¹ Da-byǎ, nǝ́ r'é yǎl nǝ́ byili ába Yi pɛnɛ́ y nánfò w rǝ̀ wɛ̀rhɛ́ Masɛdwanɛ Kristǝ-lyì gùúlí ni mú. ² Zwini zɔ bɛ dɛ̃́dɛ̃́, sǝ ǹdǝ́ rǝ̀myɛ́ ga, bǝ̀ wun yàl nyɛ̀n dɛ̃́dɛ̃́. Bǝ̀ wɔ́ nǝ̀mwà, sǝ ǹdǝ́ rǝ̀myɛ́ ga, bǝ̀ pɔ bǝ̀ jɛ̃̀-kɔn dɛ̃́dɛ̃́ ǹdǝ́ bǝ̀ wun gakó. ³ Bǝ̀ pɔ ǹdǝ bǝ̀myɛ gǝ́ zhe né; bǝ̀ gaga mɔ́ pɔ kɔn dwini bǝ̀ gǝ́ zhe né. Àmyɛ́ cìcì mú nɔ bǝ̀ gǝ́ pɔ nɛ́ ǹdǝ́ à yírh: bǝ̀ pɔ ǹdǝ́ bǝ̀ sǝ̀pwà pùbùlǝ̀. ⁴ Bǝ̀ lwǝ̀l nǝ́ba ǹdǝ́ bǝ̀ wun gakó bǝ̀ nǝ́ zwẽ bǝ̀ paánsɛ́, nǝ́ vò nǝ́ pǝ Zhǝrǝzalɛm nɛ́ bǝ m'e sɛ̃ Kristǝ-lyì bí ni. ⁵ Bǝ̀ jɛ̀rɛ̀ bǝ pǝ bǝ̀ cìn Cinnǝ mú ni, fòró bǝ zɛ̃̀ bǝ pǝ bǝ̀ cìn nǝ́myɛ nɛ ǹdǝ Yi gǝ́ n'ê yǎl nɛ́. Bǝ̀ pɔ bǝ̀ cìn dɛ̃́dɛ̃́ kɔn lyɛ̃ nǝ́ gǝ́ y'ǎ n'é bùl né. ⁶ Nǝ́ lwǝ̀l Titi bǝ̀ ń já n twĩ̀ nɔ̀nɔ̀-dǔr tum rí tɛ̀bɛ́ ń ju kùr á sõ Zhǝrǝzalɛm lyì bí yil mó, n báásɛ. ⁷ Á zhí Kristǝ ne ǹd'á wun gakó, á m'á wɛ̀rhɛ́ kɔn gakó cɛ̀nɛ̀: á n'á bwǝ̀l Yi zɔ̀mɛ̀ rɛ́ cɛ̀nɛ̀, á yě zhǝ̀n rɛ́ gǝ́ wɔ́ nɛ́, á zhe yǝwǎl, á só nǝ́ba. Rǝ̀myɛ́ gakó wɔ́ nǝ̀cɛ̀ndɛ nánfɔ̀lɔ̀ á zhe. Sǝ nǝ́ n'é yǎl s'á ce jàn nɛ́ á zǝ yǝ̀wǎl ǹdǝ́ tum ndǝ́ nɔ̀nɔ̀-dǔr, tum rí rǝ̀myɛ́ mɔ́ yil myɛ. ⁸ È dǝ̀ nyí à n'â pɛ ába yé. Wɔ́ yǎl à n'â yǎl b'ǎmyɛ zǝ yǝ̀wǎl ǹdǝ Kristǝ-lyì gùúlí dwã bɛ́ ta, mùnì ga á byili b'ǎ zhe sónó zhǝ̀nà. ⁹ Á yě nǝ́ Cǐnnǝ Yezu Kristǝ gǝ́ só nǝ́ba nɛ́. Ń yà ń zhe kɔn gakó, sǝ ń shɛ̀nɛ́ n zǝ ń cìn n yǝ̀ nǝ̀mɔ̀ ámyɛ̌ yilǝ, mùnì n tó ń nǝ̀mɔ̀ɔ̀rɛ́ rǝ̀myɛ́ dɛnnɛ n ce á jǐrh nǝ̀cɛ̀nà. ¹⁰ Wɔ́ kɔn dɛ̀bɛ́ à n'â bùl yò w òmyɛ́ shò-kwã nɛ́ mɔ́ à n'â byili ába. Wɔ́ ámyɛ̌ á tó yé á tɛ́rɛ́ tum rí yò jènne ga. ¹¹ Èlǎsɛ̃́ cǝ̀ǝ̀le-nǝ á n'á twĩ̀ tum rí rǝ̀myɛ́ ǹd'á wun gakó, á pǝ kɔn dɛ̀bɛ́ á zhe mó kɔn tó ǹdǝ á ju kùr á bù ní. Kɔn rɛ́ rǝ̀myɛ́ rǝ̀ wɔ́ kɔn dɛ̀bɛ́ rǝ̀ zhe kùr á yilǝ. ¹² Lò gǝ nǝ́ ń pɛ kɔn dɛ̀bɛ́ ń zhe ǹdǝ́ ń pùbùlǝ̀, Yi n'ê zwẽ re. È tɛ̀bɛ́ ǹ bǝ zhe mó rǝ̀ n'ê yí Yi pùbùlǝ̀ yé. Wɔ́ tɛ̀bɛ́ ǹ zhe mó rǝ̀ n'ê yí rǝ̀ pùbùlǝ̀. ¹³ È dǝ̀ yál à n'â yǎl b'ǎ kwè kɔn dɛ̀bɛ́ á zhe mó gakó á b'ǎ sɛ̃ lyi dwã nɛ yé, ámyɛ̌ zɛ̃̀ á jǐrh zúzúnú cìnǝ́ yé. Wɔ́ yǎl à n'â yǎl b'ǎmyɛ̌ ǹdǝ́ nǝ́myɛ̌ ga myɛrhɛ dwã. ¹⁴ Èlǎsɛ̃́ ámyɛ̌ gǝ́ zhe dɛ̃́dɛ̃́ mɔ́ ce, á wɔ̌ á b'ǎ sɛ̃ byɛ̀bɛ́ bǝ̀ bǝ kaka zhe mó ne. Èta, ámyɛ gǝ tú á k'á bǝ kaka zhe, ǹdǝ́ bǝ̀myɛ gǝ zhe dɛ̃́dɛ̃́, bǝ̀ wɔ̌ bǝ̀ m'a sɛ̃ ámyɛ nɛ. Èta, á gakó b'ǎ myɛrhɛ dwã. ¹⁵ Bǝ̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bǝ wɔ̀: Lò mɔ̀bɔ́ ń yà ń pwà kùjú dɛ̃́dɛ̃́ myɛ, ò myɛrhɛ ǹdǝ́ ń jú. Lò mɔ̀bɔ́ ń yà ń pwà námpɔ́lɛ́ myɛ, ò yǝ̀ ń jú mwìrì yé. ¹⁶ À n'â ce Yi nǝ̀baná, bǝ̀ wɔ́ rǝ̀myɛ́ rǝ̀ co yǝ̀wǎl Titi wẽ́ ń nǝ́ ń yǎl n sɛ̃ ába ǹdǝ àmyɛ ta. ¹⁷ Titi shɛ̀nɛ́ kɔn nǝ́ lwǝ̀l mo mó nyí. Ń zwẽ nyí ǹdǝ́ ń sǝ̀pwà pùbùlǝ̀ ń ban á sõ ǹdǝ́ ń wu gakó. ¹⁸ Sǝ nǝ́ b'ǎ ce nǝ́ da-byǐ mǝ̀dù tó mo n bà. Nǝ́ da-byǐ mú ńmyɛ̌ nǝ́ ń bwǝ̀l yò-ecɔ̀nɔ̀ nyí rí ǹdǝ́ yǝ̀wǎl, ce Kristǝ-lyì gùúlí n'ê zɔ̀m ń yil náàcɛ̀nɛ́. ¹⁹ Wɔ́ gùúlí lyì bí bǝ̀ súlí bǝ cír mu ń la nǝ́ba tó nǝ́ zǝ paánsɛ́ nǝ́ m'é vò nǝ́ pǝ Zhǝrǝzalɛm Kristǝ-lyì bí ni. Wɔ́ tum rí rǝ̀myɛ́ nǝ́ n'é twĩ̀ nǝ́ m'é sɛ̃ lyì bí dwã bɛ́ nɛ Cǐnnǝ mó yil ré yilǝ. ²⁰ Bǝ̀ pɔ nǝ́ba wársɛ dɛ̃́dɛ̃́, sǝ nǝ́ b'ǎ nyǐ sǝ̀ yò náàcɛ̀nɛ́. Wɔ́ rǝ̀myɛ́ è ce nǝ́ t'á yǎl sǝ bǝ tó sǝ dɛnnɛ bǝ zhìlì nǝ́ yil yé. ²¹ Nǝ́ n'é pyà sǝ nǝ́ twĩ̀ cɛ̀nɛ̀. È bǝ̀k'a yǝ̀ Cǐnnǝ mó dúdú yírh w yé. Nǝ́ n'é pyà sǝ́ nǝ́ twĩ̀ cɛ̀nɛ̀ numbyínsi myɛ yírh wǝ. ²² Nǝ́ ce nǝ́ da-byǐ dõ la bɛ tó ń bà. Ń zhe dwã nɛ sãɔ̃ tum rí yǝ̀wǎl. Nǝ́ cìcì mú nɔ rǝ̀myɛ́ twǝr nánzhǝzhɔ̌ ǹdǝ́ nǝ́ yírhǝ́. Ń gǝ́ zɛ̃̀ ń zhe á zhǝ̀n dɛ̃́dɛ̃́ èlǎsɛ̃́ mɔ́ ce, ń gaga mɔ́ nǝ́ ń yǎl n ce yǝ̀wǎl nɛ́ ǹdǝ́ tum rí rǝ̀myɛ́ dwini shãã ga. ²³ È gǝ wɔ́ Titi yilǝ, ńmyɛ̌ wɔ́ à tó-dõ, nǝ́ r'é tó dwã nǝ́ twĩ̀ á yilǝ. Sǝ byɛ̀bɛ́ bǝ̀ tó mo bǝ̀ bàn mɔ́ wɔ́ Kristǝ-lyì gùúlí rǝ̀ twĩ̀ bì. Bǝ̀ wɔ́ lyì byɛ̀bɛ́ bǝ̀ n'ê twĩ̀ Kristǝ yil ré còrhó yilǝ. ²⁴ Ce-nǝ bǝ lwar b'ǎ só be zhǝ̀n zhǝ̀nà. Gùúlí lyì bí gǝ nyɛ̀ɛ̀ rǝ̀myɛ́, bǝ̀ m'a lwar bǝ̀ nǝ́ gǝ́ byili bi bǝ̀ nǝ́ wun nyɛ̀ ǹd'ába mɔ́ wɔ́ zhǝ̀nà.