¹ Nǝ́myɛ̌ byɛ̀bɛ́ nǝ́ r'é tó Yi ni nǝ́ twĩ̀ mú n'é lwǝ̀l ába: bǝ̀k'á shɛ̀nɛ́ paánsɛ́ Yi pɔ ába mɔ́ yǝ̀ nánfò yé. ² Bǝ̀ kɛ̃ Yi zɔ̀mɛ̀ rɛ́ sɛ́bɛ́ ré wẽ́ bǝ̀ Yi wòwǝ̀: «Yi rí tɛ̀bɛ́ à só mó gǝ́ tú e yí, à zwẽ ǹ lwǝ̌l mó; vwǎrh mɔ́ dɛ̃ rɛ́ gǝ́ tú e yí, à tú a sɛ̃ mɔ́.» Nyǐ-nǝ, yi rí yúwǝ́; nyǐ-nǝ, dɛ̃ rɛ́ tɛ̀bɛ́ á mǝ̌ s'á nǝ vwǎrh mɔ́ yúwǝ́. ³ Nǝ́ r'é dɛ̃̀ nǝ́ cìnǝ̀, mùnì ga lò lò bǝ̀ká ń tu tɛ̃́, bǝ zɛ̃̀ bǝ tó rǝ̀myɛ́ dɛnnɛ bǝ zɔ̀m nǝ́ sõ nǝ́ tum rí shò-kwã nɛ́ yé. ⁴ Nǝ́ r'é byili kɔn gakó wẽ́ bǝ̀ nǝ́ wɔ́ Yi tùntùnnǝ̀. Nǝ́ r'é pyɛ́nɛ́ nǝ́ cìn yò-cǝ̀ǝ̀lè ǹdǝ́ zwini ǹdǝ́ nɔ̀nɔ̀ dwí gakó wẽ́. ⁵ Bǝ̀ n'ê mà nǝ́ba; bǝ̀ n'ê ce nǝ́ba byǝ̀nǝ́-jù wǝ̀; bǝ́ n'ê ce lyì bí zɛ̃̀ búlǝ́ ne ǹdǝ́ nǝ́ba; bǝ̀ n'ê ce nǝ́ twĩ̀ tùm-kùlǝ̀; nǝ́ t'á dɛ̀ɛ̀ nǝ́ swí yé; nǝ́ t'á jí nǝ́ swí yé. ⁶ Nǝ́ wɔ́ wu-põ̀ cìnǝ́; nǝ́ yě Yi zhǝ̀n dɛ́; nǝ́ zhe cìn-pyɔ́nɔ́; nǝ́ zhe wu-bɔ̀nɔ̀; Eshirhǝ náàcɛ̀nɛ́ ŋwɛ́nɛ́ ǹdǝ́ nǝ́ba; nǝ́ zhe sónó zhǝ̀n zhǝ̀nà. ⁷ Yi n'ê pɛ nǝ́ba jàn nǝ́ m'é bwǝ̀l zhǝ̀n dé nǝ́ byili. Cángá nyǝ̀ná nɛ́ nǝ̀ wɔ́ nǝ́ búlǝ́ wẽ̀ nǝ́ m'é bwí nǝ́ j'ǎ m'é cǝ̀r nǝ́ cìn yé ne. ⁸ Bǝ̀ n'ê cèrhé nǝ́ba, bǝ̀ j'à n'ê ce nǝ́ba cìzhìlǝ̀. Bǝ̀ n'ê zɔ̀m nǝ́ yil náàcɛ̀nɛ́, bǝ̀ j'à n'ê zhìlì nǝ́ yilǝ. Bǝ̀ n'ê nyǐ nǝ́ba ǹdǝ kɔ̀mdɛ̀ ta, e jà wɔ́ zhǝ̀n nǝ́ r'é zɔ̀mà. ⁹ Bǝ̀ n'ê wɛ̀rhɛ́ ǹdǝ bǝ̀ yǝ̀l nǝ́ pár ta, lyì bí gakó j'à yě nǝ́ pár náàcɛ̀nɛ́. Bǝ̀ n'ê nyǐ nǝ́ba ǹdǝ cùùrì ta, nǝ́ j'ǎ yǝ̀ cì yé. Bǝ̀ pɔ nǝ́ba còrhò-tum, sǝ bǝ̀ yǝ̀ nǝ́ba gwi yé. ¹⁰ Bǝ̀ n'ê nyǐ nǝ́ba ǹdǝ lyì byɛ̀bɛ́ bǝ̀ wun zhìlì ta, nǝ́ wun j'à nyɛ̀ twéé twéé. Bǝ̀ n'ê nyǐ nǝ́ba ǹdǝ nǝ̀mwà ta, e jà lyì nánzhǝzhɔ̌ tó nǝ́ dɛnnɛ bǝ jǐrh nǝ̀cɛ̀nà. Bǝ̀ n'ê nyǐ nǝ́ba ǹdǝ nǝ́ bǝ kaka zhe ta, e jà nǝ́ zhe kɔn gakó. ¹¹ Da-byǎ Kɔrɛ̃tɛ lyì, nǝ́ pul nǝ́ wun nǝ́ zɔ̀m ǹd'ába pamparɛ̃ɛ̃. ¹² Nǝ́ yǝ̀ kaka shèè nǝ́ wẽ́ yé. Wɔ́ ámyɛ̌ á yǝ̀ á wun ní pul ǹdǝ́ nǝ́ba yé. ¹³ À n'â zɔ̀m ǹd'ába ǹdǝ lò gǝ́ nǝ́ ń zɔ̀m ǹdǝ́ ń da-byǎ nɛ́. Whɛ̀rhɛ́-na ǹdǝ nǝ́myɛ ta: Pul-nǝ á wun ní pamparɛ̃ɛ̃ ǹdǝ́ nǝ́ba. ¹⁴ Á bǝ̀k'á tó lyì byɛ̀bɛ́ bǝ̀ yǝ̀ Yi ni zhí ni á wɛ̀rhɛ́ ǹdǝ bǝ̀ ta yé. Kɔn dɛ̀bɛ́ rǝ̀ wɔ́ cángá ǹdǝ́ dɛ̀bɛ́ rǝ̀ dǝ̀ cángá wɔ̌ rǝ̀ b'a tó dwã? Pwẽ̀ ǹdǝ́ cǝ-byín wɔ̌ rǝ̀ zhǝ̀l ǹdǝ́ dwã? ¹⁵ Kristǝ ǹdǝ́ Shǝtana nyí wɔ̌ è m'a yǝ̀ rǝ̀dù? Ráá lò mɔ̀bɔ́ ń zù Kristǝ ǹdǝ́ mɔ̀bɔ́ ń yǝ̀ Kristǝ zwì tùntwĩ̀ĩ̀ wɔ̌ è yàl rǝ̀dù? ¹⁶ Yi jì y ǹdǝ́ wẽ̀ tɛ̀bɛ́ rǝ̀ dǝ̀ Yi mú jààsɛ́ wɔ̌ è yàl rǝ̀dù? Nǝ́myɛ̌ wɔ́ Yi nã́nyì y jì. Yi cìcì wòwǝ̀: «À b'a yǝ̀ nɛ́ ǹdǝ́ bɛ a tó be à n'â zhǝ̀lǝ̀, a yǝ̀ bǝ̀ Yi, sǝ bǝ̀ m'a yǝ̀ à lyì.» ¹⁷ Wɔ́ rǝ̀myɛ́ yil Cinu kǝ́ n wɔ̀: «Du-nǝ á yẽ̌ be, á vò á jòm kwã nɛ́. Á bǝ̀k'á dwǝ̀rh kɔn dɛ̀bɛ́ rǝ̀ zhe jìmdì yé. Rǝ̀myɛ́ yi ní, à m'a zwẽ ába. ¹⁸ À m'a yǝ̀ á Da, sǝ ámyɛ m'ǎ yǝ̀ à byǎ ǹdǝ́ à bǝ̀kwá. Wɔ́ Cinnǝ jàn-bǝ-swɛ̃́-zhe cǝ́bal mɔ́ ń zɔ̀m èta.»