koussoube-marc-lee_2ch_text

Kǝ̀kàl-fwɛ̀lɛ̀ 5

¹ 1 Pyɔ̌ Saləmɔ gə́ tú n twĩ̀ tum rí rə̀myɛ́ mɔ́ gakó Yi jì y yil n zhɛ̀ kókó, ń ce bə zə wẽ̀ ré tɛ̀bɛ́ ń da Dəvyidi yà ń pɔ Yi ni mú, sə̀byì-kùlì y ǹdə́ sánə́má mɔ́ ǹdə́ nə̀zhẽ̌ né gakó n bə̀ n cĩ́ Cinu nə̀cɛ̀ndɛ jì y wẽ́. ² 2 Rə̀myɛ́ yi ní, pyɔ̌ Saləmɔ byẽ̀ Esərayɛl lyì byǎ bɛ́ náncɛsɛ́, kwálsɛ́ yó-cìnə́ bé gakó e súlí Esərayɛl lyì byǎ bɛ́ jìsí cìnə́ bé gakó bə bə̀ ń sõ Zhərəzalɛm nɛ́, mùnì ga bə kwè Cinu dɔbrɛ kùlkṍ w bə zhì Dəvyidi Pyə̀-cɔ w wa, è n'ê yǎl e wɔ̀ Səyɔ̃, bə m'e vò Yi jì y wẽ́. ³ Esərayɛl lyì bala bɛ́ gakó bə̀ dwã yó Saləmɔ sõ, cànsɛ̀ shàlpyɛ̀ nyǎ y címsí yilə. ⁴ Esərayɛl lyì byǎ bɛ́ náncɛsɛ́ gakó gə́ tú sə bə̀ dwã yó sə zhɛ̀, Levyi dwí rí lyì bí kwè kùlkṍ w bə zhĩ. ⁵ Bə̀ kwè Cinu kùlkṍ w ǹdə́ Yi kòrhó w e súlí wẽ̀ ré tɛ̀bɛ́ gakó bə̀ y'à pɔ Yi ni rə̀ y'à wɔ ò wẽ́ mó gakó bə zə bə m'e vò Yi jì y wẽ́. Wɔ́ vwĩ̀-zwə́lnə bé ǹdə́ Levyi dwí rí lyì bí bə̀ kwè re bə m'e vò. ⁶ Pyɔ̌ Saləmɔ ǹdə́ Esərayɛl lyì byǎ bɛ́ gakó bə̀ y'à mù dwã nɛ ǹdə́ mɔ kùlkṍ w yé né mó, y'à n'ê zwə́l və̌-ywàálɛ ǹdə́ vwàmá nánfwààlɛ ga nánzhəzhɔ̌ vwə̃̀, lòlò yà ń wàr nə̀ yó w ń la gál n byili yé. ⁷ Rə̀myɛ́ kwã nɛ́, vwĩ̀-zwə́lnə bé zɛ̃̀ bə kwè Cinu dɔbrɛ́ kùlkṍ w bə cĩ́ jàà y bə̀ tɛnɛ ò yil mú wẽ́, Yi dúdú jàà y Yi jì y wẽ́ mó, shərəbɛ̃́bá vɔ̀mɛ́ nɛ́ kùr wə. ⁸ Shərəbɛ̃́bá y'à lɛ̀lɛ̀ bə̀ vɔ̀mɛ̀ nɛ́ jàà y kɛ̀bɛ́ kùlkṍ w y'à la nɛ́ cṹ mú yó wə, mùnì sə pyìlì wə, òmyɛ́ ǹdə́ dǎr rɛ́ nándə̀dwààlɛ́ bə̀ m'ê zhĩ w mú ga. ⁹ Dǎr rɛ́ rə̀myɛ́ gə́ y'à dwàl mɔ́ ce ǹ gə zhì Yi dúdú jàà y nyí rí ǹdə́ Yi kùlkṍ w bwə̌l mó wə, ǹ nə rə̀ yə́-pǎlsɛ́. Sə ǹ gə zhǐ pwẽ̀ ne ǹ bə rɛ nɛ yé. Dǎr rɛ́ rə̀myɛ́ gwẽ̌ ŋwɛ́nɛ́ rə̀ jàà y w zà zà gwẽ̌. ¹⁰ Kɔn dõ y'à tɛ̀nɛ́ kùlkṍ w wẽ́, è gə də̀ nə́kulu bwə̀lsé sə̀lyè y dúdú, Muyiisi yà ń cĩ́ ò wẽ́ Orɛɛbɛ pyɔ̀ w yó, Cinu gə́ zɔ dɔbrɛ́ ǹdə́ Esərayɛl lyì byǎ bɛ́ bə̀ Ezhibti ní dwirí y yi ní mú. ¹¹ Vwĩ̀-zwə́lnə bé kwɛ̃̀ bə shí Yi jàà y wẽ́ bə du pwẽ̀ ne. Vwĩ̀-zwə́lnə bé byɛ̀bɛ́ bə̀ y'à ŋwɛ́nɛ́ gàà mɔ́ gakó y'à tɛnɛ bə̀ cìn Cinu yilə, sə bə̀ y'à yə̀ bə̀ kùkùlə̀ né gə́ pú pú dwã nɛ mɔ́ tó bə m'e wɛ̀rhɛ́ rɛ yé. ¹² Levyi dwí rí lyì bí byɛ̀bɛ́ bə̀ y'à wɔ́ núnnə mó gakó y'à ŋwɛ́nɛ́: Asaafɛ ǹdə́ Emã ǹdə́ Yədutũ e súlí bə̀ byǎ bɛ́ ǹdə́ bə̀ da-byǎ bɛ́, bə̀ y'à zù lɛ̃̌ gàndɛ. Bə̀ y'à zhe sɛmbáləbá ǹdə́ bwàárɛ e súlí zɔ̀n bə̀ m'ê zhǐ, vwĩ̀-jùlú w yi-púrhí sõ. Vwĩ̀-zwə́lnə zɔ̌m ǹdə́ shí-èlyè y'à ŋwɛ́nɛ́ bə̀ yala nɛ, bə̀ n'ê wúl pɔ́lsɛ. ¹³ Pɔ́lsɛ́ wúlnə bé ǹdə́ núnnə bé, y'à mù dwã nɛ, bə tó dwã bə̀ n'ê nún ǹdə́ bə̀ n'ê cèrhé Cinu Yi. Pɔ́lsɛ́ ǹdə́ sɛmbáləbá e súlí dɛ̀lɛ̀ wẽ̀ ré cələ né gə́ y'à la dɛ̃̌ yi ní, bə̀ y'à n'ê nún Cinu Yi bə̀ zhe: «Ń wɔ́ wu-bɔ̀nɔ̀ cə́bal, ń wu-bɔ̀nɔ̀ w j'â ŋwɛ́nɛ́ gaga yilə.» Rə̀myɛ́ yi ní, ébɔ̃ j'a zù o sú Yi jì yə́, Cinu jì y wu wə́. ¹⁴ Ébɔ̃ w òmyɛ́ mɔ́ ce vwĩ̀-zwə́lnə bé y'à k'ê wàr sə bə mɛ̃ Yi jì y wẽ́ bə twĩ̀ bə̀ tum rí yé, b'è y'à sú ǹdə́ Cinu còrhó wə́.