¹ Tənà y lyì bí zɛ̃̀ bə zə Zhɔzhaasɛ byǐ Zhɔwakaazɛ bə ce n yə̀ pyɔ̌ Zhərəzalɛm nɛ́ ń da jàà wa. ² Zhɔwakaazɛ jǐrh pyɔ̌ ǹdə́ ń yà ń zhe byinə shí-èlyè ǹdə́ nə̀tɔ̀; sə ń jòm Zhərəzalɛm nɛ́ n mə n jí pyɛ̀lɛ̀ rɛ́, cànsɛ̀ sə̀tɔ̀. ³ 3 Ezhibti pyɔ̌ Nəko zwẽ pyɛ̀lɛ̀ rɛ́ ń jɔ̃̀ w Zhərəzalɛm nɛ́. N zɛ̃̀ n ce Zhəda tənà y lyì bí n'ê pɛ wár-kùlsi cəə́le mɔ̀ɔ̀rhɛ̀ rə̀tɔ̀ (3 000) ǹdə́ sánə́má cəə́le shə́-ètɔ̀ myə̌l-kwǎndɛ. ⁴ Ezhibti pyɔ̌ mɔ́ zɛ̃̀ n ce Zhɔwakaazɛ da-byǐ Elyəcim yə̀ Zhəda ǹdə́ Zhərəzalɛm pyɔ̌, n súlí n lyə́r ń yil ré n ce bə̀ Zhowəcim. Sə è gə wɔ́ ń da-byǐ Zhɔwakaazɛ myɛ̌ yilə, Nəko zɔ mɔ n mə n vò Ezhibti. ⁵ Zhowəcim jǐrh pyɔ̌ ǹdə́ ń yà ń zhe byinə shí-èlyè ǹdə́ nə̀nu; sə ń jòm Zhərəzalɛm nɛ́ n mə n jí pyɛ̀lɛ̀ rɛ́, byinə shí ǹdə́ rə̀dù. Ń wɛ̀rhɛ́ kɔn rɛ́ tɛ̀bɛ́ rə̀ wɔ́ lwɛlɛ Cinu ń Yi rí yírh wə. ⁶ Babyəlɔnɛ pyɔ̌ Nabəkɔdɔnɔzɔɔrɛ zɛ̃̀ búlə́ ne ǹdə́ mɔ. N lyẽ mo ǹdə́ kàmmɔ nyáná nə̀lyè n mə n vò Babyəlɔnɛ. ⁷ Nabəkɔdɔnɔzɔɔrɛ pwà Cinu jì y wẽ̀ ré jàlà n mə n vò Babyəlɔnɛ, n yí n cĩ́ ri ń pyɔ̌-kɛ̀lɛ́ y wa. ⁸ Zhowəcim tumə né dwã bɛ́ ǹdə́ pwarha tumə né nyɛ̀bɛ́ ń twĩ̀ mú e súlí kɔn dɛ̀bɛ́ rə̀ yú mu mú kɛ̃ Esərayɛl ǹdə́ Zhəda pyǎ bɛ́ sɛ́bɛ́ rɛ́ wẽ́. Ń byǐ Zhɔwakɛ̃ ń pú mu n yə̀ pyɔ̌. ⁹ Zhɔwakɛ̃ jǐrh pyɔ̌ ǹdə́ ń yà ń zhe byinə lyɛlɛ; sə ń jòm Zhərəzalɛm nɛ́ n mə n jí pyɛ̀lɛ̀ rɛ́, cànsɛ̀ sə̀tɔ̀ ǹdə́ dwã shíyə́. Ń wɛ̀rhɛ́ kɔn rɛ́ tɛ̀bɛ́ rə̀ wɔ́ lwɛlɛ Cinu yírh wə. ¹⁰ Cɛ y gə́ tú e púl, pyɔ̌ Nabəkɔdɔnɔzɔɔrɛ twĩ̀ lyì bə vò bə zə mɔ bə m'e bə̀ Babyəlɔnɛ, e súlí Cinu jì y wẽ̀ ré tɛ̀bɛ́ rə̀ y'à càn mɔ́, n zɛ̃̀ n ce ń da-byǐ Sədəcaasɛ yə̀ Zhəda ǹdə́ Zhərəzalɛm pyɔ̌. ¹¹ Sədəcaasɛ jǐrh pyɔ̌ ǹdə́ ń yà ń zhe byinə shí-èlyè ǹdə́ rə̀dù; sə ń jòm Zhərəzalɛm nɛ́ n mə n jí pyɛ̀lɛ̀ rɛ́, byinə shí ǹdə́ rə̀dù. ¹² Ń wɛ̀rhɛ́ kɔn rɛ́ tɛ̀bɛ́ rə̀ wɔ́ lwɛlɛ Cinu ń Yi rí yírh wə. Sə ń yə̀ ń cìn tɛ̃́ lwəl nyì-zwennə Zheremyi mɔ̀bɔ́ ń yà ń nə́ ń zɔ̀m Cinu yil yil mú yé né yé. ¹³ Ń cẽ pyɔ̌ Nabəkɔdɔnɔzɔɔrɛ, ń yà ń ce n zə Yi yil ré n mə n bwəl nyí mú nyí ni shɔ̀nɔ̀ yò. Ń twĩ̀ yó-kùlù n súlí n kù ń wu, n cẽ ń yə̀ kwɛ̃̀ n bə̀ Cinu, Esərayɛl Yi rí sõ yé. ¹⁴ Vwĩ̀-zwə́lnə bé ǹdə́ dwí rí yó-cìnə́ bé myɛ súlí bə̀ búl bə̀ yə̀ bə̀ nà èdù yó zhì yé, dwə́ né dwã bɛ́ pwarha tumə né dwí gakó bə̀ y'à n'ê twĩ̀ mú yilə, sə bə̀ byèlè Cinu jì y ń yà ń zwẽ Zhərəzalɛm nɛ́ ń cìn yil mú. ¹⁵ Cinu, bə̀ nàmbala bɛ́ Yi rí tó rə̀ tùntúmə́ bé dɛnnɛ rə dámǎ rə zɔ̀m ǹdə́ bɛ rə k'a bwérhé, rə̀ y'à n'ê dùr rə̀ dwí rí ǹdə́ rə̀ sə̀pwà jì y nɔ̀nɔ̀, ¹⁶ sə bə̀ y'à n'ê tùrh Yi tùntúmə́ bé, bə̀ n'ê fuuli rə̀ zɔ̀mà nɛ́, bə súlí bə̀ n'ê mɔ̀n rə̀ nyì-zwennə bé, kɔn b'e yí Cinu lyim rí j'a zɛ̃̀ rə̀ n'ê yì ń dwí rí dɛ̃́dɛ̃́ rə̀ k'ê bə cə́m myɛ zhe yé. ¹⁷ Rə̀myɛ́ mɔ́ ce Cinu ce Kalədɛ lyì bí pyɔ̌ mɔ́ bə̀ n bú ǹdə́ bɛ, n gu bə̀ ébwá-dàlá bɛ́ bə̀ Yi jì y wẽ́ ǹdə́ búlə́ shù, ń yə̀ ébɔ́-dǎl ráá bóm ráá ezhɛ̀nɛ́ ráá náncɛ nɔ̀nɔ̀ myɛ dùr yé: n ce kɔn gakó ń jɔ̃̀ wa. ¹⁸ Kalədɛ lyì bí pyɔ̌ mɔ́ pwà Yi jì y wẽ̀ ré gakó, rə̀ nánfwààlɛ ǹdə́ rə̀ námpɔ́lsɛ ga, ǹdə́ Cinu jì y nə̀cɛ̀ndɛ́ e súlí pyɔ̌ mɔ́ ǹdə́ ń lyì-fwààlɛ́ ga myɛ nyǎn rɛ́, n zə rə̀ gakó n mə n vò Babyəlɔnɛ. ¹⁹ Bə ji Cinu jì y myǐn, bə wǔr Zhərəzalɛm cɔ w byíl-fwɛ̀lɛ̀ y è y'à kə́kɛ́lɛ́ w mɔ́ bə ló tɛ̃́, bə ji pyɔ̌ kǎlsɛ́ myǐn, bə cɔ̀ wẽ̀ ré tɛ̀bɛ́ rə̀ y'à càn mɔ́ gakó lyə́m lyə́m. ²⁰ Kalədɛ lyì bí pyɔ̌ mɔ́ zɛ̃̀ n pwà lyì bí byɛ̀bɛ́ bə̀ lú búlə́ shù w yé né mó n mə n vò Babyəlɔnɛ mùnì ga n ce bə jǐrh ńmyɛ̌ ǹdə́ ń byǎ bɛ́ yómə́, kɔn b'e yí Pɛɛrəsɛ pyǎ bɛ́ gə́ tú bə̀ b'e zwẽ pyɛ̀lɛ̀ rɛ́ yi rí. ²¹ Èta Cinu zɔ̀mɛ̀ rɛ́ ń yà ń tó Zheremyi dɛnnɛ n zɔ̀m mɔ́ j'a pyìrh, ń yà ń yòwə̀: «Tənà y m'a pyẽ̀ tɛ̃́ nánfò byinə shə́-shàlpyɛ̀ kɔn b'e yí è shìrhə́ dwã nɛ́ yó w pyìrh e m'e kwɛ̃̌ shìrhə́ dwã nɛ́ nyɛ̀bɛ́ nə̀ mɛ̃ nánfò mó.» ²² aPɛɛrəsɛ pyɔ̌ Səruusi pyɛ̀lɛ̀ rɛ́ byin nã́yéé ré, Cinu Yi co surhə pyɔ̌ Səruusi wẽ́, mùnì ga Səruusi ce ń zɔ̀mɛ̀ rɛ́ ń yà ń tó ń nyì-zwennǝ Zheremyi dɛnnɛ n byili mú pyìrh. Pɛɛrəsɛ pyɔ̌ Səruusi ce bə bwə̀l, bə súlí bə kɛ̃ sábá bə pə ń pyə̀-tənà y nyí rí gakó wẽ́, bə m'e byili bə wɔ̀: ²³ «Nyǐ Pɛɛrəsɛ pyɔ̌ Səruusi nyí rí: Cinu Yi rí tɛ̀bɛ́ rǝ̀ ŋwɛ́nɛ́ dɛ̃̌ mɔ́, pɔ nɛ lũ w pyə̀-tənèsé gakó, n zɛ̃̀ n pə nɛ nyí b'à lú jì Zhǝrǝzalɛm nɛ́, Zhəda tənà y wa, a pɔ̃. Mɔ̌ ń wɔ́ ń dwí rí lò á cəcəl w mó? Bə̀ Cinu ń Yi rí yál ǹdə́ rə̀-ná-cí sə n shə́r n vò!»