¹ Saləmɔ kwè nə́kul-zhinnə mɔ̀ɔ̀rhɛ̀ shə́-shàlpyɛ̀ (70 000) ǹdə́ nə́kul-sə̀lnə mɔ̀ɔ̀rhɛ̀ shə́-lyɛlɛ (80 000) bə̀ n'ê twĩ̀ pyɔ̀ w wa, e súlí nunə mɔ̀ɔ̀rhɛ̀ rə̀tɔ̀ ǹdə́ zɔ̃̌-nyə̀ldù (3 600) bə̀ la n'ê yìlì bi. ² Saləmɔ twĩ̀ bə vò bə wɔ̀ Tiiri pyɔ̌ Yəram nɛ: «Ǹ yà ǹ pɔ sɛ́ɛ́dərɛ dǎr bə b'e pə à da Dəvyidi ni ń mə́ sɛ̃ mɔ n lù ń kɛ̀lɛ́ yá. ³ Sə nyǐ àmyɛ́ n'â yǎl a lù jì Cinu à Yi rí yilə, a pə ń dúdú ni. Bə̀ m'a ji wẽ̀ rə̀ lwẽ́ nã́nyǝ̀nyɛ̀lɛ́ bə̀ mə̌ sə bə ji myǐn mú myǐn è wẽ́ ń yé né, bə̀ m'a cĩ́ pansɛ́ shɛ̀bɛ́ bə̀ mə̌ sə bə cĩ́ ń yé né twéé twéé mó è wẽ́; bə̀ m'a zwə́l nəkɔkɔ́lɛ́ ǹdə́ də̀dɛ̀nɛ́ ǹdə́ shìrhə́ dɛ̃ rɛ́ ǹdə́ càn-dǔlsí e súlí Cinu nə́ Yi rí címsí vwə̃̀ námpúmə́ cɛ̃́ɛ̃́ nɛ́ è wẽ́; sə kɔn m'a j'a yə̀ èta gaga yilə, Esərayɛl nɛ́. ⁴ Sə jì y kɛ̀bɛ́ à la lú mú m'à yə̀ nánfwɛ̀lɛ̀, bə̀ nə́ Yi rí j'â búl rə̀ du yə né gakó. ⁵ Mɔ̌ ń mà n nə jàn n lù jì n pɔ̃, e jà dɛ̃̌-yi rí púlə́púlə́ ǹdə́ rə̀ wɛ̃̀ rɛ́ gə́ wɔ́ nɛ́ ma mɔ́ ga, bə bwə̌l zhe rə̀ la m'e zwẽ mo? Àmyɛ́ nə wɔ́ mɔ̌, s'a m'a lù jì a pɔ̃, è gə də̀ à la m'a ji vwə̃̀ dúdú myǐn ń yé né yilə? ⁶ Sə èlǎsɛ̃́ ce lò mɔ̀bɔ́ ń já ń búl ń yě sánə́má ǹdə́ sə̀byì-kùlì ǹdə́ kàmmɔ ǹdə́ lù tum rí yé shò, e jà ń yě gã̀-jɛ̀rh mɔ́rh nánshɛ̀rh ǹdə́ nánshɛ̀rh gwɛ̃́gwɛ̃́ e súlí námpǔlsi, ń búl ń yě wẽ̀ sə́l tum rí myɛ yé shò bə̀ à sõ. Ń mà n twĩ̀ ǹdə́ byɛ̀bɛ́ bə̀ búl bə̀ yě tum rí yé shò, bə̀ wɔ à yala nɛ Zhərəzalɛm ǹdə́ Zhəda né, byɛ̀bɛ́ à da Dəvyidi tɛnɛ mɔ́. ⁷ Súlí ń pɛ̃ Lyəbã sɛ́ɛ́dərɛbá dǎr ǹdə́ səpərɛ́ɛ́sɛbáb dǎr e súlí santáləbá dǎr, b'à yě bə̀ ǹ tùntùnnə bé búl bə̀ yě Lyəbã cèmé né kǎ. Sə à tùntùnnə bé m'a tó ǹ nyə̀ná bɛ́ nɛ bə vò, ⁸ mùnì ga bə tɛnɛ dǎr nánzhəzhɔ̌ à yilə, bə̀ jì y kɛ̀bɛ́ à la lú mú m'a yə̀ nánfwɛ̀lɛ̀ e j'à m'a súlí e zə cɛ̀nɛ̀ dɛ̃́dɛ̃́ myɛ. ⁹ 9 Sə nyǐ à m'a pə bə̀lɛ́ è pàr tɔ́nnəbáa mɔ̀ɔ̀rhɛ̀ tə̀ldù (6 000) ǹdə́ orzhɛ tɔ́nnəbá mɔ̀ɔ̀rhɛ̀ tə̀ldù (6 000) ǹdə́ də̀vɛ̃́ lyítərə mɔ̀ɔ̀rhɛ̀ zɔ̃̌-lyɛlɛ (800 000) ǹdə́ nwə̃̌ lyítərə mɔ̀ɔ̀rhɛ̀ zɔ̃̌-lyɛlɛ (800 000) ǹ də̀-kàrna bɛ́ bə̀ la cèmé né kǎ mɔ́ nɛ.» ¹⁰ Tiiri pyɔ̌ Yəram zɛ̃̀ n kɛ̃ sɛ́bɛ́ n mə n lyár pyɔ̌ Saləmɔ n wɔ̀: «Wɔ́ Cinu Yi gə́ só ń dwí rí mú è ce, ń ce ǹ wɔ́ rə̀ pyɔ̌.» ¹¹ Yəram zɛ̃̀ n wɔ̀: «Bə̀ Cinu, Esərayɛl Yi rí, ń wɛ̀rhɛ́ dɛ̃̌-yi rí ǹdə́ cɛ y mɔ́, n súlí n pə byǐ mɔ̀bɔ́ ń wɔ́ lárma cə́bal ǹdə́ cìn-dã̀ɔ̃́ cə́bal ǹdə́ surhə cə́bal pyɔ̌ Dəvyidi ni, ń la jì lú Cinu yil e súlí pyɔ̌-kɛ̀lɛ́ ń cìcì yil mú, nə còrhó. ¹² Rə̀myɛ́ ce èlǎsɛ̃́, à n'â pɛ mɔ́ Yəram-Abyi, ń búl n lá e jà ń yě tum rí yé shò náàcɛ̀nɛ́, ¹³ Dan kwálá y lyì bə̀kɔ́ byǐ, ń da mɔ́ yà ń wɔ́ Tiiri lò. Ń yě sánə́má ǹdə́ sə̀byì-kùlì ǹdə́ kàmmɔ ǹdə́ lù ǹdə́ nə́kulu ǹdə́ dɔ̌ tum rí yé shò, ń yě gã̀-jɛ̀rh mɔ́rh nánshɛ̀rh ǹdə́ nánshɛ̀rh gwɛ̃́gwɛ̃́ e súlí námpǔlsi ǹdə́ shɛ̀bɛ́ sə̀ n'ê swɛ̃̀ ǹdə́ lɛ̃̌ kɛ̀bɛ́ è càn mɔ́ sɔ̃́. Ń yà ń súlí ń wɔ̌ kɔn dwí gakó nyɔrhɔ ń nə́ ń sə̀lə̀. Ń wɔ̌ tum rí tɛ̀bɛ́ dwí gakó bə̀ la mɔ pɔ mɔ́ ń la tũ̌. Ń mà n tó ǹmyɛ́ lyì bí byɛ̀bɛ́ bə̀ yě tum rí yé shò mó ne, ǹdə́ à yó-cə́bal ǹ da Dəvyidi nyə̀ná bɛ́ nɛ n mə n twĩ̀. ¹⁴ À yó-cə́bal pə bə̀lɛ́ y ǹdə́ orzhɛ y ǹdə́ nwə̃̌ y e súlí də̀vɛ̃́ y ǹ zɔ̀m rə̀ zɔ̀mà mɔ́, bə b'e pə ń tùntùnnə bé ne. ¹⁵ Nə́myɛ̌ m'ǎ kà Lyəbã cèmé né nə yí ǹdə ǹ gə́ nə́ ǹ yǎl nɛ́, nə́ la zɛ̃̀ nə́ lyẽ lyẽ ne dwã nɛ kùr kùr ǹdə wɔ́ sɔ̃́ nə́ sɔ̃̀ nɛ ta; ¹⁶ rə̀myɛ́ kwã nɛ́, nə́ m'ǎ ji ni nə̀-fɔ̀lɔ̀ w wa, nə́ zə nɛ nə́ m'é yí Zhafa. Ǹmyɛ́ m'ǎ zɛ̃̀ ń ce nə yí Zhərəzalɛm.» ¹⁷ Saləmɔ gə̀ zhələ bé byɛ̀bɛ́ bə̀ y'à wɔ Esərayɛl tənà y w mɔ́, ń da Dəvyidi gə́ yà ń gàl bɛ kwã mɔ́, bə̀ y'à wɔ́ nunə mɔ̀ɔ̀rhɛ̀ zɔ̌m ǹdə́ shí-ènu ǹdə́ rə̀tɔ̀ ǹdə́ zɔ̃̌-nyə̀ldù (153 600). ¹⁸ N ce bə̀ nunə mɔ̀ɔ̀rhɛ̀ shə́-shàlpyɛ̀ (70 000) la yə̀ nə́kul-zhinnə, nunə mɔ̀ɔ̀rhɛ̀ shə́-lyɛlɛ (80 000) la yə̀ nə́kul-sə̀lnə pyɔ̀ w wa, nunə mɔ̀ɔ̀rhɛ̀ rə̀tɔ̀ ǹdə́ zɔ̃̌-nyə̀ldù (3 600) la cili lyì bí sõ, bə ce bə twĩ̀.