¹ Yɔtam jǐrh pyɔ̌ ǹdə́ ń yà ń zhe byinə shí-èlyè ǹdə́ nə̀nu; sə ń jòm Zhərəzalɛm nɛ́ n mə n jí pyɛ̀lɛ̀ rɛ́, byinə shí ǹdə́ nyə̀ldù. Ń ná yà ń wɔ́ Sadɔɔkɛ bə̀kɔ́, ń yà ń yíl Yərushə. ² Ń wɛ̀rhɛ́ kɔn rɛ́ tɛ̀bɛ́ rə̀ wɔ́ cángá Cinu yírh wə, ǹdə ń da Ozhaasɛ gə́ wɛ̀rhɛ́ nɛ́ mɔ́ cìcì, sə ń já ń yə̀ dwé n zù Cinu jì y wẽ́ gaga yé. Ǹdə́ rə̀myɛ́ ga, dwí rí y'à gwẽ̌ ŋwɛ́nɛ́ rə̀ pwarha nɛ́ wẽ́. ³ Wɔ́ ńmyɛ̌ ń lù Cinu jì y dɛ̃̌-sõ étwí-ènyí rí. Ń lù wẽ̀ nánzhəzhɔ̌ Ofɛl byíl-fwɛ̀lɛ̀ y yó. ⁴ N lù cɛmɛ Zhəda pyàr rɛ́ nyí rí wẽ́ e súlí shə̀dɛ́ɛ́sɛ jààsɛ ǹdə́ jìrh nánjíjínsí bə̀ m'ê yìlì cɔ w mɔ́ túr tənèsé wə. ⁵ Wɔ́ ńmyɛ̌ ń bú ǹdə́ Amɔ̃ byǎ bɛ́ pyɔ̌ mɔ́, n ŋwɛ́nɛ́ mɔ mɔ́. Byin rí rə̀myɛ́ mɔ́, Amɔ̃ byǎ bɛ́ pɔ mɔ sə̀byì-kùlì tɔ́nnəbá bə̀tɔ̀ ǹdə́ bə̀lɛ́ tɔ́nnəbá mɔ̀ɔ̀rhɛ̀ rə̀tɔ̀ (3 000) e súlí orzhɛ tɔ́nnəbá mɔ̀ɔ̀rhɛ̀ rə̀tɔ̀ (3 000); sə byinə né nə̀lyè byin rí ǹdə́ nə̀tɔ̀ byin rí nə̀ pú mú, bə̀ pɔ mɔ myə̌l-kwǎndɛ rə mɛrhɛ èta. ⁶ Yɔtam jàn rɛ́ y'à j'â n'ê súlí, bə̀ ń yà ń já ń nə́ ń zhə̀l cángá Cinu Yi yé né. ⁷ Yɔtam tumə né dwã bɛ́ ǹdə́ búlə́ né nyɛ̀bɛ́ ń bú mú gakó e súlí ń tũ̀twə̃̀ə̃̀ né kɛ̃ Esərayɛl ǹdə́ Zhəda pyǎ bɛ́ sɛ́bɛ́ rɛ́ wẽ́. ⁸ Ń jǐrh pyɔ̌ ǹdə́ ń yà ń zhe byinə shí-èlyè ǹdə́ nə̀nu; sə ń jòm Zhərəzalɛm nɛ́ n mə n jí pyɛ̀lɛ̀ rɛ́, byinə shí ǹdə́ nyə̀ldù. ⁹ Yɔtam tú n bə̀ n cì, sə bə̀ co mo ń nàmbal Dəvyidi Pyə̀-cɔ w wa. Wɔ́ ń byǐ Akaazɛ ń jǐrh pyɔ̌ ń jàà wa.