¹ Wɔ́ ámyɛ́ Pwǝǝ à n'â lwǝ̀l ába ǹdǝ́ wu-bɔ̀nɔ̀ w kɔ̀bɔ́ ò n'ô shí Kristǝ sono mó. Lyì jàlà n'ê wǝ̀l b'à gǝ ŋwɛ́nɛ́ á sono, à n'â zɔ̀m ǹd'ába ǹdǝ́ kwàmǝ́-yúrhú cǝ́bal ta, sǝ à gǝ k'â tɛ̀nɛ́ á sono, a zɛ̃̀ à n'â zɔ̀m jàn. ² À n'â wǝ̀l ába, à gǝ tú á sõ, s'á bǝ̀k'á pyɛ́nɛ́ nɛ a zɔ̀m ǹdǝ́ jàn yé. À la jàn zɔ̌m myɛ, wɔ́ lyì bí byɛ̀bɛ́ bǝ̀ n'ê bùl bǝ̀ nǝ́ tùntwǝ̃̀ǝ̃̀ né wɔ́ numbyínsi nyǝ̀ná mɔ́ yilǝ. ³ Zhǝ̀nà, nǝ́ wɔ́ numbyínsi, sǝ́ búlǝ́ né nyɛ̀bɛ́ nǝ́ n'é bwí mú dǝ̀ numbyínsi nyǝ̀ná yé. ⁴ Búlǝ́ né wẽ̀ ré tɛ̀bɛ́ nǝ́ m'é bwí mú myɛ dǝ̀ numbyínsi nyǎn yé. Wɔ́ Yi sõ rǝ̀ jàn rɛ́ n'ê shí ní, nǝ́ m'é zhìlì kɔn dɛ̀bɛ́ gakó rǝ̀ t'â zwẽ Kristǝ nyí ni mú, ǹdǝ́ bùlǝ̀ nyɛ̀bɛ́ nǝ̀ bǝ kùr zhe mó yò, ⁵ e súlí cìn-byilu zɔ̀mà nyɛ̀bɛ́ gakó nǝ̀ n'ê cǝ̀r lò yé ne ǹdǝ́ Yi pár lwar mɔ́. Nǝ́ n'é yǎl nǝ́ pyìrhí lyì bí wun ní mùnì ga bǝ wɛ̀rhɛ́ Kristǝ pùbùlǝ̀. ⁶ Sǝ á gǝ tú á n'á wɛ̀rhɛ́ Kristǝ pùbùlǝ̀ námpúm, rǝ̀myɛ́ yi ní, lò mɔ̀bɔ́ ń tá ń wɛ̀rhɛ́ Kristǝ pùbùlǝ̀ nǝ́ b'ǎ pɔ̃ còrhò-tum. ⁷ Nyǐ-nǝ, lò mɔ̀bɔ́ ń yě ń wẽ́ zhǝn zhǝ̀n ga bǝ̀ ń wɔ́ Kristǝ-lò, sǝ n ce jàn nɛ́ n lwar bǝ̀ nǝ́myɛ wɔ́ Kristǝ-lyì ǹdǝ ń ta. Rǝ̀myɛ́ wɔ́ pamparɛ̃ɛ̃. ⁸ Cǐnnǝ mó pɔ nǝ́ba ŋwɔ̀nɔ́, sǝ è dǝ̀ á yò zhìlù yil ń pɔ w nǝ́ba yé. Wɔ́ yò kɔrhɔ yilǝ. À zɔ̀m á yil náàcɛnɛ́, sǝ rǝ̀ cìzhìl bǝ nǝ zhe yé. ⁹ À sábá nɛ́ á n'â kɛ̃ à pɛ ába mɔ́, è dǝ̀ yál á n'â yǎl a zǝ nɛ a ce ywẽ á wẽ́ yé. ¹⁰ Lyì jàlà n'ê wǝ̀l b'à sábá nɛ́ zɔ̀mà nɛ́ wɔ́ lyim zɔ̀mà, b'à zɔ̀mà nɛ́ wɔ́ nánkùlǝ̀. E jà à cìcì gǝ túwǝ́, a zɛ̃̀ à n'â zɔ̀m ǹdǝ nǝ̀bwɛ̃̀ ta; à zɔ̀mà nɛ́ cilu bǝ shil zhe yé. ¹¹ Lò mɔ̀bɔ́ ń nǝ́ ń zɔ̀m rǝ̀myɛ́, ń mǝ̌ sǝ n lwar bǝ̀ kɔn dɛ̀bɛ́ nǝ́ n'é kɛ̃ nǝ́ sábá nɛ́ wẽ́ mó ǹdǝ́ tɛ̀bɛ́ nǝ́ n'é twí nǝ́ zɔ̀m nǝ́ cìcì ni mú ga wɔ́ rǝ̀dù. ¹² Zhǝ̀nà, lyì jàlà ŋwɛ́nɛ́ bǝ́ n'ê cèrhé bǝ̀ cìn dɛ̃́dɛ̃́. Nǝ́myɛ̌ t'á yǎl nǝ́ zǝ nǝ́ cìn nǝ́ myɛrhɛ ǹdǝ bǝ̀ ta yé. Bǝ̀ gǝ la zǝ bǝ̀ cìn bǝ myɛrhɛ kɔn, wɔ́ bǝ̀ cìcì. Kɔn tɛ̀nɛ́ bǝ̀ n'ê zǝ bǝ̀ cìn bǝ̀ myɛrhɛ ǹdǝ́ è dǝ̀ bǝ̀ cìcì yé. Bǝ̀ wɔ́ lyì byɛ̀bɛ́ bǝ̀ bǝ surhǝ zhe yé. ¹³ Sǝ è gǝ wɔ́ nǝ́myɛ̌ yilǝ, nǝ́ t'á yǎl nǝ́ zhẽ̌ nǝ́ cìn dɛ̃̌ nǝ́ lyɛ̃ nǝ́ swɛ̃́ yé. Yi ce nǝ́ bǝ̀ á sono. Rǝ byili nǝ́ba tum rí tɛ̀bɛ́ rǝ̀ pɔ nǝ́ba mɔ́ swɛ̃́ rɛ́. ¹⁴ Nǝ́ gǝ́ tú á sõ yi ní, nǝ́ yǝ̀ tum rí twĩ̀ nǝ́ lyɛ̃ nǝ́ swẽ́ yé. Wɔ́ nǝ́myɛ̌ nǝ́ jɛ̀rɛ̀ nǝ́ zǝ Kristǝ yò-ècɔ̀nɔ̀ nyí rí nǝ́ yí á sono. ¹⁵ Nǝ́ yǝ̀ nǝ́ cìn dɛ̃̌ zhẽ̌ lyì dwã tum yil yé. Sǝ nǝ́ n'é bùl b'ǎ Yi ni zhú mú gǝ́ n'ê súlí mú ce, nǝ́ tum rí b'a vò yé né á cǝlcǝl wǝ, sǝ rǝ̀ bǝ̀k'a lyɛ̃ rǝ̀ swɛ̃́ yé. ¹⁶ Èta, nǝ́ b'ǎ ŋwɛ̀nɛ́ nǝ́ lyɛ̃ nǝ́ vò nǝ́ bwǝ̀l yò-ècɔnɔ̀ nyí rí cɛmɛ nɛ́ dwã bɛ́ wẽ́. Nǝ́ t'á yǎl nǝ́ zù tumǝ nyɛ̀bɛ́ lyì dwã jɛ̀rɛ̀ bǝ twĩ̀ wẽ́ nǝ́ zhẽ̌ nǝ́ cìn yé. ¹⁷ Bǝ̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bǝ wɔ̀: Lò mɔ̀bɔ́ ǹ nǝ́ ǹ yǎl ń cèrhé ǹ cìnǝ̀, sǝ́ cèrhé ǹ cìn kɔn dɛ̀bɛ́ Cǐnnǝ mó wɛ̀rhɛ́ mɔ́ yilǝ. ¹⁸ È dǝ̀ lò mɔ̀bɔ́ ń nǝ́ ń cèrhé ń cìn mú ń sú Yi yírh yé. Wɔ́ mɔ̀bɔ́ Cǐnnǝ mó nǝ́ ń cèrhé mó.