¹ Zhɔzhaasɛ jǐrh pyɔ̌ ǹdə́ ń yà ń zhe byinə lyɛlɛ; sə ń jòm Zhərəzalɛm nɛ́ n mə n jí pyɛ̀lɛ̀ rɛ́, byinə shə́-ètɔ̀ ǹdə́ rə̀dù. ² Ń wɛ̀rhɛ́ kɔn rɛ́ tɛ̀bɛ́ rə̀ y'à wɔ́ cángá Cinu yírh wə, ń já n kwè ń nàmbal Dəvyidi nà yá, ń yə̀ ywə̀r n vò jə̀-jĩ́ ráá jə̀-gwã̀ myɛ yé. ³ Ń pyɛ̀lɛ̀ rɛ́ jú byinə lyɛlɛ byin rí, ǹdə́ ń yà ń gwẽ̌ wɔ́ ébɔ́-dǎl mɔ́, ń já n ji kùr ń nə́ ń pyà ń nàmbal Dəvyidi Yi rí. Ń pyɛ̀lɛ̀ rɛ́ jú byinə shí ǹdə́ nə̀lyè byin rí, ń ju kùr ń nə́ ń ce vwə̃̀ né zwə́l jààsɛ́ ǹdə́ Ashəra pálá nɛ́ ǹdə́ yə né bə̀ y'à sə̀l ráá bə̀ y'à yə̌l wẽ̀ bə m'e zùrhì mú jé tɛ̃́, rə yẽ̌ Zhəda ǹdə́ Zhərəzalɛm nɛ zwẽ́ zwẽ́. ⁴ Bə̀ wǔr Baaləbá vwĩ̀-jùúlí ń yírh wə, n mà wẽ̀ ré tɛ̀bɛ́ bə̀ y'à n'ê ji wẽ̀ rə̀ lwẽ́ nã́nyə̀nyɛ̀lɛ́ rə̀ wẽ́ rə̀ y'à wɔ Baaləbá vwĩ̀-jùúlí yə́-pǎlsɛ́ w mɔ́ n lo, n gõ̀ Ashəra pálá nɛ́ ǹdə́ yə né nyɛ̀bɛ́ bə̀ y'à sə̀l ráá bə̀ y'à yə̌l wẽ̀ bə m'e zùrhì mú. N mà rə̀ gakó n yəywɛlɛ, n zɛ̃̀ n pwà rə̀ yəywàálɛ́ n vò n ló lyì bí byɛ̀bɛ́ bə̀ y'à zwə́l vwə̃̀ bə pə yə né nə̀myɛ́ mɔ́ nɛ́ mɔ́ lú-bɔ̀là bɛ́ yó. ⁵ N ji nə̀ vwĩ̀-zwə́lnə bé kúr rí myǐn nə̀ vwĩ̀-jùúlí yó. Èta Zhɔzhaasɛ já n ce Zhəda ǹdə́ Zhərəzalɛm jǐrh zwẽ́ zwẽ́. ⁶ Manasɛ ǹdə́ Efərəyim ǹdə́ Shəmənyɔ̃ ǹdə́ Nəfətəlyi cɛmɛ nɛ́ myɛ cìcì wẽ́, e súlí tənèsé shɛ̀bɛ́ nə̀ yala nɛ mɔ́ wẽ́, ⁷ ń wǔr vwĩ̀-jùúlí, n gõ̀ Ashəra pálá nɛ́ ǹdə́ yə né nyɛ̀bɛ́ bə̀ zùrhì mú, n mà rɛ n yəywɛlɛ. N mà wẽ̀ ré tɛ̀bɛ́ bə̀ y'à n'ê ji wẽ̀ ré rə̀ lwẽ́ nã́nyə̀nyɛ̀lɛ́ rə̀ wẽ́ mó gakó Esərayɛl púlə́púlə́ wẽ́ mó n lo. Rə̀myɛ́ kwã nɛ́, ń kwɛ̃̀ n bə̀ Zhərəzalɛm. ⁸ Zhɔzhaasɛ pyɛ̀lɛ̀ rɛ́ jú byinə shí ǹdə́ lyɛlɛ byin rí, ń gə́ ce tənà y ǹdə́ Yi jì y jǐrh zwẽ́ zwẽ́ n zhɛ̀, ń twĩ̀ Asalya byǐ Shafã ǹdə́ Maasəya, cɔ w yó-cə́bal mɔ́ e súlí Zhɔwakaazɛ byǐ Yɔwa, pyɔ̌ nyì-zwennə mó, bə̀ bə̀ zhəl bə kwɛrhɛ Cinu ń Yi rí jì yə́. ⁹ Lyì bí bə̀myɛ́ mɔ́ vò bə nə vwĩ̀-zwə́lnə náncɛ Yələca. Bə zə sə̀byì-kùlì y kɛ̀bɛ́ Manasɛ ǹdə́ Efərəyim ǹdə́ Esərayɛl kwálsɛ́ dwã bɛ́ lyì bí e súlí Zhəda ǹdə́ Bɛ̃zhamɛ ǹdə́ Zhərəzalɛm lyì bí y'à co Levyi dwí rí lyì bí jɔ̃̀ w Yi jì y yil mú bə m'e bà. ¹⁰ 10 Bə zɛ̃̀ bə kwè sə̀byì-kùlì y èmyɛ́ mɔ́ bə ce lyì bí byɛ̀bɛ́ bə̀ y'à n'ê twĩ̀ tum rí mú jɔ̃̀ wa, bə̀myɛ́ byɛ̀bɛ́ bə̀ y'à n'ê nyǐ Cinu jì y yò mó; byɛ̀bɛ́ bə̀ y'à n'ê twĩ̀ Cinu jì y w mú zɛ̃̀ bə zə sə̀byì-kùlì y bə̀ m'ê n'ê twĩ̀ bə̀ kwɛrhɛ jì y gə́ cɔ̀ cɔ̀ mə̀gã̌ mɔ́. ¹¹ Rə̀myɛ́ ce, bə kwè y bə pə də̀-shə̀lnə bé ǹdə́ bo-lùrnə bé ne mùnì bə yè nə́kulə nyɛ̀bɛ́ bə̀ sə̀l ǹdə́ byə́rh, sə bə súlí bə kwɛ̃́ jìsí shɛ̀bɛ́ Zhəda pyǎ bɛ́ y'à yẽ̌ sə cɔ̀ mɔ́. ¹² Tùntùnnə bé y'à n'ê twĩ̀ bə̀ tum rí ǹdə́ wu-põ̀; bə̀ yó-cìnə́ bé y'à wɔ́ Levyi dwí rí lyì: Yaatɛ ǹdə́ Obaja y'à wɔ́ Mərəri jì y lyì, Zakarɛ ǹdə́ Məshəlam y'à wɔ́ Kəyaatɛ jì y lyì. Levyi dwí rí lyì bí dwã bɛ́ bə̀myɛ́ byɛ̀bɛ́ gakó bə̀ y'à yě wə̀-dúúri dú mú, ¹³ y'à cǐ wə̀-zhinnə bé ǹdə́ tùntùnnə bé gakó, kɔn tó dwã ǹdə́ lò gakó tum rí. Levyi dwí rí lyì bí wẽ́, bə̀ jàlà y'à wɔ́ sá-kanna ráá yé né cìnə́ e súlí étwí-ènyə́ né dɛ̀nna. ¹⁴ Bə̀ gə́ y'à tú bə̀ n'ê kwè sə̀byì-kùlì y bə̀ y'à zɔ bə b'e cĩ́ Cinu jì y w mú yi ní, vwĩ̀-zwə́lnə Yələca nɔ Cinu nyə́ né ń yà ń tó Muyiisi dɛnnɛ n pə mɔ́ sɛ́bɛ́ rɛ́. ¹⁵ Yələca zɛ̃̀ n zɔ̀m ǹdə́ sá-kanna Shafã n wɔ̀ mɔ: «À nɔ nyə́ né sɛ́bɛ́ rɛ́ Cinu jì y wə.» Yələca zɛ̃̀ n kwè sɛ́bɛ́ rɛ́ n pɔ̃. ¹⁶ Shafã zə sɛ́bɛ́ rɛ́ n bə̀ n pə pyɔ̌ mɔ́ nɛ, n zɛ̃̀ n cĩ́ mu kɔn gə́ tó né, n wɔ̀: «Ǹ tùntùnnə bé n'ê wɛ̀rhɛ́ kɔn rɛ́ tɛ̀bɛ́ gakó bə̀ pɔ bɛ rə̀ nyí mú: ¹⁷ Bə̀ ló sə̀byì-kùlì y kɛ̀bɛ́ bə̀ nɔ Cinu jì y wẽ́ mó, bə zɛ̃̀ bə kwè y bə pə yé né cìnə́ bé ǹdə́ byɛ̀bɛ́ bə̀ n'ê twĩ̀ tum rí mú ni.» ¹⁸ Sá-kanna Shafã zɛ̃̀ n súlí n wɔ̀ pyɔ̌ mɔ́ nɛ: «Vwĩ̀-zwə́lnə Yələca pɔ nɛ sɛ́bɛ́.» Shafã já n zɛ̃̀ n kàrmə̀ sɛ́bɛ́ rɛ́ pyɔ̌ mɔ́ yé né. ¹⁹ Pyɔ̌ mɔ́ gə́ nyɛ̀ɛ̀ Nyə́ né sɛ́bɛ́ rɛ́ zɔ̀mà nɛ́, n já n kǎr ń gàndɛ́a. ²⁰ N zɛ̃̀ n pə nyí Yələca ǹdə́ Shafã byǐ Ayəkam ǹdə́ Myəka byǐ Abədɔ̃ ǹdə́ sá-kanna Shafã e súlí pyɔ̌ tùntùnnə Asaya nɛ n wɔ̀: ²¹ «Zhəl-nə á bwə̀rh á sú Cinu wu sɛ́bɛ́ rɛ́ tɛ̀bɛ́ bə̀ nɔ mɔ́ zɔ̀mà nɛ́ shò kwã nɛ́, àmyɛ́ ǹdə́ Esərayɛl lyì bí byɛ̀bɛ́ bə̀ dàl mɔ́ ǹdə́ Zhəda yilə; nyǐ Cinu lyim zɛ̃̀ rə̀ n'ê yì nə́ba dɛ̃́dɛ̃́ bə̀ nə́ nàmbala bɛ́ yə̀ Cinu zɔ̀mɛ̀ rɛ́ cili yé, bə̀ súlí bə̀ yə̀ kɔn rɛ́ tɛ̀bɛ́ rə̀ kɛ̃ sɛ́bɛ́ rɛ́ tɛ̀bɛ́ wẽ́ mó gakó ne tó yé.» ²² Yələca ǹdə́ lyì bí byɛ̀bɛ́ pyɔ̌ mɔ́ yà ń cír mú zɛ̃̀ bə vò bə nə Cinu jì y gàndɛ́ yìlnə Shəlum kɛ̃ Uləda, ń yà ń wɔ́ nyì-zwennə. Shəlum yà ń wɔ́ Təkɔwa byǐ ǹdə́ Asəra nɔ̃̌. Kɛ̃ mɔ́ yà ń ŋwɛ́nɛ́ Zhərəzalɛm nɛ́, dǔwúl-dwə̃̀ y wẽ́. Bə̀ gə́ cĩ́ mu kɔn gə́ wɔ́ nɛ́ mɔ́ gakó bə zhɛ̀, ²³ Uləda lyár bɛ n wɔ̀: «Nyǐ Cinu Esərayɛl Yi rí nyí rí: Kwɛ̃̀-na á vò á wɔ̀ bal mɔ́ mɔ̀bɔ́ ń twĩ̀ ába à sõ mó ne: ²⁴ ‹Nyǐ Cinu nyí rí: À m'a ce lwɛlɛ pú tənà y kɛ̀bɛ́ ǹdə́ è lyì bí gakó, a m'a pyìrh sɛ́bɛ́ rɛ́ bwəl-námməlwǎlsɛ́ gakó bə̀ kàrmə̀ Zhəda pyɔ̌ mɔ́ yé né mó. ²⁵ Bə̀ yẽ̌ ne, bə súlí bə ji ãsã́ myǐn bə pə yə dwã nɛ, kɔn b'e yí bə tó bə̀ jɛ̀rh tumə né gakó dɛnnɛ bə gwar nɛ. Rə̀myɛ́ ce à lyim j'a zɛ̃̀ rə̀ n'ê yì tənà y kɛ̀bɛ́ dɛ̃́dɛ̃́, sə rə̀ t'â la tu myɛ yé! ²⁶ Sə è gə wɔ́ Zhəda pyɔ̌ mɔ́ ń twĩ̀ ába mùnì ga á b'ǎ sú Cinu wu mú yilə, á m'ǎ cĩ́ mu nyí á wɔ̀: Nyǐ Cinu Esərayɛl Yi rí nyí rí: Ǹ nyɛ̀ɛ̀ zɔ̀mà nɛ́ nyɛ̀bɛ́ náàcɛ̀nɛ́, ²⁷ ǹ cili kɔn rɛ́ tɛ̀bɛ́ à byili tənà y kɛ̀bɛ́ ǹdə́ è lyì bí shò kwã nɛ́ mɔ́, rə̀ dwə̀rh mó ń zɛ̃̀ ń lwəl ǹ cìn tɛ̃́ Yi yé né, ń lwəl ǹ cìn tɛ̃́ àmyɛ́ yé né, ń súlí ń kǎr ǹ gàndɛ́, ń kúrh à yé né. Rə̀myɛ́ mɔ́ ce àmyɛ nyɛ̀ɛ̀, wɔ́ Cinu nyí rí. ²⁸ Nyǐ à m'a ce ń twèlé ǹ dabá nɛ cúlú ní; ǹ m'ǎ twèlé be ǹdə́ yə̀-zùlə́. Ǹ yírhə́ t'â la lwɛlɛ rɛ́ tɛ̀bɛ́ gakó à la ce rə pú tənà y kɛ̀bɛ́ ǹd'ê lyì bí mú kaka nɔ yé.› » Lyì bí byɛ̀bɛ́ bə̀ y'à twĩ̀ mú kwɛ̃̀ bə zə nyí rí bə vò bə cĩ́ pyɔ̌ mɔ́ nɛ. ²⁹ Pyɔ̌ mɔ́ twĩ̀ bə byẽ̀ Zhəda ǹdə́ Zhərəzalɛm náncɛsɛ́ gakó sə bə̀ sə nə dwã ń sõ. ³⁰ N zɛ̃̀ n zə Zhəda ǹdə́ Zhərəzalɛm lyì bí gakó ǹdə́ vwĩ̀-zwə́lnə bé ǹdə́ Levyi dwí rí lyì bí e súlí dwí rí lyì bí gakó, bə̀ bə̀sɔ́ná ǹdə́ bə̀ náncɛrh gakó, n mə n vò n zù Cinu jì y wẽ́. N kàrmə̀ dɔbrɛ sɛ́bɛ́ rɛ́ bə̀ nɔ Cinu jì y wẽ́ mó zɔ̀mà nɛ́ gakó dɛ̃̌dɛ̃̌ bə cili. ³¹ Pyɔ̌ mɔ́ zhì ń jàà y wa, Cinu yé né, n kə́ n bwəl dɔbrɛ́ ǹdə́ Cinu mú nyí rí, bə̀ ń mà n tó Cinu ni, ń mà n zwẽ ń byilu mú, sə n wɛ̀rhɛ́ kɔn rɛ́ tɛ̀bɛ́ ń zhe rə̀ byã nɛ bə̀ ń wɛ̀rhɛ́ mɔ́, sə n súlí n zwẽ ń nyə́ né, ǹdə́ ń wu gakó ǹdə́ ń jàn gakó, n mə n pyìrh dɔbrɛ́ zɔ̀mà nɛ́ nyɛ̀bɛ́ nə̀ kɛ̃ sɛ́bɛ́ rɛ́ wẽ́ mó. ³² N ce lyì bí byɛ̀bɛ́ gakó bə̀ y'à wɔ Zhərəzalɛm ǹdə́ Bɛ̃zhamɛ nɛ́ mɔ́ gakó bwəl nyí, rə̀myɛ́ ce Zhərəzalɛm lyì bí j'a zɛ̃̀ bə̀ n'ê tó bə̀ nàmbala bɛ́ Yi rí dɔbrɛ́ nyí rí ni. ³³ Rə̀myɛ́ kwã, Zhɔzhaasɛ ce pwarha tũ̀twə̃̀ə̃̀ né jé tɛ̃́ Esərayɛl tənà y wa, n já n zɛ̃̀ n nyɛ́ɛ́ lyì bí byɛ̀bɛ́ gakó bə̀ y'à wɔ Esərayɛl tənà y w mɔ́ bə̀ bə̀ cèrhé Cinu bə̀ Yi rí. Zhɔzhaasɛ nyǔ mú púlə́púlə́ wẽ́, bə̀ yə̀ Cinu, bə̀ nàmbala bɛ́ Yi rí ni yẽ̌ yé.