¹ Zhərəzalɛm lyì bí cír Aazha, pyɔ̌ Yɔram byì-kwaá y ń la jǐrh pyɔ̌ ń jàà wa, bə̀ Arabɛbá kùkùl ré rə̀ y'à tú rə zù Zhəda lyì bí zulə́ jàà y w mɔ́ y'à gu ń byì-cɛsɛ́. Wɔ́ èta, Zhəda pyɔ̌ Yɔram byǐ Aazha tó né n mə n jǐrh pyɔ̌. ² Aazha jǐrh pyɔ̌ ǹdə́ ń yà ń zhe byinə shə́-èna ǹdə́ nə̀lyè; sə ń jòm Zhərəzalɛm nɛ́ n mə n jí pyɛ̀lɛ̀ rɛ́, byin rə̀dù. Ń ná yà ń wɔ́ Oməri bə̀kɔ́, ń yà ń yil Atəlyi. ³ Aazha myɛ kwè Akaabɛ kɛ̀lɛ́ y lyì bí nà, bə̀ ń ná yà ń nə́ ń pɛ mɔ cúcú námməlwɛ̀lɛ́. ⁴ Ń wɛ̀rhɛ́ kɔn rɛ́ tɛ̀bɛ́ rə̀ y'à wɔ́ lwɛlɛ Cinu yírh w ǹdə Akaabɛ kɛ̀lɛ́ y lyì bí ta, bə̀ wɔ́ lyì bə̀myɛ́ bə̀ yàl ń cícírnə ń da cu mú kwã nɛ́, sə è y'à wɔ́ bə̀ la m'e dwĩ̀ mu yilə. ⁵ È wɔ́ bə̀ cúcú mə̀myɛ́ mə̀ ce Aazha tó Akaabɛ byǐ Yɔram, Esərayɛl pyɔ̌ mɔ́ nɛ n mə n vò n bú ǹdə́ Siri pyɔ̌ Azayəə, Aramɔɔtɛ nɛ́ Galaadɛ nyí rí w mú. Sə rə̀myɛ́ yi ní, Siri lyì bí cɛ̀mɛ̀ Yɔram. ⁶ Pyɔ̌ Yɔram kwɛ̃̀ n bə̀ Zhəzərɛyɛl ń nə́ ń shili ń cìnə̀, bə̀ gə́ y'à cɛ̀mɛ̀ mɔ Arama nɛ́ ǹdə́ ń yà ń nə́ ń bwí ǹdə́ Siri pyɔ̌ Azayəə yi ní mú. Rə̀myɛ́ yi ní, Yɔram byǐ Aazha ń yà ń wɔ́ Zhəda pyɔ̌ mɔ́, zɛ̃̀ n vò Zhəzərɛyɛl n vò n gwɛ̃ Akaabɛ byǐ Yɔram ń yà ń cɛ̀mɛ̀ mɔ́ nɛ́. ⁷ Sə Yi tó Aazha gə́ zhə̀l n gwɛ̃ Yɔram nɛ mɔ́ dɛnnɛ rə̀ dwĩ̀ mu. Zhə̀n ga, Aazha gə́ yú yi ní, ń tó Yɔram nɛ n vò n jəl Niməshi byǐ Zhewu. E jà Cinu yà ń cír Zhewu ń la n yə̀ pyɔ̌, mùnì ga n mə n gwirhi Akaabɛ kɛ̀lɛ́ y lyə́m lyə́m. ⁸ Zhewu pyìrh bùrsí shɛ̀bɛ́ Yi y'à kɔ́ Akaabɛ kɛ̀lɛ́ y lyì bí shò kwã nɛ́ mɔ́. N nə Zhəda yó-cìnə́ bé ǹdə́ Aazha da-byǎ bɛ́ byǎ bɛ́, bə̀ y'à n'ê twĩ̀ bə̀ pɛ pyɔ̌ mɔ́ nɛ mɔ́, n já n gu bí lyə́m lyə́m. ⁹ N ce bə pyà Aazha: bə zə mɔ ǹdə́ ń yà ń nə́ ń shèè Samarɛ nɛ́, bə m'e bə̀ Zhewu yé né, bə zɛ̃̀ bə̀ gu mu. Bə kwè mo bə ce ǹdə́ rə̀myɛ́ ga, bə̀ bə̀ y'à zhe: «Nyǐ wɔ́ Zhɔzafaatɛ mɔ̀bɔ́ ń pyà Cinu Yi ǹdə́ ń wu gakó mó byǐ.» Akaabɛ kɛ̀lɛ́ y lò mə̀dù ga yà ń kə́ ń tɛ̀nɛ́ ń yà ń wɔ̌ pyɛ̀lɛ̀ rɛ́ ń la jú yé. ¹⁰ Pyɔ̌ Aazha ná Atəlyi gə́ púrí ń byǐ Aazha cùwə̀, n jà n zɛ̃̀ ń nə́ ń pyà sə n gwirhi Zhəda kɛ̀lɛ́ y pyə̀-dwí rí gakó lyə́m lyə́m. ¹¹ Sə rə̀myɛ́ yi ní, pyɔ̌ bə̀kɔ́ Yɔshəba, shèè n kwè Aazha byǐ Zhɔwaasɛ pyɔ̌ mɔ́ byǎ bɛ́ byɛ̀bɛ́ bə̀ y'à la gu mú wẽ́, n zɛ̃̀ n zə mɔ, ńmyɛ̌ ǹdə́ ń kɔ̀nnà mɔ́ ga, n vò n cĩ́ bi pala nɛ́ jìa y wẽ́. Èta Yɔshəba, ń yà ń wɔ́ pyɔ̌ Yɔram bə̀kɔ́, n jà ń wɔ́ vwĩ̀-zwə́lnə Yɔyada kɛ̃, ń yà ń súlí ń wɔ́ Zhɔwaasɛ nəkɔ́ mɔ́, já n shèè Zhɔwaasɛ Atəlyi yé né, rə̀myɛ́ ce Atəlyi yə̀ mo gwi yé. ¹² Zhɔwaasɛ ǹdə́ byɛ̀bɛ́ bə̀ y'à n'ê yìlì mu mú mɛ̃ Yi jì y wẽ́ byinə nyə̀ldù, rə̀myɛ́ yi ní ǹdə́ wɔ́ Atəlyi ń yà ń nə́ ń jí pyɛ̀lɛ̀ rɛ́ tənà y yó.