¹ Ywẽ̀ né nə̀myɛ́ e súlí pyɔ̌ Ezəcaasɛ wu-põ̀ tumə né nə̀myɛ́ mɔ́ kwã nɛ́, Ashəri pyɔ̌ Shənəkəriibi zɛ̃̀ n bə̀ Zhəda, n bə̀ n pú Zhəda cɛmɛ nɛ́ nyɛ̀bɛ́ bə̀ lù byílsí dɛ̃̌dɛ̃̌ bə m'e kə́kɛ́lɛ́ nɛ mɔ́ gakó ń la bú n zwẽ ne. ² Ezəcaasɛ gə́ púrí Shənəkəriibi bàn ń la bú ǹdə́ Zhərəzalɛm, ³ ń zhərh ǹdə́ ń lyì-fwààlɛ́ e súlí ń shə̀dɛ́ɛ́sɛ́ yó-cìnə́ bé mùnì bə shĩ nə̀-bùlsí sə̀ y'à wɔ pwẽ̀ ne, cɔ w byílí y kwã mɔ́. Sə ń lyì bí bə̀myɛ́ mɔ́ sɛ̃ mɔ. ⁴ Lyì bí j'a du bə bə̀ dwã yó nánzhəzhɔ̌, bə shĩ nə̀-bùlsí gakó, e súlí nə̀-gɔ̀lɔ̀ w kɔ̀bɔ́ bə̀ y'à kù tɛ̃́ cɛ y kùr w mú. Bə̀ y'à n'ê wə̀lə̀: «Byè yil Ashəri pyǎ bɛ́ m'a bə̀ bə nə nɛ̃̌ mə̀ pyě tɛ̃́ èta?» ⁵ Ezəcaasɛ já n zɛ̃̀ ǹdə́ wu-jɔ̀ n kə́ ń nə́ ń lwì byíl-fwɛ̀lɛ̀ y kɛ̀bɛ́ è y'à wǔr mú, n lù jì-fwàlsɛ́ nánjíjínsí bə̀ m'ê yìlì cɛmɛ nɛ́ mɔ́ gàà ǹdə́ byíl-fwɛ̀lɛ̀ dõ pwẽ̀ ne; n kwɛrhɛ Myəlo, Dəvyidi Pyə̀-cɔ w mɔ́, n wɛ̀rhɛ́ swə́ ǹdə́ nə̀kwə̀r nánzhəzhɔ̌. ⁶ N cír shə̀dɛ́ɛ́sɛ yó-cìnə́ bə̀ la cìní dwí rí. N byẽ̀ be dwã yó ń yala nɛ jàà y kɛ̀bɛ́ è wɔ cɔ w bwə̀rə̀ y nyí ni mú, n zɛ̃̀ n zɔ̀m ǹdə́ bɛ mùnì ga kɔn dwə̀rh be ń zhe: ⁷ «Zə-na wu-jɔ̀, sə á yə̀ bala! Bə̀-na ywẽ dùr, sə á bə̀k'á kəkə Ashəri pyɔ̌ mɔ́ ǹdə́ lyì-zhɔ̌ kɔ̀bɔ́ ò ŋwɛ́nɛ́ ǹdə́ mɔ mɔ́ yé né yé, bə̀ lò mó mɔ̀bɔ́ ń ŋwɛ́nɛ́ ǹdə́ nə́myɛ̌ mɔ́ du lò mó mɔ̀bɔ́ ń ŋwɛ́nɛ́ ǹdə́ mɔ mɔ́: ⁸ Ńmyɛ̌ wɔ́ numbyínə́ jàn rə̀ ŋwɛ́nɛ́ ǹdə́ mɔ; sə nə́myɛ̌ wɔ́ Cinu nə́ Yi rí, ń ŋwɛ́nɛ́ ǹdə́ nə́ba mùnì ga n sɛ̃ nə́ba, sə n súlí n ce nyí nə́ kwã n bú nə́ búlə́ né!» Sə Zhəda pyɔ̌ Ezəcaasɛ zɔ̀mà nɛ́ j'a zə dwí rí wu ni. ⁹ Rə̀myɛ́ kwã nɛ́, Ashəri pyɔ̌ Shənəkəriibi twĩ̀ ń tùntùnnə bé Zhəda pyɔ̌ Ezəcaasɛ sõ Zhərəzalɛm nɛ́ e súlí Zhəda lyì byɛ̀bɛ́ gakó bə̀ y'à ŋwɛ́nɛ́ Zhərəzalɛm nɛ́ mɔ́ sõ, ǹdə́ ń yà ń ŋwɛ́nɛ́ Ləciishi ní ǹdə́ ń shə̀dɛ́ɛ́sɛ́ gakó, bə wɔ̀ bɛ: ¹⁰ «Nyǐ-nə Ashəri pyɔ̌ Shənəkəriibi nyí rí: Bə̀kɔ́n zhə̀n á zhe, á m'á gwẽ̌ wɔ Zhərəzalɛm jàà y bə̀ lù bə kə́kɛ́lɛ́ mɔ́ wẽ́? ¹¹ Ezəcaasɛ tá ń jə́jɛ̀nɛ́ ába ń la n ce nɔrh ǹdə́ nə̀-nyɛ̀lsɛ gu ába, ń gə́ nə́ ń wə̀l ába bə̀: ‹Cinu nə́ Yi rí mà n zwẽ nə́ba Ashəri pyɔ̌ mɔ́ jɔ̃̀ w zhə̀nà›? ¹² È də̀ ńmyɛ̌, Ezəcaasɛ ń ce Cinu vwə̃̀ né zwə́l jààsɛ́ ǹdə́ ń vwĩ̀-jùúlí jé tɛ̃́, n zɛ̃̀ n pə nyí Zhəda ǹdə́ Zhərəzalɛm lyì bí ni bə̀ bə̀ wùlì tɛ̃́ vwĩ̀-jùlú òdù sásá yé né, sə bə̀ bə̀ ãsã́ myǐn ji jàà dõ w ǹdə́ è gə də̀ òmyɛ́ dúdú yó nà? ¹³ Á nə yə̀l kɔn tɛ̀bɛ́ àmyɛ́ ǹd'â nàmbala bɛ́ wɛ̀rhɛ́ lũ w dwə́ né gakó ne mó nà? Lũ w dwə́ né dwã bɛ́ yə né nə ŋwɛ̀nɛ́ nə zwẽ nə̀ tənèsé à jɔ̃̀ w zhə̀nà? ¹⁴ Yi tɛ̌ rə̀ yàl nɛ́ dwə́ né nyɛ̀bɛ́ à nàmbala bɛ́ cɔ̀ lyə́m lyə́m mó yə né wẽ́, rə̀ ŋwɛ̀nɛ́ rə zwẽ rə̀ dwí rí àmyɛ́ jɔ̃̀ wa, sə ámyɛ̌ Yi rí m'a m'e ŋwɛ̀nɛ́ rə zwẽ ába à jɔ̃̀ wa? ¹⁵ Èlǎsɛ̃́, Ezəcaasɛ bə̀ká n gõ̀ kɔma n pə ába n mə n jə́jɛ̀nɛ́ ába èta yé! Bə̀-na ń zɔ̀mà nɛ́ zwẽ yé, bə̀ dwí rə̀dù ga myɛ ráá tənà èdù ga myɛ yi rí wàr rə̀ m'a zwẽ rə̀ dwí rí àmyɛ́ ǹd'â nàmbala bɛ́ jɔ̃̀ w yé. Rə̀myɛ́ ce, ámyɛ yə né myɛ wàr rə̀ m'a zwẽ ába à jɔ̃̀ w yé!» ¹⁶ 16 Shənəkəriibi tùntùnnə bé j'a gwẽ̌ zhílí Cinu Yi ǹdə́ ń tùntùnnə Ezəcaasɛ tùùrhí ni èta gaga. ¹⁷ Shənəkəriibi yà ń kɛ̃ sɛ́bɛ́ ń mə́ ń tùrh Cinu, Esərayɛl Yi rí. Ń yà ń kɛ̃ sɛ́bɛ́ rɛ́ wẽ́ n wɔ̀: «Ezəcaasɛ myɛ Yi rí t'â la ŋwɔ̀nɔ́ rə zwẽ rə̀ dwí rí à jɔ̃̀ w ǹdə lũ w dwə́ né yə né myɛ gə́ yə̀ ŋwɛ̀nɛ́ nə zwẽ nə̀ lyì bí à jɔ̃̀ w nɛ́ mɔ́ ta.» ¹⁸ Shənəkəriibi tùntùnnə bé y'à j'â n'ê bya dɛ̃̌dɛ̃̌ Zhəda lyì bí zɔ̀mà nɛ́ wẽ́, bə̀ ce Zhərəzalɛm lyì bí bə̀ y'à wɔ byíl-fwɛ̀lɛ̀ y yó mó ne, mùnì ga bə ce ywẽ bə̀ wẽ́ sə bə̀ wun ní zɛ̃̀ nə̀ n'ê zhizhirhi, sə bə̀myɛ́ zɛ̃̀ bə ŋwɛ̀nɛ́ bə zwẽ cɔ wá. ¹⁹ Bə̀ y'à n'ê zɔ̀m Zhərəzalɛm Yi rí shò kwã ǹdə bə̀ gə́ y'à n'ê zɔ̀m lũ dwə́ né yə né numbyínsí wɛ̀rhɛ́ ǹdə́ sə̀ jɛ̀rh mɔ́ shò kwã nɛ́ mɔ́ ta. ²⁰ Pyɔ̌ Ezəcaasɛ ǹdə́ nyì-zwennə Ezəyi, Amɔ̃ byǐ mú, lwə̀l Yi rə̀myɛ́ mɔ́ yilə, bə byẽ̀ bə ce dɛ̃̌-yi wə. ²¹ Cinu zɛ̃̀ n twĩ̀ màlɛ́ka Ashəri pyɔ̌ mɔ́ lyì bí zulə́ jàà y wa, e gu búlə́ kàndar rɛ́ gakó ǹdə́ shə̀dɛ́ɛ́sɛ́ yó-cìnə́ bé gakó e súlí lyì-fwààlɛ́ gakó. Ashəri pyɔ̌ mɔ́ kwɛ̃̀ n vò ń cɔ w w ǹdə́ cìzhìl nánfɔ̀lɔ̀, sə ń gə́ yú n zù ń yi rí jì y wə, ń cìcì byǎ bɛ́ j'a gu mu ǹdə́ búlə́ shù. ²² Èta Cinu já n zwẽ Ezəcaasɛ ǹdə́ Zhərəzalɛm lyì bí Ashəri pyɔ̌ Shənəkəriibi ǹdə́ bə̀ zwə̀ bé gakó jɔ̃̀ wa, n zɛ̃̀ n ce bə jòm yə̀-zùlə́ wẽ́ kɔn gə́ y'à kə́kɛ́lɛ́ bɛ mɔ́ nyí rí gakó wẽ́. ²³ Lyì nánzhəzhɔ̌ y'à n'ê zal vwĩ̀ pansɛ bə̀ twí bə̀ pɛ Cinu ni, ǹdə́ pansɛ dwã bə̀ twí bə̀ pɛ Zhəda pyɔ̌ Ezəcaasɛ nɛ Zhərəzalɛm nɛ́. Sə kɔn gə́ y'à zhì rə̀myɛ́ mɔ́ yi ní mú ga, dwə́ né gakó y'à j'â n'ê nyàm pyɔ̌ Ezəcaasɛ dɛ̃́dɛ̃́. ²⁴ Yi rí rə̀myɛ́ mɔ́ wẽ́, Ezəcaasɛ tú n bə̀ n tu címí sə ń yà ń dǎl námpɔ́lɛ́ sə n cì; ń byẽ̀ n ce Cinu ni, sə Cinu lyár mɔ n súlí n pɔ̃ myɔrhɔ kɔ̀bɔ́ ò n'ô byili bə̀ ń mà n wárh. ²⁵ Sə Ezəcaasɛ yàl yə̀l-cɛ̀nɛ́ cə́bal ǹdə́ Cinu; ń cìn-dɛ̃̌-zhõ̌ mó ce Cinu lyim j'a zɛ̃̀ rə̀ n'ê yì ńmyɛ̌ ǹdə́ Zhəda e súlí Zhərəzalɛm. ²⁶ Sə ǹdə́ ń yà ń zhe cìn-dɛ̃̌-zhõ̌ yírh w ga, Ezəcaasɛ tú n lwəl ń cìn tɛ̃́, ńmyɛ̌ ǹdə́ Zhərəzalɛm lyì bí ga, sə rə̀myɛ́ mɔ́ ce Cinu Yi yə̀ ń lyi-shùùrí bə̀ yó w lwé ń nyǔ mú yi ní yé. ²⁷ Ezəcaasɛ nɔ nə̀cɛ̀ndɛ rə̀ y'à búl rə̀ já dɛ̃́dɛ̃́ e súlí zùwə́ nánfɔ̀lɔ̀. Ń lù jààsɛ n cĩ́ sə̀byì-kùlì ǹdə́ sánə́má ǹdə́ nə́kulə nyɛ̀bɛ́ nə̀ càn ǹdə́ nǔrh sə̀ lwẽ́ nã́nyə̀nyɛ̀lɛ́ ǹdə́ swə́ e súlí wẽ̀ tɛ̀bɛ́ rə̀ y'à càn dwí gakó cṹ jààsɛ ń cìcì yilə. ²⁸ N súlí n lù bə̀lɛ́ ǹdə́ də̀vɛ̃́ e súlí nwə̃̌ cṹ jààsɛ, n súlí n lù jìrh ǹdə́ jilə vwàmá dwí gakó yilə. ²⁹ N ce bə lù cɛmɛ bə pɔ̃, n zɛ̃̀ n pyà və̌-ywàálɛ ǹdə́ vwàmá nánfwààlɛ nə̀ y'à búl nə̀ já, bə̀ Yi y'à pɔ mɔ nə̀cɛ̀ndɛ nánzhəzhɔ̌. ³⁰ Wɔ́ ńmyɛ̌ Ezəcaasɛ ń shĩ Gəyɔ̃ nàná bɛ́ dɛ̃̌ sõ jàà y bə̀ y'à n'ê tó mó, n zɛ̃̀ n ce bə̀ n'ê tó tɛ̃́ sõ Dəvyidi Pyə̀-cɔ w yi-zùr sõ mó. Ezəcaasɛ kɔn rɛ́ tɛ̀bɛ́ gakó ń wɛ̀rhɛ́ mɔ́ zwẽ nyí. ³¹ Rə̀myɛ́ ce, Babyəlɔnɛ lyì-fwààlɛ́ gə́ tú rə̀ la bwə̌rh rə sú màmyɔ w ò wɛ̀rhɛ́ ń cɔ w mɔ́ kùr yi ní, Yi yẽ̌ mo rə̀ la m'e zhẽ̀ mo rə̀ lwar kɔn dɛ̀bɛ́ gakó rə̀ wɔ ń wu w wẽ́ mó. ³² Ezəcaasɛ tumə né dwã bɛ́ ǹdə́ ń nyɔ̀mɔ̀ tumə né kɛ̃ kɔn dɛ̀bɛ́ nyì-zwennə Ezəyi, Amɔ̃ byǐ mú nɔ mɔ́ sɛ́bɛ́ rɛ́ e súlí Zhəda ǹdə́ Esərayɛl pyǎ bɛ́ sɛ́bɛ́ rɛ́ wẽ́. ³³ Ezəcaasɛ tú n bə̀ n cì, sə bə̀ co mo sə-jìlə́ y è la Dəvyidi byǎ bɛ́ lú-bɔ̀là bɛ́ yó mó nyí ni. Ń cu mú yi ní, Zhəda púlə́púlə́ e súlí Zhərəzalɛm lyì bí pɔ mɔ còrhó. Ń byǐ Manasɛ jǐrh pyɔ̌, ń jàà wa.