¹ Akaazɛ jǐrh pyɔ̌ ǹdə́ ń yà ń zhe byinə shí-èlyè; sə ń jòm Zhərəzalɛm nɛ́ n mə n jí pyɛ̀lɛ̀ rɛ́, byinə shí ǹdə́ nyə̀ldù. Ń yə̀ ń da Dəvyidi nà y kwè n wɛ̀rhɛ́ kɔn rɛ́ tɛ̀bɛ́ rə̀ wɔ́ cángá Cinu Yi yírh w yé. ² Ń kwɛ̃̀ n kwè Esərayɛl pyǎ bɛ́ nà, ń gaga mɔ́ yə̌l lù n mə n zùrhì yə Baalɛbá yilə. ³ Ń cìcì mú ju ãsã́ myǐn Bɛn-Yənɔm pyə̀-gɔ́rɔ́ w wa, n ji ń byǎ bɛ́ myǐna, ǹdə pwarha tumə né nyɛ̀bɛ́ gakó tənèsé shɛ̀bɛ́ Cinu zwẽ n pə Esərayɛl lyì byǎ bɛ́ nɛ mɔ́ lyì bí gə́ y'à n'ê twĩ̀ ní mú. ⁴ Ń zwə́l vwə̃̀ n súlí n ji ãsã́ myǐn vwə̃̀ né zwə́l jààsɛ́ wẽ́ ǹdə́ pyǎlsɛ́ yó ǹdə́ cǒ kɔ̀bɔ́ gakó ò púrh vɔr nánzhəzhɔ̌ mɔ́ kùr wə. ⁵ Cinu ń Yi rí ce mo Siri pyɔ̌ mɔ́ jɔ̃̀ wa, n ŋwɛ̀nɛ́ mɔ búlə́ né wẽ́, n zə ń lyì nánzhəzhɔ̌ n mə n lyɛ̃ n vò Damaasɛ. Cinu súlí n ce mo Esərayɛl pyɔ̌ mɔ́ jɔ̃̀ wa, n búl n ŋwɛ̀nɛ́ mɔ búlə́ né wẽ́. ⁶ Erəmalya byǐ Pəka gu Zhəda nunə mɔ̀ɔ̀rhɛ̀ zɔ̌m ǹdə́ shí-èlyè (120 000) dɛ̃ rə̀dù, bə̀ gakó y'à wɔ́ búlə́ kàndar, bə̀ gə́ y'à yẽ̌ Cinu, bə̀ nàmbala bɛ́ Yi rí ni mú yilə. ⁷ Efərəyim kàndɔ Zəkəri gu Maasəya, pyɔ̌ mɔ́ byǐ mə̀dù, ǹdə́ pyɔ̌-kɛ̀lɛ́ y yó-cə́bal Azərəkam e súlí Eləkana, ń pú pyɔ̌ nɛ mɔ́. ⁸ Esərayɛl lyì byǎ bɛ́ zə bə̀ da-byǎ bɛ́ nunə mɔ̀ɔ̀rhɛ̀ zwã̌-àlyè (200 000) yómə́, kana ǹdə́ bala-byǎ e súlí kana-byǎ, bə súlí bə pwà wẽ̀ rə̀ y'à búl rə̀ já bə m'e vò Samarɛ. ⁹ Cinu Yi nyì-zwennə mə̀dù yà ń ŋwɛ́nɛ́ Samarɛ nɛ́ ń yà ń yíl Odɛɛdɛ; n du n jəl Esərayɛl shə̀dɛ́ɛ́sɛ́ ǹdə́ sə̀ n'ê zwì cɔ w wa, n zɛ̃̀ n wɔ̀ sɛ: «Cinu, á nàmbala bɛ́ Yi rí lyim y'à zɛ̃̀ rə̀ n'ê yì Zhəda lyì bí. Wɔ́ rə̀myɛ́ mɔ́ rə̀ ce n zɛ̃̀ n ce be á jɔ̃̀ wa. Ámyɛ̌ j'á zɛ̃̀ á gu bi ǹdə́ lyim nánfɔ̀lɔ̀ dɛ̃́dɛ̃́ kɔn b'e yí rə̀ dweme ré yí dɛ̃̌-yi wə. ¹⁰ Kɔn súlí myɛ, á n'á zɔ̀m b'ǎ n'á yǎl á ce Zhəda ǹdə́ Zhərəzalɛm bala bɛ́ ǹdə́ kana bɛ́ byɛ̀bɛ́ èta mɔ́ jǐrh á yómə́! Sə èlǎsɛ̃́, ámyɛ cìcì mú gaga nə yə̀ Cinu á Yi rí dwé nà? ¹¹ Èlǎsɛ̃́, cili-nə ne sə á yẽ̌ lyì bí byɛ̀bɛ́ á zɔ búlə́ né jàà w á da-byǎ bɛ́ sõ mó ne bə kwɛ̃̀, è gə də̀ rə̀myɛ́ Cinu lyi-shùùrí m'a ló á yó wə.» ¹² Lyì j'a zɛ̃̀ Efərəyim byǎ bɛ́ yó-cìnə́ bé cəcəl w bə̀ n'ê bwí lyì bí byɛ̀bɛ́ bə̀ shí búlə́ né jàà w bə kwɛ̃̀ bə bə̀ mɔ́. È y'à wɔ́ Yɔwanã byǐ Azarəya ǹdə́ Məshələmɔɔtɛ byǐ Bərəca ǹdə́ Shəlum byǐ Yəyəzəkəya ǹdə́ Adələyi byǐ Amasa. ¹³ Bə wɔ̀ bɛ: «Bə̀-na lyì bí byɛ̀bɛ́ á zɔ búlə́ né jàà w mɔ́ zə á bə̀ nyɔ̀nɔ̀ yé, bə̀ nə́ m'ǎ dó Cinu ni. Á n'á yǎl á súlí nə́ yə̀-bəlwàálɛ́ ǹdə́ nə́ dwə́ə́ré, e jà nə́ dóó w dùm, Cinu lyim myɛ súlí rə̀ n'ê yì Esərayɛl lyì byǎ bɛ́ dɛ̃́dɛ̃́!» ¹⁴ Shə̀dɛ́ɛ́sɛ́ j'a yẽ̌ lyì bí byɛ̀bɛ́ sə̀ y'à zɔ búlə́ né jàà y w mɔ́ nɛ, sə súlí sə zhɛ̃̀ wẽ̀ ré tɛ̀bɛ́ sə̀ y'à pwà búlə́ né kwã nɛ́ mɔ́, yó-cìnə́ bé ǹdə́ lyì bí byɛ̀bɛ́ bə̀ y'à tú dwã yó mó gakó yé né. ¹⁵ Rə̀myɛ́ mɔ́ kwã nɛ́, bə byẽ̀ lyì jàlà yilə bə zɛ̃̀ bə zhì dɛ̃̌ bə zə lyì bí byɛ̀bɛ́ bə̀ zɔ búlə́ né jàà y w mɔ́ wun ni: bə vùr kàmə̀zwǐsi ǹdə́ nə̀cìlə̀ wẽ̀ ré tɛ̀bɛ́ bə̀ y'à pwà búlə́ né kwã mɔ́ wẽ́, bə m'e zù byɛ̀bɛ́ bə̀ y'à wɔ́ nánlwə̀rh mó; bə súlí bə pə bɛ kùjú ǹdə́ kɔ̀-nyɔ̀ɔ̀mà e súlí cə́mə́, bə zɛ̃̀ bə kwè byɛ̀bɛ́ bə̀ y'à cɛ̀mɛ̀ bə̀ y'à k'ê wàr bə̀ zhə̀l mó ǹdə́ bə̀nərh bə zə bɛ bə vò bə yí Zheriko, kwẽ̌sé cɔ wá, bə̀ da-byǎ bɛ́ sõ. Rə̀myɛ́ kwã nɛ́, bə k'a kwɛ̃̀ bə bə̀ Samarɛ. ¹⁶ Yi rí rə̀myɛ́ mɔ́ wẽ́, pyɔ̌ Akaazɛ twĩ̀ bə vò bə lwə̀l Ashəri pyǎ bɛ́ nɛ bə̀ bə̀ b'e sɛ̃ mɔ. ¹⁷ Edɔm lyì bí k'a kwɛ̃̀ bə b'e bú ǹdə́ Zhəda lyì bí bə ŋwɛ̀nɛ́ bɛ, bə zɛ̃̀ bə zə bə̀ lyì búlə́ né kwã nɛ́ bə m'e lyɛ̃. ¹⁸ Shilisəti lyì bí myɛ y'à tú bə bú ǹdə́ Zhəda cɛmɛ nɛ́ nə̀ wɔ pyàr rɛ́ kùr w pyǎlsɛ́ ǹdə́ Nəgɛɛvɛ nyí rí w mú: bə̀ y'à zwẽ Bɛtɛ-Shəmɛɛshɛ ǹdə́ Ayalɔ̃ ǹdə́ Gədərɔɔtɛ e súlí Soko ǹdə́ ò cə-bwǎlsɛ́ ò yala nɛ mɔ́ ǹdə́ Təməna ǹdə́ ò cə-bwǎlsɛ́ ò yala nɛ mɔ́ ǹdə́ Gəməzo ǹdə́ ò cə-bwǎlsɛ́ ò yala nɛ mɔ́, bə zɛ̃̀ bə̀ jě nə̀ wẽ́. ¹⁹ 19 Zhə̀n ga, Cinu yà ń nə́ ń ce Zhəda tənà y cìzhìl Esərayɛl pyɔ̌ Akaazɛ yilə, bə̀ Akaazɛ yà ń nə́ ń ce Zhəda lyì bí n'ê twĩ̀ bə̀ bùlə̀, ń cìcì mú myɛ yà ń búl ń kə́ ń tá ń nyàm Cinu námpɔ́lɛ́ kɛ̀ ga myɛ yé. ²⁰ Ashəri pyɔ̌ Təgəlaatɛ-Falazaarɛ bà, sə ń yẽ̌ Akaazɛ sãɔ̃ nɛ n zɛ̃̀ n bú ǹdə́ mɔ n súlí ń pú ń tənà yá. ²¹ E jà Akaazɛ yà ń pwà Cinu jì y nə̀cɛ̀ndɛ́ kə̀kàlà ǹdə́ pyɔ̌-kɛ̀lɛ́ y nə̀cɛ̀ndɛ́ kə̀kàlà e súlí lyì-fwààlɛ́ nyǎn rɛ́ kə̀kàlà n pə Ashəri pyɔ̌ mɔ́ nɛ, sə rə̀myɛ́ mɔ́ yə̀ mo sɛ̃ námpɔ́lɛ́ myɛ yé. ²² Sə bə̀ gə́ y'à pú ń tənà y yi ní, ńmyɛ̌ pyɔ̌ Akaazɛ mɔ́ ń yà ń tá ń nyàm Cinu mú kwɛrhɛ n pɔ̀lɛ̀ ń yò w n súlí: ²³ Ń zwə́l vwə̃̀ n pə Damaasɛ cɔ w yə né ne, e jà wɔ́ yə né nə̀myɛ́ mɔ́ nə̀ ce bə ŋwɛ̀nɛ́ mɔ búlə́ né wẽ́ mó, n zɛ̃̀ n wɔ̀: «Siri pyǎ bɛ́ yə né gə́ n'ê sɛ̃ bɛ mɔ́ ce, wɔ́ nə̀myɛ́ nɛ à m'a zwə́l vwə̃̀ né a pa, mùnì ga nə bə̀ nə sɛ̃ nɛ.» Wɔ́ èta kɔn tó né yə né nə̀myɛ́ j'a m'e yə̀ ńmyɛ̌ ǹdə́ Esərayɛl lyì byǎ bɛ́ púlə́púlə́ tɛ̃́ turí kùrə̀. ²⁴ Akaazɛ pwà Yi jì y wẽ̀ ré gakó n ló dwã yó, n zɛ̃̀ n mà rɛ n lo; rə̀myɛ́ kwã nɛ́, ń pyi Cinu jì y étwí-ènyə́ né, n zɛ̃̀ n lù vwĩ̀-jǔlne ń cìn yil Zhərəzalɛm sə-jaarhɛ́ gakó yó. ²⁵ Ń lù vwə̃̀ zwə́l jààsɛ Zhəda cɔ òdù gakó wẽ́, ń la n mə n ji ãsã́ myǐn n pə dwə́ né dwã bɛ́ yə né ne; wɔ́ rə̀myɛ́ dɛnnɛ ń tó né n mə n gwar Cinu, ń nàmbala bɛ́ Yi rí. ²⁶ Akaazɛ tumə né dwã bɛ́ e súlí ń tũ̀twə̃̀ə̃̀ né gakó, nə̀ nã́yə́ə́ né ǹdə́ nə̀ nánkwaá nɛ́ ga, kɛ̃ Zhəda ǹdə́ Esərayɛl pyǎ bɛ́ sɛ́bɛ́ rɛ́ wẽ́. ²⁷ Akaazɛ tú n bə̀ n cì, bə ce mo Zhərəzalɛm Pyə̀-cɔ w wa; sə bə̀ yə̀ mo Esərayɛl pyǎ bɛ́ lú-bɔ̀là bɛ́ w ce yé. Ń byǐ Ezəcaasɛ jǐrh pyɔ̌ ń jàà wa.