¹ À mǝ̌ s'a zhẽ̌ à cìn dɛ̃̌, sǝ rǝ̀myɛ́ bǝ kùr zhe yé. E jà ǹdǝ́ rǝ̀myɛ́ ga, à m'a byili ába kɔn dɛ̀bɛ́ Cinna mú byili ni, n jà n ce a lwar rǝ̀ pár mɔ́. ² À yě Kristǝ-lò mǝ̀dù párá. Yi kwè mò rǝ m'e vò dɛ̃̌ dɛ̃̌ è zhe byinǝ shí ǹdǝ́ nǝ̀na. È gǝ wɔ́ zhǝ̀n zhǝ̀n ga Yi kwè mò rǝ m'e vò dɛ̃̌, ráá wɔ́ ǹdǝ dàrhà ta, à yǝ̀l yé. Wɔ́ Yi dúdú rǝ̀ yě. ³ Zhǝ̀nà, à yě bǝ̀ Yi kwè bal mɔ́ ńmyɛ̌ rǝ m'e vò dɛ̃̌. Sǝ à n'â byili gwẽ̌, è gǝ wɔ́ zhǝ̀n zhǝ̀n ga Yi kwè mò rǝ m'e vò, ráá wɔ́ ǹdǝ dàrhà ta, à yǝ̀l rǝ̀myɛ́ yé. Wɔ́ Yi dúdú rǝ̀ yě. ⁴ Ń nyɛ̀ɛ̀ zɔ̀mà gàà, sǝ nǝ̀ dǝ̀ kɔn dɛ̀bɛ́ numbyíní wɔ̌ è m'a byili yé. E jà è bǝ sɔ́má myɛ zhe è zɔ̀m nɛ̀ yé. ⁵ È gǝ wɔ́ bal mɔ́ ńmyɛ̌ yilǝ, à m'a zhẽ̌ à cìnǝ̀. Sǝ à t'â la à cìn zhõ̌ à cìcì yil yé. Ǹdǝ́ à gǝ la à cìn zhõ̌, wɔ́ à bǝ-jàn-zhǝǝré yilǝ. ⁶ Bá à gǝ la à cìn dɛ̃̌ zhõ̌ myɛ, rǝ̀myɛ́ dǝ̀ tum dɛ̀bɛ́ à n'â twĩ̀ à yǝ̀l rǝ̀ kùr yé, bǝ̀ wɔ́ zhǝ̀n à n'â zɔ̀mà. Sǝ à n'â dɛ̃̀ à cìn ǹdǝ́ cìn dɛ̃̌ zhõ̌ mó, b'à t'â yǎl sǝ lyì bí tó à tumǝ né ǹdǝ́ à zɔ̀mà nɛ́ dɛnnɛ bǝ bù b'à du bi yé. ⁷ Kɔn zù à yala nɛ́ wẽ́ rǝ̀ n'ê yì nì. Kɔn wɔ́ ǹdǝ wɔ́ Shǝtana è n'ê mà nɛ̀ ta. Kɔn rɛ́ dɛ̀bɛ́ Cinnǝ mú byili ni mú zhe kùr dɛ̃́dɛ̃́. Wɔ́ rǝ̀myɛ́ è ce n yẽ̌ nɔ̀nɔ̀ w òmyɛ́ yí ni, mùnì ga à bǝ̀k'a zhẽ̌ à cìn dɛ̃̌ kɔn rɛ́ rǝ̀myɛ́ yil yé. ⁸ À lwǝ̀l mò, twǝr rǝ̀tɔ̀ gakó, sǝ n vùr nɔ̀nɔ̀ w òmyɛ́ à yala nɛ. ⁹ Sǝ ń wò nè: «À gǝ́ só mó mó myɛ dúdú já. Wɔ́ ǹ bǝ-jàn-zhǝǝre yi ní à n'â ce à jàn rɛ́ yàl nɛ́ ǹdǝ́ mɔ́ dɛ̃́dɛ̃́.» Wɔ́ rǝ̀myɛ́ è ce à b'a zhẽ̌ à cìn dɛ̃̌ à bǝ-jàn-zhǝǝre yilǝ, mùnì ga Kristǝ jàn rɛ́ yìlì nì. ¹⁰ Wɔ́ rǝ̀myɛ́ è ce, bǝ-jàn-zhǝǝre ga, tùùrhì ga, yò-cǝ̀ǝ̀lè ga, lyì bí gǝ́ n'ê nwɛ̀nɛ̀ nɛ̀ mɔ́ ga, twǝ́lǝ́ né ga; à gǝ n'â nɛ rǝ̀myɛ́ gakó Kristǝ yilǝ, à wu nyɛ̀. Zhǝ̀nà, wɔ́ à bǝ-jàn-zhǝǝre yi ní à n'â nɛ jàn nɛ́ . ¹¹ À gǝ zɛ̃̀ à n'â zɔ̀m ǹdǝ nyǝ̀nyà ta, wɔ́ ámyɛ̌ á ce à n'â wɛ̀rhɛ́ èta. Bǝ̀ wɔ́ ámyɛ̌ á y'ǎ mǝ̌ s'á zwẽ à nyí ni. Bá àmyɛ́ gǝ dǝ̀ kaka myɛ, byɛ̀bɛ́ á n'á bùl bǝ̀ bǝ̀ wɔ́ Kristǝ tùntúmǝ́ nánfwààlɛ̀ mɔ́ myɛ bǝ nɛ du yé. ¹² À wɛ̀rhɛ́ kɔn dɛ̀bɛ́ rǝ̀ b'a ce á lwar b'à wɔ́ Kristǝ tùntúm mú á yírhǝ́ na. À zhìlì à yala nɛ dɛ̃́dɛ̃́. Wò-jààrɛ̀ ǹdǝ́ màmyaarhɛ ǹdǝ́ tùm-fwààlɛ̀ gakó wɛ̀rhɛ́ á sõ. ¹³ Wɔ́ bǝ̀kɔ́n à wɛ̀rhɛ́ Kristǝ-lyì gùúlí dwã bɛ́ nɛ du ámyɛ̌? Kɔn rǝ̀dù à yě: à yǝ̀ á yó w nyǐ yé. E zɛ̃̀ wɔ́ rǝ̀myɛ́ á pwírí rǝ̀ bǝ càn ná etǝra? È gǝ wɔ́ èta, sǝ́ nyǐ à n'â lwǝ̀l ába sǔbri. ¹⁴ Nyǐ-nǝ à n'â tɛnɛ à bàn á sõ. Rǝ̀myɛ́ b'a ce né wɔ́ twǝr rǝ̀tɔ̀ à gǝ́ n'â twí á sõ né. Sǝ kɔn b'a yǝ̀ ǹdǝ twéé twéé mó ta, à t'â la ába lyɔ̀ɔ̀ ǹdǝ́ kɔn dɛ̀bɛ́ à zhe rǝ̀ tum yé. È dǝ̀ á kɔn à n'â yǎl yé. Wɔ́ á cìcì mú à n'â yàlá. È dǝ̀ bǝ̀sɔ́bwɛ̀lɛ́ námpɔ́lɛ́ è n'ê pyà è pɛ è da nɛ́ yé. Wɔ́ da ń ya n pyà n pǝ ń bǝ̀sɔ́bwɛ̀lɛ́ námpɔ́lɛ́ nɛ. ¹⁵ È gǝ wɔ́ àmyɛ́ yilǝ, à b'a pǝ ába kɔn dɛ̀bɛ́ à zhe, e súlí à cìcì námpúm. E zɛ̃̀ wɔ́ à gǝ́ só ába dɛ̃́dɛ̃́ mɔ́ yilǝ, á sónó w n'ê bɔ̀ ǹdǝ́ nɛ? ¹⁶ Dɛ̀ga lyì jàlà n'ê zɔ̀m b'à dǝ̀ cángá yé, bǝ̀ wɔ́ kɔma à gòm a m'a jǝ́jɛ̀rɛ́ ába. A j'à yǝ̀ ába lyɛ̀ɛ̀ ǹdǝ́ kɔn dɛ̀bɛ́ à zhe rǝ̀ tum yé. ¹⁷ Á gǝ n'á yǎl s'á nyǐ lyì bí byɛ̀bɛ́ à twĩ̀ á sõ mó, à yǝ̀ ce mǝ̀dù ga yǔr ába n zwẽ á kɔn n bǝ̀ n pɛ̃ yé. ¹⁸ À lwǝ̀l Titi a twĩ̀ ńmyɛ̌ ǹdǝ́ nǝ́ da-byǐ mú á yě ń pár mɔ́ á sõ. Bǝ̀ nǝ gǝ́ tú mú, Titi yǔr ába n zwẽ á kɔn nà? Á n'á bùl b'àmyɛ́ ǹdǝ́ ńmyɛ̌ tùntwĩ̀ĩ̀ rí yǝ̀ rǝ̀dù yàl, ráá nǝ́ bùlǝ̀ né nǝ̀ yǝ̀ rǝ̀dù yàl? ¹⁹ Dɛ̀ga á ju kùr shãã shãã ga á n'á bùl á wẽ́ bǝ̀ wɔ́ bwìrì nǝ́ r'é pyà á sõ? E j'à dǝ̀ èta yé. Nǝ́ r'é zɔ̀m Yi yé né ǹdǝ Kristǝ gǝ́ nǝ́ ń yǎl nɛ́. Dɔwabá nántwǝ̌rh, nǝ́ r'é zɔ̀m rǝ̀myɛ́ gakó ámyɛ̌ sãɔ̃ yilǝ, mùnì ga á kwɛrhɛ á zhí Yi ni. ²⁰ Ywẽ zhe ne, dɛ̀ga à gǝ́ m'a bǝ̀ á sõ, a pwírí á dǝ̀ ǹdǝ à gǝ́ n'â yǎl nɛ́ yé, dɛ̀ga ámyɛ pwírí àmyɛ dǝ̀ ǹdǝ á gǝ́ n'á yǎl nɛ́ yé. Kɔn súlí myɛ, ywẽ zhe ne, ǹ gǝ só a m'a pwírí nyǝ̀-pǎr ǹdǝ́ bwɛ̃̌-dǔr, ǹdǝ́ lyim, ǹdǝ́ búlǝ́, ǹdǝ́ dwã yil zhìlù, ǹdǝ́ wu-bárhɛ́ zɔ̀mà, ǹdǝ́ cìn-byilu, ǹdǝ́ yààyàà tumǝ ŋwɛ́nɛ́ á cǝcǝl wǝ. ²¹ Ywẽ zhe ne myɛ, à gǝ́ m'a k'a bǝ̀ á sõ, a zɛ̃̀ à la cìzhìl nɔ Yi yé né á yilǝ. Dɛ̀ga lyì jàlà ŋwɛ́nɛ́ bǝ̀ gwẽ̌ n'ê fwǝ̀lǝ́, bǝ̀ n'ê wɛ̀rhɛ́ lwɛlɛ, bǝ̀ n'ê wɛ̀rhɛ́ yààyàà ǹdǝ bǝ̀ shãã ga mɔ́ ta, bǝ̀ yǝ̀ shɛ̀nɛ́ bǝ pyìrhí bǝ̀ wun yé. Rǝ̀myɛ́ zɛ̃̀ rǝ̀ la à wu ni zhìlù.