¹ Pyɔ̌ Ezəcaasɛ byẽ̀ Esərayɛl lyì byǎ bɛ́ púlə́púlə́ ǹdə́ Zhəda lyì bí, n súlí n kɛ̃ sábá n pə Efərəyim ǹdə́ Manasɛ kwálsɛ́ lyì bí ni, bə̀ bə̀ bə̀ Cinu jì y w Zhərəzalɛm nɛ́ bə jí Cinu, Esərayɛl Yi rí Pakɛ címsí. ² Pyɔ̌ mɔ́ ǹdə́ ń lyì-fwààlɛ́ e súlí Zhərəzalɛm lyì bí byɛ̀bɛ́ bə̀ y'à tú dwã yó mó zhərh ǹdə́ dwã, bə zɛ̃̀ bə kwè nyí bə̀ Pakɛ címsí sə̀myɛ́ mɔ́ m'a jí byin rí cànsɛ̀ sə̀lyè nyǎ y wa. ³ Bə̀ y'à yə̀ ŋwɛ̀nɛ́ bə jí si sə̀ yi-dǒ w yé, bə̀ vwĩ̀-zwə́lnə bé y'à yə̀ bə̀ cìn tɛnɛ Cinu yilə, bə̀ yó w ji ní yé, e súlí myɛ dwí rí y'à yə̀ dwã yó twí Zhərəzalɛm nɛ́ yé. ⁴ Pyɔ̌ mɔ́ ǹdə́ lyì bí byɛ̀bɛ́ bə̀ y'à tú dwã yó mó gakó swéné nyí rə̀myɛ́ mɔ́, ⁵ bə zɛ̃̀ bə ce sábá yí Esərayɛl púlə́púlə́, kɔn zhì Bɛɛr-Shəba e m'e yí Dan, bə m'ê byẽ̀ lyì bí bə̀ bə̀ bə̀ Zhərəzalɛm Cinu Pakɛ címsí jú bə̀ la m'e pyìrh nyí rí yilə, bə̀ lyì bí byɛ̀bɛ́ bə̀ y'à jú Pakɛ címsí ǹdə kɔn gə́ kɛ̃ nɛ́ mɔ́ y'à bə já yé. ⁶ Tùntúmə́ bé lyɛ̃ ǹdə́ sábá nɛ́ pyɔ̌ mɔ́ ǹdə́ ń lyì-fwààlɛ́ kɛ̃ mɔ́ bə vò Esərayɛl ǹdə́ Zhəda tənèsé púlə́púlə́ wə, bə vò bə cĩ́ pyɔ̌ mɔ́ nyí rí ń yà ń pɔ n wɔ̀ mɔ́: «Esərayɛl byǎ, kwɛ̃̀-na á bə̀ Cinu, Abəraam ǹdə́ Yəzakɛ ǹdə́ Zhakɔɔbɛ Yi rí sõ, bə̀ ń mà n kwɛ̃̀ n bə̀ á sõ, ámyɛ̌ byɛ̀bɛ́ á lú Ashəri pyǎ bɛ́ jɔ̃̀ w á gwẽ̌ wɔ́ nã́nyìrh mú. ⁷ Á bə̀k'á yə̀ ǹdə á dabá e súlí á da-byǎ bɛ́ bə̀ yə̀ bə̀ nà yó zhì ǹdə́ Cinu, bə̀ nàmbala bɛ́ Yi rí mú ta yé; Yi ce bə̀ yò cɔ̀, ǹdə á gə́ nə nɛ́ zà mɔ́. ⁸ Èlǎsɛ̃́, á bə̀k'á twĩ̀ yó-kùùlì ǹdə á dabá ta yé. Shɛ̀nɛ́-na Cinu nyí ni, kwɛ̃̀-na á bə̀ ń jì y ń ce è wɔ́ ńmyɛ̌ nyǎ twéé twéé yil mú wẽ́, sə á twĩ̀ á pə Cinu á Yi rí ni mùnì ga ń lyim k'ê bə̀ ába yì yé, ráá n pə́ ń lyi-shùùrí rə̀ b'ǎ yó w ló yé. ⁹ Zhə̀n ga, á gə kwɛ̃̀ á tú Cinu sõ, lyì bí byɛ̀bɛ́ bə̀ pwà á da-byǎ bɛ́ ǹd'á byǎ bɛ́, bə m'e vò yómə́-jè mó m'a dùr bə̀ nɔ̀nɔ̀, bə yẽ̌ be bə kwɛ̃̀ bə bə̀ tənà y kɛ̀bɛ́ wẽ́. Bə̀ Cinu, á Yi rí wɔ́ wu-bɔ̀nɔ̀ ǹdə́ nɔ̀nɔ̀-dǔr cə́bal, sə ń kə́ ń tá ń la ń yé pyùrhú n ce kwã, á gə kwɛ̃̀ á tú ń sõ yi ní yé.» ¹⁰ Tùntúmə́ bé tó Efərəyim ǹdə́ Manasɛ tənèsé cɔ cɔ gakó, bə lyɛ̃ bə yí Zabyəlɔ̃ tənà y wa, sə lyì bí y'à n'ê mɔ̀n bɛ, bə̀ n'ê fulsi bi. ¹¹ Sə Asɛɛrɛ ǹdə́ Manasɛ e súlí Zabyəlɔ̃ lyì bí jàlà lwəl bə̀ cìn tɛ̃́ bə lwar bə̀ bə̀ dówə́, bə zɛ̃̀ bə bə̀ Zhərəzalɛm. ¹² Zhəda né myɛ Yi ce lyì bí nánzhəzhɔ̌ shɛ̀nɛ́ bə̀ bə̀ m'a wɛ̀rhɛ́ kɔn rɛ́ tɛ̀bɛ́ ńmyɛ̌ Cinu ce pyɔ̌ mɔ́ ǹdə́ ń lyì-fwààlɛ́ pə rə̀ nyí mú. ¹³ Lyì nánzhəzhɔ̌ bə̀ dwã yó Zhərəzalɛm nɛ́ búúrí rə̀ yə̀ sã̀-nə̀byẽ̌ ce mó címsí jú yilə, byin rí cànsɛ̀ sə̀lyè nyǎ y wẽ́: è búl e yə̀ lyì-zhǎ nánjə̀jóló bə̀ y'à tú dwã yó. ¹⁴ Bə̀ j'a zɛ̃̀ bə̀ n'ê wǔr vwĩ̀-jùúlí tɛ̀bɛ́ rə̀ y'à ŋwɛ́nɛ́ Zhərəzalɛm nɛ́ mɔ́, e súlí ãsã́ vwĩ̀-jùúlí, bə zɛ̃̀ bə pwà rɛ bə ló Sədərɔ̃ nə̀-gɔ̀lɔ̀ w wa. ¹⁵ Bə̀ zwə́l Pakɛ címsí vwàmá nɛ́ cànsɛ̀ sə̀lyè nyǎ y dwã shí ǹdə́ nə̀na dɛ̃ rɛ́ yù wə. Cìzhìl zɔ vwĩ̀-zwə́lnə bé ǹdə́ Levyi dwí rí lyì bí, bə zɛ̃̀ bə tɛnɛ bə̀ cìn Cinu yilə, mùnì ga bə súlí bə zə vwə̃̀ námpúmə́ cɛ̃́ɛ̃́ nɛ́ bə m'e bə̀ Cinu jì y wə. ¹⁶ Bə̀ y'à zhǐ bə̀ tum rí jààsɛ́ wa, ǹdə bə̀ nyə́ né gə́ y'à n'ê byili ní, rə tó Yi lò Muyiisi nyə́ né ne: vwĩ̀-zwə́lnə bé y'à n'ê zwẽ vwàmá nɛ́ jál mɔ́ Levyi dwí rí lyì bí jɔ̃̀ w bə̀ lwé vwĩ̀-jùlú w yó. ¹⁷ Lyì bí byɛ̀bɛ́ bə̀ y'à tú dwã yó mó nánzhəzhɔ̌ gə́ y'à yə̀ bə̀ cìn tɛnɛ Cinu yil mú ce, Levyi dwí rí lyì bí j'a zɛ̃̀ bə̀ n'ê nyǐ Pakɛ címsí vwàmá nɛ́ zwə́l mó yò, lyì bí byɛ̀bɛ́ bə̀ y'à yə̀ bə̀ cìn tɛnɛ Cinu yil sə bə m'e twĩ̀ tum ń yil mú jàà wa. ¹⁸ Lyì nánzhəzhɔ̌, kɔn du Efərəyim ǹdə́ Manasɛ ǹdə́ Yəsakaarɛ e súlí Zabyəlɔ̃ kwálsɛ́ lyì bí y'à yə̀ bə̀ cìn tɛnɛ Cinu yil bə jǐrh wárhgáá yé, sə ǹdə́ rə̀myɛ́ mɔ́ ga, bə̀ jú Pakɛ címsí sə kɔn yə̀ tɛ̀bɛ́ rə̀ kɛ̃ mɔ́ nɛ tó yé. Sə Ezəcaasɛ zɔ Yi cã̌ nɛ bə̀ yil ń mə́ ń wə̀lə̀: «Bə̀ Cinu mú mɔ̀bɔ́ ń wɔ́ wu-bɔ̀nɔ̀ cə́bal mɔ́ pə sǔbri ¹⁹ lyì bí byɛ̀bɛ́ gakó bə̀ n'ê pyà Yi, Cinu, bə̀ nàmbala bɛ́ Yi rí mú ni, má bə̀ yə̀ bə̀ cìn tɛnɛ Cinu yilə, ǹdə kɔn gə́ y'à mǎ nɛ́ mɔ́, wẽ̀ tɛ̀bɛ́ rə̀ wɔ́ Yi nyǎn mɔ́ yilə!» ²⁰ Cinu Yi zwẽ Ezəcaasɛ lwə̌l mó, ń yə̀ còrhò-tum pɛ dwí rí ni yé. ²¹ Esərayɛl lyì byǎ bɛ́ bə̀ y'à ŋwɛ́nɛ́ Zhərəzalɛm nɛ́ mɔ́ jí búúrí rə̀ yə̀ sã̀-nə̀byẽ̌ ce mó címsí dwã nyàlpyɛ̀ ǹdə́ wu-nyɔ̃̀ nánfɔ̀lɔ̀. Levyi dwí rí lyì bí ǹdə́ vwĩ̀-zwə́lnə bé y'à n'ê cèrhé Cinu Yi dɛ̃ gakó ǹdə́ bə̀ jàn gakó ǹdə́ wə̀-dúúri rə̀ cələ y'à búl nə̀ n'ê dwi, Cinu yilə. ²² Ezəcaasɛ zɔ̀mà nɛ́ dwə̀rh Levyi dwí rí lyì bí gakó bə̀ y'à só Cinu Yi yò mó wun ni, bə zɛ̃̀ bə zhílí címsí dwã nyàlpyɛ̀, bə̀ y'à n'ê zwə́l yə̀-zùlə́ vwə̃̀, bə súlí bə̀ n'ê ce Cinu, bə̀ nàmbala bɛ́ Yi rí nə̀báná. ²³ Rə̀myɛ́ kwã nɛ́, lyì bí byɛ̀bɛ́ bə̀ y'à tú dwã yó mó zhərh ǹdə́ dwã bə zɛ̃̀ bə kwè nyí bə̀ bə̀ m'a zhílí címsí dwã nyàlpyɛ̀ dwã kə́dò, sə bə̀ k'e jí si dwã nyàlpyɛ̀ kə́dò wu-nyɔ̃̀ wẽ́. ²⁴ Zhəda pyɔ̌ Ezəcaasɛ yà ń pɔ nə̀-byərh mɔ̀rhɔ̀ (1 000) ǹdə́ və̌-ywàálɛ mɔ̀ɔ̀rhɛ̀ tàlpyɛ̀ (7 000) lyì bí byɛ̀bɛ́ bə̀ y'à tú dwã yó mó ne, sə pyɔ̌ mɔ́ lyì-fwààlɛ́ y'à pɔ bɛ nə̀-byərh mɔ̀rhɔ̀ (1 000) ǹdə́ və̌-ywàálɛ mɔ̀ɔ̀rhɛ̀ shíyə́ (10 000). Vwĩ̀-zwə́lnə nánjə̀jóló y'à tɛnɛ bə̀ cìn Cinu yilə. ²⁵ Zhəda lyì bí byɛ̀bɛ́ bə̀ y'à tú dwã yó mó gakó wun zɔ nyàn, bə̀myɛ́ ǹdə́ vwĩ̀-zwə́lnə bé ǹdə́ Levyi dwí rí lyì bí e súlí lyì bí byɛ̀bɛ́ bə̀ y'à shí Esərayɛl bə̀ bə̀ dwã yó mó, byɛ̀bɛ́ bə̀ shí Esərayɛl tənà y w bə bə̀ bə̀ jě Zhəda né mó. ²⁶ Wu-nyɔ̃̀ nánfɔ̀lɔ̀ zɔ Zhərəzalɛm, bə̀ kɔn zhì Dəvyidi, Esərayɛl pyɔ̌ mɔ́, byǐ Saləmɔ yi ní ga rə̀myɛ́ mɔ́ dwí rí gwẽ̌ yə̀ nɛ Esərayɛl nɛ́ gaga yé. ²⁷ Rə̀myɛ́ kwã nɛ́, vwĩ̀-zwə́lnə bé byɛ̀bɛ́ bə̀ wɔ́ Levyi dwí rí lyì mú zɛ̃̀ bə cĩ́ bwəl dwí rí yó: bə nyɛ̀ɛ̀ bə̀ cəl ré, sə bə̀ co w yú dɛ̃̌-yi wə, Yi rí rə̀ bə dõ zhe mó dǒ sõ.