koussoube-marc-lee_2co_text

Kǝ̀kàl-fwɛ̀lɛ̀ 13

¹ À bàn á sõ, sǝ rǝ̀myɛ́ b'a ce né wɔ́ twǝr rǝ̀tɔ̀ à gǝ́ n'â twí á sõ né. Bǝ̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bǝ wɔ̀: «Yò gǝ la kɔrhɔ gakó, s'e yǝ̀ zhǝ̀n-cìnǝ́ bǝ̀lyè ráá bǝ̀tɔ̀ yírh wǝ.» ² À zhe zɔ̀mɛ̀ à la byɛ̀bɛ́ bǝ̀ wɛ̀rhɛ́ yǝ̀-bǝlwàálɛ́ shãã ga mɔ́ ǹdǝ́ lyì bí dwã bɛ́ nɛ byilu. À gǝ́ y'à k'a bwérhé a bǝ̀ á sõ yi ní, à y'à byili ri. Wɔ́ rǝ̀myɛ́ à k'â n'â byili bi kǝ́dò ǹdǝ́ à tɛ̀nɛ́ á sõ ga. À gǝ tú èlǎsɛ̃́, sǔbri t'â la nɛ́ yál lò mǝ̀dù ga yil yé. ³ Á n'á yǎl b'à wɛ̀rhɛ́ kɔn dɛ̀bɛ́ rǝ̀ b'a ce á lwar bǝ̀ Kristǝ nǝ́ ń tó à dɛnnɛ ń zɔ̀mà. Sǝ à n'â byili ába, Kristǝ dǝ̀ bǝ-jàn-zhǝǝre cí yé. Rǝ̀myɛ́ ce, ń gǝ la ń tum rí tũ̌ á wẽ́, ń nǝ́ ń byili ń jàn rɛ́. ⁴ Zhǝ̀nà, ń shɛ̀nɛ́ n yǝ̀ ǹdǝ bǝ-jàn-zhǝǝre cí ta bǝ pǝpa mɔ dǝ̀-jɔrhɔ́ yó. Sǝ ń bwìrhì ń ŋwɛ́nɛ́ Yi jàn yilǝ. Èta, nǝ́ mù dwã nɛ ǹdǝ́ mɔ, nǝ́ shɛ̀nɛ́ nǝ́ yǝ̀ bǝ-jàn-zhǝǝre cìnǝ́. Sǝ á b'ǎ tó nǝ́ tùntwǝ̃̀ǝ̃̀ né dɛnnɛ á lwar bǝ̀ nǝ́ mù dwã nɛ ǹdǝ́ Kristǝ nǝ́ ŋwɛ́nɛ́ Yi jàn yilǝ. ⁵ Bwǝ̌rh-nǝ á cìnǝ̀, s'á tɛ́rɛ́ á wẽ́ á nyǐ ǹdǝ́ á gǝ n'â wɛ̀rhɛ́ ǹdǝ lyì byɛ̀bɛ́ bǝ̀ zhí Kristǝ ne ta? Èta á m'ǎ pwírí Yezu Kristǝ ŋwɛ́nɛ́ á wẽ́. È gǝ dǝ̀ rǝ̀myɛ́, sǝ́ nyǐ kaka tɛ̀nɛ́ rǝ̀ n'ê byili b'ǎ zhí mu yé. ⁶ È gǝ wɔ́ nǝ́myɛ̌ yilǝ, kɔn ŋwɛ́nɛ́ rǝ̀ n'ê byili bǝ̀ nǝ́ zhí mu. À n'â bùl b'ǎ cìcì mú yě rǝ̀myɛ́. ⁷ Nǝ́ r'é lwǝ̀l Yi s'á bǝ̀k'á wɛ̀rhɛ́ kɔn dɛ̀bɛ́ rǝ̀ bǝ càn yé. Nǝ́ t'á wɛ̀rhɛ́ rǝ̀myɛ́ nǝ́ la m'é pǝ bwìrì nǝ́ cìn nì yé. Wɔ́ yál nǝ́ r'é yǎl b'ǎ wɛ̀rhɛ́ cɛ̀nɛ̀. Á gǝ tǝ̀ rǝ̀myɛ́ yil á n'á wǝ̀l bǝ̀ nǝ́ dówǝ́, rǝ̀myɛ́ dǝ̀ yò yé. ⁸ Nǝ́ wàr zhǝ̀n rɛ́ yé ne nǝ́ la cǝ̌r yé. Kɔn rɛ́ dɛ̀bɛ́ nǝ́ wɔ̌ mɔ́, wɔ́ nǝ́ twĩ̀ zhǝ̀n rɛ́ byilu yilǝ. ⁹ Ámyɛ̌ gǝ wɔ́ jàn cìnǝ́, nǝ́myɛ̌ zɛ̃̀ nǝ́ wɔ́ bǝ-jàn-zhǝǝre cìnǝ́, nǝ́ wun nyɛ̀ nǝ́ bǝ-jàn-zhǝǝré yilǝ. Sǝ kɔn dɛ̀bɛ́ nǝ́ r'é lwǝ̀l Yi ni á yil mó gakó wɔ́ s'á yǝ̀ náàcɛ̀nà námpúm Yi yilǝ. ¹⁰ Wɔ́ rǝ̀myɛ́ è ce à n'â kɛ̃ sɛ́bɛ́ rɛ́ tɛ̀bɛ́ à la ába pɔ ǹdǝ́ à gwẽ̌ yǝ̀ á sõ yí yé. Bá à gǝ tú á sõ myɛ, à t'â yǎl a ji ába búlǝ́ kɔn lyɛ̃ cɛ nɛ yé. Zhǝ̀nà, Cinnǝ mú pɔ nɛ ŋwɔ̀nɔ́ á yò kɔrhɔ yilǝ, sǝ è dǝ̀ á yò zhìlù yil yé. ¹¹ Da-byǎ, tɛ̀bɛ́ rǝ̀ dàl mɔ́, ce-nǝ á wun yǝ̀ nyɛ̀n, s'á yǝ̀ náàcɛ̀nà námpúm. Cící-nǝ dwã. Wɛ̀rhɛ́-na nyì-dwìì, s'á jòm ǹdǝ́ dwã ǹdǝ́ yǝ̀-zùlǝ́. Èta, Yi b'a yǝ̀ nɛ́ ǹd'ába. Wɔ́ rǝ̀myɛ́ rǝ̀ wɔ́ sónó ǹdǝ́ yǝ̀-zùlǝ́ cí mú. ¹² Ce-nǝ dwã, á kwǝ̀ǝ̀lè dwã náàcɛ̀nɛ́ ǹdǝ da-byǎ ta. Yi lyì bí gakó n'ê ce ába. ¹³ Yi lyì bí gakó n'ê ce ába. ¹⁴ Cinnǝ Yezu Kristǝ mà n cĩ́ bwǝl á yó! Nǝ́ Da Yi sónó w ǹdǝ́ nyì-dwìì rí tɛ̀bɛ́ Eshirhǝ náàcɛ̀nɛ́ n'ê pɛ mɔ́ b'a yǝ̀ nɛ́ ǹd'á gakó!