¹ Ezəcaasɛ jǐrh pyɔ̌ ǹdə́ ń yà ń zhe byinə shí-èlyè ǹdə́ nə̀nu; sə ń jòm Zhərəzalɛm nɛ́ n mə n jí pyɛ̀lɛ̀ rɛ́, byinə shí-èlyè ǹdə́ nə̀bɔ́. Ń ná mɔ́ yà ń wɔ́ Zakarɛ bə̀kɔ́, ń yà ń yíl Abyi. ² Ń wɛ̀rhɛ́ kɔn rɛ́ tɛ̀bɛ́ rə̀ wɔ́ cángá Cinu yírh wə, ǹdə Dəvyidi ń nàmbal mɔ́ ta, ń kɔn gakó wẽ́. ³ Ń pyɛ̀lɛ̀ rɛ́ jú byin nã́yéé ré cìcì, rə̀ cànà nã́yéé yə́, ń pul Cinu jì y bwə̀ə̀lé, n súlí n kwɛrhɛ rɛ. ⁴ N byẽ̀ vwĩ̀-zwə́lnə bé ǹdə́ Levyi dwí rí lyì bí bə bà, n zɛ̃̀ n cĩ́ bi dwã yó yi-púrhí sõ dwã-gùlú jàà y wa, ⁵ n wɔ̀ bɛ: «Cili-nə, Levyi dwí rí lyì! Èlǎsɛ̃́, tɛnɛ-na á cìn Cinu yiləa, sə á tɛnɛ Cinu, á nambala bɛ́ Yi rí jì yə́, e yə̀ ńmyɛ̌ nyǎ. Vǔr-nə jìmdi dwí gakó Yi jì y wə. ⁶ Nə́ nambala bɛ́ yə̀ bə̀ nà yó zhì yé, bə zɛ̃̀ bə wɛ̀rhɛ́ kɔn rɛ́ tɛ̀bɛ́ rə̀ wɔ́ lwɛlɛ Cinu nə́ Yi rí yírh wə: bə̀ yẽ̌ mo, bə̀ pyìrhí bə̀ yə́rh bə ce kwã bə yẽ̌ ń jì y ni, bə̀ zə bə̀ kwərh bə zǎ ya; ⁷ bə̀ gaga mɔ́ sàásɛ Bwə̀r-zɔ́nɔ́ w bwə̀ə̀lé, bə cì pàntámsɛ́, bə̀ k'ê t'â ji ãsã́ y myǐn, bə súlí bə̀ k'ê t'â zwə́l vwĩ̀ námpúm cɛ̃́ɛ̃́ bə̀ pɛ Esərayɛl Yi rí ni rə̀ jì y wẽ́ yé. ⁸ Rə̀myɛ́ mɔ́ ce Cinu lyim j'a zɛ̃̀ rə̀ n'ê yì Zhəda tənà y ǹdə́ Zhərəzalɛm cɔ w dɛ̃́dɛ̃́, n ce rə jǐrh wu-zɛ̃̀ɛ̃́ nánfɔ̀lɔ̀ kɔna, tənà è pyě è la wu-zhùlù nánfɔ̀lɔ̀ wẽ́, ǹdə́ fuuli kɔna ǹdə á yírhə́ gə́ nə nɛ́. ⁹ Nyǐ bə̀ gu nə́ dabá ǹdə́ búlə́ shù, nə́ byǎ bɛ́ ǹdə́ nə́ bə̀kwá bɛ́ e súlí nə́ kana bɛ́ zɛ̃̀ bə̀ wɔ yómə́-jè né rə̀myɛ́ mɔ́ yilə. ¹⁰ Èlǎsɛ̃́, à n'â yǎl a zə dɔbrɛ ǹdə́ Cinu Esərayɛl Yi rí, mùnì ga ń lyi-shùùrí pá, rə̀ bə̀ nə́ yó w lwé yé. ¹¹ Èlǎsɛ̃́, à byǎ, bə̀-na yò w zə á m'á dədal yé, bə̀ wɔ́ ámyɛ̌ Cinu cír mùnì ga á zhì ń yé né, á twĩ̀ á pɔ̃, á yə̀ ń tùntùnnə sə á ji ãsã́ myǐn á pɔ̃.» ¹² Nyǐ Levyi dwí rí lyì bí byɛ̀bɛ́ bə̀ du bə zhì mú: Aməsəyi byǐ Maatɛ ǹdə́ Kəyaatɛ jì y lò Azarəya byǐ Zuwəə ǹdə́ Abəji byǐ Ciishi ǹdə́ Mərəri jì y lò Yəyaləlɛl byǐ Azarəya ǹdə́ Zəma byǐ Yɔwa e súlí Gɛrəshɔn jì y lò Yɔwa byǐ Edɛn; ¹³ Eləsafã jì y lyì Shiməri ǹdə́ Yəyəə ǹdə́ Asaafɛ jì y lyì Zakarɛ ǹdə́ Matanya ¹⁴ ǹdə́ Emã jì y lyì Yəəyɛl ǹdə́ Shimeyi ǹdə́ Yədutũ jì y lyì Shəmaya e súlí Uzhəə. ¹⁵ Bə cĩ́ bə̀ da-byǎ bɛ́ dwã yó, bə tɛnɛ bə̀ cìn Cinu yilə, bə zɛ̃̀ bə vùr Cinu jì y jìmdí, kɔn tó pyɔ̌ mɔ́ nyí rí ń pɔ mɔ́ ǹdə́ Cinu zɔ̀mà nɛ́ nɛ. ¹⁶ Vwĩ̀-zwə́lnə bé bə̀ bə zù Cinu jì y wẽ́, bə̀ la jìmdí vǔr è wẽ́. Bə vùr wẽ̀ ré tɛ̀bɛ́ gakó rə̀ y'à zhe jìmdi, rə̀ y'à wɔ Cinu jì y jì-ná y wẽ́ mó bə cĩ́ Cinu jì y kɔ̀nɔ́ w wẽ́. Levyi dwí rí lyì bí pwà rɛ bə m'e du cɔ w wa, bə vò bə ló kwã nɛ́, Sədərɔ̃ nə̀-gɔ̀lɔ̀ w wa. ¹⁷ Bə̀ ju jìmdi vǔr tum rí rə̀myɛ́ kùr cànà nã́yéé y dɛ̃ nã́yéé ré yù wə; cànà y èmyɛ́ mɔ́ dwã lyɛlɛ yù wə, bə̀ zù Cinu jì y Zɔ́nɔ́ w wẽ́; bə̀ vùr Cinu jì y jìmdí dwã lyɛlɛ; sə bə̀ j'a zhɛ̀ cànà nã́yéé y dwã shí ǹdə́ nyə̀ldù yù wə. ¹⁸ Bə zɛ̃̀ bə vò pyɔ̌ Ezəcaasɛ sõ bə wɔ̀ mɔ: «Nə́ vùr Cinu jì y e súlí vwə̃̀-námpúmə́ cɛ̃́ɛ̃́ nɛ́ vwĩ̀-jùlú w ǹdə́ rə̀ wẽ̀ ré gakó ǹdə́ tábəlɛ́ y bə̀ n'ê cĩ́ búrú w kɔ̀bɔ́ bə̀ pɔ Yi ni è yó mó ǹdə́ è wẽ̀ ré gakó jìmdí nə́ zhɛ̀, ¹⁹ e súlí wẽ̀ ré tɛ̀bɛ́ pyɔ̌ Akaazɛ yà ń vùr n cĩ́ kwã tumə né nyɛ̀bɛ́ ń twĩ̀, e jà ń yà ń bə sɔ́má zhe sə n twĩ̀ ni mú wẽ́, ń pyɛ̀lɛ̀ rɛ́ yi ní mú jìmdí. Nə́ k'á cĩ́ ri rə̀ jàà nɛ́, nə́ zɛ̃̀ nə́ kwè re nə́ pə Yi ni rə k'a jǐrh Yi nyǎn. Nyǐ ri tɛ̃́ Cinu vwĩ̀-jùlú w yé né.» ²⁰ 20 È zɛ̃̀ nəkɔkɔ́lɛ́ shãã shãã pyɔ̌ Ezəcaasɛ byẽ̀ cɔ w yó-cìnə́ bé dwã yó, n zɛ̃̀ n zɛ̃̀ n vò Cinu jì y wẽ́. ²¹ Bə zə nə̀-byərh shàlpyɛ̀ ǹdə́ pyì-bwərh shàlpyɛ̀ ǹdə́ pyì-bwǎlsɛ shàlpyɛ̀ e súlí bə̀-cǐlsi shàlpyɛ̀ bə m'e bə̀ sǔbri lwə̌l vwĩ̀ rí zwə́l yilə, pyɔ̌-kɛ̀lɛ́ y ǹdə́ Yi jì y e súlí Zhəda lyì bí yilə. N zɛ̃̀ n pə nyí vwĩ̀-zwə́lnə bé bə̀ wɔ́ Aarɔ̃ byǎ bɛ́ mɔ́ nɛ bə̀ bə̀ zwə́l vwàmá nɛ́ Cinu vwĩ̀-jùlú w yó. ²² Bə zwə́l nə̀-byesé; vwĩ̀-zwə́lnə bé kwɛ̃́ sə̀ jal mɔ́ bə ló vwĩ̀-jùlú w yó; bə zwə́l pyì-byesé, bə ló sə̀ jal mɔ́ vwĩ̀-jùlú w yó; bə zwə́l pyì-bwǎlsɛ́, bə ló sə̀ jal mɔ́ vwĩ̀-jùlú w yó. ²³ Bə zɛ̃̀ bə zə bə̀-cǐlsí bə̀ la zwə́l yə̀-bəlɔ̀lɔ́ w sǔbri lwə̌l yil mú, bə m'e bə̀ pyɔ̌ mɔ́ ǹdə́ lyì bí byɛ̀bɛ́ bə̀ y'à tú dwã yó mó yé né. Pyɔ̌ mɔ́ ǹdə́ lyì bí dwã bɛ́ cĩ́ jɛ̀rh sə̀ yó. ²⁴ Vwĩ̀-zwə́lnə bé zwə́l se, bə zɛ̃̀ bə ló sə̀ jal mɔ́ vwĩ̀-jùlú w yó Esərayɛl púlə́púlə́ yə̀-bəlɔ̀lɔ́ w sǔbri lwə̌l yilə, bə̀ wɔ́ Esərayɛl púlə́púlə́ yil pyɔ̌ mɔ́ yà ń pɔ vwĩ̀ námpúm cɛ̃́ɛ̃́ rɛ́ ǹdə́ yə̀-bəlɔ̀lɔ́ w sǔbri lwə̌l vwĩ̀ rí zwə́l nyí. ²⁵ Pyɔ̌ mɔ́ ce Levyi dwí rí lyì bí zù Yi jì y wẽ́, ǹdə́ sɛmbálɛbáb ǹdə́ zɔ̀n ǹdə́ bwàárɛ, bə pə bɛ jààsɛ kɔn tó Dəvyidi ǹdə́ pyɔ̌ nyì-zwennə Gaadɛ e súlí nyì-zwennə Natã nyí rí ni; bə̀ nyí rí rə̀myɛ́ y'à wɔ́ Cinu ń tó ń nyì-zwennə bé dɛnnɛ n pə rɛ. ²⁶ Levyi dwí rí lyì bí gə́ tú bə jòm bə̀ jààsɛ́ wẽ́ bə zhɛ̀ ǹdə́ bə̀ wə̀-dúúrí tɛ̀bɛ́ Dəvyidi yà ń wɛ̀rhɛ́ mɔ́, vwĩ̀-zwə́lnə bé myɛ bə̀ ǹdə́ pɔ́lsɛ́, ²⁷ Ezəcaasɛ pə nyí bə̀ bə̀ zwə́l vwĩ̀ námpúm cɛ̃́ɛ̃́ rɛ́ vwĩ̀-jùlú w yó. Sə bə̀ gə́ ju kùr bə̀ n'ê zwə́l vwĩ̀ námpúm cɛ̃́ɛ̃́ rɛ́ yi ní, bə̀ ju nwə̃́ y Cinu yilə, rə̀myɛ́ yi ní pɔ́lsɛ́ wúl e súlí Esərayɛl pyɔ̌ Dəvyidi wə̀-dúúrí myɛ dú rə̀ m'e kwɛ̃ ya. ²⁸ Lyì bí byɛ̀bɛ́ gakó bə̀ y'à tú dwã yó mó y'à lwəl tɛ̃́, nwə̃́ y nún e dɛnɛ, pɔ́lsɛ́ myɛ y'à n'ê wúlə́, kɔn m'e yí vwĩ̀ námpúm cɛ̃́ɛ̃́ rɛ́ zwə́l rə zhɛ̀. ²⁹ Vwĩ̀ rí gə́ tú rə zwə́l rə b'e zhɛ̀ yi ní, pyɔ̌ mɔ́ ǹdə́ lyì bí byɛ̀bɛ́ bə̀ y'à ŋwɛ́nɛ́ gàà mɔ́ jòm bə̀ nə̀dwə́nə́ yó bə zɛ̃̀ bə zə bə̀ yə́rh bə pú tɛ̃́. ³⁰ Rə̀myɛ́ kwã nɛ́, pyɔ̌ Ezəcaasɛ ǹdə́ yó-cìnə́ bé wɔ̀ Levyi dwí rí lyì bí ni, bə̀ bə̀ cèrhé Cinu Yi ǹdə́ Dəvyidi e súlí Asaafɛ, mɔ̀bɔ́ ń nɛ̃́ mɔ́ nwísí bə̀ wɛ̀rhɛ́ mɔ́. Levyi dwí rí lyì bí j'a búl bə nún ǹdə́ wu-nyɔ̃̀ nánfɔ̀lɔ̀, rə̀myɛ́ kwã nɛ́ bə̀ jòm bə̀ nə̀dwə́nə́ yó bə zə bə̀ yə́rh bə pú tɛ̃́. ³¹ Ezəcaasɛ kwè nyí, n wɔ̀: «Èlǎsɛ̃́, á jɛ̀sɛ́ gə́ sú pyám ǹdə́ pansɛ́ shɛ̀bɛ́ á la Cinu ni pɔ mɔ́ ce, bwəlse-nə, zə-na vwə̃̀ ǹdə́ còrhó pansɛ á m'á bə̀ Cinu jì y wə.» Lyì bí byɛ̀bɛ́ bə̀ y'à tú dwã yó mó j'a zə vwə̃̀ ǹdə́ còrhó pansɛ bə m'e bà, lyì bí byɛ̀bɛ́ gakó bə̀ y'à wɔ́ pùbùlə̀-cìnə́ mó zə vwə̃̀ námpúmə́ cɛ̃́ɛ̃́ bə m'e bà. ³² Vwə̃̀ námpúmə́ cɛ̃́ɛ̃́ nɛ́ bə̀ zɔ bə m'e bə̀ mɔ́ yàl nə̀-byərh shə́-shàlpyɛ̀ (70) ǹdə́ pyì-byərh zɔ̌m (100) ǹdə́ pyì-bwǎlsɛ zwã̌-àlyè (200), bə zwə́l nə̀ gakó bə pə Cinu Yi ni. ³³ Vwə̃̀ né dwã bɛ́ yàl vwàmá nánfwààlɛ zɔ̃̌-nyə̀ldù (600) ǹdə́ və̌-ywàálɛ mɔ̀ɔ̀rhɛ rə̀tɔ̀ (3 000). ³⁴ Sə vwĩ̀-zwə́lnə bé gə́ y'à bə já dɛ̃́dɛ̃́ vwàmá nɛ́ bə̀ zwə́l mó póm yil mú ce, bə̀ da-byǎ, Levyi dwí rí lyì bí sɛ̃ bɛ kɔn b'e yí tum rí zhɔ̌, e súlí myɛ kɔn b'e yí bə tɛnɛ bə̀ cìn Cinu yil bə zhɛ̀. Bə̀ Levyi dwí rí lyì bí yàl làlà bə tɛnɛ bə̀ cìn Cinu yil dwini vwĩ̀-zwə́lnə bé. ³⁵ Kɔn súlí myɛ, vwə̃̀ námpúmə́ cɛ̃́ɛ̃́ nɛ́ y'à búl nə̀ já dɛ̃́dɛ̃́, nə̀myɛ́ ǹdə́ yə̀-zùlə́ vwə̀ né nwǐsí e súlí vwə̃̀ námpúmə́ cɛ̃́ɛ̃́ nɛ́ də̀vɛ̃́ pansɛ́. Èta, Cinu jì y tum rí j'a k'e zhì rə̀ nà yó. ³⁶ Ezəcaasɛ ǹdə́ dwí rí púlə́púlə́ wun yàl nyàn kɔn rɛ́ tɛ̀bɛ́ Yi y'à wɛ̀rhɛ́ dwí rí yil mú yilə, bə̀ yò w j'a wɛ̀rhɛ́ làlà.