¹ Saləmɔ lù Cinu jì y ǹdə́ ń sə̀pwà kɛ̀lɛ́ y byinə shí-èlyè. ² N kə́ n kwɛrhɛ cɛmɛ nɛ́ nyɛ̀bɛ́ Yəram yà ń pɔ mɔ mɔ́, n zɛ̃̀ n ce Esərayɛl lyì byǎ bɛ́ bə̀ bə jòm nə̀ wẽ́. ³ Rə̀myɛ́ kwã, ń zhə̀l n bú ǹdə́ Amaatɛ-Sɔba cɔ wá, n zwẽ w n cìní. ⁴ Ń lù Tadəmɔɔrɛ gɔ-elũ èpòlò w w mó ǹdə́ wẽ̀ cṹ jààsɛ́ cɛmɛ nɛ́ gakó Amaatɛ nyí rí wẽ́ mó. ⁵ Ń lù Dɛ̃̌-sõ Bɛtɛ-Orɔ̃ ǹdə́ Tɛ̃́-sõ Bɛtɛ-Orɔ̃, cɛmɛ nə̀ kə́kɛ́lɛ́ ǹdə́ byíl-fwàlsɛ nə̀ zhe bwə̀ə̀le rə̀ n'ê sàásɛ, ⁶ ǹdə́ Baalatɛ ǹdə́ wẽ̀ cṹ jààsɛ́ cɛmɛ nɛ́ nyɛ̀bɛ́ gakó ń yà ń cǐ mú ǹdə́ ń búlə́ eshə-vwə̃tur rí cṹ jààsɛ́ cɛmɛ nɛ́ e súlí ń eshə-jòmnə bé cɛmɛ nɛ́. Saləmɔ súlí n lù kɔn rɛ́ tɛ̀bɛ́ gakó ń yà ń nə́ ń yǎl mɔ́ Zhərəzalɛm nɛ́ ǹdə́ Lyəbã nɛ́ e súlí tənà y ń yà ń cǐ mú nyí rí gakó wẽ́. ⁷ Yititəbá ǹdə́ Amɔrətəbá ǹdə́ Pərəzhitəbá ǹdə́ Yivyitəbá e súlí Zhəbuusi lyì bí, bə̀ y'à də̀ Esərayɛl lyì byǎ bɛ́ dwí rí lyì mú, kùr y'à gwẽ̌ dàl tənà y wẽ́. ⁸ Wɔ́ bə̀ byǎ bɛ́ byɛ̀bɛ́ bə̀ y'à mɛ̃ tənà y wẽ́ bə̀myɛ́ kwã nɛ́, Esərayɛl lyì byǎ bɛ́ y'à yə̀ gwi lyə́m lyə́m mó, Saləmɔ zɔ n ce tũ̀-kùlə̀ né wẽ́, kɔn b'e yí zà. ⁹ Sə ń yə̀ Esərayɛl lyì byǎ bɛ́ mə̀dù ga tũ̀-kùlə̀ né w ce yé; bə̀myɛ́ y'à wɔ́ ń lyì bí byɛ̀bɛ́ bə̀ tɛnɛ búlə́ yilə, ǹdə́ ń shəshesé yìlnə yó-cìnə́ bé ǹdə́ ń búlə́ eshə-vwə̃tur rí e súlí eshə-jòmnə bé yó-cìnə́ bé. ¹⁰ Nyǐ yé né cìnə́ bé byɛ̀bɛ́ bə̀ y'à n'ê twĩ̀ bə̀ pɛ pyɔ̌ Saləmɔ nɛ mɔ́ yó-cìnə́ bé yó wə́: bə̀ y'à wɔ́ nunə zwã̌-àlyè ǹdə́ shí-ènu, bə̀ y'à n'ê cili dwí ¹¹ Saləmɔ ce Faraɔ̃ bə̀kɔ́ mɔ́ shə́r Dəvyidi Pyə̀-cɔ w wẽ́ n bə̀ pyɔ̌-kɛ̀lɛ́ y kɛ̀bɛ́ ń lù n pɔ̃ mɔ́ wẽ́, bə̀ ń yà ń nə́ ń wə̀lə̀: «À kɛ̃ mɔ́ bə mə̌ sə n mɛ̃ Esərayɛl lyì byǎ bɛ́ pyɔ̌ Dəvyidi kɛ̀lɛ́ y wẽ́ yé, bə̀ jààsɛ́ shɛ̀bɛ́ bə̀ cĩ́ Cinu Yi dɔbrɛ kùlkṍ w né mó wɔ́ Yi jààsɛ.» ¹² Kɔn gə́ zhì rə̀myɛ́ yi ní mú, Saləmɔ já n zwə́l vwə̃̀ námpúmə́ cɛ̃́ɛ̃́ n pə Cinu Yi ní, vwĩ̀-jùlú w ń lù Yi yilə, ò y'à ŋwɛ́nɛ́ Cinu jì y yé né mó yó, ¹³ kɔn tó dwã nɛ́ nyɛ̀bɛ́ bə̀ y'à mə̌ sə bə zwə́l ne ǹdə Muyiisi gə́ pɔ nyí ní: shìrhə́ y dɛ̃ rɛ́, càn-dùlí y dɛ̃ rɛ́, e súlí byin rí címsí nánfwàlsɛ́ sə̀tɔ̀ yá: búrú w ò yǝ̀ sã̀-nǝ̀byẽ̌ ce mó címsí ǹdə́ Pantǝkɔtɛ címsí e súlí Kwə̀ə́rhé címsía. ¹⁴ Ń tó nyí rí tɛ̀bɛ́ ń da Dəvyidi yà ń kwè mó ne. N pə vwĩ̀-zwə́lnə kùkùlə̀ né ne bə̀ tumə né. N cĩ́ Levyi dwí rí lyì bí bə̀ jààsɛ́ wẽ́, mùnì ga bə cèrhé Cinu ráá bə twĩ̀ ǹdə vwĩ̀-zwə́lnə bé dwã nɛ́ gə́ pú pú dwã nɛ nɛ́. N zɛ̃̀ n cĩ́ étwí-ènyə́ né dɛ̀nna bɛ́, étwí-ènyí gakó ne, kɔn tó dwã ǹdə́ bə̀ kùkùlə̀ né. Bə̀ wɔ́ rə̀myɛ́ mɔ́ nyí Yi lò Dəvyidi yà ń pɔwa. ¹⁵ Bə̀ j'â yə̀ ywə̀r bə yẽ̌ Dəvyidi nyə́ né ń pɔ vwĩ̀-zwə́lnə bé ǹdə́ Levyi dwí rí lyì bí shò kwã nɛ́ mɔ́ nɛ, kɔn tɛ̌ tɛ̌ yil má nə̀cɛ̀ndɛ́ cìcì mú yil myɛ yé. ¹⁶ Wɔ́ èta Saləmɔ tum rí gakó twĩ̀ rə zhɛ̀ nɛ́, kɔn zhì Cinu jì y lú kùr ju tumə né e m'e yí è lú e zhɛ̀ tumə né. ¹⁷ Rə̀myɛ́ yó, Saləmɔ já n zhǐr n vò Eshɔ̃-Gəbɛɛrɛ ǹdə́ Elaatɛ, nə̀-fɔ̀lɔ̀ w nyí ni, Edɔm tənà y wa. ¹⁸ Yəram twĩ̀ ń tùntùnnə bé bə zə bǔ-bwələ ǹdə́ tùntùnnə bə̀ yě nə̀-fɔ̀lɔ̀ w yé shò bə vò bə pɔ̃. Bə̀myɛ́ mɔ́ tó Saləmɔ tùntùnnə bé ne bə vò Ofiiri, bə zə sánə́má mə̀ y'à du tɔ́nnəbá shí ǹdə́ bə̀tɔ̀ bə m'e shí gàà bə kwɛ̃̀ bə b'e pə Saləmɔ nɛ.