹdǝ́ ń cɛ̀nɛ̀ rɛ́ mɔ́ gǝ́ wɔ́ nɛ́. ⁴ Èta, Yi pɔ nǝ́ba rǝ̀ cɛ̀nɛ̀ pansɛ́ nánfwààlɛ́ rǝ̀ y'à bwǝl nǝ́ba sǝ̀ nyí mú. Wɔ́ cɛ̀nɛ̀ paánsɛ́ sǝ̀myɛ́ mɔ́ dɛnnɛ á b'ǎ tó né á yẽ̌ shilǝ námmǝlwǎlsɛ́ sǝ̀ ŋwɛ́nɛ́ sǝ̀ n'ê zhìlì lyì bí yò lũ w wẽ́ mó ne, á wu yǝ̀ òdù ǹdǝ́ Yi cìcì. ⁵ Rǝ̀myɛ́ ce, ce-nǝ jàn nɛ́ á twĩ̀ tùm-ècɛ̀nà á súlí á Yi-ni-zhú mú ni. Á gǝ n'á twĩ̀ tùm-ècɛ̀nà, s'á lwar Yi pùbùlǝ̀ né myɛ á súlí. ⁶ Á gǝ lwar Yi pùbùlǝ̀ né, s'á yǝ̀ cìn-zal cìnǝ́ myɛ á súlí. Á gǝ wɔ́ cìn-zal cìnǝ́, s'á yǝ̀ cìn-pyɔ́nɔ́ cìnǝ́ myɛ á súlí. Á gǝ wɔ́ cìn-pyɔ́nɔ́ cìnǝ́, s'á zhí Yi ni ǹd'á wun gakó á súlí. ⁷ Á gǝ zhí Yi ni ǹd'á wun gakó, s'á wɛ̀rhɛ́ cɛ̀nɛ̀ ǹdǝ́ dwã á súlí, s'á swéné dwã. ⁸ Á gǝ wɔ́ rǝ̀myɛ́ gakó cìnǝ́ kɔn yí, rǝ̀ b'a pǝ ába yǝ̀wǎl rǝ ce á kwɛrhɛ á lwar nǝ́ Cǐnnǝ Yezu Kristǝ párá. ⁹ Sǝ lò mɔ̀bɔ́ ǹ dǝ̀ rǝ̀myɛ́ gakó cí, ǹ wɔ́ ǹdǝ lyìlyǒ ta, ǹ bǝ yé né nɛ yé. Ǹ kǝ́ ǹ yǝ̀l bǝ̀ bǝ̀ vùr ǹ shãã ga yǝ̀-bǝlwàálɛ́ yé. ¹⁰ Da-byǎ, Yi cír ába, rǝ byẽ̀ ába. Rǝ̀myɛ́ ce, ce-nǝ jàn nɛ́ á zhì á nà y yó á shɛ̀ rǝ̀ byǝ̀l ré twéé twéé. Á gǝ n'á wɛ̀rhɛ́ èta, á t'á la tɛ̃́ tu gaga yé. ¹¹ Èta, á b'ǎ nǝ sɔ́má á zù nǝ́ Cǐnnǝ ǹdǝ́ nǝ́ Zwennǝ Yezu Kristǝ tǝnà y è ŋwɛ́nɛ́ byinǝ nǝ̀ bǝ zhɔ̌ zhe yil mó wẽ́ nàná. ¹² Wɔ́ rǝ̀myɛ́ è ce, ǹd'á jɛ̀rɛ̀ á yě ywẽ̀ né nǝ̀myɛ́, á zhǐ á nà y yó zhǝ̀n dɛ́ bǝ̀ byili ába mó wẽ́ ga, à gwẽ̌ n'â lyǐrh ne ába twéé twéé. ¹³ À n'â bùl b'à gǝ́ gwẽ̌ ŋwɛ́nɛ́ lũ w wẽ́ mó, à mǝ̌ s'a sɛ̃ ába á surhǝ né pul ywẽ̀ né nǝ̀myɛ́ shò-kwã nɛ́. ¹⁴ Nǝ́ Cinu Yezu Kristǝ ce a lwar b'à bwǝ́l zhǐr lũ w ò n'ô lyɛ̃ mɔ́ wẽ́. ¹⁵ Sǝ à b'a wɛ̀rhɛ́ à gǝ́ wɔ̌ nɛ́ gakó, mùnì ga, à gǝ tú à tɛ̀nɛ́ myɛ, s'á bǝ̀k'á swě ywẽ̀ né nǝ̀myɛ́ gaga yé. ¹⁶ Nǝ́ gǝ́ byili ába nǝ́ Cǐnnǝ Yezu Kristǝ jàn rɛ́ ǹdǝ́ ń twírí y yò mó, è dǝ̀ sǝswaálsɛ numbyíní tɛ́rɛ́ ǹdǝ́ è surhǝ nǝ́ m'é byili ába yé. Nǝ́ cìcì yírhǝ́ nɔ ń zùwǝ́ yǝ́. ¹⁷ Ń Da Yi wòwǝ̀: «Mɔ̀bɔ́ wɔ́ àmyɛ́ Byǐ, à só mo dɛ̃́dɛ̃́. Wɔ́ ńmyɛ̌ à cír.» Wɔ́ rǝ̀myɛ́ yi ní, Yi jàn-bǝ-swɛ̃́-zhe cǝ́bal mɔ́ pɔ mɔ pyɛ̀lɛ̀ ǹdǝ́ zùwǝ́ nánfɔ̀lɔ̀. ¹⁸ Nǝ́ gǝ́ y'ǎ tó mo nǝ́ ŋwɛ́nɛ́ pyɔ̀ w náàcɔ̀nɔ̀ w yó mó yi ní, wɔ́ rǝ̀myɛ́ yó cǝl ré rǝ̀myɛ́ mɔ́ zhì dɛ̃̌ rǝ zɔ̀m, nǝ́ cìcì zhã̌ nyɛ̀ɛ̀. ¹⁹ Wɔ́ rǝ̀myɛ́ è ce nǝ́ zwẽ Yi nyì-zwennǝ bé zɔ̀mà nɛ́ nǝ́ zhǐ kẽkẽ, tǝ́tɔ̀ná tɛ̀nɛ́ yé. Ámyɛ mǝ̌ s'á cili ni náàcɛ̀nɛ́, bǝ̀ nǝ̀ wɔ́ ǹdǝ pàntɛ́mɛ́ è yǝ̌r cǝ-byín wẽ́ ta, kɔn la b'e yí cǝ-lár, cǝ-lár nǝ̀ŋwɔ w du o yǝ̌r á wun ní. ²⁰ Sǝ kɔn du, lwarna bǝ̀ lò tɛ̀nɛ́ ń wɔ̌ Yi nyì-zwennǝ zɔ̀mà nɛ́ nǝ̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ mó kùrǝ̀ ń la byilu ǹdǝ́ ń sǝ̀pwà jàn yé. ²¹ Lò tɛ̀nɛ́ ń zɔ̀m nyì-zwennǝ zɔ̀mà ǹdǝ́ ń sǝ̀pwà pùbùlǝ̀ yé. Wɔ́ Eshirhǝ náàcɛ̀nɛ́ è ce lyì zɔ̀m zɔ̀mà nɛ́ nyɛ̀bɛ́ nǝ̀ shí Yi sõ mó.