¹ Byinə nyàlpyɛ̀ byin rí, vwĩ̀-zwə́lnə Yɔyada kàm ń wu n zə dɔbrɛ ǹdə́ nunə zɔ̌m zɔ̌m yó-cìnə́ bé. È y'à wɔ́: Yərɔwam byǐ Azarəya ǹdə́ Yɔwanã byǐ Yəsəmayəə ǹdə́ Obɛɛdɛ byǐ Azarəya ǹdə́ Adaya byǐ Maasəya e súlí Zəkəri byǐ Eləshafaatɛ. ² Bə̀ tó Zhəda tənà y púlə́púlə́ wẽ́ bə kál è cɛmɛ nɛ́ gakó Levyi dwí rí lyì bí ǹdə́ Esərayɛl dwə́ né yó-cìnə́ bé bə cĩ́ dwã yó, bə zɛ̃̀ bə k'a kwɛ̃̀ bə bə̀ Zhərəzalɛm. ³ Lyì bí byɛ̀bɛ́ gakó bə̀ y'à tú dwã yó mó zə dɔbrɛ ǹdə́ pyɔ̌ mɔ́ Yi jì y wə. Yɔyada zɛ̃̀ n wɔ̀ bɛ: «Nyǐ-nə Zhɔwaasɛ, pyɔ̌ mɔ́ byǐ mú. Wɔ́ ńmyɛ̌ ń mə̌ sə n jí pyɛ̀lɛ̀ rɛ́ kɔn tó nyí rí tɛ̀bɛ́ Cinu bwəl Dəvyidi byǎ bɛ́ shò kwã nɛ́ mɔ́.» ⁴ «Nyǐ-nə kɔn rɛ́ tɛ̀bɛ́ á la wɔ̀rhɔ́ mɔ́: Á kùkùl ré námpɔ́lɛ́ rə̀dù kùkùlə̀ né námpɔ́lsɛ́ nə̀tɔ̀ y yó w lyì bí ǹdə́ vwĩ̀-zwə́lnə bé e súlí Levyi dwí rí lyì byɛ̀bɛ́ bə̀ n'ê zwì tum shìrhə́ dɛ̃ rɛ́ mɔ́ m'a dɛ̃̀ Yi jì y étwí-ènyə́ né ne, ⁵ rə̀dù y dõ mó lyì bí m'a yìlì pyɔ̌-kɛ̀lɛ́ yá, rə̀ dõ mó zɛ̃̀ rə̀ n'ê yìlì Kùr ré gə́ cĩ́ mə̀gã̌ mɔ́ bwə̀rə̀ y ne. Dwí rí gakó m'a yə̀ Cinu jì y kǎlsɛ́ wun ní wẽ́. ⁶ Lò mə̀dù ga bə̀ Cinu jì y w zwì, è gə də̀ vwĩ̀-zwə́lnə bé ǹdə́ Levyi dwí rí lyì bí bə̀ n'ê twĩ̀ dɛ̃ rɛ́ rə̀myɛ́ yù w mú dúdú: bə̀myɛ́ wɔ̌ bə̀ m'a zù ní, bə̀ bə̀ cír bi rə̀myɛ́ yilə. Sə dwí rí lyì bí mə̌ sə bə nyàm Cinu nyí rí rə̀myɛ́ mɔ́. ⁷ Levyi dwí rí lyì bí m'a b'e zhì bə kə́kɛ́lɛ́ pyɔ̌ mɔ́, lò gakó ǹdə́ ń búlə́ wẽ̀ ré ń jɔ̃̀ wa. Bə̀ gu lò mó mɔ̀bɔ́ ń tú ń nə́ ń yǎl n nyɛ́ɛ́ n lyɛ̃ n zù Yi jì y mú. Yál-na ǹdə́ pyɔ̌ mɔ́ ń gə la mə̀gã̌ gakó.» ⁸ Levyi dwí rí lyì bí ǹdə́ Zhəda lyì bí púlə́púlə́ wɛ̀rhɛ́ kɔn gakó ǹdə vwĩ̀-zwə́lnə Yɔyada gə́ yà ń pɔ bɛ nyí ní. Bə̀ mə̀dù gakó cĩ́ ń lyì bí dwã yó, byɛ̀bɛ́ bə y'à n'ê zwì tum shìrhə́ dɛ̃ rɛ́ ǹdə́ byɛ̀bɛ́ bə̀ y'à n'ê swé tum mú ga, bə̀ vwĩ̀-zwə́lnə Yɔyada yà ń yə̀ ce kùkùl rə̀dù ga yẽ̌ rə̀ tum rí ni yé. ⁹ Yɔyada zɛ̃̀ n kwè pyɔ̌ Dəvyidi swə́ né ǹdə́ ń nə̀kwə̀r ré rə̀ y'à wɔ Yi jì y wẽ́ mó n pə nunə zɔ̌m zɔ̌m yó-cìnə́ bé ne. ¹⁰ N zɛ̃̀ n ce dwí rí lyì bí gakó zhì, lò gakó swé ré nándə̀dɔ̀lɔ̀ w ń jɔ̃̀ wa, kɔn zhì Yi jì y jə̀-jĩ́ sõ e m'e vò è jə̀-gwã̀ sõ, vwĩ̀-jùlú w ǹdə́ Yi jì y yé né, èta sə bə ŋwɛ̀nɛ́ bə kə́kɛ́lɛ́ pyɔ̌ mɔ́ bə ce cəcəl wə. ¹¹ Rə̀myɛ́ yó, bə̀ zɛ̃̀ bə ce bə zə pyɔ̌ mɔ́ byǐ mú bə bə̀ pwẽ̀ ne, bə kwè pyɛ̀lɛ̀ yə́-pú w bə pú mu, bə súlí bə pɔ̃ dɔbrɛ́ nyə́ né sɛ́bɛ́ rɛ́, rə̀myɛ́ kwã Yɔyada ǹdə́ ń byǎ bɛ́ zɛ̃̀ bə twərh nwə̃̌ ń yó w yó, bə ce n jǐrh pyɔ̌. Bə zɛ̃̀ bə kǎrh bə wɔ̀: «Yi pə myè-èdɔ̀lɔ̀ pyɔ̌ mɔ́ ¹² Atəlyi gə́ nyɛ̀ɛ̀ dwí rí rə̀ y'à n'ê dùr rə̀ bànà, rə j'à n'ê kǎrh ǹdə́ wu-nyɔ̃̀ pyɔ̌ mɔ́ kùr w mú sɔ̀ wá, ńmyɛ du n vò rə̀ sõ, Cinu jì y wẽ́. ¹³ Ń nyǐ n púrí pyɔ̌ mɔ́ ń zhǐ dɛ̃̌ ń jùlú w yó, étwí-ènyí rí ni; yó-cìnə́ bé ǹdə́ pɔ́lsɛ́ wúlnə bé y'à zhǐ pyɔ̌ mɔ́ nyí ni; tənà y lyì bí gakó wun y'à nyɛ̀, sə bə̀ y'à n'ê wúl pɔ́lsɛ; wə̀-dúrnə bé y'à n'ê dwí bə̀ wẽ̀ ré, bə súlí bə̀ n'ê ce lyì bí mà wu-nyɔ̃̀ búbwéésé. Atəlyi já n kǎr ń gàndɛ́a n zɛ̃̀ n kúrh n wɔ̀: «Tɛ̀bɛ́ èta mɔ́ wɔ́ myìnù tũ̀twĩ̀ĩ̀! Myìnù tũ̀twĩ̀ĩ̀!» ¹⁴ Vwĩ̀-zwə́lnə Yɔyada ce nunə zɔ̌m zɔ̌m yó-cìnə́ bé bə̀ y'à n'ê nyǐ shə̀dɛ́ɛ́sɛ́ yò mó du, n zɛ̃̀ n wɔ̀ bɛ: «Vǔr-nə mo n du á cəcəl wə! Bə̀ m'a gu lò mó mɔ̀bɔ́ gakó ń mà n tó ń kùr ǹdə́ búlə́ shù!» Vwĩ̀-zwə́lnə mó yà ń yòwə̀: «Á bə mə̌ sə á gu mu Cinu jì y wẽ́ yé.» ¹⁵ Bə zə Atəlyi bə̀ m'ê la pyɔ̌-kɛ̀lɛ́ y səta, bə yí Shəshesé bwə̀rə̀ y nyí ni bə gu mu tɛ̃́ gàà. ¹⁶ Yɔyada ǹdə́ dwí rí gakó ǹdə́ pyɔ̌ mɔ́ bwəl nyí ǹdə́ dwã bə̀ bə̀ m'a yə̀ Cinu dwí. ¹⁷ Dwí rí lyì bí gakó j'a k'a vò Baalɛ còrhó-jì y wẽ́, bə yí bə wǔr yə, bə mà è vwĩ̀-jùúlí ǹd'ê èsã̌yùúlí gakó bə yəywɛlɛ, bə zɛ̃̀ bə zə Baalɛ vwĩ̀-zwə́lnə Matã bə gu vwĩ̀-jùúlí yé né. ¹⁸ Vwĩ̀-zwə́lnə Yɔyada ce Cinu jì y yùlù mú yò w vwĩ̀-zwə́lnə bé ǹdə́ Levyi dwí rí lyì bí jɔ̃̀ wa. Dəvyidi yà ń bɔ̀n bɛ kùkùlə̀ kùkùlə̀ mùnì ga bə zwə́l vwə̃̀ námpúmə́ cɛ̃́ɛ̃́ bə pə Cinu ni ǹdə rə̀ gə́ kɛ̃ Muyiisi nyə́ né wẽ́ né, Cinu jì y wẽ́, s'e yə̀ wu-nyɔ̃̀ ǹdə́ nwíísi wẽ́ ǹdə Dəvyidi gə́ byili ní. ¹⁹ Yɔyada yà ń cĩ́ étwí-ènyə́ né dɛ̀nna bɛ́ Cinu jì y étwí-ènyə́ né ne, mùnì ga kɔn dɛ̀bɛ́ rə̀ zhe jìmdi gakó b'è wẽ́ zwì yò kɔ̌ kɔ̌ yil yé. ²⁰ Yɔyada cĩ́ nunə zɔ̌m zɔ̌m yó-cìnə́ bé ǹdə́ lyì-fwààlɛ́ ǹdə́ yé né cìnə́ bé e súlí tənà y lyì bí gakó dwã yó; n ce bə zə pyɔ̌ mɔ́ bə zhì Cinu jì y wẽ́ bə só tɛ̃́, bə zɛ̃̀ bə tó dɛ̃̌-sõ bwə̀rə̀ y bə m'e vò pyɔ̌ mɔ́ kɛ̀lɛ́ y wẽ́, bə yí bə ce pyɔ̌ mɔ́ jòm pyɔ̌ də̀gwã́ y yó. ²¹ Tənà y lyì bí gakó fùù ǹdə́ wu-nyɔ̃̀, sə cɔ w jòm yə̀-zùlə́ wẽ́. Sə è gə wɔ́ Atəlyi myɛ̌ yilə, bə̀ y'à gu mu ǹdə́ búlə́ shù.