¹ Wɔ́ rǝ̀myɛ́ è ce, à gu à wẽ́ à k'â yǝ̀ á sõ tó, mùnì ga à bǝ̀k'a zhìlì á wun ni kǝ́dò yé. ² Àmyɛ́ gǝ zhìlì á wun ni, wɔ́ mɔ̌ ń mà n pɛ̃ wu-nyɔ̃̀? Wɔ́ ámyɛ̌ byɛ̀bɛ́ à zhìlì á wun ni mú á y'ǎ mǝ̌ s'á pɛ̃ wu-nyɔ̃̀. ³ Wɔ́ rǝ̀myɛ́ è ce, à byili ába sɛ́bɛ́ rɛ́ tɛ̀bɛ́ à jɛ̀rɛ̀ a kɛ̃ a pǝ ába mɔ́ wẽ́, bǝ̀ nyǐ à t'â yǎl a bǝ̀ á sõ mùnì byɛ̀bɛ́ bǝ̀ y'à mǝ̌ sǝ bǝ pɛ̃ wu-nyɔ̃̀ mɔ́ wun bǝ̀k'a zhìlì yé. Zhǝ̀nà, à yě pamparɛ̃ɛ̃ b'à wu gǝ nyɛ̀, ámyɛ wun b'a yǝ̀ nyɛ̀n. ⁴ Zhǝ̀nà, wɔ́ wu-zhìlù nánfɔ̀lɔ̀ ǹdǝ́ yǝ́-nàná à m'a kɛ̃ sɛ́bɛ́ rɛ́ rǝ̀myɛ́, s'e jà à yǝ̀ rɛ kɛ̃ à la m'a zhìlì á wun ni yé. À kɛ̃ rɛ a pǝ ába mùnì á lwar b'à só ába dɛ̃́dɛ̃́. ⁵ Lò mó mɔ̀bɔ́ ń ce wu-zhìlù w ŋwɛ́nɛ́ mɔ́, è dǝ̀ à dúdú wu ni ń zhìlì yé. Wɔ́ á gakó. Sǝ à t'â yǎl a wɔ̀ bǝ̀ wɔ́ á gakó á wun zhìlì yé. Wɔ́ á jàlà wun nǝ̀ zhìlì. ⁶ Sǝ lyì nánzhǝzhɔ̌ gǝ́ pɔ mɔ còrhò-tum mú, rǝ̀myɛ dúdú já. ⁷ Rǝ̀myɛ́ ce, á mǝ̌ s'á pɔ̃ sǔbri èlǎsɛ̃́, s'á cící mu. È gǝ dǝ̀ rǝ̀myɛ́, ń wu gǝ zhìlì ò lyɛ̃ cɛ nɛ, ń wu wɔ̌ ò gɛ. ⁸ Wɔ́ rǝ̀myɛ́ è ce à n'â lwǝ̀l ába, s'á ce n lwar b'ǎ só mo. ⁹ À kɛ̃ sɛ́bɛ́ rɛ́ a pǝ ába à la b'a dwẽ́ ába, a nyǐ ǹd'á gǝ b'ǎ zwẽ kɔn dɛ̀bɛ́ gakó à byili ába mó. ¹⁰ Mɔ̀bɔ́ á pɔ mɔ sǔbri mú, àmyɛ n'â pɛ mɔ sǔbri. À gǝ mǝ̌ s'a pǝ sǔbri lò nè, à gǝ pɔ mɔ, wɔ́ ámyɛ̌ yil à pɔ mɔ sǔbri Kristǝ yé né. ¹¹ Èta mɔ́, Shǝtana t'â la bɔ̀l nɔ è zù nǝ́ bwǝ̌l w yé. Zhǝ̀nà, nǝ́ yě è surhǝ né gǝ́ wɔ́ nɛ́ náàcɛ̀nɛ́. ¹² À gǝ́ yú Tǝrǝwaasɛ à la Kristǝ yò-ècɔ̀nɔ̀ nyí rí bwǝ̌l mó, à pwírí Cinnǝ mú yà ń pul sɔ́má n pɛ̃ mùnì a ŋwɛ̀nɛ́ a twĩ̀ gàà. ¹³ Sǝ à gǝ́ yǝ̀ à da-byǐ Titi nɛ mɔ́ ce, à wu yǝ̀ nyɛ̀n yàl yé. Wɔ́ rǝ̀myɛ́ è ce a k'a zhǐr gàà a vò Masɛdwanɛ. ¹⁴ Cèrhé-nǝ nǝ́ cèrhé Yi, bǝ̀ rǝ̀ tó Kristǝ mó ń jú bɛlɛ mɔ́ dɛnnɛ rǝ sɛ̃ nǝ́ba nǝ́ ŋwɛ́nɛ́ Kristǝ mó ńmyɛ̌ mǝ̀dù y kwã nɛ́ twéé twéé. Rǝ̀ n'ê tó nǝ́ dɛnnɛ rǝ ce ń pár lwar mɔ́ sáa jààsɛ́ gakó wǝ, ǹdǝ lwẽ́ nã́nyǝ̀nyɛ̀lɛ́ ta. ¹⁵ Zhǝ̀nà, nǝ́ wɔ́ ǹdǝ lwẽ́ nã́nyǝ̀nyɛ̀lɛ́ ta Kristǝ nǝ́ ń pɛ Yi ni. Lwẽ́ ré rǝ̀myɛ́ wɔ́ byɛ̀bɛ́ Yi n'ê vwǎrh mɔ́ ǹdǝ́ byɛ̀bɛ́ bǝ̀ yò n'ô yǎl o zhìlì mú yilǝ. ¹⁶ Sǝ lwẽ́ ré rǝ̀myɛ́ mɔ́ wɔ́ cu lwẽ́, rǝ̀ n'ê twí ǹdǝ́ cu byɛ̀bɛ́ bǝ̀ yò n'ô zhìlì mú yilǝ. Rǝ zɛ̃̀ rǝ̀ wɔ́ nyǔ lwẽ́ rǝ̀ n'ê pɛ nyǔ byɛ̀bɛ́ Yi n'ê vwǎrh mɔ́ nɛ. Sǝ è nǝ wɔ́ mɔ̌ ń wɔ̌ ń mà n twĩ̀ tum dí rǝ̀myɛ́? ¹⁷ Nǝ́myɛ̌ dǝ̀ ǹdǝ lyì nánzhǝzhɔ̌ byɛ̀bɛ́ bǝ̀ n'ê zǝ Yi zɔ̀mɛ̀ rɛ́ bǝ̀ dɔ̌l mɔ́ ta yé. Nǝ́myɛ̌ wɔ́ Yi rǝ̀ twĩ̀ nǝ́ba nǝ́ r'é byili rǝ̀ zɔ̀mɛ̀ rɛ́ ǹdǝ́ wu-põ̀ rǝ̀ yé né, Kristǝ jàn yilǝ.