¹ À lyì nántwǝ̌rh, nyǝ́ né nyɛ̀bɛ́ Yi bwǝl èta mɔ́ gakó zhe kùr nǝ́ yilǝ. Wɔ́ rǝ̀myɛ́ è ce, nǝ́ mǝ̌ sǝ nǝ́ kwɛrhɛ kɔn dɛ̀bɛ́ gakó rǝ̀ n'ê pɛ jìmdì nǝ́ yala nɛ́ ǹdǝ́ nǝ́ ywǝ́lsé ne mó yò ǹdǝ́ Yi, sǝ nǝ́ zɛ̃̀ nǝ́ ce jàn nɛ́ nǝ́ yǝ̀ náàcɛ̀nà námpúm nǝ́ wɛ̀rhɛ́ Yi pùbùlǝ̀. ² Pul-nǝ á wun ní ǹdǝ́ nǝ́ba, bǝ̀ nǝ́ yǝ̀ lò lò gwar yé, nǝ́ yǝ̀ lò lò Yi-ni-zhú cɔ̀ yé, nǝ́ yǝ̀ lò lò kɔn zwẽ nǝ́ jí yé. ³ À t'â zɔ̀m èta à la m'a cĩ́ yò á yó w yé. À jɛ̀rɛ̀ a byili bǝ̀ nyǐ nǝ́ só ába dɛ̃́dɛ̃́; è gǝ wɔ́ cu myɛ, nǝ́ ŋwɛ́nɛ́ ǹdǝ́ dwã; è gǝ dǝ̀ cu myɛ, nǝ́ ŋwɛ́nɛ́ ǹdǝ́ dwã twéé twéé. ⁴ À zhe á zhǝ̀n námpúm; à só á yò dɛ̃́dɛ̃́. À wu zɔ kẽkẽ; à wu nyɛ̀ dɛ̃́dɛ̃́ nǝ́ yò-cǝ̀ǝ̀lè ga yírh wǝ. ⁵ Zhǝ̀nà, nǝ́ gǝ́ tú nǝ́ yí Masɛdwanɛ nǝ́ zhɛ̀, nǝ́ yǝ̀ shìrhǝ́ nɛ gaga yé. Nǝ́ nɔ zwini dwí gakó: lyì pyà zɔ̀mà nǝ́ nyí ni, ywẽ myɛ y'à zhe nǝ́ba. ⁶ Sǝ Yi n'ê swẽ́ wu-zhìlù cìnǝ́ wun ni. Rǝ̀ tó Titi twírí y dɛnnɛ rǝ swẽ́ nǝ́myɛ wun ni. ⁷ È dǝ̀ ń twírí y dúdú yil nǝ́ wun swẽ́ yé. Ń byili nǝ́ba myɛ b'ǎ zɔ ń wu ni. Wɔ́ rǝ̀myɛ́ gakó rǝ̀ swẽ́ nǝ́ wun ní. Ń byili myɛ b'ǎ n'á yǎl á nǝ nɛ ǹd'á wun gakó. Ń zɔ̀m á wu-zhìlù w yò n byili nǝ́ba; n byili myɛ b'ǎ só à yò dɛ̃́dɛ̃́ èlǎsɛ̃́. Rǝ̀myɛ́ ce à wu zɛ̃̀ o kwɛrhɛ ò nyɛ̀. ⁸ Sɛ́bɛ́ rɛ́ dõ mó à kɛ̃ a pǝ ába mɔ́ gǝ zhìlì á wun ni myɛ, à t'â gá rǝ̀myɛ́ nɛ kǝ́dò yé. Á gǝ́ nɔ rɛ yi ní, rǝ̀ y'à zhìlì á wun ni námpɔ́lɛ́. Wɔ́ rǝ̀myɛ́ yó à y'à n'â gá nɛ́. ⁹ Sǝ èlǎsɛ̃́, à wu nyɛ̀. Sǝ è dǝ̀ á wun ní gǝ́ zhìlì yil à wu nyɛ̀ yé. Wɔ́ á wu-zhìlù w gǝ́ ce á wun k'a pyìrhí mú yilǝ. Wɔ́ wu-zhìlù w òmyɛ́ dwí rí ò n'ô tó ǹdǝ Yi pùbùlǝ̀ né gǝ́ n'ê yǎl nɛ́. Rǝ̀myɛ́ n'ê byili bǝ̀ nǝ́ yǝ̀ lwɛlɛ wɛ̀rhɛ́ á mǝ̀dù ga nɛ yé. ¹⁰ Zhǝ̀nà, wu-zhìlù w òmyɛ́ dwí rí t'â yàl kɔn nánfò numbyíní yil yé. Ò n'ô ce è wu pyìrhí e nǝ vwǎrh. Sǝ wu-zhìlù kɔ̀bɔ́ ò n'ô tó ǹdǝ lũ w pùbùlǝ̀ né gǝ́ n'ê yǎl nɛ́ mɔ́, òmyɛ́ n'ô zǝ numbyíní ò zhǝ̀l è cu sɔ́má yó. ¹¹ Á wu-zhìlù w tó ǹdǝ Yi pùbùlǝ̀ né gǝ́ n'ê yǎl nɛ́ zhǝ̀n zhǝ̀nà. Wɔ́ rǝ̀myɛ́ rǝ̀ co yǝ̀wǎl á wẽ́ á pú á lwar làlà b'ǎ dówǝ́. Á wun zhìlì, ywẽ zǝ ába; á zɛ̃̀ á n'á yǎl á nǝ nɛ; á j'ǎ n'á yǎl á pǝ còrhò-tum mɔ̀bɔ́ ń dó mó myɛ nɛ ǹd'á wun gakó. Zhǝ̀nà, á tó rǝ̀myɛ́ gakó dɛnnɛ á byili bǝ̀ dóó dwí-byǐ yǝ̀ ába gùlí yé. ¹² È dǝ̀ lò mó mɔ̀bɔ́ ń dó mó yil à kɛ̃ sɛ́bɛ́ rɛ́ yé, e j'à k'ê dǝ̀ mɔ̀bɔ́ bǝ̀ dó mo mó myɛ yil yé. À kɛ̃ rɛ mùnì a byili Yi yé né bǝ̀ nyǐ á shɛ̀nɛ́ á zwẽ nyí, á n'á ce jàn nɛ́ á twĩ̀ nǝ́ yilǝ. ¹³ Wɔ́ rǝ̀myɛ́ è ce nǝ́ wun swẽ́. È dǝ̀ rǝ̀myɛ́ dúdú rǝ̀ swẽ́ nǝ́ wun ni yé. Á gǝ́ zɔ Titi wu ni, ń wu yǝ̀ nyɛ̀n mɔ́, súlí e pǝ nǝ́ba wu-nyɔ̃̀ nánfɔ̀lɔ̀. ¹⁴ Zhǝ̀nà, à byili Titi ni bǝ̀ nyǐ à wu nyɛ̀ dɛ̃́dɛ̃́ ǹd'ába. Sǝ á yǝ̀ nɛ̀ cìzhìl pɛ yé. Nǝ́ r'é zɔ̀m zhǝ̀n nǝ́ byili ába twéé twéé. Rǝ̀myɛ́ ce à zhe bwìrì a m'a byili Titi ni bǝ̀ nyǐ à wu nyɛ̀ dɛ̃́dɛ̃́ á yilǝ. ¹⁵ Titi gǝ lyǐrh á gǝ́ zwẽ mo á sono ǹdǝ́ ywẽ ǹd'á n'á kǝkǝ, á gakó zɛ̃̀ á shɛ̀nɛ́ á zwẽ nyí mú, ń wu kwɛrhɛ o nyɛ̀ ǹd'ába. ¹⁶ À wu nyɛ̀ dɛ̃́dɛ̃́ b'à n'â nyǐ á yó w kɔn gakó wẽ́.