¹ N zùrhì kàmmɔ vwĩ̀-jùlú wə́, ò dwɛ̀lɛ̀ rɛ́ y'à wɔ́ jə̀-tórhó yírhə́ shí-èlyè, ò wɛ̃̀ rɛ́ y'à wɔ́ jə̀-tórhó yírhə́ shí-èlyè, ò dɛ̃̌-zhìyə́ y zɛ̃̀ è y'à wɔ́ jə̀-tórhó yírhə́ shíyə́. ² N yə̌l kàmmɔ n mə n zùrhì zhǎ nánfwɛ̀lɛ̀ yá: è y'à wɔ́ nánjíjíní, è wu wɛ̃̀ rɛ́ y'à wɔ́ jə̀-tórhó yírhə́ shíyə́; è dɛ̃̌-zhìyə́ y y'à wɔ́ jə̀-tórhó yírhə́ nə̀nu, sə jə̀-tórhó yírhə́ shə́-ètɔ̀ tə́tɔ̃̌ dwɛ̀lɛ̀ y'à wɔ̌ è cã̌ y è m'a kə́kɛ́lɛ́. ³ Nɛ̃ èsã̌yùúli y'à kə́kɛ́lɛ́ zhǎ nánfwɛ̀lɛ̀ y nyí kùr rí, jə̀-tórhó yírh rə̀dù gakó y'à zhe rə̀ dwí rí shíyə́. Rə̀ y'à kə́kɛ́lɛ́ zhǎ y nyí rí púlə́púlə́ rə ce dwã wa. Nɛ̃ nə̀myɛ́ mɔ́, nə̀ y'à tùrhì nə̀rh sə̀lyè mó, y'à tó dwã ǹdə́ zhǎ nánfwɛ̀lɛ̀ y rə zùrhì twər rə̀dù. ⁴ Zhǎ nánfwɛ̀lɛ̀ y kùr ré y'à cĩ́ nɛ̃ shí ǹdə́ nə̀lyè yó; nɛ̃ nɛ́ nə̀myɛ́ nə̀tɔ̀ yésé y'à zǎ jə̀-gwã̀ sõ, nə̀tɔ̀ yésé y'à zǎ yi-zùr sõ, nə̀tɔ̀ yésé y'à zǎ jə̀-jĩ́ sõ, nə̀tɔ̀ yésé y'à zǎ yi-púrhí sõ; zhǎ nánfwɛ̀lɛ̀ y y'à cĩ́ nə̀ yó; nə̀ gakó kùrə̀ né zɛ̃̀ nə̀ y'à pyìrhí nə zǎ wẽ́. ⁵ Zhǎ nánfwɛ̀lɛ̀ y kweeré y'à wɔ́ jɛ̃̀-wàn, sə è nyí-gugwii rí kùr ré y'à j'a kwɛrhɛ náàcɛ̀nɛ́ ǹdə kǎ-zɔ̌m mɔ̀bɔ́ mə̀ nyɛ̌ ǹdə lyíísia pùní jɛ̃̀ ta mɔ́ nyí-gugwii rí kùr rí ta. Nɛ̃̌-kwǎlnɛ mɔ̀ɔ̀rhɛ̀ rə̀lyè yírhə́ nɛ̃̌ y'à wɔ̌ mə̀ ce è wẽ́. ⁶ N zùrhì zhə̌rh, n cĩ́ sə̀nu Yi jì y jə̀-jĩ́ sõ, n zɛ̃̀ n cĩ́ sə̀nu è jə̀-gwã̀ sõ, wẽ̀ zhə́zhɔ́lɔ́ yilə: bə̀ y'à n'ê zhə́zhə́lɛ́ vwə̃̀ námpúmə́ cɛ̃́ɛ̃́ nɛ́ wẽ̀ ré bə̀ gu mú sə̀ wẽ́, sə vwĩ̀-zwə́lnə bé y'à n'ê zhə́zhə́lɛ́ bə̀ cìn zhǎ nánfwɛ̀lɛ̀ y wẽ́. ⁷ N zɛ̃̀ n zùrhì wẽ̀ né tɛ̀bɛ́ bə̀ n'ê cĩ́ pàntámsɛ́ rə̀ yó mó shíyə́ ǹdə́ sánə́má, kɔn tó nyə́ né gə́ byili ní, n zɛ̃̀ n kwè re n cĩ́ Yi jì y wẽ́, rə̀nu jə̀-jĩ́ sõ, rə̀nu jə̀-gwã̀ sõb. ⁸ N wɛ̀rhɛ́ tabəlɛbá shíyə́, n zɛ̃̀ n kwè se n cĩ́ jì-ná y wẽ́, sə̀nu jə̀-jĩ́ sõ, sə̀nu jə̀-gwã̀ sõc. N zùrhì jal-zhɔ́rhɔ́ nə̀zhǐr zɔ̌m ǹdə́ sánə́má. ⁹ N lù vwĩ̀-zwə́lnə bé kɔ̀nɔ́ w ǹdə́ kɔ̀nɔ́ dõ nánfɔ̀lɔ̀ ǹd'ô bwə̀rsé bwə̀ə̀lé; n yə̌l kàmmɔ n mə n fwàl bwə̀ə̀lé. ¹⁰ È gə wɔ́ zhǎ nánfwɛ̀lɛ̀ y yilə, ń cĩ́ y Yi jì y jə̀-jĩ́ sõ, kɔn ce è jə̀-jĩ́ byílí y sõ ǹdə́ è yi-púrhí sõ byílí y nə̀gúl ré ne. ¹¹ Yəram gə́ tú n zùrhì tɔ̀mɔ̀ pwǎ nə̀zhẽ̌ ré ǹdə́ pyə́lə́ né e súlí jal-zhɔ́rhɔ́ nə̀zhẽ̌ né n zhɛ̀ kwã nɛ́, rə̀myɛ́ yi ní, ń twĩ̀ tum rí tɛ̀bɛ́ pyɔ̌ Saləmɔ yà ń pɔ mɔ rə̀ nyí bə̀ ń twĩ̌ Cinu jì y wẽ́ mó gakó n zhɛ̀: ¹² kàmmɔ yə né nə̀lyè y ǹdə́ wẽ̀ nánjíjíndí rə̀lyè y nə̀ cĩ́ yə né yə́-pǎlsɛ́ w mɔ́, e súlí wẽ̀ ré rə̀lyè y rə̀ nyɛ̌ ǹdə gùndwə̌ ta rə̀ la m'e pyìlì yə né yə́-pǎlsɛ́ wẽ̀ nánjíjíndí mú, ¹³ ǹdə́ gərənáádɛ byǎ zwã̌-àna y bə̀ jele wẽ̀ ré rə̀lyè y rə̀ nyɛ̌ ǹdə gùndwə̌ ta mɔ́ nɛ; bə̀ nə̀rh sə̀lyè y'à jele wẽ̀ ré rə̀lyé y rə̀ nyɛ̌ ǹdə́ gùndwə̌ ta mɔ òdù gakó ne; rə m'e pyìlì yə né yə́-pǎlsɛ́ wẽ̀ ré. ¹⁴ E súlí vwə̃tur rí ǹdə́ zhěsé sə̀ y'à cĩ́ rə̀ yó mó, ¹⁵ ǹdə́ zhǎ nánfwɛ̀lɛ̀ yá, è y'à wɔ́ èdù sásá, ǹdə́ nɛ̃ nɛ́ shí ǹdə́ nə̀lyè y nə̀ y'à wɔ è kùr w mú, ¹⁶ ǹdə́ tɔ̀mɔ̀ pwǎ nə̀zhẽ̌ né ǹdə́ pyə́lə́ né ǹdə́ nàmá lyəlsé e súlí rə̀ wẽ̀ ré námbwǎlsɛ́ dwã bɛ́. Wẽ̀ ré rə̀myɛ́ Yəram-Abyi zùrhì n pə Saləmɔ nɛ, Cinu jì y yil mú gakó y'à zùrhì ǹdə́ kàmmɔ kɔ̀bɔ́ bə̀ y'à pɔ̌r o jǐrh nánsósóló mó. ¹⁷ Wɔ́ Zhɔrdɛ̃ bwǐ y səta, Səkɔɔtɛ ǹdə́ Sarədata bwə̌l mó wə, pyɔ̌ mɔ́ ce n kù dɔ-gwáárɛ bə m'e yə̌l kàmmɔ w nɛ́, wẽ̀ ré rə̀myɛ́ mɔ́ gakó zùrhù yilə. ¹⁸ Saləmɔ zùrhì wẽ̀ ré rə̀myɛ́ mɔ́ gakó nánzhəzhɔ̌. Rə̀ gə́ y'à já dɛ̃́dɛ̃́ mɔ́ ce, bə̀ y'à wàr kàmmɔ w bə̀ m'e zùrhì ri mú dùmì rí bə̀ la jə̀ə̀lè bə lwar yé. ¹⁹ Saləmɔ súlí n zùrhì wẽ̀ ré tɛ̀bɛ́ gakó Cinu jì y y'à zhe rə̀ tum mú: sánə́má vwĩ̀-jùlú wə́, e súlí tabəlɛbá bə̀ n'ê cĩ́ vwĩ̀ rí búrú w sə̀ yó mó; ²⁰ wẽ̀ ré tɛ̀bɛ́ bə̀ n'ê cĩ́ pàntámsɛ́ rə̀ yó mó ǹdə́ rə̀ pàntámsɛ́, sə̀ y'à wɔ Yi dúdú jì y yé né, bə̀ y'à mə̌ sə bə ji, kɔn tó nyə́ né gə́ byili ní, y'à zùrhì ǹdə́ sánə́má mɔ̀bɔ́ mə̀ càn; ²¹ e súlí pùnə́ né ǹdə́ pàntámsɛ́ ǹdə́ pyə́lsɛ námpɔ́lsɛ, rə̀myɛ y'à zùrhì ǹdə́ sánə́má, sánə́má mɔ̀bɔ́ mə̀ càn dɛ̃́dɛ̃́, ²² shisí bə̀ m'ê kwɛrhɛ pàntámsɛ́ myǐn mú ráá bə̀ m'ê cì mù mú ǹdə́ jal-zhɔ́rhɔ́ nə̀zhẽ̌ ǹdə́ kǎzɔ̀má e súlí lwẽ́ nã́nyə̀nyɛ̀lɛ́ ju nə̀zhĩ̌sí rə̀ y'à zùrhì ǹdə́ sánə́má mɔ̀bɔ́ mə̀ càn; Yi jì y étwí-ènyí rí ǹdə́ è wẽ́ étwí-ènyə́ né nyɛ̀bɛ́ nə̀ y'à zǎ Yi dúdú jì yə́, ǹdə́ Yi jì y étwí-ènyə́ né nə̀ y'à zǎ jì-ná y wu wə́, rə̀myɛ y'à zùrhì ǹdə́ sánə́má.