koussoube-marc-lee_2co_text

Kǝ̀kàl-fwɛ̀lɛ̀ 5

¹ Nǝ́ yě myɛ bǝ̀ nǝ́ cɛ yó yala nɛ́ nyɛ̌ ǹdǝ wɔ́ kòrhó wẽ́ nǝ́ ŋwɛ́nɛ́ ta. Nǝ́ yě bǝ̀, kòrhó w òmyɛ́ gǝ cɔ̀ myɛ, Yi cìcì lù jì rǝ cĩ́ nǝ́ba dɛ̃̌ Arǝzana wa, sǝ jì y èmyɛ́ t'â la wǔr gaga yé, bǝ̀ è dǝ̀ numbyínsi jɛ̃̀ tum yé. ² Wɔ́ rǝ̀myɛ́ è ce, nǝ́ r'é kúrh nǝ́ yala nɛ́ nǝ̀ wɔ́ kòrhó w mɔ́ wẽ́, nǝ́ r'é yǎl ǹdǝ́ nǝ́ wun gakó nǝ́ zù nǝ́ jì y Arǝzana w mɔ́ ǹdǝ kàmǝ̀-zwǐ ta. ³ Bǝ̀ nǝ́ gǝ zù jì y èmyɛ́ ǹdǝ kàmǝ̀-zwǐ ta, nǝ́ k'é t'á la nánlwǝ̀rh yál Yi yé né yé. ⁴ Zhǝ̀nà, nǝ́ gǝ́ ŋwɛ́nɛ́ nǝ́ cɛ yó kòrhó w wẽ́ mó ce, nǝ́ wun zhìlì, nǝ́ r'é kúrh ǹdǝ wɔ́ zhĩĩ tɛ̀bɛ́ rǝ̀ dùm nǝ́ zhĩ ta. Sǝ rǝ̀myɛ́ t'â yǎl e byili bǝ̀ nǝ́ r'é yǎl nǝ́ dùr nǝ́ yẽ̌ nǝ́ cɛ yó yala nɛ́ nɛ yé. Wɔ́ yál nǝ́ r'é yǎl nǝ́ zù Arǝzana yala nɛ́ ǹdǝ kàmǝ̀-zwǐ ta, mùnì ga nǝ́ yala nɛ́ nǝ̀ r'ê cì mú zù nyǔ mú mǝ̀ t'â la zhɔ̌ mɔ́ wẽ́. ⁵ Wɔ́ Yi cìcì rǝ̀ kwɛrhɛ nǝ́ba rǝ ce nǝ́ r'é dɛ̃̀ kɔn rɛ́ rǝ̀myɛ́ mɔ́, rǝ ce rǝ̀ Eshirhǝ y só nǝ́ yó wǝ. Wɔ́ èmyɛ́ è ce nǝ́ yě bǝ̀ nǝ́ b'ǎ nǝ kɔn rɛ́ dɛ̀bɛ́ gakó Yi byili bǝ̀ rǝ̀ la nǝ́ba pɔ mɔ́. ⁶ Wɔ́ rǝ̀myɛ́ è ce, nǝ́ zhǐ kẽkẽ ǹdǝ́ wu-jɔ̀ twéé twéé. Nǝ́ yě bǝ̀, nǝ́ gǝ́ gwẽ̌ ŋwɛ́nɛ́ ǹdǝ́ nǝ́ yala nɛ́ mɔ́, nǝ́ gwẽ̌ tɛ̀nɛ́ Cinnǝ mú sõ yé. ⁷ Sǝ wɔ́ nǝ́ Yi-ni-zhú mú yil nǝ́ ŋwɛ́nɛ́, è dǝ̀ nǝ́ yírhǝ́ nǝ̀ nǝ kɔn yil yé. ⁸ Zhǝ̀nà, nǝ́ zhǐ kẽkẽ ǹdǝ́ wu-jɔ̀, sǝ tɛ̀bɛ́ nǝ́ y'ǎ m'ǎ swéné du mú, wɔ́ nǝ́ gǝ y'ǎ zhǐr nǝ́ yẽ̌ nǝ́ cɛ yó yala nɛ́ nɛ, nǝ́ vò nǝ́ jòm Cinnǝ mú yala nɛ, rǝ̀myɛ́ y'à cɔ̃̀. ⁹ Sǝ ǹdǝ́ rǝ̀myɛ́ ga, nǝ́ gǝ ŋwɛ́nɛ́ ǹdǝ́ nǝ́ yala nɛ́ myɛ, ráá nǝ́ gǝ zhǐr nǝ́ yẽ̌ ne myɛ, nǝ́myɛ̌ wírí nǝ́ tùntwĩ̀ĩ̀ sú Cinnǝ mú yírh, wɔ́ rǝ̀myɛ́ nǝ́ r'é pyà du. ¹⁰ Lò ǹ gǝ wɛ̀rhɛ́ cɛ̀nɛ̀ ráá lwɛlɛ ǹdǝ́ ǹ cɛ yó yala nɛ́ ǹdǝ́ ǹ gwẽ̌ ŋwɛ́nɛ́ lũ ní myɛ, kɔn wɔ́ nyɔ́ɔ́ bǝ̀ nǝ́ gakó zhǐ Kristǝ yé né, n bùr nǝ́ bùrsì. Rǝ̀myɛ́ yó, lò gakó b'ǎ nǝ tɛ̀bɛ́ rǝ̀ mǝ̌ dwã ǹdǝ́ ǹ tùntwǝ̃̀ǝ̃̀ né mó. ¹¹ Bǝ̀ gǝ wò bǝ̀ lò nǝ́ ń nyàm Cinnǝ mú, nǝ́myɛ̌ yě zɔ̀mɛ̀ rɛ́ rǝ̀myɛ́ mɔ́ gǝ́ n'ê yǎl rǝ wɔ̀ nɛ́. Wɔ́ rǝ̀myɛ́ è ce nǝ́ r'é ce jàn nɛ́ nǝ́ byili lyì bí ni mùnì ga bǝ nyɛ̀ɛ̀ nǝ́ zɔ̀mà nɛ́ kùrǝ̀. Yi yě nǝ́ gǝ́ wɔ́ nɛ́ pamparɛ̃ɛ̃, sǝ à n'â bùl b'ǎmyɛ yě à gǝ́ wɔ́ nɛ́ mɔ́ pamparɛ̃ɛ̃. ¹² È dǝ̀ yál nǝ́ k'é n'é yǎl nǝ́ zhẽ̌ nǝ́ cìn dɛ̃̌ á yé né yé. Wɔ́ sɔ́má nǝ́ r'é yǎl nǝ́ pul nǝ́ pǝ ába, mùnì ga á wun yǝ̀ nyɛ̀n ǹdǝ́ nǝ́ba. Èta, á b'ǎ ŋwɛ̀nɛ́ á lyár byɛ̀bɛ́ bǝ̀ n'ê zhẽ̌ bǝ̀ cìn dɛ̃̌ wẽ̀ ré tɛ̀bɛ́ numbyínsi yírhǝ́ nǝ mɔ́ yilǝ, bǝ̀ twǝ́r j'à tɛ̀nɛ́ ǹdǝ́ tɛ̀bɛ́ rǝ̀ wɔ wu w wẽ́ mó. ¹³ Nǝ́myɛ̌ gǝ wɔ́ ǹdǝ nyǝ̀nyǝ̀rh ta myɛ, wɔ́ Yi yilǝ, sǝ nǝ́ gǝ zhe surhǝ, wɔ́ ámyɛ̌ yilǝ. ¹⁴ Kristǝ sónó w cǐ nǝ́ba, bǝ̀ nǝ́ yě pamparɛ̃ɛ̃ bǝ̀ lò mǝ̀dù cù lyì bí gakó yilǝ, sǝ rǝ̀myɛ́ n'ê byili bǝ̀ bǝ̀ gakó tó mo bǝ cì. ¹⁵ Ń cù lyì bí gakó yilǝ, mùnì ga byɛ̀bɛ́ bǝ̀ ŋwɛ́nɛ́ mɔ́ bǝ̀k'a k'e yǝ̀ nɛ́ bǝ̀ cìn yil yé, sǝ bǝ yǝ̀ nɛ́ mɔ̀bɔ́ ń cù n ká n bwìrhì bǝ̀ yil mó yilǝ. ¹⁶ Wɔ́ rǝ̀myɛ́ è ce, nǝ́ k'é t'á nyǐ lò lò ǹdǝ́ numbyíní surhǝ yé. Nǝ́ gǝ y'ǎ n'é nyǐ Kristǝ shãã ga èta myɛ, èlǎsɛ̃́, nǝ́ k'é t'á nyǐ mu ǹdǝ nǝ́ gǝ́ yě né yé. ¹⁷ Èta, lò mɔ̀bɔ́ ń zù Kristǝ, ń jǐrh lyì-dùl. Tùntwǝ̃̀ǝ̃̀ nándwǝ́lǝ́ né jé; e jǐrh tùntwǝ̃̀ǝ̃̀ nándùlǝ̀ nǝ̀ ŋwɛ́nɛ́. ¹⁸ Sǝ rǝ̀myɛ́ gakó wɔ́ Yi sõ rǝ̀ n'ê shí ní, rǝ̀myɛ́ rǝ̀ kwɛrhɛ nǝ́ yò ǹdǝ́ rǝ̀ cìcì Yezu Kristǝ jàn yilǝ, sǝ rǝ̀ pɔ nǝ́ba nyí bǝ̀ nǝ́ bwǝ̌l nǝ́ byili lyì bí dwã bɛ́ nɛ, bǝ̀ rǝ̀ n'ê yǎl rǝ kwɛrhɛ bǝ̀ yò ǹdǝ́ rǝ̀ cìcì. ¹⁹ Yi kwɛrhɛ lũ w lyì bí yò ǹdǝ́ rǝ̀ cìcì Kristǝ jàn yilǝ, rǝ zǝ bǝ̀ dwǝ́ǝ́ré rǝ cɛ̃́ bɛ. Sǝ rǝ̀ pɔ rǝ̀ zɔ̀mɛ̀ rɛ́ nǝ́myɛ̌ nɛ bǝ̀ nǝ́ bwǝ̌l nǝ́ byili lyì bí ni, bǝ̀ rǝ̀ n'ê yǎl rǝ kwɛrhɛ bǝ̀ yò ǹdǝ́ rǝ̀ cìcì. ²⁰ Zhǝ̀n zhǝ̀nà, nǝ́myɛ̌ wɔ́ Kristǝ nyì-zwennǝ. Wɔ́ Yi rǝ̀ tó nǝ́ dɛnnɛ rǝ̀ n'ê lwǝ̀l ába dɛ̃́dɛ̃́ Kristǝ yil lé yilǝ: yẽ̌-nǝ rǝ kwɛrhɛ á yò ǹdǝ́ rǝ̀ cìcì. ²¹ Kristǝ yǝ̀ yǝ̀-bǝlɔ̀lɔ́ wɛ̀rhɛ́ gaga yé, sǝ Yi zwẽ nǝ́ yǝ̀-bǝlwàálɛ́ rǝ cĩ́ ń yó wǝ, mùnì ga rǝ tó ń dɛnnɛ rǝ ce nǝ́ bǝ̀k'á k'é zǝ dwǝ́ǝ́re yé.