¹ Manasɛ jǐrh pyɔ̌ ǹdə́ ń yà ń zhe byinə shí ǹdə́ nə̀lyè; sə ń jòm Zhərəzalɛm nɛ́ n mə n jí pyɛ̀lɛ̀ rɛ́, byinə shí-ènu ǹdə́ nə̀nu. ² Ń wɛ̀rhɛ́ kɔn rɛ́ tɛ̀bɛ́ rə̀ wɔ́ lwɛlɛ Cinu yírh wə, kɔn tó dwã ǹdə pwarha tumə né nyɛ̀bɛ́ gakó tənèsé shɛ̀bɛ́ Cinu zwẽ n pə Esərayɛl lyì byǎ bɛ́ nɛ lyì bí y'à n'ê twĩ̀ mú. ³ N kə́ n lù vwə̃̀ zwə́l jààsɛ́ ń da Ezəcaasɛ yà ń ce sə jé tɛ̃́ mɔ́. Ń lù vwĩ̀-jùúli Baaləbá yilə, n súlí n fwar Ashəra pálá tɛ̃́. Ń wùlì tɛ̃́ n cèrhé cã̀mə́sɔ̌sɛ́ dɛ̃̌-yi w mú gakó. ⁴ 4 N lù vwĩ̀-jùúli Cinu jì y wẽ́, e jà Cinu yà ń wə̀l ń jì y shò kwã nɛ́: «Zhərəzalɛm m'a yə̀ à yil ré còrhó jàà gaga yilə.» ⁵ N lù vwĩ̀-jùúli cã̀mə́sɔ̌sɛ́ dɛ̃̌-yi w mú gakó yilə, Cinu jì y kǎlsɛ́ sə̀lyè y wun ní wẽ́. ⁶ Ń cìcì mú ju ń byǎ bɛ́ myǐn Bɛn-Yənɔm nə̀-gɔ̀lɔ̀ w wa, n mə n zwə́l vwĩ̀; n párh jə̀pársɛ, ń tó jə̀-myaarhɛ tumə dɛnnɛ n pyà ywẽ̀ né nyɛ̀bɛ́ nə̀ bàn mɔ́ lwar, n wɛ̀rhɛ́ càl tumə, n byẽ̀ ywə́lse. Lwɛlɛ rɛ́ tɛ̀bɛ́ ń yà ń nə́ ń wɛ̀rhɛ́ Cinu yírh w mú y'à j'â n'ê súlí, kɔn b'e yí rə ce Cinu lyim zɛ̃̀. ⁷ N cĩ́ yi rí tɛ̀bɛ́ ń yà ń sə̀l mó èsã̌yùlú w Yi jì y wẽ́; e jà Yi y'à zɔ̀m ǹdə́ Dəvyidi ǹdə́ ń byǐ Saləmɔ rə̀ jì y shò kwã nɛ́ rə wɔ̀: «À m'a ce à yil ré yə̀ jì y kɛ̀bɛ́ wẽ́ ǹdə́ Zhərəzalɛm nɛ́, cɔ w à cír Esərayɛl lyì byǎ bɛ́ kwálsɛ́ gakó wẽ́ mó, gaga yilə. ⁸ À k'â t'â la ce Esərayɛl lyì byǎ bɛ́ twẽ̌, tənà y kɛ̀bɛ́ à pɔ bə̀ nàmbala bɛ́ nɛ mɔ́ nyí ni bə vò kwã nɛ́ yé; bə̀myɛ́ wúrí bə ce jàn nɛ́ bə wɛ̀rhɛ́ kɔn rɛ́ tɛ̀bɛ́ gakó à tó à tùntùnnə Muyiisi dɛnnɛ a byili bi mú: à nyə́ né gakó ǹdə́ à byilu mú ǹdə́ à nyə́ né nyɛ̀bɛ́ à kwè mó.» ⁹ Manasɛ dwĩ̀ Zhəda ǹdə́ Zhərəzalɛm lyì bí, kɔn b'e yí bə wɛ̀rhɛ́ lwɛlɛ rə dwini dwə́ né Cinu ce nə jé tɛ̃́ lyə́m lyə́m Esərayɛl lyì byǎ bɛ́ yé né mó lwɛlɛ rɛ́. ¹⁰ Cinu Yi zɔ̀m ǹdə́ Manasɛ ǹdə́ ń dwí rí, sə bə̀ yə̀ bə̀ cìn dɛ̃̀ yé. ¹¹ Cinu ce Ashəri pyɔ̌ mɔ́ shə̀dɛ́ɛ́sɛ́ yó-cìnə́ bé bə̀ bə bú ǹdə́ bɛ: Bə zə Manasɛ ǹdə́ cǎbsɛ námməgɔ́lsɛ, bə lyẽ mo ǹdə́ kàmmɔ nyáná nə̀lyè nə̀ pyɛ̀lɛ́ dwã yó, bə zə mɔ bə m'e vò Babyəlɔnɛ. ¹² Ń wu-zhùlù w wẽ́, Manasɛ byẽ̀ n ce Yi ni, n já n búl n lwəl ń cìn tɛ̃́ dɛ̃́dɛ̃́ ń nàmbala bɛ́ Yi rí yé né, ¹³ n lwə̀l re bə̀ rə̀ dǔr ń nɔ̀nɔ̀. Yi só rə̀ lyim tɛ̃́, rə nyɛ̀ɛ̀ ń lwə̌l mó, rə k'a ce n bə̀ Zhərəzalɛm n zhílí ń pyɛ̀lɛ̀ rɛ́ jú mú. Manasɛ já n lwar b'è wɔ́ Cinu ń wɔ́ Yi. ¹⁴ Rə̀myɛ́ mɔ́ kwã nɛ́, ń lù Dəvyidi Pyə̀-cɔ w pwẽ̀ ne byíl-fwɛ̀lɛ̀ yá. È y'à n'ê tó Gəyɔ̃ yi-zùr sõ, nə̀-gɔ̀lɔ̀ w wa, e lyɛ̃ e yí Émɔ̌rh bwə̀rə̀ y wə, e kə́kɛ́lɛ́ Ofɛl; ń lù y e búl e vò dɛ̃̌ dɛ̃́dɛ̃́. N cĩ́ shə̀dɛ́ɛ́sɛ yó-cìnə́ myɛ Zhəda cɛmɛ nɛ́ nyɛ̀bɛ́ nə̀ lù nə kə́kɛ́lɛ́ mɔ́ wẽ́. ¹⁵ N vùr dwə́ né dwã bɛ́ yə né ǹdə́ yi rí tɛ̀bɛ́ bə̀ sə̀l mó èsã̌yùlú w Cinu jì y wẽ́. N wǔr vwĩ̀-jùùlí tɛ̀bɛ́ ń yà ń lù Cinu Yi jì y pyɔ̀ w yó ǹdə́ Zhərəzalɛm nɛ́ mɔ́, n zɛ̃̀ n zə rɛ n du cɔ w w n dwĩ̀. ¹⁶ Ń ká n lù Cinu vwĩ̀-jùlú w n cĩ́ ò jàà nɛ́, n zwə́l yə̀-zùlə́ vwə̃̀ ǹdə́ còrhó vwə̃̀ ò yó, n zɛ̃̀ n pə nyí Zhəda lyì bí ni bə̀ bə̀ cèrhé Cinu Esərayɛl Yi rí. ¹⁷ E jà dwí rí y'à j'â gwẽ̌ n'ê zwə́l vwə̃̀ né vwə̃̀ né zwə́l jààsɛ́ wa, sə è y'à wɔ́ Cinu rə̀ Yi rí yilə. ¹⁸ Manasɛ tumə né dwã bɛ́, ń lwə̌l mó mɔ̀bɔ́ ń lwə̀l Yi ni mú ǹdə́ lyì bí byɛ̀bɛ́ bə̀ nɛ̃́ mɔ́ zɔ̀mà nɛ́ bə̀ y'à n'ê zɔ̀m ǹdə́ mɔ Cinu, Esərayɛl Yi rí jàà w mɔ́, kɛ̃ Esərayɛl pyǎ bɛ́ tumə né sɛ́bɛ́ rɛ́ wẽ́. ¹⁹ Ń Yi lwə̌l mó ǹdə́ Yi gə́ zwẽ ń lwə̌l mó ma mɔ́, ń dwə́ə́ré gakó ǹdə́ ń yə̀ nà èdù yó zhì ǹdə́ Yi mú yò wə́, ǹdə́ jààsɛ́ shɛ̀bɛ́ ń tɛnɛ dwə́ né dwã bɛ́ yə né còrhó yil mú mó, e súlí Ashəra pálá nɛ́ ǹdə́ yə né bə̀ zùrhì èsã̌yùúlí ń cìì tɛ̃́ mɔ́, ǹdə́ ń yà ń gwẽ̌ yə̀ ń cìn tɛ̃́ lwəl Yi yé né mó, ywẽ̀ né nə̀myɛ́ gakó kɛ̃ Ozəyi Tumə né sɛ́bɛ́ rɛ́ wẽ́. ²⁰ Manasɛ tú n bə̀ n cì sə bə̀ co mo ń sõ kɛ̀lɛ́ wa. Ń byǐ Amɔ̃ jǐrh pyɔ̌ ń jàà wa. ²¹ Amɔ̃ tú n bə̀ n jǐrh pyɔ̌ ǹdə́ ń yà ń zhe byinə shí-èlyè ǹdə́ nə̀lyè; sə ń jòm Zhərəzalɛm nɛ́ n mə n jí pyɛ̀lɛ̀ rɛ́ byinə nə̀lyè. ²² Amɔ̃ wɛ̀rhɛ́ kɔn rɛ́ tɛ̀bɛ́ rə̀ wɔ́ lwɛlɛ Cinu yírh w ǹdə ń da Manasɛ ta. Ń zwə́l vwə̃̀ n pə yə né nyɛ̀bɛ́ gakó ń da Manasɛ yà ń wɛ̀rhɛ́ mɔ nɛ, n súlí n cèrhé ne. ²³ Sə ń yə̀ ń cìn tɛ̃́ lwəl Cinu yé né ǹdə ń da Manasɛ gə́ yà ń lwəl ń cìn tɛ̃́ nɛ́ mɔ́ yé; ńmyɛ̌ Amɔ̃ gaga mɔ́ búl n dó dɛ̃́dɛ̃́ dwini Manasɛ. ²⁴ Ń tùntùnnə bé zɔ̀m bə ce dwã yó bə gu mu ń sõ kɛ̀lɛ́ wa. ²⁵ Sə tənà y lyì bí gu lyì bí byɛ̀bɛ́ gakó bə̀ gu pyɔ̌ Amɔ̃ mɔ́, bə zɛ̃̀ bə cĩ́ ń byǐ Zhɔzhaasɛ ń jàà wa, n yə̀ pyɔ̌.