¹ Saləmɔ gə́ tú ń ce Yi n zhɛ̀ kwã nɛ́, myǐn j'a shí dɛ̃̌-yi w mə bə̀ mə jí vwĩ̀ námpúm cɛ̃́ɛ̃́ rɛ́ ǹdə́ yə̀-zùlə́ vwə̃̀ né, sə Cinu Yi còrhó w tú o sú Yi jì yə́. ² Vwĩ̀-zwə́lnə bé k'ê yə̀ ŋwɛ̀nɛ́ bə zù Cinu Yi jì y wẽ́ yé, b'è y'à sú ǹdə́ Cinu còrhó wə́. ³ Esərayɛl lyì byǎ bɛ́ gakó nɔ myǐn mú ǹdə́ Cinu Yi còrhó w rə̀ n'ê swé jì y yó w mó, bə j'a zɛ̃̀ bə tu bə̀ nə̀dwə́nə́ yó, bə zə bə̀ yə́rh bə pú tɛ̃́ cɛ y è y'à pyìlì mú yó, bə̀ m'ê cèrhé Cinu Yi bə̀ zhe: «Ń wɔ́ wu-bɔ̀nɔ̀ cə́bal, ń wu-bɔ̀nɔ̀ w j'â ŋwɛ́nɛ́ gaga yilə.» ⁴ Pyɔ̌ mɔ́ ǹdə́ dwí rí púlə́púlə́ zwə́l vwə̃̀ Cinu Yi yé né. ⁵ Saləmɔ zwə́l vwàmá nánfwààlɛ mɔ̀ɔ̀rhɛ̀ shí-èlyè ǹdə́ rə̀lyè (22 000) ǹdə́ və̌-ywàálɛ mɔ̀ɔ̀rhɛ̀ zɔ̌m ǹdə́ shí-èlyè (120 000) vwə̃̀, n pə Cinu ni. Wɔ́ èta pyɔ̌ Saləmɔ ǹdə́ Esərayɛl lyì byǎ bɛ́ gakó wɛ̀rhɛ́ nɛ́ bə m'e pə jì y Cinu ni e yə̀ ńmyɛ̌ ń cǐ y námpúm cɛ̃́ɛ̃́. ⁶ Vwĩ̀-zwə́lnə bé y'à zhǐ bə̀ tum jààsɛ́ wẽ́. Levyi dwí rí lyì bí y'à n'ê dwí Cinu còrhó dɛ̀lɛ̀ wẽ̀ ré, wẽ̀ ré tɛ̀bɛ́ pyɔ̌ Dəvyidi yà ń wɛ̀rhɛ́ mɔ́ bə̀ m'ê cèrhé Cinu bə̀ zhe: «Ń wu-bɔ̀nɔ̀ w j'â ŋwɛ́nɛ́ gaga yilə.» Bə̀ gə́ y'à tú bə kwè Dəvyidi nwə̃́ y èmyɛ́ bə̀ m'ê cèrhé Yi yi ní, vwĩ̀-zwə́lnə bé y'à zɛ̃̀ bə̀ n'ê wúl pɔ́lsɛ, Esərayɛl lyì byǎ bɛ́ púlə́púlə́ y'à j'a zɛ̃̀ bə̀ zhǐ dɛ̃̌. ⁷ Saləmɔ pə kɛ̀lɛ́ y wu w cəcəl ré, rə̀ wɔ Cinu Yi jì y yé né mó Cinu ni. Wɔ́ gàà ń zwə́l vwə̃̀ námpúmə́ cɛ̃́ɛ̃́ nɛ́ nɛ́, n súlí n ji yə̀-zùlə́ vwə̃̀ né nwǐsí myǐn ní, bə̀ vwə̃̀ námpúmə́ cɛ̃́ɛ̃́ nɛ́ ǹdə́ yə̀-zùlə́ vwə̃̀ né jíjí byǎ bɛ́ e súlí rə̀ nwǐsí y'à wàr kàmmɔ vwĩ̀-jùlú w kɔ̀bɔ́ Saləmɔ yà ń zùrhì mú yó yé. ⁸ Saləmɔ jú címsí rə̀myɛ́ yi ní dwã nyàlpyɛ̀, sə Esərayɛl lyì byǎ bɛ́ púlə́púlə́ tó mo bə jí si: è yàl lyì bə̀ y'à búl bə̀ já dɛ̃́dɛ̃́ bə̀ y'à tú dwã yó, bə̀ y'à shí kɔn gə́ zhì Lebo-Amaatɛ nyí rí wẽ́ mó e m'e vò e zə Ezhibti bwǐ y ni. ⁹ Dwã lyɛlɛ dɛ̃ rɛ́ yù wə, bə̀ jòm kúlí nánfwɛ̀lɛ̀, bə̀ bə̀ y'à kwè dwã nyàlpyɛ̀ bə m'e pə vwĩ̀-jùlú w Yi ni, sə bə̀ y'à súlí bə jí címsí dwã nyàlpyɛ̀. ¹⁰ Sə cànsɛ̀ shàlpyɛ̀ nyǎ y dwã shí-èlyè ǹdə́ nə̀tɔ̀ dɛ̃ rɛ́, n ká n cĩ́ dwí rí sɔ́má yó, rə kwɛ̃̀ rə vò rə̀ kwə̀ə́rhé wə. Rə̀ y'à n'ê fùù, rə̀ wu y'à sú ǹdə́ wu-nyɔ̃̀ cɛ̀nɛ̀ rɛ́ tɛ̀bɛ́ Cinu yà ń wɛ̀rhɛ́ ń tùntùnnə Dəvyidi ǹdə́ Saləmɔ e súlí ń dwí Esərayɛl lyì byǎ bɛ́ nɛ mɔ́ yilə. ¹¹ Saləmɔ gə́ tú n lù Cinu jì y ǹdə́ ń sə̀pwà kɛ̀lɛ́ y e súlí kɔn rɛ́ tɛ̀bɛ́ gakó ń yà ń nə́ ń yǎl n wɛ̀rhɛ́ Cinu jì y wẽ́ ǹdə́ ń kɛ̀lɛ́ y wẽ́ n zhɛ̀, ¹² Cinu lyí mu cəcɛ̃ nɛ n zɛ̃̀ n wɔ̀ mɔ: «À nyɛ̀ɛ̀ ǹ lwə̌l mó, sə à cír jàà y kɛ̀bɛ́ à cìcì yil mùnì ga e yə̀ jì kɛ̀bɛ́ bə̀ la zwə́l vwə̃̀ è wẽ́ bə pɛ̃. ¹³ À gə pyi dɛ̃̌-yi rí, dwà zɛ̃̀ è k'ê t'â nywɛ̀, à gə pɔ nyí byaalɛ nɛ bə̀ rə̀ cɔ̌ tənà yá, à gə ce cím-bəlwɛ̀lɛ́ zù à dwí rí wẽ́ yi ní, ¹⁴ à dwí rí, tɛ̀bɛ́ bə̀ byẽ̀ à yil ré rə̀ yó mó, gə lwəl rə̀ cìn tɛ̃́, rə lwə̀l ne, rə pyà à yé-zwã̌ yá, rə súlí rə kwɛ̃̀ rə yẽ̌ rə̀ sɔ̃́-bǝlwǎlsɛ́ nɛ, àmyɛ́ m'a zhì dɛ̃̌-yi w a cili, a pə rɛ rə̀ dóó w sǔbri, a zɛ̃̀ a kwɛrhɛ rə̀ cɔ w a cĩ́ ò jàà y nɛ́. ¹⁵ Kɔn zhí èlǎsɛ̃́, à m'a pul à yírhə́ a súlí a pyèrhè à zhã̌ a cili lwə̌l mó mɔ̀bɔ́ bə̀ m'a zhì jàà y kɛ̀bɛ́ wẽ́ bə lwə̀l mó. ¹⁶ Sə kɔn zhí èlǎsɛ̃́, à cír jì y kɛ̀bɛ́ a súlí a zwẽ y è la yə̀ àmyɛ́ nyǎ mùnì ga à yil ré yə̀ è wẽ́ twéé twéé, à yírhə́ né ǹdə́ à wu w m'a yə̀ è wẽ́ twéé twéé. ¹⁷ È gə wɔ́ ǹmyɛ́ yilə, ǹ gə zhə̀l à yé né ǹdə ǹ da Dəvyidi ta, ǹ nə́ ǹ tó kɔn rɛ́ tɛ̀bɛ́ gakó à n'â byili mú mú, ǹ nə́ ǹ zwẽ à nyə́ né ǹdə́ à lùl-e-púrsí, ¹⁸ à m'a ce ń dɛnɛ ǹ pyɛ̀lɛ̀ də̀gwã́ y yó, ǹdə à gə́ bwəl nyí ǹ da Dəvyidi ni, a wɔ̀ mɔ nɛ́: ‹Ǹ tá ǹ la byǐ lyã̀ɔ̃̀ n yə̀ Esərayɛl pyɔ̌ gaga yé.› ¹⁹ Sə á gə tú á yẽ̌ ne, á yẽ̌ à nyə́ né ǹdə́ à lùl-e-púrsí à pɔ ába mɔ́ zõ ne, á zɛ̃̀ á kwɛ̃̀ á n'â cèrhé yə dwã, á n'á wùlì tɛ̃́ nə̀ yé né, ²⁰ à m'a ce á jé tɛ̃́ à cɛ y kɛ̀bɛ́ à pɔ ába mɔ́ wẽ́, a zɛ̃̀ a zhɛ̃̀ jì y kɛ̀bɛ́ à zwẽ è wɔ́ à còrhó pɔ jàà mɔ́, à m'a dwĩ̀ y kwã nɛ́ pyépyé à nyí ni, a ce e jǐrh səswalá ǹdə́ mɔ̀n kɔna, dwə́ né dwã bɛ́ gakó yilə. ²¹ Sə kɔn m'a jàr lò mɔ̀bɔ́ gakó ń mà n tó jì y kɛ̀bɛ́ è wɔ dɛ̃̌dɛ̃̌ èta mɔ́ nyí ni ń nə́ ń lyɛ̃ mɔ́ gakó dɛ̃́dɛ̃́, sə ń mà n wɔ̀: ‹È nə wɔ́ byè yil Cinu Yi wɛ̀rhɛ́ tənà y kɛ̀bɛ́ ǹdə́ jì y kɛ̀bɛ́ èta?› ²² Sə bə̀ m'a lyár mɔ bə wɔ̀: ‹Wɔ́ Esərayɛl lyì byǎ bɛ́ gə́ yẽ̌ Cinu bə̀ Yi rí tɛ̀bɛ́ rə̀ y'à ce bə̀ nàmbala bɛ́ shə́r Ezhibti ní mú, bə zɛ̃̀ bə zhí yə dwã nɛ, bə̀ n'ê wùlì tɛ̃́ nə̀ yé né bə̀ m'ê cèrhé ne mó è ce Cinu Yi ce lwɛlɛ rɛ́ tɛ̀bɛ́ pú bi.› »