¹ Saləmɔ já n ji kùr ń nə́ ń lwì Cinu Yi jì y Zhərəzalɛm nɛ́, Mɔrəya pyɔ̀ w yó, Cinu gə́ yà ń lyí ń da Dəvyidi mə̀gã̌ mɔ́, jàà y kɛ̀bɛ́ Dəvyidi yà ń tɛnɛ Zhəbuusi lyì bal Orənã tuwə y w mó. ² Ń ju è lú mú kùr ń pyɛ̀lɛ̀ rɛ́ jú byinə nə̀na byin rí, cànsɛ̀ sə̀lyè nyǎ y wẽ́. ³ Nyǐ Saləmɔ gə́ mɛrhɛ Yi jì y ń yà ń la lú mú kùr rí ní: è dwɛ̀lɛ̀ rɛ́ y'à wɔ́ jə̀-tórhó yírhə́ shə́-shə̀ldù, è wɛ̃̀ rɛ́ y'à wɔ́ jə̀-tórhó yírhə́ shí-èlyè, kɔn tó dwã ǹdə shãã ga jə̀-tórhó yírh gə́ y'à mə̌ nɛ́a. ⁴ Bwə̀r-zɔ́nɔ́ w dwɛ̀lɛ̀ rɛ́, rə̀ y'à kwè Yi jì y wɛ̃̀ rɛ́ mɔ́, y'à wɔ́ jə̀-tórhó yírhə́ shí-èlyè, ò dɛ̃̌-zhìyə́ y y'à wɔ́ jə̀-tórhó yírhə́ zɔ̌m ǹdə́ shí-èlyè. Saləmɔ yə̌l sánə́má mɔ̀bɔ́ mə̀ càn n mə n fwàl ò wu wə́. ⁵ N zù Yi jì y jì-ná y wu w byílsí ǹdə́ səpərɛ́ɛ́sɛbá dǎr, n zɛ̃̀ n yə̌l sánə́má mɔ̀bɔ́ mə̀ càn n mə n fwàl rɛ, n súlí n ce bə cĩ́ kwã̌ vɔr ǹdə́ nyáná námpɔ́lsɛ èsã̌yùúli rə̀ yó. ⁶ N súlí n zə nə́kulə nyɛ̀bɛ́ nə̀ càn n mə n kwɛrhɛ jì-ná y wu wə́. Sánə́má mɔ́ y'à wɔ́ mɔ̀bɔ́ mə̀ n'ê shí Pərəvəyim mú. ⁷ N yə̌l sánə́má n mə n fwàl jì-ná yá: è dɛ̃̌ byésé ǹdə́ étwí-ènyə́ né ǹdə́ è wu byílsí e súlí è bwə̀ə̀lé vɔ̀mɛ̀ nɛ́, n zɛ̃̀ n sə̀ shərəbɛ̃́bá è wu byílsí ni. ⁸ Rə̀myɛ́ kwã nɛ́, n zɛ̃̀ n lù Yi dúdú jì yə́: è dwɛ̀lɛ̀ rɛ́ y'à wɔ́ jə̀-tórhó yírhə́ shí-èlyè, rə̀ y'à kwè Yi jì wɛ̃̀ rɛ́, è wɛ̃̀ rɛ́ y'à wɔ́ jə̀-tórhó yírhə́ shí-èlyè; n yə̌l sánə́má tɔ́nnəbá shí-èlyè n mə n fwàl è wu wə́. ⁹ Dàdɔ̌bsɛ́ dùmì rí y'à wɔ́ gə̀rámməbá zwã̌-ànu (500). N yə̌l sánə́má n mə n fwàl dɛ̃̌-yó jìsí myɛ. ¹⁰ 10 N yə̌l lù n mə n zùrhì shərəbɛ̃́bá bə̀lyè n cĩ́ Yi dúdú jì y wẽ́, n zɛ̃̀ n yə̌l sánə́má n mə n fwàl bɛ. ¹¹ Shərəbɛ̃́bá vɔ̀mɛ̀ nɛ́ dwɛ̀lɛ̀ rɛ́ y'à wɔ́ jə̀-tórhó yírhə́ shí-èlyè: shərəbɛ̃́ nã́yéé y vɔ̃̀ òdù, ò dwɛ̀lɛ̀ rɛ́ y'à wɔ́ jə̀-tórhó yírhə́ nə̀nu, y'à n'ô dwə̀rh jì y wu byílí y ni, è vɔ̃̀ w dõ mó myɛ, ò dwɛ̀lɛ̀ rɛ́ y'à wɔ́ jə̀-tórhó yírhə́ nə̀nu, y'à n'ô dwə̀rh shərəbɛ̃́ y dõ mó vɔ̃̀ òdù ni. ¹² Shərəbɛ̃́ bə̀lyè nyǎn mɔ́ myɛ vɔ̃̀ òdù, ò dwɛ̀lɛ̀ rɛ́ y'à wɔ́ jə̀-tórhó yírhə́ nə̀nu, y'à n'ô dwə̀rh jì y wu byílí y ni, è vɔ̃̀ w dõ mó myɛ, ò dwɛ̀lɛ̀ rɛ́ y'à wɔ́ jə̀-tórhó yírhə́ nə̀nu, y'à n'ô dwə̀rh shərəbɛ̃́ nã́yéé y vɔ̃̀ òdù ni. ¹³ Shərəbɛ̃́bá bə̀myɛ́ vɔ̀mɛ̀ nɛ́ y'à lɛ̀lɛ̀ nə mɛrhɛ jə̀-tórhó yírhə́ shí-èlyè dwɛ̀lɛ̀, bə̀ y'à zɛ̃̀ bə̀ zhǐ dɛ̃̌ bə̀ nèsé yó, bə̀ yésé zǎ wẽ́. ¹⁴ Ń súlí n sɔ̃̀ gɔ̀nɔ̀ ǹdə́ lɛ̃̌ kɛ̀bɛ́ è càn, n zɛ̃̀ n mɔ́rh w námpùlú ǹdə́ nánshɔ̃̀ e súlí nánshɔ̃̀ gwɛ̃́gwɛ̃́, n zɛ̃̀ n zò shərəbɛ̃́bá èsã̌yùúli ò yó. ¹⁵ N zùrhì kàmmɔ yə nə̀lyè Yi jì y yé y wə: rə̀ dwɛ̀lɛ̀ rɛ́ y'à wɔ́ jə̀-tórhó yírhə́ shə́-ètɔ̀ ǹdə́ nə̀nu, sə wẽ̀ ré bə̀ y'à zùrhì bə cĩ́ yə né yə́-pǎlsɛ́ w mɔ́ dwɛ̀lɛ̀ rɛ́ y'à wɔ́ jə̀-tórhó yírhə́ nə̀nu. ¹⁶ N zùrhì nyáná námpɔ́lsɛ n cĩ́ yə né yə́-pǎlsɛ́ wa. N zùrhì ébwár wẽ̀, gərənáádɛb byǎ zɔ̌m, n jele nyáná námpɔ́lsɛ́ nɛ. ¹⁷ N cìì yə né tɛ̃́ Yi jì y yé y wə, rə̀dù y jə̀-jĩ́ sõ, rə̀ dõ mó jə̀-gwã̀ sõ: n ce jə̀-jĩ́ sõ nyǎn rɛ́ yil bə̀ Yaakɛ̃c, n ce jə̀-gwã̀ sõ nyǎn rɛ́ yil bə̀ Bwaazɛd.