¹ Zhɔzafaatɛ gə́ tú n bə̀ n cì yi ní, bə̀ co mo ǹdə́ ń nàmbala bɛ́ Dəvyidi Pyə̀-cɔ w wa. Sə wɔ́ ń byǐ Yɔram ń jǐrh pyɔ̌ ń jàà wa. ² Yɔram yà ń zhe da-byǎ, bə̀ y'à wɔ́ Zhɔzafaatɛ byǎ: Azarəya ǹdə́ Yəyəə ǹdə́ Zakarɛ ǹdə́ Azərəyəwu ǹdə́ Myəkayəə e súlí Shəfaca. Bə̀myɛ́ byɛ̀bɛ́ èta mɔ́ gakó y'à wɔ́ Esərayɛl pyɔ̌ Zhɔzafaatɛ byǎ. ³ Bə̀ da yà ń pɔ bɛ pansɛ nánzhəzhɔ̌: sə̀byì-kùlì ǹdə́ sánə́má ǹdə́ wẽ̀ rə̀ y'à càn e súlí cɛmɛ nə̀ y'à kə́kɛ́lɛ́ ǹdə́ byílsi Zhəda né. Sə ń yà ń pɔ pyɛ̀lɛ̀ rɛ́ Yɔram nɛ, ń gə́ yà ń wɔ́ ń byì-cɛ mɔ́ yilə. ⁴ Yɔram ŋwɛ̀nɛ́ n cìní ń da tənà yá, sə ń pyɛ̀lɛ̀ rɛ́ cĩ́ kùrə̀; rə̀myɛ́ yó, ń gu ń da-byǎ bɛ́ gakó ǹdə́ Esərayɛl yó-cìnə́ jàlà cìcì ǹdə́ búlə́ shù. ⁵ Ń jǐrh pyɔ̌ ǹdə́ ń yà ń zhe byinə shə́-ètɔ̀ ǹdə́ nə̀lyè; sə ń jòm Zhərəzalɛm nɛ́ n mə n jí pyɛ̀lɛ̀ rɛ́, byinə lyɛlɛ. ⁶ Ń kwè Esərayɛl pyǎ bɛ́ nà ǹdə Akaabɛ kɛ̀lɛ́ y lyì bí ta, bə̀ ń yà ń jú Akaabɛ bə̀kɔ́a, ń wɔ́ ń kɛ̃. Ń wɛ̀rhɛ́ kɔn rɛ́ tɛ̀bɛ́ rə̀ wɔ́ lwɛlɛ Cinu yírh wə. ⁷ Ǹdə́ rə̀myɛ́ ga, Cinu yə̀ Dəvyidi dwí rí cɔ̌ yǎl yé, ń dɔbrɛ́ ń zɔ ǹdə́ Dəvyidi mú yilə, e súlí ń gə́ yà ń bwəl nyí bə̀ ń mà n pə pàntɛ́mɛ́b Dəvyidi ǹdə́ ń byǎ bɛ́ nɛ, e yə̀ nɛ́ twéé twéé mó yilə. ⁸ Yɔram pyɛ̀lɛ̀ rɛ́ yi ní, Edɔm lyì bí cẽ bə̀ Zhəda lyì bí cìní bi, bə zɛ̃̀ bə cír bə̀ pyɔ̌. ⁹ Yɔram zɛ̃̀ n kwè sɔ́má ǹdə́ ń shə̀dɛ́ɛ́sɛ́ yó-cìnə́ bé, e súlí ń búlə́ eshə-vwə̃tur rí gakó. Ń tó cəcɛ̃ nɛ n bú ǹdə́ Edɔm lyì bí bə̀ y'à kə́kɛ́lɛ́ ńmyɛ̌ ǹdə́ búlə́ eshə-vwə̃tur rí yó-cìnə́ bé bə ce cəcəl w mó; ¹⁰ Edɔm lyì bí j'â gwẽ̌ cẽ bə̀ Zhəda lyì bí cìní bi, kɔn b'e yí zà gwẽ̌. Yi rí rə̀myɛ́ mɔ́ wẽ́, Lyəbəna lyì bí myɛ cẽ bə̀ Yɔram cìní bi, bə̀ ń yẽ̌ Cinu, ń nàmbala bɛ́ Yi rí ni. ¹¹ Ń cìcì mú lù vwə̃̀ zwə́l jààsɛ Zhəda pyàr rɛ́ yó, n já n ce Zhərəzalɛm lyì bí zɛ̃̀ bə̀ n'ê twĩ̀ fwə̌l tumə, n zɛ̃̀ n ce Zhəda lyì bí zɛ̃̀ bə̀ n'ê twĩ̀ ywǎl tumə. ¹² Dɛ̃ rə̀dù nyì-zwennə Elyi kɛ̃ sɛ́bɛ́ bə b'e pə Yɔram nɛ, ń mə́ ń wə̀l mo: «Nyǐ Cinu, ǹ nàmbal Dəvyidi Yi rí nyí rí: ǹ gə́ yə̀ ǹ da Zhɔzafaatɛ ǹdə́ ǹ da náncɛ Aza, Zhəda pyɔ̌ mɔ́ nà kwè, ¹³ ń zɛ̃̀ ń k'á kwè Esərayɛl pyǎ bɛ́ nà, ń ce Zhəda ǹdə́ Zhərəzalɛm lyì bí fwə̌l tumə wẽ́, ǹdə Akaabɛ kɛ̀lɛ́ y lyì bí gə́ fwə̌l né; ń súlí ń gu ǹ da-byǎ bɛ́ myɛ cìcì, ǹ da kɛ̀lɛ́ yá, bə̀myɛ́ byɛ̀bɛ́ bə̀ y'à cɔ̃̀ mɔ́ mɔ́, ¹⁴ gakó ce, Cinu Yi mà n ce zwini nánfɔ̀lɔ̀ zə ǹ dwí rí ǹdə́ ǹ byǎ bɛ́ ǹdə́ ǹ kana bɛ́ e súlí ǹ jɛ̃̀-kɔn rɛ́. ¹⁵ Sə è gə wɔ́ ǹmyɛ́ cìcì mú, címsí shɛ̀bɛ́ sə̀ cɛ̀ nánzhəzhɔ̌ m'a zə mɔ́, wu lyur címí m'a zə mɔ́, sə ǹ címí y m'a j'â n'ê súlí dɛ̃ gakó, kɔn m'e yí è ce ǹ wu lyur rí sàrh rə du pwẽ̀ ne.» ¹⁶ Cinu Yi ce Shilisəti lyì bí ǹdə́ Arabɛbá bə̀ wɔ́ Ecopyi lyì bí wúlə́ mó, j'a zɛ̃̀ búlə́ ne ǹdə́ Yɔram. ¹⁷ Bə bə̀ bə bú ǹdə́ Zhəda, bə zù è wẽ́, bə pwà kɔn dɛ̀bɛ́ gakó rə̀ y'à ŋwɛ́nɛ́ pyɔ̌-kɛ̀lɛ́ y wẽ́ mó e súlí ń byǎ bɛ́ ǹdə́ ń kana bɛ́, ń byǐ mə̀dù ga yə̀ dàl è gə də̀ Aazha, bə̀ ga nyɛ̃́ mɔ́. ¹⁸ Rə̀myɛ́ mɔ́ gakó kwã nɛ́, Cinu Yi ju mu wu lyur címí kɛ̀bɛ́ è t'â ŋwɛ̀nɛ́ è shili è zhɛ̀. ¹⁹ Dwã nɛ́ lyɛ̃ nə̀ yó b'e ji ní; sə kɔn gə́ y'à tú e dǎl námpɔ́lɛ́ sə e pyìrh byinə nə̀lyè nyǎn rɛ́, címí y ce ń wu lyur rí sàrh rə du pwẽ̀ ne, rə̀myɛ́ mɔ́ ce ń nwɛ̀nɛ̀ dɛ̃́dɛ̃́ n mə n cì. Ń dwí rí yə̀ myǐn jéé bə m'e cèrhé mo ǹdə bə̀ gə́ y'à wɛ̀rhɛ́ nɛ́ ń nàmbala bɛ́ yil mú ta yé. ²⁰ Yɔram tú n bə̀ n jǐrh pyɔ̌ ǹdə́ ń yà ń zhe byinə shə́-ètɔ̀ ǹdə́ nə̀lyè, ń jú pyɛ̀lɛ̀ rɛ́ Zhərəzalɛm nɛ́ byinə lyɛlɛ. Ń tú n bə̀ n cì sə bə̀ yə̀ mo kúrh yé; bə̀ co mo Dəvyidi Pyə̀-cɔ w wa, sə è yə̀ yàl pyǎ bɛ́ lú-bɔ̀là bɛ́ w yé.