koussoube-marc-lee_2co_text

Kǝ̀kàl-fwɛ̀lɛ̀ 4

¹ Wɔ́ Yi gǝ́ wɔ́ nɔ̀nɔ̀-dǔr cǝ́bal mɔ́ è ce rǝ pǝ nǝ́ba tum rí rǝ̀myɛ́. Rǝ̀myɛ́ yilǝ, nǝ́ wun t'â gɛ yé. ² Nǝ́ zhɔ̃̀ tùntwǝ̃̀ǝ̃̀ né nyɛ̀bɛ́ gakó nǝ̀ wɔ́ cìzhìl nyǝ̀ná bǝ̀ n'ê shèè bǝ̀ twĩ̀ mú. Nǝ́ t'á wɛ̀rhɛ́ yǔyǔ yé, nǝ́ t'á lyǝ́r Yi zɔ̀mɛ̀ rɛ́ nǝ́ gùlí kɔma nɛ yé. Nǝ́myɛ̌ gaga mɔ́ n'é byili rǝ̀ zhǝ̀n rɛ́ pamparɛ̃ɛ̃, mùnì ga lò gakó tó ń wu-cǝl ré dɛnnɛ n lwar bǝ̀ nǝ́ wɔ́ zhǝ̀n-cínǝ́ Yi yé né. ³ Sǝ́ nǝ́ yò-ècɔ̀nɔ̀ nyí rí nǝ́ r'é bwǝ̀l mó gǝ shèè, wɔ́ lyì byɛ̀bɛ́ bǝ̀ yò la zhìlù yil rǝ̀ shèè. ⁴ Bǝ̀ yǝ̀ Yi ni zhí yé, bǝ̀ lũ w kɔ̀bɔ́ lwɛlɛ cǝ́bal mɔ́ pyi bǝ̀ surhǝ né, bǝ zɛ̃̀ bǝ̀ k'ê bǝ yò-ècɔ̀nɔ̀ nyí rí pwẽ̀ ré nɛ yé. Yò-ècɔ̀nɔ̀ nyí rí rǝ̀myɛ́ rǝ̀ n'ê byili Kristǝ mó ń wɔ́ Yi nyɔrhɔ mɔ́ zùwǝ́ yǝ́. ⁵ Nǝ́myɛ̌ dǝ̀ nǝ́ cicì yò nǝ́ n'é bwǝ̀l nǝ́ byili yé. Wɔ́ Yezu Kristǝ ń wɔ́ nǝ́ Cǐnnǝ mó nǝ́ r'é bwǝ̀lǝ̀. Nǝ́myɛ̌ zɛ̃̀ nǝ́ n'é byili bǝ̀ nǝ́ wɔ́ á tùntùnnǝ ńmyɛ̌ yil yilǝ. ⁶ Yi rí tɛ̀bɛ́ rǝ̀ wò bǝ̀ pwẽ̀ yǝ̌r cǝ-byṹ wẽ́ mó, wɔ́ rǝ̀myɛ́ cìcì rǝ̀ zǝ rǝ̀ pwẽ̀ ré rǝ yǝ̌r nǝ́ wun ní, rǝ ce nǝ́ wɔ̌ nǝ́ n'é nɛ rǝ̀ zùwǝ́ y è n'ê jǝ́jɛ̀mɛ́ Kristǝ yé-zwã̌ w mɔ́. ⁷ Sǝ nǝ́myɛ̌ byɛ̀bɛ́ nǝ́ zhe Yi pɛnɛ́ y nánfwɛ̀lɛ̀ y èmyɛ́ mɔ́, nǝ́ nyɛ̌ ǹdǝ dɔ nǝ̀zhĩ̌ ta Yi co rǝ̀ pɛnɛ́ nǝ́ wẽ́, rǝ m'e byili bǝ̀ wɔ́ rǝ̀ jàn rɛ́ nánfɔ̀lɔ̀ w ò ŋwɛ́nɛ́ ǹdǝ́ nǝ́ba, s'e dǝ̀ nǝ́ sǝ̀pwà jàn yé. ⁸ Lyì bí n'ê jí zùù ri dwí gakó ǹdǝ́ nǝ́ba, sǝ bǝ̀ t'â ŋwɛ̀nɛ́ nǝ́ba yé. Yò-cǝ̀ǝ̀le n'ê zal nǝ́ba, sǝ nǝ́ wun t'â gɛ yé. ⁹ Bǝ̀ n'ê nwɛ̀nɛ̀ nǝ́ba, sǝ Yi t'â yẽ̌ nǝ́ba yé. Bǝ̀ n'ê zal nǝ́ba bǝ̀ fwàl tɛ̃́, sǝ rǝ̀myɛ́ t'â gwi nǝ́ba yé. ¹⁰ Yezu cu mú nɔ̀nɔ̀ w dɛ̃ nǝ́ba twéé twéé, mùnì bǝ nǝ ń nyǔ mú myɛ nǝ́ yala nɛ́ wẽ́. ¹¹ Nǝ́ ŋwɛ́nɛ́ lũ ní, sǝ ǹdǝ́ rǝ̀myɛ́ ga, nǝ́ nyɛ̌ ǹdǝ wɔ́ cu nyí ni nǝ́ zhǐ ní dɛ̃ gakó Yezu yil ta. Kɔn wɔ́ èta mùnì ga bǝ ŋwɛ̀nɛ́ bǝ nǝ ń nyǔ mú myɛ nǝ́ yala nɛ́ nǝ̀ la cú mú wẽ́. ¹² Èta, cu mú n'ê twĩ̀ mǝ̀ tum nǝ́myɛ̌ wẽ́; nyǔ mú zɛ̃̀ mǝ̀ n'ê twĩ̀ mǝ̀ tum ámyɛ̌ wẽ́. ¹³ Bǝ̀ kɛ̃ Yi zɔ̀mɛ̀ rɛ́ wẽ́ bǝ wɔ̀: À zwẽ nyí, wɔ́ rǝ̀myɛ́ yil à zɔ̀m. Nǝ́myɛ wɔ́ èta. Nǝ́ n'é zwẽ nyí. Wɔ́ rǝ̀myɛ́ yil nǝ́ n'é zɔ̀mà. ¹⁴ Zhǝ̀nà, nǝ́ yě bǝ̀ mɔ̀bɔ́ ń bwìrhì Cǐnnǝ Yezu mú mà n súlí n bwìrhì nǝ́myɛ, sǝ nǝ́myɛ̌ ǹd'ámyɛ̌ ga b'a du nǝ́ zhì Yezu yala nɛ. ¹⁵ Wɔ́ ámyɛ̌ yil rǝ̀myɛ́ gakó la wɔ̀rhɔ́, mùnì Yi pɛnɛ́ y nánfò w j'â n'ô yí lyì nánjǝ̀jóló. Èta, á m'ǎ yǝ̀ nánzhǝzhɔ̌ á mù dwã nɛ á ce Yi nǝ̀báná, s'á cèrhé re. ¹⁶ Wɔ́ rǝ̀myɛ́ è ce, nǝ́ wun t'â gɛ gaga yé. Bá nǝ́ yala nɛ́ jàn rɛ́ gǝ n'ê bɔ̀ námpɔ́lɛ́ námpɔ́lɛ́ rǝ̀ la myɛ, nǝ́ yě nǝ́ wẽ́ bǝ̀ nǝ́ yò n'ô kwɛrhɛ ǹdǝ́ Yi twéé twéé. ¹⁷ Zhǝ̀nà, èlǎsɛ̃́ mɔ́, nɔ̀nɔ̀ gǝ zhe nǝ́ba námpɔ́lɛ́, sǝ ò t'â la dɔnɔ yé. Nɔ̀nò w òmyɛ́ b'a ce nǝ́ nǝ zùwǝ́ nánfɔ̀lɔ̀ è t'â la zhɔ̌, sǝ zùwǝ́ y nǝ́ la nɔ mɔ́ b'a dwini nɔ̀nɔ̀ w kɔ̀bɔ́ nǝ́ n'é nwɛ̀nɛ̀ èlǎsɛ̃́ mɔ́ dɛ̃́dɛ̃́. ¹⁸ Nǝ́myɛ̌ t'á pyà kɔn dɛ̀bɛ́ yírhǝ́ wɔ̌ nǝ̀ nɛ yé. Wɔ́ tɛ̀bɛ́ yírhǝ́ wàr nǝ̀ nɛ mɔ́ nǝ́ n'é pyà, bǝ̀ tɛ̀bɛ́ yírhǝ́ nǝ mɔ́ bǝ bwàl cɔ̌ yé, sǝ tɛ̀bɛ́ yírhǝ́ bǝ nɛ mɔ́ t'â cɔ̀ gaga yé.