¹ Zhəda lyì bí gakó cír Ozhaasɛ, ń yà ń zhe byinə shí ǹdə́ nyə̀ldù, bə ce n jǐrh pyɔ̌ ń da Amazhaasɛ jàà wa. ² Wɔ́ ńmyɛ̌ ń zwẽ Elaatɛ cɔ wá, n zɛ̃̀ n kwɛrhɛ n lù wə, n zɛ̃̀ n kwè w n pə Zhəda ne, ń da Amazhaasɛ cu mú kwã nɛ́. ³ Ozhaasɛ jǐrh pyɔ̌ ǹdə́ ń yà ń zhe byinə shí ǹdə́ nyə̀ldù, sə ń jòm Zhərəzalɛm nɛ́ n mə n jí pyɛ̀lɛ̀ rɛ́, byinə shí-ènu ǹdə́ nə̀lyè. Ń ná mɔ́ yà ń wɔ́ Zhərəzalɛm lyì bə̀kɔ́, ń yà ń yíl Yəkɔləya. ⁴ Ń wɛ̀rhɛ́ kɔn rɛ́ tɛ̀bɛ́ rə̀ wɔ́ cángá Cinu yírh wə, ǹdə ń da Amazhaasɛ ta, ń kɔn gakó wẽ́. ⁵ Ń pyà Yi, Zakarɛ nyǔ mú púlə́púlə́ yi ní, bə̀ Zakarɛ yà ń nə́ ń cèrhè mo Yi nyɔ̀mɔ̀ wẽ́. Sə ń gə́ zhì ń nà yó ǹdə́ Yi yi ní ga, Yi ce ń kɔn gakó zwẽ nyí. ⁶ Ozhaasɛ zhə̀l n vò n bú ǹdə́ Shilisəti lyì bí, n wǔr Gaatɛ ǹdə́ Yabənɛ e súlí Ashədɔɔdɛ cɛmɛ nɛ́ byílsí, n zɛ̃̀ n lù cɛmɛ Ashədɔɔdɛ yala nɛ ǹdə́ Shilisəti lyì bí tənà y wa. ⁷ Yi sɛ̃ mɔ n bú ǹdə́ Shilisəti lyì bí ǹdə́ Arabɛbá bə̀ y'à wɔ Guur-Baalɛ nɛ́ mɔ́ e súlí Məwunitəbá. ⁸ Məwunitəbá kwɛ̃̌ myə̌l-kwǎndɛ Ozhaasɛ nɛ. Ozhaasɛ tú n bə̀ n jǐrh lyì-fɔ̀lɔ̀ dɛ̃́dɛ̃́, ń yil ré j'a du rə yí Ezhibti swɛ̃́ rɛ́. ⁹ Ń lù jìrh nánjíjínsí bə̀ m'ê yìlì cɔ w mɔ́ Zhərəzalɛm nɛ́, Nə̀gúl ré bwə̀rə̀ y ǹdə́ Vɔlɔ w bwə̀rə̀ y e súlí byílí y nèsé gə́ jəl dwã wẽ́ mə̀gã̌ mɔ́ yó, n kwɛrhɛ sɛ n ce sə zə jàn. ¹⁰ N súlí n lù jìrh nánjíjínsí gɔ-elũ èpòlò w nyí rí wə, n zɛ̃̀ n kù nɛ̃̌-gwáárɛ nánzhəzhɔ̌, bə̀ ń yà ń zhe vwàmá nánjə̀jóló; ń yà ń zhe vwàlna nánzhəzhɔ̌ pyàr rɛ́ kùr w pyǎlsɛ́ nyí rí wẽ́ ǹdə́ jə́-è-zɛ̃̀-dɛ̃̌ mɔ́ wa, e súlí lyì bǝ̀ n'ê nyǐ də̀vɛ̃́-cèmé né yò pyàr rɛ́ w ǹdə́ Karəmɛl pyɔ̀ w wa. Ń zhə̀n ga yà ń só vwál mɔ́. ¹¹ Ozhaasɛ yà ń zhe shə̀dɛ́ɛ́sɛ sə̀ y'à wɔ̌ búlə́ sə̀ la bú, sə j'à wɔ̌ sə̀ dwi sə̀ zhə̀l búlə́ jàà wa, sə̀ bɔ̀n kùkùlə̀ kùkùlə̀ kɔn tó gál mɔ́ sá-kanna Yəyəə ǹdə́ yé né cə́bal Maasəya gàl mɔ́ nɛ; pyɔ̌ shə̀dɛ́ɛ́sɛ́ yó-cə́bal Ananya yà ń cǐ shə̀dɛ́ɛ́sɛ́ gakó. ¹² Jìsí yó-cìnə́ bé byɛ̀bɛ́ bə̀ y'à cǐ búlə́ kàndar rɛ́ rə̀myɛ́ mɔ́ yó w gakó y'à wɔ́ mɔ̀ɔ̀rhɛ̀ rə̀lyè ǹdə́ zɔ̃̌-nyə̀ldù (2 600). ¹³ Bə̀ y'à cǐ shə̀dɛ́ɛ́sɛ mɔ̀ɔ̀rhɛ̀ zwã̌-àtɔ̀ ǹdə́ tàlpyɛ̀ ǹdə́ zwã̌-ànu (307 500), sə̀ y'à zhe jàn ǹdə́ wu-jɔ̀ búlə́ bú yilə, sə̀myɛ́ mɔ́ y'à mə̌ sə sə sɛ̃ pyɔ̌ mɔ́ nɛ sə bú ǹdə́ ń zùwə̀ bé. ¹⁴ Sə̀ gə du sə̀ la búlə́ jàà w gakó, Ozhaasɛ yà ń nə́ ń tɛnɛ nə̀kwə̀r ǹdə́ swə́ ǹdə́ cɔ̀bɔ́ yǝ́-púr ǹdə́ cɔ̀bɔ́ kàmə̀zǔrh ǹdə́ twərh e súlí kɔ́làmpá nə́kulə sə̀ yilə. ¹⁵ N zùrhì wẽ̀ bə̀ n'ê cĩ́ ri cɔ w yùlù jìsí nánjíjínsí ǹdə́ byílsí nə̀gúlə́ né yó, bə zɛ̃̀ bə zhì gàà bə zə rɛ bə m'e tə cama bə súlí bə m'e dul nə́kul-fwààlɛ. Ozhaasɛ nɔ sɛ̃ɛ̃́ dwí nánfwɛ̀lɛ̀ kɔn b'e yí ń jàn rɛ́ súlí, rə̀myɛ́ ce ń yil ré j'a du rə yí gaga. ¹⁶ Sə ń jàn rɛ́ ce n zhẽ̌ ń cìn dɛ̃̌ kɔn b'e yí n dwĩ̀ ń cìnə̀, ń kə́ ń yə̀ ń nà èdù yó zhì ǹdə́ Cinu ń Yi rí yé: dɛ̃ rə̀dù, ń zù Cinu jì y w ń la ãsã́ myǐn ju, jùlú w kɔ̀bɔ́ bə̀ n'ê ji wẽ̀ tɛ̀bɛ́ rə̀ lwé nã́nyə̀nyɛ̀lɛ́ ò yó mó. ¹⁷ Vwĩ̀-zwə́lnə náncɛ Azarəya ǹdə́ Cinu vwĩ̀-zwə́lnə shə́-lyɛlɛ, bə̀ y'à wɔ́ wu-jɔ̀ cìnə́, zù ń kwã nɛ́. ¹⁸ Bə zhì dɛ̃̌ pyɔ̌ Ozhaasɛ yé né bə wɔ̀ mɔ: «È də̀ ǹmyɛ́ Ozhaasɛ ǹ mə̌ sə́ ji ãsã́ myǐn ń pə Cinu ni yé, è wɔ́ vwĩ̀-zwə́lnə bé, bə̀ wɔ́ Aarɔ̃ byǎ bɛ́, bə̀ cír vwĩ̀-pɛnɛ́ y èmyɛ́ mɔ́ yil mú! Du Yi jì y wẽ́, bə̀ ǹ wɛ̀rhɛ́ tɛ̀bɛ́ rə̀ bə mə̌ mɔ́! Tũ̀twĩ̀ĩ̀ rí rə̀myɛ́ t'â zhẽ̌ ǹ yó dɛ̃̌ Cinu Yi yé né yé!» ¹⁹ Ozhaasɛ lyim j'a zɛ̃̀, e jà ń yà ń zhe ãsã́ nǝ̀zhĩ̌ y ń jɔ̃̀ wa. Ń lyim rí gə́ j'a zɛ̃̀ rə̀ n'ê yì vwĩ̀-zwə́lnə bé yi ní, yə-bəcàndɛ̀ j'a du ń cíl ré ne, vwĩ̀-zwə́lnə bé yé né, Cinu jì y wə, jùlú w kɔ̀bɔ́ bə̀ n'ê ji wẽ̀ tɛ̀bɛ́ rə̀ lwé nã́nyə̀nyɛ̀lɛ́ ò yó mó yala nɛ. ²⁰ Vwĩ̀-zwə́lnə náncɛ Azarəya ǹdə́ vwĩ̀-zwə́lnə bé dwã bɛ́ pyìrhí bə nyǐ ń səta, sə bə̀ púrí yə-bəcàndɛ̀ du ń cíl ré ne. Bə j'a jì mu bə ce pwẽ̀ ne làlà, ń cìcì mú já n ce jàn nɛ́ n du pwẽ̀ ne làlà, bə̀ Cinu yà ń mà mɔ. ²¹ Yə-bəcàndɛ́ j'a zə Pyɔ̌ Ozhaasɛ kɔn b'e yí ń cu. Ń yə-bəcàndɛ́ ce, ń jòm kɛ̀lɛ́ dõ w ń dúdú, bə̀ ń yà ń bə mə̌ sə n bwəlse Cinu jì y ni yé. Sə wɔ́ ń byǐ Yɔtam, ń yà ń wɔ́ pyɔ̌ mɔ́ kɛ̀lɛ́ yó-cə́bal mɔ́, ń cìní tənà y lyì bí. ²² Nyì-zwennə Ezəyi, Amɔɔsɛ byǐ mú, kɛ̃ Ozhaasɛ tumə né dwã bɛ́, nə̀ nã́yə́ə́ né ǹdə́ nə̀ nánkwaá nɛ́ ga. ²³ Ozhaasɛ tú n bə̀ n cì, bə ce mo ǹdə́ ń nàmbala bɛ́ pyǎ bɛ́ lú-bɔ̀là bɛ́ jàà y wa, bə̀ bə̀ y'à n'ê wə̀lə̀: «Ń wɔ́ yə-bəcàndɛ cə́bal!» Sə wɔ́ ń byǐ Yɔtam ń jǐrh pyɔ̌ ń jàà wa.