koussoube-marc-lee_2co_text

Kǝ̀kàl-fwɛ̀lɛ̀ 3

¹ Nǝ́ gǝ́ zɔ̀m èta mɔ́, á zɛ̃̀ á n'á bùl bǝ̀ wɔ́ nǝ́ cìn nǝ́ k'é ji kùr nǝ́ r'é zhẽ̌ dɛ̃̌ náá etǝra? Ráá nǝ́ mǝ̌ sǝ nǝ́ zǝ sábá nǝ́ b'ě byili ába mùnì ga á lwar bǝ̀ nǝ́ wɔ́ Kristǝ tùntúmǝ́, ráá ámyɛ mǝ̌ s'á pǝ nǝ́ba sábá mùnì ga lyì bí lwar bǝ́ nǝ́ wɔ́ Kristǝ tùntúmǝ́, ǹdǝ lyì jàlà gǝ́ n'ê wɛ̀rhɛ́ nɛ́? ² Wɔ́ ámyɛ̌ cìcì á wɔ́ nǝ́ sɛ́bɛ́, rǝ̀ kɛ̃ nǝ́ wun ní wẽ́; lyì bí gakó wɔ̌ bǝ̀ lwar rǝ̀ párá bǝ kàrmǝ̀. ³ Bǝ̀ lwar pamparɛ̃ɛ̃ b'ǎ wɔ́ sɛ́bɛ́ Kristǝ cìcì kɛ̃ nǝ́ zǝ nǝ́ m'é bà, sǝ è dǝ̀ numbyíní è kɛ̃ sɛ́bɛ́ rɛ́ rǝ̀myɛ́ zɔ̀mà nɛ́ yé. Wɔ́ Yi nã́nyì y Eshirhǝ y è kɛ̃ nɛ. Nǝ̀ yǝ̀ kɛ̃ nǝ́kuuli yó yé. Wɔ́ numbyínsi wun wẽ́ nǝ̀ kɛ̃ nɛ́. ⁴ Nǝ́ r'é tó Kristǝ dɛnnɛ nǝ́ zɔ̀m èta ǹdǝ́ zhǝ̀n rɛ́ tɛ̀bɛ́ nǝ́ zhe ǹdǝ́ Yi mú. ⁵ È dǝ̀ búl nǝ́ r'é bùl bǝ̀ nǝ́ wɔ̌ kɔn nǝ́ la wɔ̀rhɔ́ ǹdǝ́ nǝ́ sǝ̀pwà jàn yé. Nǝ́ ŋwɔ̀nɔ́ w wɔ́ Yi sõ ò n'ô shí ní, ⁶ bǝ̀ wɔ́ rǝ̀myɛ́ rǝ̀ ce nǝ́ ŋwɛ̀nɛ́ nǝ́ jǐrh rǝ̀ tùntùnnǝ̀ nǝ́ r'é bwǝ̀l dɔbrɛ́ nándùl ré nyí rí nǝ́ byili. Dɔbrɛ́ nándùl ré rǝ̀myɛ́ n'ê shí Eshirhǝ náàcɛ̀nɛ́ sõ. Rǝ̀ t'â shí nyǝ́ né nǝ̀ kɛ̃ nǝ́kuulí yó mó wẽ́ yé. Nyǝ́ né nǝ̀ kɛ̃ mɔ́ n'ê zǝ cu nǝ̀ twí, sǝ Eshirhǝ y n'ê pɛ nyǔ. ⁷ Muyiisi yà ń nǝ́ ń bwǝ̀l nyǝ́ né zɔ̀mà nɛ́ nǝ̀ kɛ̃ nǝ́kuulí yó mó, sǝ nǝ̀ y'à n'ê zǝ cu nǝ̀ twí. Ǹdǝ́ rǝ̀myɛ́ ga, tum rí rǝ̀myɛ́ mɔ́ y'à n'ê byili Yi zùwǝ́ yǝ́. Rǝ̀ zùwǝ́ y èmyɛ́ y'à n'ê ce Muyiisi yé y jǝ́jɛ̀mɛ́. Rǝ̀myɛ́ ce, Esǝrayɛl lyì bí y'à k'ê kwàl ń yé y bǝ̀ n'ê nyǐ yé. È jǝ́jɔ̀mɔ́ mɔ́ j'à y'à t'â dɛnɛ yé, ⁸ sǝ zùwǝ́ y kɛ̀bɛ́ Eshirhǝ náàcɛ̀nɛ́ tum rí n'ê pɛ mɔ́ já dɛ̃́dɛ̃́ du. ⁹ Nyǝ́ né nyɛ̀bɛ́ nǝ̀ y'à n'ê zǝ cu nǝ̀ twí mú bwǝ̌l e byili mú gǝ y'à n'ê ce nǝ̀ bwǝ̀lnǝ̀ mó nǝ zùwǝ́, sǝ́ nyǐ Eshirhǝ y è n'ê ce nǝ́ k'é bǝ dwǝ́ǝ́re zhe mó bwǝ̀lnǝ̀ bé nǝ zùwǝ́ nánfɔ̀lɔ̀ du. ¹⁰ Zùwǝ́ y kɛ̀bɛ́ è ŋwɛ́nɛ́ èlǎsɛ̃́ mɔ́ du shãã ga nyǎ yá. Rǝ̀myɛ́ ce shãã ga nyǎ y k'ê bǝ kùr zhe yé. ¹¹ Kɔn dɛ̀bɛ́ rǝ̀ t'â dɛnɛ rǝ̀ m'ê jé mó gǝ zhe zùwǝ́, sǝ́ nyǐ tɛ̀bɛ́ rǝ̀ j'â ŋwɛ́nɛ́ gaga mɔ́ zhe zùwǝ́ du. ¹² Nǝ́ gǝ́ n'é dɛ̃̀ Yi nyì-bwelé y pyǐrh mó ce nǝ́ zhe wu-jɔ̀. ¹³ Nǝ́ t'â wɛ̀rhɛ́ ǹdǝ Muyiisi ta yé. Ń yà ń nǝ́ ń zǝ kàmǝ̀-jɛ̃̀ ń mǝ́ ń círhí ń yé ne, mùnì ga Esǝrayɛl lyì bí bǝ̀k'a nǝ ń yé y jǝ́jɔ̀mɔ́ mɔ́ gǝ́ la nɛ́ zhɔ̌ yé, e j'à t'â dɛnɛ yé. ¹⁴ Sǝ bǝ̀ surhǝ né y'à pyi. Zà zà myɛ gwẽ̌ wɔ́ èta. Bǝ̀ gǝ n'ê kàrmǝ̀ dɔbrɛ́ nándwǝ́l ré sɛ́bɛ́ rɛ́, kàmǝ̀-jɛ̃̀ y èmyɛ́ cìcì mú n'ê pyi bǝ̀ surhǝ né. Lò mɔ̀bɔ́ ń zù Kristǝ, wɔ́ ńmyɛ̌ dúdú surhǝ né kàmǝ̀-jɛ̃̀ y èmyɛ́ t'â pyi yé. ¹⁵ Zà zà gwẽ̌, bǝ̀ gǝ n'ê kàrmǝ̀ Muyiisi sábá nɛ́, kàmǝ̀-jɛ̃̀ gwẽ̌ n'ê pyi bǝ̀ wun ní. ¹⁶ Bǝ̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bǝ wɔ̀: «Lò mɔ̀bɔ́ ǹ pyìrhí ǹ wu ń zù Cinǝ mú, kàmǝ̀-jɛ̃̀ y n'ê púrǝ́.» ¹⁷ Nyɔ̀nɔ̀, bǝ̀ gǝ wò bǝ̀ Cinnǝ, wɔ́ ń Eshirhǝ y yò bǝ̀ n'ê zɔ̀mà, sǝ Cinnǝ mó Eshirhǝ y gǝ ŋwɛ́nɛ́ mǝ̀gã̌, cìn-cìnú ŋwɛ́nɛ́ gàà. ¹⁸ Nǝ́myɛ̌ byɛ̀bɛ́ gakó kàmǝ̀-jɛ̃̀ y yǝ̀ nǝ́ yésé ne círhí mú, nǝ́ r'é nɛ Cinnǝ mú zùwǝ́ y ǹdǝ lò gǝ́ nǝ́ ń nyǐ ń cìn zhèzhé wẽ́ ta. Ńmyɛ̌ mɔ̀bɔ́ ń wɔ́ Eshirhǝ mó ce nǝ́ r'é nɛ zùwǝ́ dɛ̃́dɛ̃́. Èta, nǝ́ zɛ̃̀ nǝ́ nyɛrhɛ ń cìcì.