¹ Zhɔzhaasɛ jú Cinu Pakɛ címsí Zhərəzalɛm nɛ́, sə bə̀ zwə́l Pakɛ címsí vwàmá nɛ́ cànà nã́yə́ə́ y dwã shí ǹdə́ nə̀na dɛ̃ rɛ́ yù wə. ² N kə́ n cĩ́ vwĩ̀-zwə́lnə bé bə̀ tumə né wẽ́, n zɛ̃̀ n ce yə̀wǎl bə̀ kùr w Cinu jì y tum rí tũ̌ yilə. ³ N wɔ̀ Levyi dwí rí lyì bí bə̀ y'à mə̌ dwã sə bə cèrhè Esərayɛl púlə́púlə́ mó ne, bə̀myɛ́ byɛ̀bɛ́ bə̀ y'à cír bə̀ wɔ́ Cinu lyì námpúm mú ni: «Á gə la Cinu Yi kùlkṍ w Yi jì y Esərayɛl pyɔ̌ Saləmɔ, Dəvyidi byǐ mú, lù mú w co, ò k'ô t'â la zhĩĩ yál á pyə́pyɛla nɛ́ yil yé. Elǎsɛ̃́, twĩ̌-nə á pə Cinu á Yi rí ǹdə́ ń dwí Esərayɛl nɛ. ⁴ Bɔ̌n-na dwã kɔn tó á nàmbala bɛ́ jìsí ni, kɔn súlí rə tó á tumə né kùkùlə̀ né ne, ǹdə Esərayɛl pyɔ̌ Dəvyidi ǹdə́ ń byǐ Saləmɔ sábá nɛ́ gə́ n'ê byili ní. ⁵ Zhǐ-nə Yi jì y wẽ́ kɔn tó á da-byǎ nàmbala bɛ́ jìsí ni, kɔn súlí rə tó Levyi dwí rí nàmbala bɛ́ jìsí gə́ bɔ̀n bɔ̀n nɛ́. ⁶ Zwə́l-nə Pakɛ címsí vwĩ̀ rí, tɛnɛ-na á cìn Cinu yilə, s'a sɛ̃ á da-byǎ bɛ́ nɛ mùnì ga bə tó kɔn rɛ́ tɛ̀bɛ́ Cinu tó Muyiisi dɛnnɛ n byili mú ni.» ⁷ Zhɔzhaasɛ pə və̌-ywàálɛ, pyì-bwǎlsɛ ǹdə́ bɔ̀-bwǎlsɛ dwí rí lyì bí ni; Pakɛ vwə̃̀ né vwàmá nɛ́ gakó yó w y'à yú mɔ̀ɔ̀rhɛ̀ shə́-ètɔ̀ (30 000) Esərayɛl lyì byǎ byɛ̀bɛ́ bə̀ y'à ŋwɛ́nɛ́ gàà mɔ́ yilə, e súlí nə̀-byərh mɔ̀ɔ̀rhɛ̀ rə̀tɔ̀ (3 000); sə rə̀myɛ́ mɔ́ gakó y'à shí pyɔ̌ mɔ́ jilə né wə. ⁸ Ń lyì-fwààlɛ́ pə vwàmá dwí rí ǹdə́ vwĩ̀-zwə́lnə bé e súlí Levyi dwí rí lyì bí ni ǹdə́ bə̀ sə̀pwà pùbùlə̀: Yələca ǹdə́ Zakarɛ ǹdə́ Yəyəə, bə̀ y'à n'ê nyǐ Yi jì y yò mó, pə pyì-bwǎlsɛ mɔ̀ɔ̀rhɛ̀ rə̀lyè ǹdə́ zɔ̃̌-nyə̀ldù (2 600) e súlí nə̀-byərh zwã̌-àtɔ̀ (300) vwĩ̀-zwə́lnə be né Pakɛ vwə̃̀ né yilə. ⁹ Levyi dwí rí lyì bí yó-cìnə́ bé, Kɔnanya ǹdə́ ń da-byǎ Shəmaya ǹdə́ Nətanəyəə ǹdə́ Ashabya ǹdə́ Yəyəə e súlí Yɔzabaadɛ pə pyì-bwǎlsɛ mɔ̀ɔ̀rhɛ̀ rə̀nu (5 000) ǹdə́ nə̀-byərh zwã̌-ànu(500) Levyi dwí rí lyì bí ni Pakɛ vwə̃̀ né yilə. ¹⁰ Nyǐ tum rí gə́ y'à tɛnɛ nɛ́: vwĩ̀-zwə́lnə bé y'à zhǐ bə̀ jààsɛ́ wa, Levyi dwí rí lyì bí zɛ̃̀ bə̀ wɔ bə̀ tumə né kùkùlə̀ né wə, kɔn tó dwã ǹdə́ pyɔ̌ mɔ́ nyí rí ń yà ń pɔ mɔ́. ¹¹ Bə̀ y'à n'ê zwə́l Pakɛ vwə̃̀ né vwàmá nɛ́, bə pə nə̀ jal mɔ́ vwĩ̀-zwə́lnə bé ne bə̀ lwé vwĩ̀-jùlú w yó, Levyi dwí rí lyì bí zɛ̃̀ bə̀ n'ê pòm vwàmá nɛ́ bə̀ zwə́l mó. ¹² Bə̀ gə tú bə̀ n'ê pɛ dwí rí lyì bí ni bə̀ cələ né kɔn tó dwã ǹdə bə̀ nambala bɛ́ jìsí gə́ bɔ̀n bɔ̀n dwã nɛ nɛ́, bə̀ y'à n'ê vùr vwə̃̀ námpúmə́ cɛ̃́ɛ̃́ nɛ́ bə̀ mə̌ sə bə pə Cinu ni mú wẽ̀ ré bə̀ cĩ́ kwã nɛ́, ǹdə rə̀ gə́ kɛ̃ Muyiisi sɛ́bɛ́ rɛ́ wẽ́ né. Kɔn yàl èta ǹdə́ nə̀-byesé myɛ. ¹³ Bə wò Pakɛ pyì-bwɛ̀lɛ́ y ǹdə nyí rí gə́ byili ní, bə zɛ̃̀ bə yele nə́kwánsɛ ǹdə́ kwǎlnɛ e súlí nə̀bwánsɛ bə m'e tɛnɛ kùjúúrí dwã bɛ́ bə̀ pɔ Yi ni mú. Sə rə̀myɛ́ kwã nɛ́, bə̀ vùr ri bə dùr làlà bə vò bə pə dwí rí lyì bí dwã bɛ́ gakó ne. ¹⁴ Rə̀myɛ́ mɔ́ kwã nɛ́, Levyi dwí rí lyì bí zɛ̃̀ bə tɛnɛ tɛ̀bɛ́ rə̀ wɔ́ bə̀myɛ́ cìcì ǹdə́ vwĩ̀-zwə́lnə bé cəl mó; bə̀ vwĩ̀-zwə́lnə bé bə̀ wɔ́ Aarɔ̃ byǎ bɛ́ mɔ́ y'à jâ n'ê ji vwə̃̀ námpúmə́ cɛ̃́ɛ̃́ nɛ́ ǹdə́ vwə̃̀ né nwǐsí myǐn kɔn m'e yí cəcɛ̃; wɔ́ rə̀myɛ́ rə̀ ce Levyi dwí rí lyì bí tɛnɛ tɛ̀bɛ́ rə̀ y'à wɔ́ bə̀myɛ́ cìcì ǹdə́ vwĩ̀-zwə́lnə bé cəl mó. ¹⁵ Núnnə bé, bə̀ y'à wɔ́ Asaafɛ byǎ bɛ́ mɔ́, j'a mɛ̃ bə̀ tum rí jàà y wa, ǹdə Dəvyidi ǹdə́ Asaafɛ ǹdə́ Emã e súlí Yədutũ, pyɔ̌ mɔ́ cícírnə mó, gə́ y'à pɔ nyí ní; étwí-ènyə́ né dɛ̀nna bɛ́ myɛ mɛ̃ étwí-ènyí gakó ne. Bə̀ j'â yə̀ bə̀ tum rí ni yẽ̌ bə zhì yé, bə̀ bə̀ da-byǎ Levyi dwí rí lyì bí y'à n'ê tɛnɛ bə̀ yilə. ¹⁶ Dɛ̃ rə̀myɛ́ mɔ́ yù wə, tum rí tɛ̀bɛ́ bə̀ twĩ̀ Cinu yil mú tɔnɔ mɔ́ y'à n'ê pyà sə bə jí Pakɛ címsí, sə bə súlí bə zwə́l vwə̃̀-námpúmə́ cɛ̃́ɛ̃́ nɛ́ Cinu vwĩ̀-jùlú w yó kɔn tó dwã ǹdə nyí rí tɛ̀bɛ́ pyɔ̌ Zhɔzhaasɛ yà ń pɔ mɔ́. ¹⁷ Èta Esərayɛl lyì byǎ bɛ́ byɛ̀bɛ́ bə̀ y'à ŋwɛ́nɛ́ gàà mɔ́ jú Pakɛ címsí dɛ̃ rɛ́ rə̀myɛ́ mɔ́ yù wə, bə zɛ̃̀ bə súlí bə jí búúrí rə̀ yə̀ sã̀-nə̀byẽ̌ ce mó címsí dwã nyàlpyɛ̀. ¹⁸ Kɔn zhì nyì-zwennə Saməwəə yi ní ga, bə̀ k'ê gwẽ̌ yə̀ Pakɛ címsí sə̀myɛ́ mɔ́ dwí rí jí gaga yé, sə Esərayɛl pyɔ̌ mə̀dù ga myɛ yə̀ Pakɛ címsi tɛnɛ ǹdə shɛ̀bɛ́ Zhɔzhaasɛ ǹdə́ vwĩ̀-zwə́lnə bé ǹdə́ Levyi dwí rí lyì bí ǹdə́ Zhəda lyì bí gakó ǹdə́ Esərayɛl lyì bí byɛ̀bɛ́ bə̀ y'à ŋwɛ́nɛ́ gàà mɔ́ e súlí Zhərəzalɛm lyì bí y'à tɛnɛ mɔ́ gə́ jú si ní ta yé. ¹⁹ Pakɛ címsí sə̀myɛ́ mɔ́ jú Zhɔzhaasɛ pyɛ̀lɛ̀ rɛ́ jú byinə shí ǹdə́ lyɛlɛ byin rí. ²⁰ Rə̀myɛ́ mɔ́ gakó kwã nɛ́, Zhɔzhaasɛ gə́ kwɛrhɛ Yi jì y n zhɛ̀, Ezhibti pyɔ̌ Nəko yà ń zhə̀l ń la vò n bú Kərəkəmyiishi ní, Efəraatɛ bù-fwɛ̀lɛ̀ y yó, Zhɔzhaasɛ zɛ̃̀ ń vò ń la mɔ jəl. ²¹ Nəko twĩ̀ lyì bə vò bə wɔ̀ mɔ: «Bə̀kɔ́n rə̀ wɔ nə́ bwə̌l wə, Zhəda pyɔ̌? Zà mɔ́, à yə̀ twí à la bú ǹdə́ mɔ́ yé, sə wɔ́ ǹd'â zù-bal mɔ́ nándwə́l mó. Yi wə̀l ne b'à ce jàn nɛ́. Bə̀ pyà ń bú ǹdə́ Yi rí tɛ̀bɛ́ rə̀ ŋwɛ́nɛ́ ǹdə́ nɛ mɔ́ yé, nyǐ è gə də̀ rə̀myɛ́ rə̀ m'a ce ń jé tɛ̃́.» ²² Sə ǹdə́ rə̀myɛ́ ga, Zhɔzhaasɛ yə̀ kwɛ̃̀ n pyìrhí n yẽ̌ mo yé, n zɛ̃̀ n lyə́r ń cìn mùnì ga bə̀ bə̀k'a lwar ń pár yé, sə n mə n bú ǹdə́ mɔ; ń yə̀ Nəko zɔ̀mà nɛ́ cili, e jà wɔ́ Yi rə̀ y'à ce n zɔ̀m èta. N zɛ̃̀ ń bàn bú ǹdə́ mɔ Mejido jə́ y wə. ²³ Twərh cìnə́ bé tə pyɔ̌ Zhɔzhaasɛ bə za, n já n wɔ̀ ń tùntùnnə bé ne: «Kwě-nə ne á m'á lyɛ̃ b'à cɛ̀mɛ̀ dɛ̃́dɛ̃́.» ²⁴ Ń tùntùnnə bé vùr mu ń búlə́ vwə̃tu w kɔ̀bɔ́ ń yà ń mə́ ń bwí mú wẽ́, bə ce ń búlə́ vwə̃tu w dõ mó wẽ́, sə bə̀ zɔ mɔ bə m'e vò Zhərəzalɛm. N yí n cì gàà, sə bə̀ co mo ń nàmbala bɛ́ bɔ̀là bɛ́ wẽ́. Zhəda ǹdə́ Zhərəzalɛm lyì bí gakó kúrh mu. ²⁵ Zheremyi wɛ̀rhɛ́ wu-zhùlù nwə̃́ Zhɔzhaasɛ cu mú shò kwã nɛ́; núnnə bé gakó, bə̀ bala ǹdə́ bə̀ kana ga j'â n'ê zɔ̀m Zhɔzhaasɛ zɔ̀mà bə̀ wu-zhùlù nwísí wẽ́ kɔn b'e yí zà; bə̀ ce tũ̀twĩ̀ĩ̀ rí rə̀myɛ́ mɔ́ j'a jǐrh lùl-e-pwírí Esərayɛl nɛ́, bə súlí bə ce nwísí sə̀myɛ́ mɔ́ wu-zhùlù nwísí wẽ́. ²⁶ Zhɔzhaasɛ tumə né dwã bɛ́ ǹdə́ ń Yi nyɔ̀mɔ̀ tumə né nyɛ̀bɛ́ ń twĩ̀ nə̀ tó kɔn dɛ̀bɛ́ rə̀ kɛ̃ Cinu nyə́ né sɛ́bɛ́ rɛ́ wẽ́ mó ne, ²⁷ è n'ê yàl e wɔ̀ ń tumə nã́yə́ə́ né ǹdə́ nə̀ nánkwaá nɛ́ ga, kɛ̃ Esərayɛl ǹdə́ Zhəda pyǎ bɛ́ sɛ́bɛ́ rɛ́ wẽ́.