¹ È gǝ wɔ́ paánsɛ́ shɛ̀bɛ́ bǝ̀ n'ê ce dwã yó bǝ̀ la vò bǝ pǝ Yi lyì bí bǝ̀ ŋwɛ́nɛ́ Zhǝrǝzalɛm nɛ́ mɔ́ yilǝ, kɔn dǝ̀ nyɔ́ɔ́ b'à kɛ̃ sɛ́bɛ́ a pǝ ába rǝ̀myɛ́ yil yé. ² 2 À yě b'ǎ n'á yǎl á pǝ zhǝ̀n zhǝ̀nà. Wɔ́ rǝ̀myɛ́ è ce à wu yàl nyɛ̀n a zɔ̀m á yò Masɛdwanɛ Kristǝ-lyì bí sono, a wɔ̀ bǝ̀ nyǐ Akǝyi tǝnà y Kristǝ-lyì bí wɔ́ jẽ̀ nè ga bǝ̀ ju kùr bǝ̀ n'ê yǎl bǝ pa. Á gǝ́ n'á yǎl á pǝ ǹdǝ́ á wun gakó mó n'ê ce yǝ̀wǎl Kristǝ-lyì gùúlí lyì nánzhǝzhɔ̌ wẽ́. ³ Wɔ́ à gǝ́ jɛ̀rɛ̀ a zɔ̀m á yò mó è ce a twĩ̀ nǝ́ da-byǎ bɛ́ á sõ, s'á ce jàn nɛ́ á tɛnɛ, mùnì ga à gǝ́ zɔ̀m á yò a byili ní mú bǝ̀k'a yǝ̀ kɔma yé. ⁴ È gǝ dǝ̀ rǝ̀myɛ́, Masɛdwanɛ Kristǝ-lyì bí gǝ tó ne bǝ tú á sõ, bǝ pwírí á yǝ̀ tɛnɛ á zhɛ̀, è m'a yǝ̀ cìzhìl àmyɛ́ mɔ̀bɔ́ à zhe á zhǝ̀n mɔ́ ǹdǝ́ ámyɛ̌ cìcì mú ga yilǝ. ⁵ Wɔ́ rǝ̀myɛ́ è ce, à pwírí kɔn mǝ̌ b'à lwǝ̌l nǝ́ da-byǎ bɛ́ bǝ tó yé bǝ bǝ̀ á sõ, mùnì á tɛnɛ pɛnɛ́ y á bwǝl è nyí mú á cĩ́. Nǝ́ gǝ tú nǝ́ pwírí á tɛnɛ á zhɛ̀, nǝ́ m'ǎ lwar bǝ̀ wɔ́ á pùbùlǝ̀ á m'á pa, è dǝ̀ lò ń nyɛ́ɛ́ ába yé. ⁶ Kɔn rǝ̀dù ŋwɛ́nɛ́ á mǝ̌ s'á lwar: lò mɔ̀bɔ́ ǹ dù námpɔ́lɛ́, wɔ́ námpɔ́lɛ́ ǹ y'ǎ jǝ̀r; sǝ lò mɔ̀bɔ́ ǹ dù dɛ̃́dɛ̃́, wɔ́ dɛ̃́dɛ̃́ ǹ y'ǎ jǝ̀r. ⁷ Yi só lò mɔ̀bɔ́ ń nǝ́ ń pɛ ǹdǝ́ wu-nyɔ̃̀. Rǝ̀myɛ́ ce, kɔn dɛ̀bɛ́ lò gakó bùl ǹ wẽ́ ǹ la pɔ mɔ́, sǝ́ pa. Ǹ bǝ̀ká pǝ ǹdǝ́ wu-zhìlù ǹdǝ wɔ́ lò ń nǝ́ ń nyɛ́ɛ́ mɔ́ ta yé. ⁸ Yi wɔ̌ rǝ̀ m'a pǝ ába rǝ̀ paánsɛ́ shɛ̀bɛ́ dwí gakó á zhe sǝ̀ tum mú sǝ yí ába dɛ̃ gakó sǝ dàl, á m'á twĩ̀ tùm-ècɛ̀nà dwí gakó. ⁹ Bǝ̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bǝ wɔ̀: «Ń nǝ́ ń nǝ́ ń tǝ̀l ń nǝ̀cɛ̀ndɛ́ ń pǝ ń nǝ̀mwà nɛ̀» ń nǝ́ ń twĩ̀ cángá tumǝ twéé twéé gakó. ¹⁰ Wɔ́ Yi rǝ̀ n'ê pɛ jíjí dwí vwàlnà nɛ̀ ń dwì; wɔ́ rǝ̀myɛ́ rǝ̀ n'ê pɛ nyí kùjú w myɛ. Rǝ̀ b'a pǝ jíjí dwí ámyɛ nɛ á dù, rǝ ce rǝ lyĩ rǝ byì rǝ ce byǎ nánzhǝzhɔ̌. Á tùm-ècɛ̀nà nɛ́ myɛ b'a ce byǎ nánzhǝzhɔ̌ èta. ¹¹ Yi m'a tó rǝ̀myɛ́ dɛnnɛ rǝ ce á jǐrh nǝ̀cɛ̀nà kɔn gakó wẽ́, mùnì ga á ŋwɛ̀nɛ́ á n'á pɛ ǹd'á wun gakó. Èta, nǝ́ gǝ zhǝ̀l nǝ́ pɔ bɛ á jɛ̃̀-kɔn rɛ́, bǝ̀ nánzhǝzhɔ̌ b'a ce Yi nǝ̀bán á yilǝ. ¹² Pɛnɛ́ y èmyɛ́ mɔ́ wɔ́ Zhǝrǝzalɛm Kristǝ-lyì bí ni á la m'á sɛ̃, tɛ̀bɛ́ rǝ̀ mwìrì bi mú yilǝ. Kɔn súlí myɛ, bǝ̀ nánzhǝzhɔ̌ b'a tó èmyɛ́ dɛnnɛ myɛ bǝ ce Yi nǝ̀báná. ¹³ Kɔn rɛ́ dɛ̀bɛ́ á la bɛ pɔ èta mɔ́ zhe kùr dɛ̃́dɛ̃́. Rǝ̀myɛ́ n'ê byili b'ǎ zhí Kristǝ ne ǹd'á wun gakó yò-ècɔ̀nɔ̀ nyí rí jàn yilǝ. Á n'á tó rǝ̀myɛ́ dɛnnɛ myɛ á byili b'ǎmyɛ̌ ǹdǝ́ Zhǝrǝzalɛm Kristǝ-lyì bí nyí wɔ́ rǝ̀dù, e súlí Kristǝ-lyì bí dwã bɛ́ gakó. Á tum rí rǝ̀myɛ́ m'a ce bǝ cèrhé Yi. ¹⁴ Sǝ bǝ̀ m'a lwǝ̀l Yi á yilǝ, mùnì ga á lwar bǝ̀ bǝ̀ wun ní ŋwɛ́nɛ́ ǹd'ába, Yi pɛnɛ́ nánfò w nánfɔ̀lɔ̀ w kɔ̀bɔ́ Yi wɛ̀rhɛ́ ǹd'ába mɔ́ yilǝ. ¹⁵ Yi nǝ còrhó, rǝ̀ pɛnɛ́ y nánfɔ̀lɔ̀ w è bǝ dõ zhe mó yilǝ!