¹ Rə̀myɛ́ yó Saləmɔ yòwə̀: «Cinu wə̀l bə̀ ń nə́ ń yǎl n jòm cə-byín fúrí wẽ́. ² Sə àmyɛ́ lù pyɔ̌ jì ǹ yilə, ǹ la ǹ já ǹ ŋwɛ́nɛ́ è wẽ́ twéé twéé yilə.» ³ Saləmɔ pyìrhí ń yé y n zǎ Esərayɛl lyì byǎ bɛ́ bə̀ y'à tú dwã yó mó; bə̀ gakó y'à zɛ̃̀ bə̀ zhǐ dɛ̃̌. Saləmɔ cĩ́ bwəl bə̀ yó. ⁴ Ń yòwə̀: «Cinu Esərayɛl lyì byǎ bɛ́ Yi rí nə còrhó! Ń cìcì mú pyìrh kɔn rɛ́ tɛ̀bɛ́ ń púr ń nyí ń wɔ̀ à da Dəvyidi ni mú: ⁵ ‹À gə́ ce à dwí Esərayɛl lyì byǎ bɛ́ shə́r Ezhibti ní yi ní ga, à yə̀ cɔ òdù ga cír bə̀ kwálsɛ́ ga wẽ́ mùnì bə lù jì ò wẽ́ àmyɛ́ yil ré còrhó pɔ yil yé. À yə̀ lò dõ myɛ cír mùnì ga n yə̀ à dwí Esərayɛl pyɔ̌ yé: ⁶ sə à cír Zhərəzalɛm cɔ w mùnì ga o yə̀ à yil ré còrhó pɔ jàà, a zɛ̃̀ a cír Dəvyidi ń la n yə̀ à dwí Esərayɛl pyɔ̌.› ⁷ À da Dəvyidi búl n bù jì lú bùlə̀ Cinu, Esərayɛl lyì byǎ bɛ́ Yi rí yilə. ⁸ Sə Cinu yà ń wə̀l mo: ‹Ǹ wɛ̀rhɛ́ cɛ̀nɛ̀ ǹ gə́ búl ń bù jì lú bùlə̀ à yil ré yil mú yilə. ⁹ Sə nyǐ è də̀ ǹmyɛ́ ǹ la jì y èmyɛ́ mɔ́ lú yé, wɔ́ ǹ cìcì byǐ: wɔ́ ńmyɛ̌ ń mà n lù y à yil ré yilə.› ¹⁰ Cinu já n pyìrh nyí rí ń yà ń bwəl mó: À pú à da Dəvyidi ni, à jǐrh Esərayɛl pyɔ̌ ǹdə Cinu gə́ yà ń bwəl nyí ní, sə à lù jì y kɛ̀bɛ́ Cinu, Esərayɛl lyì byǎ bɛ́ Yi rí yil ré yilə. ¹¹ À tɛnɛ jàà è wẽ́ a cĩ́ kùlkṍ w dɔbrɛ́ nə́kulu bwə̀lsé ŋwɛ́nɛ́ ò wẽ́ mó né, dɔbrɛ́ tɛ̀bɛ́ Cinu zɔ ǹdə́ nə́ nàmbala bɛ́ ń gə́ tú n ce bə shə́r Ezhibti ní yi ní mú.» ¹² Saləmɔ zhì Cinu vwĩ̀-jùlú w yé né, n zə ń yé n zǎ Esərayɛl lyì byǎ bɛ́ bə̀ y'à tú dwã yó mó, n zhẽ̌ ń jɛ̀rh n ce dɛ̃̌-yi wə. ¹³ Saləmɔ yà ń zùrhì kàmmɔ vwĩ̀-jùlú, ò dwɛ̀lɛ̀ rɛ́ y'à wɔ́ jə̀-tórhó yírhə́ nə̀nu, ò wɛ̃̀ rɛ́ y'à wɔ́ jə̀-tórhó yírhə́ nə̀nu, ò dɛ̃̌-zhìyə́ y zɛ̃̀ è y'à wɔ́ jə̀-tórhó yírhə́ nə̀tɔ̀, n cĩ́ kɔ̀nɔ́ w cəcəl wə. N jì ò yó, n zɛ̃̀ n jòm ń nə̀dwə́nə́ yó, n zə ń yé n zǎ Esərayɛl lyì byǎ bɛ́ bə̀ y'à tú dwã yó mó gakó, n zhẽ̌ ń jɛ̀rh n ce dɛ̃̌-yi wə. ¹⁴ n wɔ̀: «Cinu, Esərayɛl lyì byǎ bɛ́ Yi, Yi dõ tɛ̀nɛ́ rə̀ wɔ́ ǹdə ǹmyɛ́ ta dɛ̃̌-yi w ráá cɛ yó, rə̀ zhǐ rə̀ dɔbrɛ nà y yó twéé twéé ǹdə́ ǹ tùntùnnə bé byɛ̀bɛ́ bə̀ n'ê zhə̀l ǹ yé né ǹdə́ wu-põ̀ mó, e jà rə̀ n'ê súlí rə̀ zal bɛ ǹdə́ wu-bɔ̀nɔ̀ yé. ¹⁵ Ǹ zhì kɔn rɛ́ tɛ̀bɛ́ ǹ yà ǹ bwəl rə̀ nyí ǹ tùntùnnə à da Dəvyidi ni mú yó: bwelé y kɛ̀bɛ́ è shə́r ǹ nyu w mú, ǹmyɛ́ cìcì pyìrh y zà ǹdə nə́ gə́ nə nɛ́. ¹⁶ Èlǎsɛ̃́ Cinu, Esərayɛl lyì byǎ bɛ́ Yi, zhǐ nyí rí ǹ yà ǹ bwəl ǹ tùntùnnə à da Dəvyidi ni mú yó, bə̀ ǹ yà ǹ wə̀l mo: ‹Ǹ byǎ bɛ́ gə zɔ bə̀ cìn náàcɛ̀nɛ́ à yé né, bə tó à nyí rí ni ǹdə ǹ gə́ zɔ ǹ cìn à yé né mó ta, ǹ tá ǹ la byǐ lyã̀ɔ̃̀ n yə̀ Esərayɛl pyɔ̌ à yé né gaga yé.› ¹⁷ Rə̀myɛ́ ce, Esərayɛl lyì byǎ bɛ́ Yi, à n'â lwə̀l mó bə̀ ǹ ce nyí rí ǹ bwəl ǹ tùntùnnə Dəvyidi ni mú pyìrh zhə̀n ga èlǎsɛ̃́! ¹⁸ Sə Yi nə wɔ̌ rə̀ m'a jòm ǹdə́ numbyínə́ bé cɛ yó zhə̀nà? Dɛ̃̌-yi rí púlə́púlə́ ǹdə́ rə̀ wɛ̃̀ rɛ́ gə́ wɔ́ nɛ́ ma mɔ́ ga, bə bwə̌l zhe rə̀ la m'e zwẽ mó yé. Jì y kɛ̀bɛ́ à lù ǹ yil mú myɛ̌ wɔ́ nyí cɛ́m! ¹⁹ Cinu à Yi, cili ǹ tùntùnnə mó lwə̌l mó ń nə́ ń lwə̀l ǹdə́ ń wu gakó mó náàcɛ̀nɛ̀. Cili ń cǐl ré ǹdə́ ń lwə̌l mó. ²⁰ Púr ǹ yírhə́ ń nyǐ jì y kɛ̀bɛ́ nə̀nyɔ́nɔ́ ǹdə́ cəcɛ̃ ga, jì y kɛ̀bɛ́ ǹ wə̀l è shò kwã nɛ́ b'è m'a yə̀ ǹ còrhó pɔ jàà mɔ́. Cili ǹ tùntùnnə mó lwə̌l mó ń zhǐ è wẽ́ ń mə́ ń lwə̀l mó mó! ²¹ Cili ǹ tùntùnnə mó ǹdə́ ǹ dwí Esərayɛl lyì byǎ bɛ́ lwə̌l mó bə̀ gə tú bə̀ zhì jàà y kɛ̀bɛ́ wẽ́ bə̀ lwə̀l mó ǹdə́ bə̀ wun gakó yi ní. Jǒm jàà y kɛ̀bɛ́ ǹ ŋwɛ́nɛ́ è wẽ́ dɛ̃̌-yi rí w mú, ń cili. Cili sə́ pə sǔbri. ²² Lò gə tú ń dó ń dõ ne, bə zɛ̃̀ bə ce n dù n pə ń cìn ni, ń gə tú ń dùl dùlì y èmyɛ́ mɔ́ ǹ vwĩ̀-jùlú w yé né jì y kɛ̀bɛ́ wẽ́, ²³ sə́ jòm dɛ̃̌-yi rí w ń cili. Kə́ ǹ tùntùnnə bé bùrsí. Cĩ́ dóó lwɛlɛ-cí mú yó wə, sə́ pɔ̃ còrhò-tum ń zhə̀zhèèlé yilə. Pə bùrì bə-dóó-zhe-cí mú ni, sə́ zə mɔ ǹdə bə-dóó-zhe-cí ta. ²⁴ Ǹ dwí Esərayɛl lyì byǎ bɛ́ gə tú bə̀ dó mó, bə̀ zwə̀ bé zɛ̃̀ bə ŋwɛ̀nɛ́ bɛ búlə́ jàà wa, bə̀ gə kwɛ̃̀ bə̀ tú ǹ sõ, bə b'e cèrhé mó, bə lwə̀l mó ǹdə́ bə̀ wun gakó jì y kɛ̀bɛ́ wẽ́, ²⁵ sə́ jòm dɛ̃̌-yi rí w ń cili, pə bɛ bə̀ dóó w sǔbri, sə́ k'á zə bɛ bə bə̀ cɛ y kɛ̀bɛ́ ǹ pɔ bə̀myɛ́ ǹdə́ bə̀ nàmbala bɛ́ nɛ mɔ́ wẽ́. ²⁶ Dwí rí gə tú rə̀ dó mó, dɛ̃̌ yí rí gə pyi dwà zɛ̃̀ è k'ê t'â nywɛ̀, rə̀ gə tú rə̀ zə rə̀ yé rə zǎ jàà y kɛ̀bɛ́ rə m'e lwə̀l mó, rə cèrhé ǹ yil ré, rə súlí rə yẽ̌ rə̀ lwɛlɛ rɛ́ nɛ, ǹ gə́ ce rə̀ wu zhìlì yilə, ²⁷ jǒm dɛ̃̌-yi rí w ń cili, sə́ pə ǹ tùntùnnə bé ǹdə́ ǹ dwí Esərayɛl lyì byǎ bɛ́ nɛ bə̀ dóó w sǔbri, ǹ m'ǎ byili bi sɔ́má nántwə̌ kɛ̀bɛ́ bə̀ mə̌ sə bə kwè mó; sə́ ce dwà nyɔ̃̀ ǹ tənà y wẽ́, tənà y kɛ̀bɛ́ ǹ pɔ ǹ dwí rí ni è wɔ́ rə̀ cəl mó. ²⁸ Nɔrh ráá cím-bəlwɛ̀lɛ́ ráá jíjí shəshàr rɛ́ címí y ráá jíjí byǎ bɛ́ címí y ráá sɔswɛ̀mɛ̀ ráá byaalɛ gə tu tənà y w yi ní ráá Esərayɛl lyì byǎ bɛ́ zwə̀ bé gə tú bə̀ pú bə̀ cɛmɛ nɛ ráá yò-ècòlò kɔ̌ kɔ̌ ráá címí kɛ̌ kɛ̌ yi ní, ²⁹ kɔn rɛ́ tɛ̀bɛ́ bə̀ n'ê lwə̀l ǹdə́ bə̀ wun gakó gə wɔ́ ná-dwí yil myɛ, è wɔ́ lò mə̀dù ráá ǹ dwí Esərayɛl púlə́púlə́ myɛ, lò gakó gə lwar yò-ècòlò w kɔ̀bɔ́ ǹdə́ nɔ̀nɔ̀ w ń ŋwɛ́nɛ́ ò wẽ́ mó gə́ wɔ́ kɔn ná-dwí yilə, n zɛ̃̀ n zhẽ̌ ń jɛ̀rh dɛ̃̌ n zǎ jì y kɛ̀bɛ́ ń mə́ ń lwə̀l mó, ³⁰ sə́ jòm jàà y kɛ̀bɛ́ ǹ wɔ è wẽ́ dɛ̃̌-yi rí w mú ń cili. Pə sǔbri, zə lò gakó kɔn tó dwã ǹdə́ ń zhə̀zhèèlé, ǹ gə́ yě kɔn rɛ́ tɛ̀bɛ́ rə̀ ŋwɛ́nɛ́ ń wu w wẽ́ mó yilə; zhə̀n ga wɔ́ ǹmyɛ́ dúdú ǹ yě kɔn rɛ́ tɛ̀bɛ́ rə̀ ŋwɛ́nɛ́ numbyínə́ bé gakó wun ní wẽ́. ³¹ Èta Esərayɛl lyì byǎ bɛ́ m'a kwè ǹ sɔ́msɛ́, bə m'e nyàm mɔ́ dɛ̃ gakó bə̀ nyǔ mú wẽ́ cɛ y kɛ̀bɛ́ ǹ pɔ nə́ nàmbala bɛ́ nɛ mɔ́ yó. ³² Má zhə-bal, ńmyɛ̌ mɔ̀bɔ́ ń də̀ ǹ dwí Esərayɛl lyì byǎ bɛ́ lò, gə shí tənà kɛ̀bɛ́ è nyɛ wẽ́, ń gə́ nyɛ̀ɛ̀ bə̀ gə́ zɔ̀m ǹ yil ré rə̀ du dɛ̃́dɛ̃́ e súlí ǹ jàn rɛ́ nánfɔ̀lɔ̀ w ǹ mə́ ǹ twĩ̀ mú yò, n bə̀ n zù jì y kɛ̀bɛ́ wẽ́ ń la n lwə̀l mó, ³³ sə́ jòm jàà y kɛ̀bɛ́ ǹ ŋwɛ́nɛ́ è wẽ́ dɛ̃̌-yi w mú ń cili, ń wɛ̀rhɛ́ kɔn rɛ́ tɛ̀bɛ́ gakó zhə-bal mɔ́ lwə̀l mó mó ń pɔ̃, mùnì ga dwə́ né nə̀ ŋwɛ́nɛ́ cɛ yó mó gakó lwar ǹ párá, sə nə nyàm mɔ́ ǹdə ǹ dwí Esərayɛl lyì byǎ bɛ́ ta, sə nə súlí nə lwar bə̀ jì y kɛ̀bɛ́ à lù mú wɔ́ ǹmyɛ́ ǹ cǐ y zhə̀n ga. ³⁴ Ǹ dwí rí gə shə́r rə vò rə̀ la bú ǹdə́ rə̀ zwə̀ bé, rə vò ǹ gə́ la rɛ tũ̌ mə̀gã̌, rə̀ gə pyìrhí rə̀ yé rə zǎ cɔ w kɔ̀bɔ́ ǹ cír mú ǹdə́ jì y kɛ̀bɛ́ à lù ǹ yil ré yil mú rə m'e lwə̀l mó, ³⁵ sə́ jòm dɛ̃̌-yi rí w ń cili rə̀ lwə̌l mó rə̀ n'ê lwə̀l mó ǹdə́ rə̀ wu gakó mó; sə́ ce nyí rə̀ kwã nɛ́. ³⁶ Lòlò tɛ̀nɛ́ ń tá ń dwé yé. Rə̀myɛ́ ce Esərayɛl lyì byǎ bɛ́ gə tú bə̀ dó mó yi ní, ń zɛ̃̀ ń kwè lyim ǹdə́ bɛ, ń ce be bə̀ zwə̀ bé jɔ̃̀ wa, bə pwà bɛ bə m'e vò yómə́-jè, tənà kɛ̀bɛ́ è nyɛ ráá è bwə́l wẽ́, ³⁷ bə̀ gə zɛ̃̀ bə̀ zhì gàà bə zù bə̀ wẽ́ bə súl bə̀ lwɛlɛ rɛ́, bə súlí bə byẽ̀ bə ce mó bə̀ m'ê lwə̀l mó bə̀ zhe: ‹Nə́ dó mó, nə́ twĩ̀ lwɛlɛ, dóó zhǐ nə́ yó wə›, ³⁸ bə̀ gə k'a kwɛ̃̀ bə bə̀ bə zhí mú ǹdə́ bə̀ wun gakó ǹdə́ bə̀ jàn gakó, yómə́-jè y bə̀ zə bɛ bə m'e vò né mó wə, bə̀ gə pyìrhí bə̀ yə́rh bə̀ zǎ bə̀ tənà y kɛ̀bɛ́ ǹ pɔ bə̀ nàmbala bɛ́ nɛ mɔ́, ǹdə́ cɔ w kɔ̀bɔ́ ǹ cír mú, e súlí jì y kɛ̀bɛ́ à lù ǹ yil ré yil mú, bə lwə̀l mó, ³⁹ sə́ jòm jàà y kɛ̀bɛ́ ǹ ŋwɛ́nɛ́ è wẽ́ dɛ̃̌-yi rí w mú ń cili bə̀ lwə̌l mó bə̀ n'ê lwə̀l ǹdə́ bə̀ wun gakó mó, ce nyí bə̀ kwã nɛ́ sə́ pə sǔbri ǹ dwí rí rə̀ dó mó mó ne. ⁴⁰ Èlǎsɛ̃́ ná, à Yi, púr ǹ yírhə́ né sə ǹ zhã̌ nɛ́ nyɛ̀ɛ̀ lwə̀lə́ y kɛ̀bɛ́ à lwə̀l mó jàà y kɛ̀bɛ́ wẽ́ mó! ⁴¹ Sə èlǎsɛ̃́ ná, zɛ̃̀ tɛ̃́ Cinu Yi, bə̀ ǹ shìrhə́ jàà y wa, ǹmyɛ́ ǹdə́ dɔbrɛ kùlkṍ w ǹ jàn rɛ́ wɔ ò wẽ́ mó! Sə ǹ vwĩ̀-zwə́lnə bé zù vwǎrh mɔ́ ǹdə kàmə̀zwǐ ta, sə ǹ lyì bí fùù ǹdə́ wu-nyɔ̃̀! ⁴² Cinu Yi, ǹ bə̀k'á cìrh mɔ̀bɔ́ ǹ cír mó ń ce kwã yé, lyǐrh ǹ tùntùnnə Dəvyidi sónó w kɔ̀bɔ́ ń yà ń mə́ ń só mó mó tumə né yò.»