¹ Dəvyidi byǐ Saləmɔ pyɛ̀lɛ̀ rɛ́ tú rə cĩ́ kùrə̀; Cinu ń Yi rí yà ń ŋwɛ́nɛ́ ǹdə́ mɔ, n ce n jǐrh pyɔ̌ nánfɔ̀lɔ̀. Saləmɔ lárma mɔ́, ² 2 Saləmɔ zhərh ǹdə́ Esərayɛl lyì byǎ bɛ́ púlə́púlə́, shə̀dɛ́ɛ́sɛ mɔ̀rhɔ̀ mɔ̀rhɔ̀ ǹdə́ shə̀dɛ́ɛ́sɛ zɔ̌m zɔ̌m kùkùlə̀ né yó-cìnə́ bé ǹdə́ bù-kárna bɛ́ e súlí Esərayɛl púlə́púlə́ yé né cìnə́ bé, è n'ê yǎl e wɔ̀ dwə́ né yó-cìnə́ bé. ³ Saləmɔ ǹdə́ lyì bí byɛ̀bɛ́ bə̀ y'à tú dwã yó mó gakó, zɛ̃̀ bə vò vwə̃̀ né zwə́l jàà y è y'à wɔ Gabaɔ̃ nɛ́ mɔ́ wa, bə̀ wɔ́ gàà Yi kòrhó w kɔ̀bɔ́ Cinu Yi tùntùnnə Muyiisi yà ń wɛ̀rhɛ́ gɔ-elũ èpòlò w w mó y'à ŋwɛ́nɛ́. ⁴ Dəvyidi yà ń kwè Yi kùlkṍ w Cərəyaatɛ-Yəyərim ní n bə̀ n cĩ́ jàà y kɛ̀bɛ́ ń yà ń tɛnɛ ò yil mú wə, bə̀ ń yà ń pú kòrhó ò yil Zhərəzalɛm nɛ́. ⁵ Sə kàmmɔ vwĩ̀-jùlú w Uri byǐ Bəsalɛl, Uuri nɔ̃̌ wá, yà ń zùrhì mú y'à wɔ Cinu kòrhó w yé né; sə wɔ́ òmyɛ́ Saləmɔ ǹdə́ lyì bí byɛ̀bɛ́ bə̀ y'à tú dwã yó mó gakó y'à n'ê pyà. ⁶ 6 Gàà mɔ́, Saləmɔ jìl n vò kàmmɔ vwĩ̀-jùlú w jàà y wa, Cinu yé né, dwã-joló kòrhó w yala nɛ, n zwə́l vwə̃̀ námpúmə́ cɛ̃́ɛ̃́ mɔ̀rhɔ̀. ⁷ Dɛ̃ rɛ́ rə̀myɛ́ cìcì cəcɛ̃ yá, Yi lyí Saləmɔ rə bwə̀rh mo rə wɔ̀: «Bə̀kɔ́n ǹ nə́ ǹ yǎl b'à pɔ̃́? Sə́ lwə̀l re ne.» ⁸ Saləmɔ lyár Yi n wɔ̀: «Wɔ́ ǹmyɛ́ ǹ zɔ à da Dəvyidi ǹdə́ wu-bɔ̀nɔ̀ nánfɔ̀lɔ̀, ń zɛ̃̀ ń ce a jǐrh pyɔ̌ a zwẽ ń jàà yá. ⁹ Èlǎsɛ̃́, Cinu Yi, pyǐrh ǹ nyí rí ǹ bwəl à da Dəvyidi ni mú, bə̀ wɔ́ ǹmyɛ́ ǹ ce à wɔ́ dwí, rə̀ já dɛ̃́dɛ̃́ ǹdə cɛ shó w ne mó pyɔ̌. ¹⁰ Èlǎsɛ̃́ pɛ̃ lárma ǹdə́ surhə, mùnì ga a ŋwɛ̀nɛ́ a kál dwí rí rə̀myɛ́ mɔ́. Mɔ̌ gaga ń wɔ̌ ǹ dwí rí ń la kál, dwí rí tɛ̀bɛ́ rə̀ já dɛ̃́dɛ̃́ èta mɔ́?» ¹¹ Yi zɛ̃̀ rə wɔ̀ Saləmɔ nɛ: «È gə́ wɔ́ rə̀myɛ́ mɔ́ ǹ nə́ ǹ yàlá, ǹ yə̀ nə̀cɛ̀ndɛ ráá jɛ̃̀-kɔn ráá còrhó lwə̀l, ǹ yə̀ ǹ zwə̀ bé cu ráá myè-èdɔ̀lɔ̀ cìcì myɛ lwə̀l, ń zɛ̃̀ ń lwə̀l lárma ǹdə́ surhə, mùnì ń kál à dwí rí tɛ̀bɛ́ à ce ǹ wɔ́ rə̀ pyɔ̌ mɔ́ ce, ¹² à m'a pɔ̃́ lárma mɔ́ ǹdə́ surhə né, a zɛ̃̀ a súlí a pɔ̃́ nə̀cɛ̀ndɛ ǹdə́ jɛ̃̀-kɔn ǹdə́ còrhó; pyǎ bɛ́ byɛ̀bɛ́ bə̀ jɛ̀nɛ̀ mɔ́ mɔ́ yə̀ rə̀ dwí rí nɛ yé, byɛ̀bɛ́ myɛ bə̀ la yə̀ nɛ́ ǹmyɛ́ kwã nɛ́ mɔ́ myɛ t'â la rə̀ dwí rí nɔ yé.» ¹³ Saləmɔ zhǐr Gabaɔ̃ vwə̃̀ né zwə́l jàà y wa, dwã-joló kòrhó w yé né, n ká n kwɛ̃̀ n bə̀ Zhərəzalɛm. N já n jí pyɛ̀lɛ̀ Esərayɛl nɛ́. ¹⁴ Saləmɔ pyà búlə́ eshə-vwə̃tur ǹdə́ eshə-jòmnə. Ń yà ń zhe búlə́ eshə-vwə̃tur mɔ̀rhɔ̀ ǹdə́ zwã̌-àna (1 400) e súlí eshə-jòmnə mɔ̀ɔ̀rhɛ̀ shí ǹdə́ rə̀lyè (12 000). N ce rə̀ jàlà vò rə̀ ŋwɛ́nɛ́ cɛmɛ nɛ́ nyɛ̀bɛ́ ń tɛnɛ jààsɛ̀ nə̀ wẽ́, rə̀ yil mú wẽ́; jàlà mɛ̃ Zhərəzalɛm nɛ́, ń yala nɛ. ¹⁵ Pyɔ̌ mɔ́ yà ń ce sə̀byì-kùlì y ǹdə́ sánə́má mɔ́ y'à j'â pyě tɛ̃́ ǹdə nə́kulə né ta, sɛ́ɛ́dərɛbá myɛ y'à já ǹdə pyàr rɛ́ kùr w pyǎlsɛ́ nyí rí shəkəmɔ́ɔ́rɛbá ta, Zhərəzalɛm nɛ́. ¹⁶ Saləmɔ shəshesé y'à wɔ́ Ezhibti ǹdə́ Shəliishi sə̀ y'à n'ê shí. Pyɔ̌ mɔ́ dɔ̌lna bɛ́ y'à n'ê zhə̀l bə̀ yè se gàà bə̀ twí bə̀ pɛ mɔ. ¹⁷ Búlə́ eshã-vwə̃tu kɔ̀bɔ́ ò y'à shí Ezhibti mú òdù gakó y'à n'ô yè wár-kùlsi zɔ̃̌-nyə̀ldù, eshã èdù gakó zɛ̃̀ è n'ê yè wár-kùlsi zɔ̌m ǹdə́ shí-ènu. È y'à wɔ́ rə̀myɛ́ rə̀dù y Yititəbá e súlí Siri pyǎ bɛ́, bə̀ y'à n'ê tó dɔ̌lna bɛ́ bə̀myɛ́ mɔ́ dɛnnɛ bə̀ yè búlə́ eshə-vwə̃tur rí ǹdə́ eshesé mó yilə.