¹ 1 Címsí gə́ j'a bə̀ sə zhɛ̀ kwã nɛ́, Esərayɛl lyì byǎ bɛ́ byɛ̀bɛ́ gakó bə̀ y'à ŋwɛ́nɛ́ gàà mɔ́ zhǐr bə vò Zhəda cɛmɛ nɛ́ wẽ́, bə mà nə́kulə né nyɛ̀bɛ́ bə̀ y'à cìì tɛ̃́ mɔ́ bə lo, bə gõ̀ Ashəra pálá nɛ́, bə wǔr vwə̃̀ né zwə́l jààsɛ́ ǹdə́ vwĩ̀-jùúlí, kɔn m'e yí rə jé tɛ̃́ Zhəda púlə́púlə́ né ǹdə́ Bɛ̃zhamɛ ǹdə́ Efərəyim e súlí Manasɛ kwálsɛ́ wẽ́. Rə̀myɛ́ kwã, lò gakó ká n kwɛ̃̀ n vò jè, ń cɔ w wa. ² Ezəcaasɛ kə́ n cĩ́ vwĩ̀-zwə́lnə bé ǹdə́ Levyi dwí rí lyì bí kùkùlə̀ né; n zɛ̃̀ súlí n pə lò gakó ne ń tum rí ń kùkùl ré wẽ́; n pə vwə̃̀ námpúmə́ cɛ̃́ɛ̃́ nɛ́ ǹdə́ yə̀-zùlə́ vwə̃̀ né zwə́l mó ǹdə́ Yi jì y tumə né, e súlí Yi nə̀bán-co mó ǹdə́ Yi còrhó w vwĩ̀-zwə́lnə bé ǹdə́ Levyi dwí rí lyì bí ni, Cinu zulə́ jàà y étwí-ènyə́ né ne. ³ Pyɔ̌ mɔ́ yà ń nə́ ń vùr cəl, kɔn rɛ́ tɛ̀bɛ́ ń yà ń nə́ ń nɛ mɔ́ wẽ́, ń pɛ nəkɔkɔ́lɛ́ ǹdə́ də̀dɛ̀nɛ́ vwə̃̀ námpúmə́ cɛ̃́ɛ̃́ nɛ́ ǹdə́ shìrhə́ dwã nɛ́ nyǎn rɛ́ e súlí càn-dǔlsí ǹdə́ címsí nyǎn rɛ́ yilə, ǹdə rə̀ gə́ kɛ̃ Cinu nyə́ né wẽ́ né. ⁴ N zɛ̃̀ n wɔ̀ Zhərəzalɛm lyì bí gakó ne bə̀ bə̀ pə vwĩ̀-zwə́lnə bé ǹdə́ Levyi dwí rí lyì bí ni bə̀ cəl ré, mùnì ga bə̀myɛ ŋwɛ̀nɛ́ bə tó Cinu nyə́ né ne bə̀ tumə né wẽ́. ⁵ Bə̀ gə́ ce bə lwar nyí rí rə̀myɛ́ mɔ́ kwã nɛ́, Esərayɛl lyì byǎ bɛ́ j'a búl bə zə bə̀lɛ́ y ǹdə́ də̀vɛ̃́ y ǹdə́ nwə̃̌ y ǹdə́ tùr rí e súlí bə̀ cɛsɛ́ wẽ̀ dwã byǎ nã́yə́ə́ bé nánzhəzhɔ̌ bə m'e bà; bə zə kɔn gakó kùr rə̀dù rə̀ kùrə́ shí y yó w bə m'e bà. ⁶ Sə Esərayɛl ǹdə́ Zhəda lyì bí bə̀ y'à wɔ Zhəda cɛmɛ nɛ́ w mɔ́ myɛ zɔ vwàmá nánfwààlɛ́ ǹdə́ və̌-ywàálɛ́ e súlí pansɛ́ shɛ̀bɛ́ bə̀ pɔ Cinu bə̀ Yi rí ni mú kùr rə̀dù nə̀ kùrə́ shí y yó w bə m'e bà; bə ló re dwã yó púlə́ nánzhəzhɔ̌. ⁷ Bə̀ ju kùr bə̀ n'ê cĩ́ púlə́ né byin rí cànsɛ̀ sə̀tɔ̀ nyǎ y wẽ́, sə bə̀ cĩ́ ni bə zhɛ̀ cànsɛ̀ shàlpyɛ̀ nyǎ y wẽ́. ⁸ Ezəcaasɛ ǹdə́ lyì-fwààlɛ́ gə́ tú bə b'e nə wẽ̀ ré púlə́ né nə̀myɛ́ mɔ́, bə̀ co Cinu ǹdə́ ń dwí Esərayɛl lyì byǎ bɛ́ nə̀báná. ⁹ Ezəcaasɛ bwə̀rh vwĩ̀-zwə́lnə bé ǹdə́ Levyi dwí rí lyì bí pansɛ́ púlə́ né nə̀myɛ́ mɔ́ shò kwã nɛ́. ¹⁰ Sə vwĩ̀-zwə́lnə náncɛ Azarəya, Sadɔɔkɛ jì y lò mó, lyár mɔ n wɔ̀: «Bə̀ gə́ j'a ji kùr bə̀ n'ê zal kɔn rɛ́ tɛ̀bɛ́ bə̀ n'ê vùr wẽ̀ ré yó w bə̀ pɛ, bə̀ m'ê twí Cinu jì y w ga mɔ́, nə́ búl nə́ n'é jí nə́ swí, e jà rə̀ búl rə̀ gwẽ̌ n'ê dàl nánzhəzhɔ̌, bə̀ Cinu cĩ́ bwəl ń dwí rí yó. Wɔ́ tɛ̀bɛ́ rə̀ gwẽ̌ dàl mɔ́ rə̀ pyě púl púl èta mɔ́.» ¹¹ Ezəcaasɛ pə nyí bə̀ bə̀ tɛnɛ wẽ̀ cṹ jààsɛ Cinu jì y wə, bə j'a tɛnɛ sɛ. ¹² Bə̀ y'à j'â n'ê zal kɔn rɛ́ tɛ̀bɛ́ bə̀ y'à n'ê vùr wẽ̀ ré yó w bə̀ pɛ mɔ́, ǹdə́ tɛ̀bɛ́ bə̀ y'à n'ê pɛ kùr rə̀dù kùrə̀ shí gakó yó mó, e súlí pansɛ́ shɛ̀bɛ́ bə̀ y'à pɔ Yi ni mú bə̀ n'ê twí bə̀ ce né. Bə ce Kɔnanya, Levyi dwí rí lò, nə́ ń nyǐ rə̀ yò, ńmyɛ̌ ǹdə́ ń da-byǐ Shəmeyi, ń wɔ́ lò mɔ̀bɔ́ ń yà ń pú mú. ¹³ Pyɔ̌ Ezəcaasɛ ǹdə́ vwĩ̀-zwə́lnə náncɛ Azarəya, ń yà ń nə́ ń nyǐ Cinu jì y yò mó, kwè nyí bə ce Kɔnanya ǹdə́ ń da-byǐ Shəmeyi cìní yìlnə bé byɛ̀bɛ́: Yəəyɛl ǹdə́ Azazha ǹdə́ Naatɛ ǹdə́ Asayəə ǹdə́ Yərəmɔɔtɛ ǹdə́ Yɔzabaadɛ ǹdə́ Elyɛl ǹdə́ Yəsəmakəya ǹdə́ Maatɛ e súlí Bənaya. ¹⁴ Levyi dwí rí lò Kore, Yəməna byǐ mú, ń yà ń nə́ ń dɛ̃̀ yi-púrhí sõ bwə̀rə̀ y mó, yà ń nə́ ń nyǐ pansɛ́ shɛ̀bɛ́ bə̀ pɔ Yi ni mú yò. Ń yà ń nə́ ń tə̀l kɔn dɛ̀bɛ́ bə̀ y'à vùr Cinu yil mú, e súlí kɔn dɛ̀bɛ́ rə̀ y'à wɔ́ Yi dúdú nyǎn mɔ́. ¹⁵ Ńmyɛ̌ ń yà ń já ń cǐ Edɛn ǹdə́ Myənyəmyin ǹdə́ Yəshuwə ǹdə́ Shəmaya ǹdə́ Amarəya e súlí Shəkanya vwĩ̀-zwə́lnə bé cɛmɛ nɛ́ wa; Lyì bí bə̀myɛ́ mɔ́ bə̀ y'à mə̌ sə bə nyǐ kùjú w tə́l ǹdə́ bə̀ da-byǎ bɛ́ ǹdə́ bə̀ náncɛrh e súlí bə̀ bə̀sɔ́ná ga nɛ, kɔn tó dwã ǹdə́ bə̀ tumə né kùkùlə̀ né. ¹⁶ Bə̀ y'à n'ê pɛ cələ lyì bí byɛ̀bɛ́ bə̀ y'à kɛ̃ bə̀ yilə né mó ne, ǹdə́ bala-byǎ bɛ́ byɛ̀bɛ́ bə̀ y'à zhe byinə nə̀tɔ̀ è m'ê la mɔ́ nɛ. Lyì bí byɛ̀bɛ́ gakó bə̀ y'à n'ê twí Cinu jì y w mú myɛ y'à n'ê nɛ kɔn dɛ̃ gakó tum rí bə̀ y'à n'ê twĩ̀ bə̀ kùkùlə̀ né wẽ́ mó yilə. ¹⁷ Bə̀ y'à n'ê kɛ̃ vwĩ̀-zwə́lnə bé kɔn tó bə̀ dabá jìsí ni, bə zɛ̃̀ bə̀ n'ê kɛ̃ Levyi dwí rí lyì bí, kɔn zhì byinə shí-èlyè cìnə́ e m'e vò, kɔn tó dwã ǹdə́ bə̀ tumə né bə̀ n'ê twĩ̀ mú e súlí ǹdə́ bə̀ kùkùlə̀ né ne. ¹⁸ Bə̀ y'à n'ê kɛ̃ bə̀ kɛ̀lɛ́ y lyì bí gakó yilə né: kana bɛ́ ǹdə́ bala-byǎ ǹdə́ kana-byǎ ga; bə̀ y'à n'ê kɛ̃ lyì bí byɛ̀bɛ́ gakó bə̀ y'à ŋwɛ́nɛ́ dwã yó mó yilə né, bə̀myɛ́ wúrí bə̀ y'à n'ê ŋwɛ̀nɛ́ bə̀ tɛnɛ bə̀ cìn Cinu yilə, ǹdə́ wu-põ̀ twéé twéé. ¹⁹ È gə wɔ́ vwĩ̀-zwə́lnə bé byɛ̀bɛ́ bə̀ wɔ́ Aarɔ̃ byǎ bə̀ y'à wɔ gɔ sõ, vwĩ̀-zwə́lnə bé cɛmɛ nɛ́ yala nɛ mɔ́ yilə, bə̀ y'à vùr lyì cɔ gakó wẽ́ bə̀ la bɛ bə̀ cəl pɔ, bə̀myɛ́ ǹdə́ Levyi dwí rí lyì bí byɛ̀bɛ́ bə̀ y'à kɛ̃ bə̀ yilə né mó. ²⁰ Ezəcaasɛ wɛ̀rhɛ́ èta Zhəda púlə́púlə́ wə, sə ń wɛ̀rhɛ́ kɔn rɛ́ tɛ̀bɛ́ rə̀ càn, rə̀ wɔ́ cángá rə̀ súlí rə̀ wɔ́ wu-põ̀ tum Cinu, ń Yi rí yírh wə. ²¹ Ń pyà Yi ǹdə́ ń wu gakó kɔn rɛ́ tɛ̀bɛ́ gakó ń wɛ̀rhɛ́ Cinu jì y tum rí, ǹdə́ Cinu nyə́ né nyɔ̀mɔ̀ yil mú wẽ́, sə ń tum rí zwẽ nyí.