¹ Amazhaasɛ jǐrh pyɔ̌ ǹdə́ ń yà ń zhe byinə shí-èlyè ǹdə́ nə̀nu, sə ń jòm Zhərəzalɛm nɛ́ n mə n jí pyɛ̀lɛ̀ rɛ́, byinə shí-èlyè ǹdə́ nə̀bɔ́. Ń ná mɔ́ yà ń wɔ́ Zhərəzalɛm lyì bə̀kɔ́, ń yà ń yíl Yɔwadã. ² Amazhaasɛ wɛ̀rhɛ́ kɔn rɛ́ tɛ̀bɛ́ rə̀ wɔ́ cángá Cinu yírh wə, sə è yə̀ yàl ǹdə́ ń wu gakó yé. ³ Ń pyɛ̀lɛ̀ rɛ́ gə́ tú rə cĩ́ kùr rə zhɛ̀, ń gu ń tùntùnnə bé byɛ̀bɛ́ gakó bə̀ y'à gu ń da, pyɔ̌ Zhɔwaasɛ mɔ́. ⁴ Sə ń yə̀ bə̀ byǎ bɛ́ gwi yé, ǹdə rə̀ gə́ kɛ̃ nyə́ né sɛ́bɛ́ rɛ́, Muyiisi sɛ́bɛ́ rɛ́, wẽ́ né. Cinu pɔ nyí sɛ́bɛ́ rɛ́ wẽ́ n wɔ̀: «Bə̀ t'â la dabá gu bə̀ byǎ bɛ́ yə̀-bəlwàálɛ́ yil yé; bə̀ t'â la byǎ bɛ́ myɛ gu bə̀ dabá yə̀-bəlwàálɛ́ yil yé; bə̀ m'a gu lò gakó ń cìcì yə̀-bəlɔ̀lɔ́ w yilə.» ⁵ Amazhaasɛ cĩ́ Zhəda tənà y lyì bí dwã yó, n zɛ̃̀ n cír nunə mɔ̀rhɔ̀ mɔ̀rhɔ̀ ǹdə́ nunə zɔ̌m zɔ̌m yó-cìnə́ kɔn tó dwã ǹdə́ bə̀ jìsí, Zhəda kwálá y ǹdə́ Bɛ̃zhamɛ kwálá y lyì bí yilə. N gə̀ byɛ̀bɛ́ bə̀ y'à zhe byinə shí-èlyè è m'ê la mɔ́, n nə nunə mɔ̀ɔ̀rhɛ̀ zwã̌-àtɔ̀ (300 000) bə̀ y'à yě kɔn du bə̀ dwã bɛ́, bə̀ wɔ̌ búlə́ jàà w bə̀ m'a vò, bə j'à yě swé ǹdə́ nə̀kò zə bə m'e bú. ⁶ N zɛ̃̀ n zə sə̀byì-kùlì tɔ́nnəbá bə̀tɔ̀ n mə n pwà búlə́ kàndar mɔ̀ɔ̀rhɛ̀ zɔ̌m (100 000) Esərayɛl nɛ́. ⁷ Sə Yi lò mə̀dù tú n wɔ̀ mɔ: «Pyɔ̌! Esərayɛl lyì shə̀dɛ́ɛ́sɛ bə̀ mɔ́ tó yé, bə̀ Cinu Yi nyí tɛ̀nɛ́ Esərayɛl byǎ bɛ́, bə̀myɛ́ byɛ̀bɛ́ bə̀ wɔ́ Efərəyim byǎ mɔ́ kwã nɛ́ yé! ⁸ Nyǐ bə̀ gə tó mó, má ǹ búl ǹ zhe jàn ná-dwí yil búlə́ né wẽ́ myɛ, Yi m'a ce ń mà ǹ nà ń tu tɛ̃́ ǹ zwə̀ bé yé né, bə̀ wɔ́ Yi rə̀ zhe jàn rə̀ wɔ̌ rə̀ sɛ̃ lò ne ráá rə̀ wɔ̌ rə̀ ce ń mà ń nà ń twi tɛ̃́.» ⁹ Amazhaasɛ bwə̀rh Yi lò mó n wɔ̀: «Sə sə̀byì-kùlì y tɔ́nnəbá bə̀tɔ̀ y gakó à nə pɔ Esərayɛl lyì shə̀dɛ́ɛ́sɛ́ nɛ mɔ́?» Yi lò mó lyár mɔ́ n wɔ̀: «Cinu wɔ̌ ń mà n pɔ̃́ kɔn rə dwini èmyɛ́ mɔ́.» ¹⁰ Rə̀myɛ́ yó, Amazhaasɛ já n ká n ce shə̀dɛ́ɛ́sɛ́ shɛ̀bɛ́ sə̀ y'à shí Efərəyim sə bə̀ mɔ́ kwɛ̃̀ sə vò jè. Sə lyì bí bə̀myɛ lyim y'à zɛ̃̀ rə̀ n'ê yì Zhəda lyì bí dɛ̃́dɛ̃́, sə bə̀ kwɛ̃̀ bə vò jè ǹdə́ lyi-shùùri. ¹¹ Amazhaasɛ jàn rɛ́ gə́ y'à tú rə súlí yi ní, n zə ń dwí rí n mə n vò Nə̀kwə̃̌ vɔlɔ w wa, n gu Səyiiri lyì shə̀dɛ́ɛ́sɛ mɔ̀ɔ̀rhɛ̀ shíyə́ (10 000). ¹² Zhəda lyì bí zə nunə mɔ̀ɔ̀rhɛ̀ shí (10 000) nã́nyìrh, bə zə bɛ bə m'e jì pyɛ̀lɛ́ è yó nánsɔ́sɔ́mɛ́ èdù yə́-pɛ̀lɛ́ wa, bə zɛ̃̀ bə zhì gàà bə cìrh bi bə ló tɛ̃́, bə̀ gakó j'a tu bə bɔbwɛlɛ. ¹³ Esərayɛl lyì shə̀dɛ́ɛ́sɛ́ shɛ̀bɛ́ Amazhaasɛ yà ń cə̀r bə̀ sə̀ bə̀ mɔ tó sə vò búlə́ né jàà w mɔ́, j'a zɛ̃̀ sə zù Zhəda cɛmɛ nɛ́ wẽ́, sə gu nunə mɔ̀ɔ̀rhɛ̀ rə̀tɔ̀, kɔn zhì Samarɛ e m'e vò Bɛtɛ-Orɔ̃, sə súlí sə pwà wẽ̀ nánzhəzhɔ̌ búlə́ né kwã nɛ́ sə m'e lyɛ̃. ¹⁴ Amazhaasɛ gə́ ŋwɛ̀nɛ́ Edɔm lyì bí, n zɛ̃̀ n kwɛ̃̀ n bə̀ yi ní, ń súlí n pwà Səyiiri lyì bí yə né n mə n bà, n ce nə jǐrh ń yə, ń nə́ ń wùlì tɛ̃́ nə̀ yé né, n súlí ń nə́ ń ji ãsã́ myǐn ń pɛ nɛ. ¹⁵ Rə̀myɛ́ ce Cinu Yi lyim zɛ̃̀ rə̀ n'ê yì Amazhaasɛ dɛ̃́dɛ̃́, n zɛ̃̀ n twĩ̀ nyì-zwennə ń sõ bə̀ ń zhəl n bwə̀rh mo n wɔ̀: «Byè yil ǹ cèrhé dwí rí tɛ̀bɛ́ yə né nə̀ yə̀ ŋwɛ̀nɛ́ nə zwẽ nə̀ lyì bí myɛ cìcì ǹ jɔ̃̀ w mɔ́?» ¹⁶ Ń gə́ yà ń nə́ ń bwə̀rh mo rə̀myɛ́ mɔ́ yi ní, Amazhaasɛ myɛ bwə̀rh mo, n wɔ̀: «Bə̀ cír mú bə̀ ǹ yál pyɔ̌ cícírnə nà? Ce rə yə̀ rə̀ ga! Ǹ nə́ ǹ yǎl bə̀ bə̀ mǎ mɔ́ nà?» Nyì-zwennə mó ká ń yə̀ zɔ̀m n bwérhé yé, sə ń wə̀lə̀: «À yě bə̀ Yi n'ê yǎl rə ce ń jé tɛ̃́ ǹ gə́ wɛ̀rhɛ́ èta mɔ́, ń zɛ̃̀ ń súlí ǹ yə̀ à cúcú mú zwẽ mó yilə.» ¹⁷ Zhəda pyɔ̌ Amazhaasɛ cili cúcú dõ, n zɛ̃̀ n twĩ̀ bə vò bə wɔ̀ Esərayɛl pyɔ̌ Zhɔwakaazɛ byǐ Zhɔwaasɛ, Zhewu nɔ̃̌ w nɛ: «Bə̀ nə́ jəl dwã búlə́ wẽ́!» ¹⁸ Esərayɛl pyɔ̌ Zhɔwaasɛ myɛ twĩ̀ bə vò bə lyár Zhəda pyɔ̌ Amazhaasɛ bə wɔ̀: «Dɛ̃ rə̀dù, Lyəbã pyɔ̀ w sɔ òdù twĩ̀ bə vò bə wɔ̀ Lyəbã sɛ́ɛ́dərɛa èdù ni: ‹Pə ǹ bə̀kɔ́ mɔ́ à byǐ mú ni n jí!› Sə Lyəbã gɔ-ku òdù tó sɔ w yó, o cèè w tɛ̃́. ¹⁹ Zhə̀n ga, ǹ nə́ ǹ wə̀l bə̀ ǹ bú ǹdə́ Edɔm lyì bí ń ŋwɛ̀nɛ́ bɛ. Ǹ nə́ ǹ zhẽ̌ ǹ cìn dɛ̃̌, ǹ nə́ ǹ cèrhé ǹ cìnə̀. Sə mɛ̃ ǹ sõ wɛ̀! È nə wɔ́ byè yil ǹ m'ǎ zɛ̃̀ ǹ nə́ ǹ pyà búlə́ né nyɛ̀bɛ́ nə̀ m'a ce mó zwini wẽ́ mó; búlə́ né nyɛ̀bɛ́ bə̀ m'a ŋwɛ̀nɛ́ ǹmyɛ́ ǹdə́ Zhəda shə̀dɛ́ɛ́sɛ́ ga nə̀ wẽ́ mó?» ²⁰ Sə Amazhaasɛ yə̀ ń zɔ̀mà nɛ́ cili yé, bə̀ yò w y'à shí Yi sõ, bə̀ rə̀ y'à n'ê yǎl rə ce bé bə̀ jɔ̃̀ wa, bə̀ gə́ y'à cèrhé Edɔm yə né mó yilə. ²¹ Esərayɛl pyɔ̌ Zhɔwaasɛ du ń la n vò n bú ǹdə́ mɔ; ńmyɛ̌ ǹdə́ Zhəda pyɔ̌ Amazhaasɛ jəl dwã Bɛtɛ-Shəmɛɛshɛ nɛ́, Zhəda tənà y wẽ́, bə bú. ²² Esərayɛl lyì bí ŋwɛ̀nɛ́ Zhəda lyì bí, Zhəda lyì bí j'a dùr lò gakó vò ń kòrhó w wə. ²³ Esərayɛl pyɔ̌ Zhɔwaasɛ zɛ̃̀ n zə Zhəda pyɔ̌ Amazhaasɛ, Zhɔwaasɛ byǐ ǹdə́ Aazha nɔ̃̌ wa, ń yə-bal Bɛtɛ-Shəmɛɛshɛ nɛ́. N zhì gàà n zhǐr n bə̀ Zhərəzalɛm, n wǔr Zhərəzalɛm byílí y è dwɛ̀lɛ̀ yí jə̀-tórhó yírhə́ zwã̌-àna, kɔn zhì Efərəyim bwə̀rə̀ y e m'e yí Nə̀gúl ré bwə̀rə̀ y ne. ²⁴ N zɛ̃̀ n pwà sánə́má mɔ́ gakó ǹdə́ sə̀byì-kùlì y gakó e súlí wẽ̀ ré tɛ̀bɛ́ gakó rə̀ y'à wɔ Yi jì y wẽ́, Obɛɛdɛ-Edɔm yà ń nə́ ń yìlì mú, ǹdə́ pyɔ̌ mɔ́ jì y nə̀cɛ̀ndɛ́, n súlí n zə lyì bə̀ y'à cə̀r bə cĩ́ tɛ̃́ bə̀ m'ê dɛ̃̀ nyì-bwelé pyìrh bə shò kwã nɛ́, n mə n kwɛ̃̀ n vò Samarɛ. ²⁵ Zhəda pyɔ̌, Zhɔwaasɛ byǐ Amazhaasɛ wɛ̀rhɛ́ byinə shí ǹdə́ nə̀nu, Esərayɛl pyɔ̌, Zhɔwakaazɛ byǐ Zhɔwaasɛ cu mú kwã nɛ́. ²⁶ Amazhaasɛ tumə né dwã bɛ́, nə̀ nã́yə́ə́ né ǹdə́ nə̀ nánkwaá nɛ́ ga, yə̀ kɛ̃ Zhəda ǹdə́ Esərayɛl pyǎ bɛ́ sɛ́bɛ́ rɛ́ wẽ́ nà? ²⁷ Amazhaasɛ gə́ yẽ̌ Cinu Yi kùr tó ne yi ní ga mɔ́, lyì zɔ̀m bə ce dwã yó Zhərəzalɛm nɛ́ bə pyà ń gu, sə ń dùr n vò Ləciishi. Bə̀ twĩ̀ lyì bə vò bə twèlé mo Ləciishi ni, bə gu mu gàà. ²⁸ Bə kwè ń yala nɛ́ ǹdə́ shəshərh bə b'e ce ǹdə́ ń nàmbala bɛ́ Zhəda cɔ òdù wẽ́.