¹ À y'à só s'á shɛ̀nɛ́ b'à zɔ̀mà nɛ́ wɔ́ ǹdǝ nyǝ̀nyà zɔ̀mà ta! Zhǝ̀nà, shɛ̀nɛ́-na! ² Á nyɛ̌ ǹdǝ kɛ̃-byǐ kɛ̀bɛ́ è yǝ̀l bal pár ta, à kwè à la byal nɛ pɔ. Byal mɔ́ ńmyɛ̌ mɔ́ wɔ́ Kristǝ. À só ába dɛ̃́dɛ̃́, sǝ sónó w kɔ̀bɔ́ à zhe ǹd'ába mɔ́ wɔ́ Yi sõ ò n'ô shí ní. ³ Ywẽ zhe ne, dɛ̀ga lyì b'a jǝ́jɛ̀rɛ́ ába á wun pyìrhí, á zɛ̃̀ á yẽ̌ á gǝ́ ju kùr á zhí Kristǝ ne ǹdǝ́ wu-põ̀ mó ne, ǹdǝ Awa gǝ́ yẽ̌ ń cìn nì n pǝ dɔm mɔ́ nɛ mǝ jǝ́jɛ̀rɛ́ ǹdǝ́ mǝ̀ kɔma bɛ́ nɛ́. ⁴ Lò dõ gǝ tú ń bwǝ̀l Yezu dõ, mɔ̀bɔ́ nǝ́myɛ̌ yǝ̀ bwǝ̀l nǝ́ byili ába gaga mɔ́ yò ń byili ába, á zɛ̃̀ á n'á zwẽ nyí, ráá á shɛ̀nɛ́ á zwẽ éshìrhǝ́ kɛ̀bɛ́ á gwẽ̌ yǝ̀ zwẽ gaga. Bǝ̀ gǝ bwǝ̀l yò-ècɔ̀nɔ̀ nyí tɛ̀bɛ́ á gwẽ̌ yǝ̀ rǝ̀ yò nyɛ̀ɛ̀ gaga bǝ byili ába, á n'á shɛ̀nɛ́ á zwẽ nyí. ⁵ À t'â bùl b'à yǝ̀ yírh swí á tùntúmǝ́ bé nánfwààlɛ́ kùr w yé. ⁶ Dɛ̀ga, wɔ́ à nyí rǝ̀ wàr zɔ̀mà yé. Sǝ ǹdǝ́ rǝ̀myɛ́ ga, à yě kɔn dɛ̀bɛ́ à n'â zɔ̀m mɔ́ kùrǝ̀. Nǝ́ ce á lwar rǝ̀myɛ́ pamparɛ̃ɛ̃ twéé gakó kɔn dɛ̀bɛ́ nǝ́ wɛ̀rhɛ́ gakó wẽ́. ⁷ À gǝ́ tú a bwǝ̀l Yi yò-ècɔ̀nɔ̀ nyí rí á sõ yi ní, à lwǝl à cìn tɛ̃́, mùnì ga a zhẽ̌ á yó dɛ̃̌. À bwǝ̀l rè nánfò. À gǝ́ wɛ̀rhɛ́ èta mɔ́ wɔ́ dóó nà? ⁸ À shɛ̀nɛ́ a yẽ̌ Kristǝ-lyì gùúli dwã kwɛ̃̌ nɛ. Wɔ́ bǝ̀myɛ́ jɛ̃̀-kɔn à zwẽ a m'a sɛ̃ ába. ⁹ À gǝ́ y'à ŋwɛ́nɛ́ á sõ yi ní, à y'à tú à zhe wɛ́rɛ́ tum, sǝ à yǝ̀ lò yó w nyǐ yé. Wɔ́ nǝ́ da-byǎ bɛ́ bǝ̀ shí Masɛdwanɛ mɔ́ bǝ̀ sɛ̃ nɛ ǹdǝ́ kɔn dɛ̀bɛ́ gakó à y'à zhe rǝ̀ tum mú. À zɔ à cìnǝ̀, mùnì à bǝ̀k'a nyǐ á yó w kɔn dɛ̀bɛ́ gakó à zhe rǝ̀ tum yil yé. À n'â yǎl a j'a zhe à cìn èta twéé gakó. ¹⁰ Lò lò wàr ń la nɛ cǝ̌r Akǝyi tǝnà y vɔ̃̀ òdù ga wẽ́ ǹdǝ́ wu-nyɔ̃̀ w òmyɛ́ byilu yé. Rǝ̀myɛ́ wɔ́ zhǝ̀n à n'â byili Kristǝ jàn yilǝ. ¹¹ À gǝ́ n'â wɛ̀rhɛ́ èta mɔ́, wɔ́ só à bǝ ába só? È dǝ̀ èta yé; Yi cìcì yě b'à só ába. ¹² À m'a j'â n'â wɛ̀rhɛ́ kɔn dɛ̀bɛ́ à n'â wɛ̀rhɛ́ mɔ́ gaga, mùnì ga lyì bí byɛ̀bɛ́ bǝ̀ n'ê yǎl bǝ zhẽ̌ bǝ̀ cìn dɛ̃̌ bǝ wɛ̀rhɛ́ ǹdǝ nǝ́ ta mɔ́ lyɛ̃̀ bɔ̀l. ¹³ Lyì bí bǝ̀myɛ́ dǝ̀ Kristǝ tùntúmǝ́ yé. Bǝ̀ wɔ́ tùntùnnǝ̀ byɛ̀bɛ́ bǝ̀ nyɛ̌ yǔyǔ. Bǝ̀ n'ê zǝ bǝ̀ cìn bǝ̀ yàl ǹdǝ Kristǝ tùntúmǝ́ ta. ¹⁴ Rǝ̀myɛ́ t'â jàr lò yé, bǝ̀ Shǝtana cìcì n'ê zǝ è cìn è yàl ǹdǝ màlɛ́ka kɛ̀bɛ́ è shí pwẽ̀ wẽ́ ta. ¹⁵ Rǝ̀myɛ́ ce, è kwã-lyì bí gǝ n'ê wɛ̀rhɛ́ ǹdǝ bǝ̀ tùntwǝ̃̀ǝ̃̀ né wɔ́ cángá ta, rǝ̀ t'â jàr lò yé. Sǝ bǝ̀ yó-gurǝ́ yǝ́, wɔ́ tɛ̀bɛ́ bǝ̀ twĩ̀ mú bǝ̀ m'a na. ¹⁶ À k'a bwérhé à n'â wǝ̀l ába: bǝ̀k'á bù b'à wɔ́ nyǝ̀nyà yé. Á gǝ cẽ, s'á nyǐ ni ǹdǝ nyǝ̀nyà ta, mùnì ga àmyɛ ŋwɛ̀nɛ́ a zhẽ̌ à cìn dɛ̃̌ námpɔ́lɛ́. ¹⁷ Zhǝ̀nà, à t'â zɔ̀m ǹdǝ Cinnǝ mú gǝ́ nǝ́ ń yǎl nɛ́ yé. À n'â zɔ̀m ǹdǝ nyǝ̀nyà ta, mùnì ga a tó rǝ̀myɛ́ dɛnnɛ a zhẽ̌ à cìn dɛ̃̌. ¹⁸ Lyì nánzhǝzhɔ̌ ŋwɛ́nɛ́ bǝ̀ n'ê tó numbyínsí tùntwǝ̃̀ǝ̃̀ né dúdú dɛnnɛ bǝ̀ zhẽ̌ bǝ̀ cìn dɛ̃̌. ¹⁹ Ámyɛ̌ byɛ̀bɛ́ á zhe surhǝ mó zɛ̃̀ á shɛ̀nɛ́ á ŋwɛ́nɛ́ ǹdǝ́ nyǝ̀nyǝ̀rh! ²⁰ Á yẽ̌ bǝ̀ n'ê wɛ̀rhɛ́ ába ǹdǝ yómǝ́ ta, bǝ̀ n'ê myìnì ába, bǝ̀ n'ê zwẽ á wẽ̀ dé, bǝ̀ n'ê tùrh ába, bǝ̀ n'ê mà ába jǝ̀-sǝ̌rh! ²¹ È gǝ wɔ́ nǝ́myɛ̌ yilǝ, nǝ́ yǝ̀ wu-jɔ̀ zal ǹdǝ́ rǝ̀myɛ́ wɔ̀rhɔ́ yé. Cìzhìl zhe ne ǹdǝ́ rǝ̀ zɔ̌m. Ǹdǝ́ rǝ̀myɛ́ ga, kɔn gǝ ŋwɛ́nɛ́ lò wɔ̌ ń zhẽ̌ ń cìn rǝ̀ yilǝ, sǝ́ nyǐ àmyɛ wɔ̌ à zhẽ̌ à cìnǝ̀, bá ǹdǝ́ à gǝ n'â zɔ̀m ǹdǝ nyǝ̀nyà ta, ²² Bǝ̀ wɔ́ Ebǝrǝbá? Àmyɛ wɔ́ Ebǝrǝ. Bǝ̀ wɔ́ Esǝrayɛl lyì? Àmyɛ wɔ́ Esǝrayɛl lò. Bǝ̀ wɔ́ Abǝraham dwí rí lyì? Àmyɛ wɔ́ Abǝraham dwí rí lò. ²³ Bǝ̀ wɔ́ Kristǝ tùntùnnǝ̀? Àmyɛ́ wɔ́ Kristǝ tùntùnnǝ̀ du bi. À gǝ́ n'â byili rǝ̀myɛ́ mɔ́, wɔ́ zɔ́m à n'â zɔ̀m ǹdǝ nyǝ̀nyà ta kɔn lyɛ̃ cɛ nɛ. À twĩ̀ dɛ̃́dɛ̃́ du bi. Bǝ̀ co ne byǝ̀nǝ́-jù w twǝr nánzhǝzhɔ̌ du bi. Bǝ̀ mà nɛ̀ dɛ̃́dɛ̃́ du bi. Twǝr nánzhǝzhɔ̌ myɛ kɔn y'à dàl námpɔ́lɛ́ y sǝ bǝ gu ni. ²⁴ Zhwifubá zɔ nɛ bǝ mà dàmǝshɔ̀rɔ́ yírhǝ́ shǝ́-ètɔ̀ ǹdǝ́ nǝ̀bɔ́ nǝ̀bɔ́ kùrǝ̀ nǝ̀nu. ²⁵ Orɔm lyì bí myɛ zǝ nɛ bǝ mà ǹdǝ́ dǝ̀-dààlɛ̀ twǝr rǝ̀tɔ̀. Dɛ̃ rǝ̀dù, bǝ̀ y'à zɔ nǝ́kuuli bǝ dul ne bǝ̀ la gu. À zù bǔ-bwǝl rǝ gǝ nɛ̃̌ mɔ́ wẽ́ twǝr rǝ̀tɔ̀. Sǝ dɛ̃ rǝ̀dù, à mɛ̃ nɛ̃̌ mɔ́ wẽ́ a zɔ̃̀. ²⁶ À zhǝ̀l jààsɛ̀ nánzhǝzhɔ̌ wẽ́. À y'à dàl námpɔ́lɛ́ y s'a mɛ̃ bǔrh wẽ́. Èmà-byǎ y'à la nɛ gu. À da-byǎ Zhwifubá ǹdǝ́ byɛ̀bɛ́ bǝ̀ dǝ̀ Zhwifubá ga y'à n'ê pyà à gu. Bǝ̀ y'à n'ê pyà nɛ̀ cɛmɛ nɛ́ wẽ́ ǹdǝ́ gɔ nɛ́ bǝ̀ la gu. À y'à dàl námpɔ́lɛ́ y s'a mɛ̃ nǝ̀-fɔ̀lɔ̀ w wẽ́. Byɛ̀bɛ́ bǝ̀ n'ê gòm kɔma bǝ̀ bǝ̀ wɔ́ Kristǝ-lyì mú myɛ y'à n'ê pyà à gu. ²⁷ À twĩ̀ tumǝ nyɛ̀bɛ́ nǝ̀ jɛ̀, nǝ̀ n'ê lyɛ̀ɛ̀ numbyíní. Dǝdɛ̃̌nɛ, à t'â dɛ̀ɛ̀ yé. Nɔrh ǹdǝ́ nǝ̀nyɛ̀lsɛ̀ zɔ nɛ. Dǝdɛ̃̌nɛ, kɔn wɔ́ nyɔ́ɔ́ s'a zhɛ̃̀ kùjú. Dǝdɛ̃̌nɛ, wàr y'à zǝ nɛ, gɔ̀nɔ̀ myɛ j'a tɛ̀nɛ́ yé. ²⁸ Sǝ kɔn rɛ́ dɛ̀bɛ́ rǝ̀ yò zù nì du rǝ̀myɛ́ gakó mó, wɔ́ Kristǝ-lyì gùúlí. Wɔ́ rǝ̀myɛ́ yò ò zù nì dɛ̃ gakó. ²⁹ Lò gǝ yǝ̀ Yi ni zhí kẽkẽ, àmyɛ y'a yǝ̀ ǹdǝ ń ta. Lò gǝ tu yǝ̀-bǝlɔ̀lɔ́ wẽ́, à wu y'a zhìlì dɛ̃́dɛ̃́. ³⁰ È gǝ wɔ́ cìn-dɛ̃̌-zhõ̌ yilǝ, wɔ́ à gǝ́ bǝ kùr zhe yil à n'â zhẽ̌ à cìnǝ̀. ³¹ Nǝ́ Cinnǝ Yezu Da Yi yě bǝ̀ wɔ́ zhǝ̀n à n'â zɔ̀mà. Ń yil ré b'a nǝ còrhó twéé gakó! ³² À gǝ́ y'à ŋwɛ́nɛ́ Damaasɛ nɛ́ yi ní, cɔ w yó-cǝ́bal mɔ́, pyɔ̌ Arǝtaasɛ yà ń cĩ́ gàà mɔ́, ce lyì zɛ̃̀ bǝ cǝ̀r cɔ w jààsɛ́ gakó ne, mùnì ga bǝ zǝ nɛ. ³³ Rǝ̀myɛ́ yó, bǝ̀ zɛ̃̀ bǝ ce a zù sǝ́yǎ wa, bǝ kwè nè bǝ tó byílí y bǝ̀ lù bǝ m'e kǝ́kɛ́lɛ́ cɔ w mɔ́ túkwǝ́rǝ́ èdù, bǝ cĩ́ pwẽ̀ nè. Wɔ́ gàà mɔ́ à tó né a lù cɔ w cǝ́bal mɔ́ yé né.