¹ Rə̀myɛ́ mɔ́ kwã nɛ́, Mɔwaabɛ lyì bí ǹdə́ Amɔ̃ byǎ bɛ́ e súlí Məwunitəbá tú bə b'e la bú ǹdə́ Zhɔzafaatɛ. ² Bə b'e cĩ́ rə̀ nyí Zhɔzafaatɛ nɛ bə wɔ̀: «Lyì nánjə̀jóló shí Nə̀kwə̃̌ nə̀-fɔ̀lɔ̀ w èpá dõ mó, è n'ê yǎl e wɔ̀ Edɔm tənà y wa, bə b'e la bú ǹdə́ mɔ́, sə bə̀ ŋwɛ́nɛ́ Asasɔ̃-Tamaarɛ nɛ́, è n'ê yǎl e wɔ̀ bə̀ Eyɛ̃-Gedi ní.» ³ Ywẽ zə Zhɔzafaatɛ: n já n wɔ̀ bə̀ ń mà n bwə̀rh Cinu Yi, n súlí n ce bə bwə̀l nyì-lyõṍ nyí Zhəda tənà y púlə́púlə́ wə. ⁴ Zhəda tənà y lyì bí gakó bə̀ dwã yó bə̀ la lwə̀l Cinu sɛ̃ɛ̃́; bə̀ y'à búl bə shí Zhəda tənà y cɛmɛ nɛ́ gakó w bə bà, bə̀ la Cinu sɛ̃ɛ̃́ y lwə̌l. ⁵ Zhɔzhafaatɛ zɛ̃̀ n zhì dɛ̃̌ Zhəda lyì bí ǹdə́ Zhərəzalɛm lyì bí bə̀ y'à tú dwã yó mó cəcəl w Cinu jì y wẽ́, Yi jì y kɛ̀lɛ́ y wu nándũ̀ w yé y wə, ⁶ n wɔ̀: «Cinu, nə́ nàmbala bɛ́ Yi, è də̀ ǹmyɛ́ ǹ wɔ́ Yi dɛ̃̌-yi wə, ń jà ǹ zhe ŋwɔ̀nɔ́ dwə́ né tənèsé gakó yó w nà? Jàn ǹdə́ ŋwɔ̀nɔ́ ga wɔ ǹ jɔ̃̀ wa, lò wàr ń mà n bú ǹdə́ mɔ́ yé. ⁷ È də̀ ǹmyɛ́, nə́ Yi, ǹ jì tənà y kɛ̀bɛ́ lyì bí ǹ dwí Esərayɛl lyì byǎ bɛ́ yé né, ń zɛ̃̀ ń kwè y ń pə ǹ dɔwa Abəraam nɛ̀mɛ́ nɛ́ nɛ twéé twéé yil nà? ⁸ Bə̀ jòm gàà mɔ́, bə súlí bə lù jì è wẽ́ ǹ yilə, bə̀ y'à m'ê wə̀lə̀: ⁹ ‹Zwini gə tú rə̀ pú nə́ba: búlə́ shù ráá còrhò-tum ráá cím-bəlwɛ̀lɛ́ ráá nɔrh nánfɔ̀lɔ̀, nə́ zɛ̃̀ nə́ bə̀ nə́ zhì jì y kɛ̀bɛ́ wẽ́ ǹdə́ ǹmyɛ́ yé né, ǹ yil ré rə̀ wɔ jì y kɛ̀bɛ́ w yilə, nə́ gə súlí nə́ byẽ̀ nə́ ce mó nə́ zúzúnú w wẽ́, ǹ b'ǎ cili nə́ba, ń súlí ń zwẽ nə́ba.› ¹⁰ Èlǎsɛ̃́ nyǐ Amɔ̃ byǎ bɛ́ ǹdə́ Mɔwaabɛ lyì bí e súlí Səyiiri pyɔ̀ w lyì bí byɛ̀bɛ́. Nə́ dabá gə́ shə́r Ezhibti ní yi ní mú, ǹ yə̀ shɛ̀nɛ́ bə tó dwə́ né nə̀myɛ́ mɔ́ cɛmɛ nɛ́ w bə lyɛ̃ yé. Rə̀myɛ́ ce nə́ nàmbala bɛ́ byə́byɛ́lɛ́ nə̀ cã̌, bə̀ yə̀ ne cɔ̀ yé. ¹¹ Nyǐ lyì bí bə̀myɛ́ mɔ́ zɛ̃̀ bə bə̀ bə̀ la nə́ cəl-tənà y ǹ pɔ nə́ba mɔ́ zõ, sə rə̀myɛ́ mɔ́ yə̀ nə́ kwǎndɛ́ bə̀ n'ê càrh nə́ba mɔ́! ¹² Nə́ Yi, ǹ tá ǹ la bə̀ bùrsi kɔ́ zhə̀nà? Nyǐ nə́ bə jàn də́-byǐ zhe lyì nánjə̀jóló w kɔ̀bɔ́ ò bàn bú ǹdə́ nə́ba mɔ́ yé né yé, e jà nə́myɛ̌ cìcì mú yə̀l tɛ̀bɛ́ nə́ m'ǎ wɛ̀rhɛ́ yé. Nə́ yírhə́ né j'â pyǎ ǹ yó?» ¹³ Zhəda lyì bí gakó y'à j'a zɛ̃̀ bə̀ zhǐ dɛ̃̌ Cinu yé né, bə̀ dwə́ né gakó ǹdə́ bə̀ kana bɛ́ e súlí bə̀ bə̀sɔ́ná bɛ́ ga. ¹⁴ Cinu Eshirhə y só Yaazhɛl ń yà ń wɔ́ Levyi dwí rí lò yó, lyì bí bə̀ y'à tú dwã yó mó cəcəl wə. Yaazhɛl yà ń wɔ́ Zakarɛ byǐ, Bənaya nɔ̃̌, Bənaya cìcì mú yà ń wɔ́ Yəyəə byǐ, Matanya nɔ̃̌. Bə̀ y'à wɔ́ Asaafɛ dwí rí lyì. ¹⁵ N já n zɛ̃̀ n wɔ̀: «Zhəda ǹdə́ Zhərəzalɛm lyì e súlí pyɔ̌ Zhɔzafaatɛ, á gakó cili-nə náàcɛ̀nɛ́! Nyǐ Cinu nyí rí á yilə: ‹Á bə̀k'á dùr ywẽ, sə á wun bə̀k'a gə myɛ lyì-zhǎ nánjə̀jóló w kɔ̀bɔ́ yé né yé, bə̀ búlə́ né nyɛ̀bɛ́ də̀ ámyɛ̌ búlə́ yé, nə̀ wɔ́ Yi búlə́. ¹⁶ Nəkɔl sə á vò á bú ǹdə́ bɛ. Nyǐ bi bə̀ kwè Pùní rí sə-jìlə́ y bə̀ n'ê jìl bə̀ bànà, sə á m'ǎ jəl be nə̀-gɔ̀lɔ̀ w yó-gurə́ y ne, Yərɔwɛl èpòlò w yé y wə. ¹⁷ Á t'á la bú ǹdə́ bɛ gàà mɔ́ yé; du-nə á vò gàà, zhǐ-nə gàà mɔ́ sə á nyǐ Cinu gə́ la bɛlɛ jú á yil ní. Zhəda ǹdə́ Zhərəzalɛm lyì, á bə̀k'á dùr ywẽ yé, sə á wun bə̀k'a gə myɛ yé! Nəkɔl sə á du á vò á jəl be, Cinu mà n yə̀ nɛ́ ǹd'ába.› » ¹⁸ Zhɔzafaatɛ tu n zə ń yé y n pú tɛ̃́, rə̀myɛ́ yi ní ǹdə́ Zhəda e súlí Zhərəzalɛm lyì bí gakó myɛ y'à tu bə zə bə̀ yə́rh bə pú tɛ̃́ Cinu yé né bə̀ m'ê cèrhé mo; ¹⁹ Kəyaatɛ ǹdə́ Kooré byǎ bɛ́ bə̀ y'à wɔ́ Levyi dwí rí lyì mú, zɛ̃̀ bə̀ n'ê cèrhé Cinu, Esərayɛl Yi rí ǹdə́ bə̀ cələ né jàn rɛ́ gakó. ²⁰ Dwí rí dùlí rə zɛ̃̀ nəkɔkɔ́lɛ́ shãã shãã, rə shə́r rə̀ la Təkɔwa èpòlò w wə. Rə̀ gə́ tú rə̀ n'ê zhǐr yi ní, Zhɔzafaatɛ wə̀l re: «Zhəda ǹdə́ Zhərəzalɛm lyì, cili-nə ne! Zə-na Cinu, á Yi rí zhə̀nà, sə á yẽ̌ bə̀ bə̀ t'â la ába ŋwɔ̀nɔ́ yé! Zə-na ń nyì-zwennə bé zhə̀nà, sə á yẽ̌ bə̀ kɔn m'a tó cɛ̀nɛ̀ á yilə!» ²¹ Ń zhərh ǹdə́ dwí rí n zɛ̃̀ n vùr lyì bə̀ m'a yə̀ byɛ̀bɛ́ bə̀ y'à zhĩ búlə́ wẽ̀ ré mó yé né bə̀ m'ê cèrhé Cinu, bə̀ m'ê nún ń zùwə̀ y è bə dõ zhe mó bə̀ zhe: «Cèrhé-nə Cinu, bə̀ ń wu-bɔ̀nɔ̀ w j'â ŋwɛ́nɛ́ gaga yilə.» ²² Bə̀ gə́ tú bə ji còrhó nwísí sə̀myɛ́ mɔ́ kùr yi ní, Cinu ce Amɔ̃ byǎ bɛ́ ǹdə́ Mɔwaabɛ lyì bí e súlí Səyiiri pyɔ̀ w lyì bí bə̀ y'à tú bə̀ la bú ǹdə́ Zhəda lyì bí mú yə̀ dwã yó ce yé, bə zɛ̃̀ bə yə́yɛ́lɛ́ bə k'ê n'ê bwí dwã. ²³ Amɔ̃ byǎ bɛ́ ǹdə́ Mɔwaabɛ lyì bí j'a zɛ̃̀ bə̀ n'ê bwí ǹdə́ Səyiiri pyɔ̀ w lyì bí, bə̀ n'ê pyà sə bə ce bə jé tɛ̃́. Sə bə̀ gə́ gu Səyiiri lyì bí bə zhɛ̀ kwã nɛ́, bə̀ zhízhílí bə kwɛ̃̀ bə̀ n'ê gwi dwã. ²⁴ Zhəda lyì bí gə́ yú də̀dwélé y kɛ̀bɛ́ ǹ wɔ̌ ǹ zhì è yó ǹ nə èpòlò w mó, bə pyìrhí bə nyǐ lyì nánjə̀jóló w səta: bə̀ púrí wɔ́ cùùri dúdú rə̀ y'à ləlɛ tɛ̃́, lyì-nyì èdù ga myɛ y'à tɛ̀nɛ́ nɛ́ yé. ²⁵ Zhɔzafaatɛ ǹdə́ ń dwí rí bə̀ bə bubu bə̀ zwə̀ bé wẽ̀ ré, sə bə̀ nɔ və̌-ywàálɛ rə̀ y'à búl rə̀ já ǹdə́ nə̀cɛ̀ndɛ ǹdə́ gàndɛ e súlí wẽ̀ tɛ̀bɛ́ rə̀ y'à càn. Wẽ̀ ré jɛ́nɛ́ rɛ́ ce bə̀ wɛ̀rhɛ́ dwã nə̀tɔ̀ ǹdə́ bə̀ n'ê pwà rɛ, e jà bə̀ gaga mɔ́ yə̀ rə̀ gakó ŋwɛ̀nɛ́ bə pwà bə m'e lyɛ̃ yé. ²⁶ Dwã nə̀na dɛ̃ rɛ́, bə̀ tú bə nə dwã Bəraka jə́ y wə. Sə gàà mɔ́ bə̀ co Cinu Yi nə̀báná. Bə̀ j'â gwẽ̌ n'ê byẽ̀ jàà y èmyɛ́ mɔ́ bə̀ «Bəraka jə́» ǹdə́ zà gwẽ̌. ²⁷ Zhəda ǹdə́ Zhərəzalɛm lyì bí gakó pú Zhɔzafaatɛ kùr bə kwɛ̃̀ bə vò Zhərəzalɛm ǹdə́ wu-nyɔ̃̀, bə̀ Cinu yà ń zhìlì bə̀ zwə̀ bé wun ni n mə n ce bə̀myɛ́ wun zə nyàn. ²⁸ Bə zù Zhərəzalɛm ǹdə́ bə̀ n'ê dwí zɔ̀n ǹdə́ bwàárɛ, bə súlí bə̀ n'ê wúl pɔ́lsɛ, bə lyɛ̃ bə vò bə zù Cinu jì y wẽ́. ²⁹ Tənèsé dwã bɛ́ lyì bí gə́ nyɛ̀ɛ̀ bə̀ Cinu Yi yà ń bú ǹdə́ Esərayɛl zwə̀ bé, Yi ywẽ nánfɔ̀lɔ̀ zɔ bə̀ gakó. ³⁰ Zhɔzafaatɛ pyɛ̀lɛ̀ rɛ́ jú yə̀-zùlə́ wẽ́, sə ń Yi rí y'à pɔ mɔ shìrhə́ kɔn gə́ y'à kə́kɛ́lɛ́ mɔ mɔ́ nyí rí gakó wẽ́. ³¹ Aza byǐ Zhɔzafaatɛ yàl Zhəda pyɔ̌; ń jǐrh pyɔ̌ ǹdə́ ń yà ń zhe byinə shə́-ètɔ̀ ǹdə́ nə̀nu. Ń jòm Zhərəzalɛm nɛ́ n mə n jí pyɛ̀lɛ̀ rɛ́ byinə shí-èlyè ǹdə́ nə̀nu. Ń ná yà ń wɔ́ Shili bə̀kɔ́, ń yà ń yíl Azəba. ³² Ń já n kwè sɔ́má y kɛ̀bɛ́ ń da Aza yà ń kwè mó cìcì, ń yə̀ è yó ywə̀r námpɔ́lɛ́ kɛ̀ ga myɛ yé, ń nə́ ń wɛ̀rhɛ́ kɔn rɛ́ tɛ̀bɛ́ rə̀ wɔ́ cángá Cinu yírh wə. ³³ E jà yə né còrhó jààsɛ́ yə̀ tɛ̃́ jé yé. Dwí rí y'à gwẽ̌ yə̀ rə̀ nàmbala bɛ́ Yi rí ni zhí ǹdə́ rə̀ wu gakó yé. ³⁴ Tumə né nyɛ̀bɛ́ Zhɔzafaatɛ súlí n twĩ̀ mú, nə̀ nã́yə́ə́ né ǹdə́ nə̀ nánkwaá nɛ́ ga, kɛ̃ Anəni byǐ Yewu Tumə né sɛ́bɛ́ rɛ́ bə̀ mù dwã nɛ ǹdə́ Esərayɛl pyǎ bɛ́ sɛ́bɛ́ rɛ́ mɔ́ wa. ³⁵ Rə̀myɛ́ kwã nɛ́, Zhəda pyɔ̌ Zhɔzafaatɛ zɔ dɔbrɛ ǹdə́ Esərayɛl pyɔ̌ Aazha, e jà Aazha zhə̀zhèèlé y'à bə càn yé. ³⁶ Bə wɛ̀rhɛ́ nyí rə̀dù bə̀ la wɛ̀rhɛ́ bǔ-bwələ bə ce nə̀ n'ê zhə̀l Tərəshiisi. Bə wɛ̀rhɛ́ nɛ Eshɔ̃-Gəbɛɛrɛ nɛ́. ³⁷ Sə Marəsha lyì bal Dɔdava byǐ Elyəzɛɛrɛ ń wɔ́ nyì-zwennə mó wə̀l Zhɔzafaatɛ nɛ: «Ǹ gə́ zɔ dɔbrɛ ǹdə́ Aazha mɔ́ ce Cinu cɔ̀ ǹ tumə né.» Sə bǔ-bwələ né kɔ́ dwã wa, nə̀ k'ê yə̀ ŋwɛ̀nɛ́ nə vò Tərəshiisi yé.